Вазирлар Маҳкамаси қайд этадики, Халқаро тикланиш ва тараққиёт банки ҳамда Қувайт араб иқтисодий ривожлантириш жамғармаси кредитлари ҳисобига амалга оширилаётган «Тоза сув, санитария ва аҳоли саломатлиги» лойиҳасини рўёбга чиқаришда қурилиш-монтаж ишларининг бажарилиши ва хорижий маслаҳатлашув компаниялари фаолияти устидан назоратнинг сусайтириб юборилганлиги туфайли кредит маблағларидан самарасиз фойдаланишга йўл қўйилган, бунинг натижасида республика манфаатларига иқтисодий зарар етказилган. Қорақалпоғистон Республикаси Вазирлар Кенгаши ва Хоразм вилояти ҳокимлиги Лойиҳани биргаликда амалга оширишда қатнашишдан ўзларини четга олишган.

«Тоза сув, санитария ва аҳоли саломатлиги» лойиҳаси бўйича хорижий кредитларни ўз вақтида ва самарали ўзлаштириш юзасидан таъсирчан чора-тадбирлар кўриш мақсадида Вазирлар Маҳкамаси қарор қилади:

1. Ўзбекистон Республикаси Иқтисодиёт вазирлиги томонидан:

асбоб-ускуналар етказиб бериш ва хизматлар кўрсатиш бўйича тузилган барча контрактлар хатловдан ўтказилганлиги, Лойиҳанинг жорий ҳолати баҳоланганлиги ва якуний ҳисоб-китоб қилишда илгари хорижий маслаҳатчиларга асоссиз тўланган кредит маблағлари ушлаб қолинганлиги;

Лойиҳа бўйича сотиб олинадиган асбоб-ускуналар рўйхати республика корхоналари томонидан ишлаб чиқариладиган товарлар импорти чиқариб ташланган ҳолда мақбуллаштирилганлиги;

қарз маблағларининг ҳаракатини молиявий ҳисобга олиш ва назорат қилишнинг миллий ва халқаро молия ҳисоботлари стандартлари талабларига мувофиқ бўлган тизими жорий этилганлиги маълумот учун қабул қилинсин.

2. Ўзбекистон Республикаси Иқтисодиёт вазирлиги ижрочи агент этиб белгилансин, унга кўрсатиб ўтилган Лойиҳани амалга ошириш учун жалб этиладиган қарз маблағларидан мақсадли ва самарали фойдаланилиши, лойиҳа бўйича тугалланган объектларни фойдаланувчи ташкилотлар билан биргаликда қабул қилиб олиш учун жавобгарлик юклансин.

3. Ўзбекистон Республикаси Иқтисодиёт вазирлиги икки ҳафта муддатда:

1-иловага мувофиқ ходимларининг чекланган сони 15 кишидан иборат бўлган юридик шахс сифатидаги Лойиҳани амалга ошириш гуруҳини тузсин;

Ўзбекистон Республикаси тижорат банкида Лойиҳанинг махсус ҳисоб рақамини очсин.

4. Қуйидагилар Лойиҳани амалга ошириш гуруҳининг асосий вазифалари этиб белгилансин:

молиялаштирувчи халқаро ташкилотлар тартиботларига ва Ўзбекистон Республикаси қонун ҳужжатларига мувофиқ Лойиҳани ва кредит маблағларини бошқариш;

кредит маблағларидан қарз битимлари ва Ҳукумат қарорларида Лойиҳанинг белгиланган мақсадларига қатъий мувофиқ равишда фойдаланиш;

қурилиш ишларининг сифати ва ўз вақтида бажарилиши устидан назоратни амалга ошириш, кўрсаткичларда контрактларда назарда тутилган кўрсаткичлар ўртасида тафовутлар аниқланган тақдирда пудрат ташкилотларига ўз вақтида эътироз ва рекламациялар киритиш;

объектларнинг ўз вақтида фойдаланишга топширилишини назорат қилиш ва малакали маҳаллий мутахассислар — муҳандислар ва гуруҳнинг штатдаги ходимлари томонидан қурилишнинг бориши устидан техник назоратни амалга ошириш;

кредит маблағларининг молиявий ҳисобини юритиш ва амалдаги қонун ҳужжатлари талабларига мувофиқ улардан фойдаланилиши тўғрисида ҳисобот тузиш;

харид ҳужжатларини тайёрлашда ва таклифларни баҳолашда тендер комиссияси ишида қатнашиш.

Белгилаб қўйилсинки, Лойиҳани амалга ошириш гуруҳи ходимлари Лойиҳа бошқарилиши ва маблағлардан самарали фойдаланилиши, шунингдек қурилиш ишлари техник назорат қилиниши учун шахсан жавоб берадилар.

5. «Тоза сув, санитария ва аҳоли саломатлиги» лойиҳасини амалга ошириш бўйича Мувофиқлаштирувчи кенгаш таркиби 2-иловага мувофиқ тасдиқлансин.

Қуйидагилар Мувофиқлаштирувчи кенгашнинг асосий вазифалари этиб белгилансин:

Лойиҳани амалга ошириш бўйича асосий чора-тадбирларни, шунингдек лойиҳанинг йиллик бюджетини тасдиқлаш;

Лойиҳани амалга ошириш доирасида харид қилинадиган зарур товарлар, ишлар ва хизматлар рўйхатининг мақсадга мувофиқлиги ва самарадорлигини комплекс таҳлил қилиш;

Лойиҳани амалга ошириш доирасида асбоб-ускуналар, ишлар ва хизматларни харид қилиш учун белгиланган тартибда тендер савдолари ўтказилишини ташкил этиш;

кредит маблағлари ҳисобига тузиладиган контрактлар бўйича бажариладиган ишларнинг муддатлари ва сифати, шунингдек уларнинг самарадорлиги мониторингини олиб бориш;

Лойиҳа амалга оширилиши ва Лойиҳа маблағларидан фойдаланишнинг иқтисодий самарадорлигини қатъий ва тизимли назорат қилиш.

6. Мувофиқлаштирувчи кенгашга бажариладиган ишларнинг хусусияти ва ҳажми ўзгаришига кўра Лойиҳани амалга ошириш гуруҳининг штат жадвалига ходимларнинг тасдиқланган сони доирасида ўзгартиришлар киритиш ҳуқуқи берилсин.

7. Қорақалпоғистон Республикаси Вазирлар Кенгаши Раиси ва Хоразм вилояти ҳокими Лойиҳанинг ўз вақтида амалга оширилишида амалий иштирок этишни таъминлаш бўйича зарур чора-тадбирлар кўрсинлар, Мувофиқлаштирувчи кенгашга Лойиҳа маблағларидан самарали фойдаланиш бўйича асосланган таклифлар киритсинлар.

8. Вазирлар Маҳкамасининг «Қизкетган шаҳарчасини сув билан таъминлашнинг кўргазмали лойиҳасини амалга ошириш чора-тадбирлари тўғрисида» 1997 йил 29 августдаги 421-сон қарорининг 8-банди ва қарорга 3-илова ўз кучини йўқотган деб ҳисоблансин.

9. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М.Мирзиёев зиммасига юклансин.