Ўзбекистон товарларининг ички ва хорижий бозорларда рақобатбардошлилигини ошириш, товар ишлаб чиқарувчини товарларни рақамлашнинг халқаро тизимлари доирасида идентификатлаштириш, истеъмолчи ҳуқуқларини ҳимоя қилиш, товарлар ишлаб чиқаришнинг автоматлаштирилган ҳисобини юритишни таъминлаш мақсадида Вазирлар Маҳкамаси қарор қилади:

1. Қуйидагилар:

«EAN International» товарларни рақамлаш Халқаро Уюшмаси (Бельгия) томонидан Ўзбекистон Республикасига 478 рақамли идентификатлаштириш коди берилганлиги;

Ўзбекистон Товар ишлаб чиқарувчилар ва тадбиркорлар палатаси томонидан халқаро талабларга мувофиқ, товарлари EAN штрихли кодлари билан тамғаланадиган тадбиркорлик фаолияти субъектларини рўйхатдан ўтказиш ҳамда товарларни идентификатлаштириш тизимидан фойдаланувчилар фаолиятига услубий раҳбарлик қилиш учун «EAN Uzbekistan» товарлар ва хизматларни автоматик идентификатлаштириш маркази ташкил этилганлиги;

«Ўздавстандарт» маркази томонидан штрихли кодларнинг оригинал-макетларини тайёрлаш маркази ташкил этилганлиги маълумот учун қабул қилинсин.

2. Ўзбекистон Республикасида ишлаб чиқариладиган товарларни штрихли кодлаш тўғрисидаги Низом иловага мувофиқ тасдиқлансин.

3. «Ўзстандарт» агентлигига:

Ўзбекистон Республикасида ишлаб чиқариладиган товарларни штрихли кодлаш тизимини жорий этиш бўйича ягона сиёсатни амалга ошириш;

Ўзбекистон Республикасида ишлаб чиқариладиган товарлар штрихли кодларининг давлат реестрини юритиш;

Ўзбекистон Республикаси қонун ҳужжатларига мувофиқ штрихли кодлаш тизимини қўллаш тартибини тартибга солувчи меъёрий ҳужжатларни ва услубий материалларни ишлаб чиқиш;

тадбиркорлик фаолияти билан шуғулланувчи субъектларни турли манбалардаги штрихли кодлар оригинал-макетлари билан таъминлаш функциялари юклансин.

4. Ўзбекистон Республикаси Ташқи иқтисодий алоқалар вазирлиги Ўзбекистон Товар ишлаб чиқарувчилар ва тадбиркорлар палатаси ҳамда «Ўзстандарт» агентлиги билан биргаликда 1999 йил сентябрь ойида Тошкент шаҳрида саноат, қишлоқ хўжалиги ва савдо корхоналари вакилларини кўрсатиб ўтилган тизимни қўллаш хусусиятлари билан таништириш учун «Ўзбекистон Республикасида товарни рақамлаш (штрихли кодлаш)» мавзуида республика семинари ўтказсин.

5. Мулкчиликнинг барча шаклларидаги юридик шахсларга товарларни штрихли кодлашни:

экспорт қилинаётган маҳсулотларни, янги товарларни ва улар учун янги этикеткалар ёки ўраш-жойлаш буюмлари буюртма қилинаётган товарларни тамғалашни — 2000 йил 1 мартгача;

бошқа барча товарларни тамғалашни — 2000 йил охиригача жорий этиш тавсия қилинсин.

Белгилаб қўйилсинки, ўз маҳсулотига «EAN International» штрихли кодини учинчи мамлакатларда олган тадбиркорлик фаолияти субъектлари ундан ушбу қарор қабул қилинган вақтдан бошлаб бир йил мобайнида фойдаланишлари мумкин.

6. «Ўзтелерадио» компанияси, Ўзбекистон Миллий ахборот агентлиги, оммавий ахборот воситалари аҳолини ва товар ишлаб чиқарувчиларни Ўзбекистон Республикасида товарларни штрихли кодлашни жорий этиш тартиби, қоидалари ва муддатлари тўғрисида кенг хабардор қилишни таъминласинлар.

7. Мазкур қарорнинг бажарилишини назорат қилиш Ўзбекистон Республикасининг Бош вазири ва Бош вазирнинг тегишли ўринбосарлари зиммасига юклансин.

товар — бевосита ёки улгуржи ва чакана савдо тармоқлари орқали сотиш учун тадбиркорлик фаолияти субъектлари томонидан ишлаб чиқарилган ва/ёки етказиб бериладиган (истеъмол қилиш ва ишлаб чиқариш мақсадидаги) меҳнат маҳсулоти;

тадбиркорлик фаолияти субъектлари — Ўзбекистон Республикаси ҳудудида белгиланган тартибда рўйхатдан ўтказилган ва ишлаб чиқариш, савдо фаолиятини амалга оширувчи ёхуд хизматлар кўрсатувчи юридик, шунингдек, жисмоний шахслар — якка тартибдаги тадбиркорлар;

штрихли код билан тамғалаш — штрихли кодни товар бирлиги юзасига қўйиш;

EAN штрихли коди — товар бирликларини идентификатлаштириш ва уларни тамғалаш учун «EAN International» товарларни рақамлаш Халқаро Уюшмаси қоидаларида белгиланган ўлчамлар билан ва жойлаштирилган ҳолда изчил жойлаштирилган параллел штрихлар ва улар ўртасидаги оралиқдаги комбинациялар билан ифодаланган рақамли код;

1. Товарларни EAN штрихли кодлари билан тамғалаш «Ўзстандарт» агентлиги, «EAN International» — товарларни рақамлаш Халқаро Уюшмасининг стандартлари ва меъёрий ҳужжатларига мувофиқ амалга оширилади.

2. Товарлари EAN штрихли кодлари билан тамғаланиши керак бўлган Ўзбекистон Республикасининг тадбиркорлик фаолияти билан шуғулланувчи субъектлари ташкилотнинг ва Ўзбекистон Республикаси давлат стандартларига мувофиқ ишлаб чиқариладиган маҳсулотнинг штрихли кодида фойдаланиладиган товар кодини олиш учун «EAN Uzbekistan» товарлар ва хизматларни автоматик идентификатлаштириш марказида рўйхатдан ўтадилар.

3. Тадбиркорлик фаолияти субъектлари — штрихли кодлаштирилиши керак бўлган маҳсулотлар (товарлар)ни тайёрловчилар «Ўзстандарт» агентлигига Ўзбекистон Республикасида ишлаб чиқариладиган маҳсулотларни Давлат реестрига киритиш ва штрихли кодларнинг оригинал-макетларини олиш учун давлат стандартлари талабларига мувофиқ маҳсулотлар ҳақидаги ахборотни тақдим этадилар.

4. Тадбиркорлик фаолияти субъекти — штрихли код қўйилган маҳсулотлар (товарлар)ни тайёрловчи буюртмачининг талабига кўра уни етказиб бериш бошлангунга қадар маълумотлар базасини шакллантириш учун буюртмачига маҳсулотлар (товарлар)нинг асосий истеъмол тавсифномалари тўғрисида ахборот беради.

5. «EAN Uzbekistan» марказида рўйхатдан ўтказилмаган тадбиркорлик фаолияти субъектлари ишлаб чиқариладиган ва ёки сотиладиган маҳсулотлар (товарлар)ни EAN штрихли кодлари билан тамғалаш ҳуқуқига эга эмаслар.

6. Тадбиркорлик фаолияти субъектлари штрихли кодлаш бўйича стандартлар ва мазкур Низом талабларини бузганлик учун Ўзбекистон Республикасининг амалдаги қонун ҳужжатларига мувофиқ жавоб берадилар.

7. Ўзбекистонда ишлаб чиқариладиган ёки сотиладиган маҳсулотлар (товарлар)ни EAN штрихли кодлари билан тамғалаш тадбиркорлик фаолияти субъектлари томонидан ушбу Низом қоидаларига мувофиқ амалга оширилади.

8. Мулкчилик шаклларидан қатъи назар, тадбиркорлик фаолияти субъектлари томонидан республикада ишлаб чиқариладиган барча маҳсулотлар (товарлар) тамғаланади, қуйидагилар:

халқ ҳунармандчилиги ва муаллифлик ишлари;

якка тартибдаги буюртмалар бўйича тайёрланган;

меъёрий ҳужжатларда (Давлат стандартлари, тармоқ стандартлари, техник шартлар, амал қилинувчи техник материаллар, корхона стандартлари ва бошқаларда) ўраш-жойлаш ёки этикетка ёпиштириш назарда тутилмаган ёхуд техник сабабларга кўра уларда EAN штрихли кодларини кўрсатиш мумкин бўлмаган;

тортиш ёки бошқача ўлчаш йўли билан бевосита харидорга сотиладиган;

кейинчалик ишлов бериладиган ва чакана савдода сотилмайдиган эҳтиёт қисмлар, металл конструкциялар ва деталлар ҳолидаги;

тажриба намуналар (туркумлар);

республикага келтирилаётган ва тайёрлаган мамлакат кодига эга бўлган маҳсулотлар (товарлар) бундан мустасно.

Штрихли кодни ёзиб қўйишнинг техникавий имкониятини «EAN Uzbekistan» автоматик идентификатлаштириш маркази белгилайди.

9. Маҳсулотларга (товарларга) қўшимча ишлов берадиган (қадоқлаш, идишга қайта жойлаш ва бошқалар) тадбиркорлик фаолияти субъектлари уларни EAN штрихли коди билан тамғалашни таъминлайдилар.

10. Улгуржи савдо корхоналари чакана савдога «EAN International» товарларни рақамлаш Халқаро Уюшмасининг ёки «UCC» Шимолий Америка Халқаро ташкилотининг штрихли кодлари билан (қайта кодлашсиз) тамғаланган товарларни юборадилар.

Улгуржи савдо корхоналари тайёрловчилардан, воситачилик ташкилотлари ва жисмоний шахслардан маҳсулотлар (товарлар) етказиб бериш юзасидан шартномалар (контрактлар) тузишда маҳсулотга (товарга) ва улар жойланган идишларга рўйхатдан ўтказилган штрихли кодларни ёзиб қўйиш тўғрисидаги талабни киритадилар.

11. Улгуржи савдо корхоналари, штрихли кодлар билан тамғаланмаган маҳсулотлар (товарлар) қабул қилинган тақдирда, уларни мустақил равишда EAN штрихли коди билан тамғалашни таъминлайдилар.

12. Чакана савдо корхоналари, шунингдек Ўзбекистон Республикасида маҳсулотларни (товарларни) сотувчи бошқа корхоналар улгуржи ва тўғридан-тўғри етказиб берувчилардан рўйхатдан ўтказилган штрихли кодларсиз маҳсулотлар (товарлар)ни қабул қилиш ҳуқуқига эга эмас, штрихли кодлаш муддатлари ушбу қарорда белгиланган маҳсулотлар (товарлар)нинг тегишли тоифасини штрихли кодлаш жорий этиш бошлангунгача улгуржи савдо корхонасига келиб тушган маҳсулот (товар)лар бундан мустасно.

13. Чакана савдо корхоналари, штрихли кодлар билан тамғаланмаган маҳсулотлар (товарлар) қабул қилинган тақдирда, уларни мустақил равишда EAN штрихли коди билан тамғалашни таъминлайдилар.