Хорижий фуқаролар, шу жумладан МДҲ қатнашчилари бўлган давлатлар фуқаролари, фуқаролиги бўлмаган шахслар томонидан уй-жой сотиб олиниши, шунингдек фуқароларнинг доимий яшаш учун Тошкент шаҳрига келиши жараёнларини тартибга солиш мақсадида Вазирлар Маҳкамаси қарор қилади:

1. Белгилаб қўйилсинки:

уй-жойни олувчи томон хорижий фуқаролар, шу жумладан МДҲ қатнашчилари бўлган давлатлар фуқаролари ёки фуқаролиги бўлмаган шахслар ҳисобланганда Ўзбекистон Республикаси ҳудудида жойлашган уй-жойни сотиб олиш, айирбошлаш ёки гаровга қўйиш битишувларини нотариал тасдиқлаш ва кейинчалик уларни техник рўйхатдан ўтказиш бюроси органларида давлат рўйхатидан ўтказиш амалдаги қонун ҳужжатларида назарда тутилган ҳужжатлар билан бир қаторда Ўзбекистон Республикаси ички ишлар органлари томонидан белгиланган тартибда берилган яшаш учун рухсатнома тақдим этилган тақдирда амалга оширилади;

уй-жойнинг эгаси ҳисобланган, яшаш жойида бўлмаган хорижий фуқаролар, шу жумладан МДҲ қатнашчилари бўлган давлатлар фуқаролари ва фуқаролиги бўлмаган шахслар томонидан коммунал хизматлар ва уй-жойдан фойдаланиш харажатлари учун узоқ вақт (12 ойдан ортиқ) ҳақ тўланмаган тақдирда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг тақдимномасига кўра коммунал хизматлар ва уй-жойдан фойдаланиш харажатларига ҳақ тўлаш юзасидан қарзларни ундириш масаласини ҳал қилиш учун уй-жой белгиланган тартибда хатлаб қўйилади;

уй-жойни ҳадя қилувчининг яқин қариндоши бўлмаган ҳамда Ўзбекистон Республикасида яшаш учун рухсатномага эга бўлмаган хорижий фуқароларга, шу жумладан МДҲ қатнашчилари бўлган давлатлар фуқароларига ва фуқаролиги бўлмаган шахсларга уй-жойни ҳадя қилиш шартномаларини давлат рўйхатидан ўтказганлик учун уй-жойнинг техник рўйхатдан ўтказиш бюроси органлари томонидан аниқланган рўйхатдан ўтказиш қийматининг 100 фоизи миқдорида йиғим ундирилади.

2. Белгилансинки:

хорижий фуқароларни, шу жумладан МДҲ қатнашчилари бўлган давлатлар фуқароларини, фуқаролиги бўлмаган шахсларни ва республиканинг бошқа минтақаларидан келаётган Ўзбекистон Республикаси фуқароларини Тошкент шаҳрида ва Тошкент вилоятида доимий рўйхатдан ўтказиш Рўйхатдан ўтказиш масалалари бўйича махсус комиссиянинг асосланган хулосаси асосида амалга оширилади;

Ўзбекистон Республикасининг бошқа минтақалари аҳолиси уй-жой сотиб олаётган томон ҳисобланган тақдирда уй-жойни сотиб олиш, айирбошлаш, ҳадя қилиш ёки гаровга қўйиш битишувларини нотариал тасдиқлаш ва кейинчалик уларни «Ергеодезкадастр» давлат қўмитаси органларида давлат рўйхатидан ўтказиш фақат Махсус комиссиянинг Тошкент шаҳрида ва Тошкент вилоятида рўйхатдан ўтишга рухсат бериш тўғрисидаги қарори тақдим этилган тақдирда амалга оширилади;

ҳадя қилиш шартномаларини давлат рўйхатидан ўтказганлик учун йиғимлар ҳамда хорижий фуқароларни, шу жумладан, МДҲ қатнашчилари бўлган давлатлар фуқароларини ва фуқаролиги бўлмаган шахсларни, шунингдек, бошқа минтақалардан келаётган Ўзбекистон Республикаси фуқароларини Тошкент шаҳрида ва Тошкент вилоятида доимий рўйхатдан ўтказганлик учун тўлов сифатида тушаётган маблағлар Тошкент шаҳар ва Тошкент вилояти ҳокимликлари ихтиёрида қолади ҳамда уй-жой-коммунал хўжалигини, инфратузилманинг бошқа объектларини, коммуникацияларни мустаҳкамлашга ва жамоат тартибини сақлашга сарфланади.

2¹. Ўзбекистон Республикаси фуқароларини рўйхатдан ўтказиш масалаларини ҳал этишда Махсус комиссия қуйидаги узрли ҳолатларни ҳисобга олиши керак:

қонун ҳужжатларига мувофиқ сотиб олинган уй-жой мавжудлиги;

вояга етмаган болалар ва васийликдагиларни — ота-оналар ёки васийларнинг турар жой майдонига рўйхатдан ўтказиш;

ўз оилаларига эга бўлмаган ёки вояга етмаган болалари бўлган, бироқ никоҳда бўлмаган вояга етган болаларни — ота-оналарнинг турар жой майдонига рўйхатдан ўтказиш;

ота-оналарни — болаларнинг турар жой майдонига рўйхатдан ўтказиш;

эрни (хотинни) — хотиннинг (эрнинг) турар жой майдонига рўйхатдан ўтказиш;

ота-оналари бўлмаган туғишган ака-укалар ва опа-сингилларни, шунингдек ёшидан қатъи назар меҳнатга лаёқатли бўлмаган туғишган ака-укалар ва опа-сингилларни, агар улар ўз оилаларига эга бўлмасалар — ака-укалар ёки опа-сингилларнинг турар жой майдонига рўйхатдан ўтказиш;

юқори малакали мутахассисларни, шунингдек вазирликлар, давлат қўмиталари, идоралар ва ташкилотларга лавозимга таклиф этиладиган тор ихтисосликдаги мутахассисларни рўйхатдан ўтказиш;

3. Тошкент шаҳар ҳокимлиги бир ҳафта муддатда:

мавжуд инфратузилмани ва жамоат тартибини сақлашни таъминлаш имкониятларини ҳисобга олган ҳолда доимий яшаш учун келиш жараёнларини тартибга солиш учун Тошкент шаҳрида рўйхатдан ўтказиш масалалари бўйича махсус комиссия ташкил этсин;

хорижий фуқароларни, шу жумладан МДҲ қатнашчилари бўлган давлатлар фуқароларини ва фуқаролиги бўлмаган шахсларни Тошкент шаҳрида доимий рўйхатдан ўтказганлик учун тўлов ставкаларини тасдиқласин.

4. Мазкур қарорнинг амал қилиши:

хорижий фуқаролар — дипломатик корпус ходимларига;

хорижий фуқаролар — Ўзбекистон Республикасида рўйхатдан ўтказилган халқаро ташкилотлар, хорижий фирмалар, компаниялар ва банкларнинг доимий ваколатхоналари ходимларига;

илгари Тошкент шаҳри ва Тошкент вилоятида яшаган ўқишни тугатиб қайтган, узоқ муддатли хизмат сафарида бўлган, шунингдек озодликдан маҳрум қилиш жойларидан озод қилинган шахсларга татбиқ этилмайди.

Ўзбекистон Республикаси Президентининг ёки Ўзбекистон Республикаси Вазирлар Маҳкамасининг қарорлари билан лавозимга тайинланган шахслар.

5. Ўзбекистон Республикаси Адлия вазирлиги, Ички ишлар вазирлиги ва Коммунал хизмат кўрсатиш вазирлиги бир ҳафта муддатда идоравий меъёрий ҳужжатларни мазкур қарорга мувофиқлаштирсинлар.

6. Тошкент шаҳар ҳокимлиги Ўзбекистон Республикаси Адлия вазирлиги билан биргаликда бир ой муддатда Тошкент шаҳри мақоми тўғрисидаги Низомни ишлаб чиқсин ва кўриб чиқиш учун Ўзбекистон Республикаси Вазирлар Маҳкамасига киритсин.

7. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов ва Тошкент шаҳри ҳокими К.Н. Тўлаганов зиммасига юклансин.