“Alohida muhofaza etiladigan tabiiy hududlar toʻgʻrisida” Oʻzbekiston Respublikasi Qonuniga muvofiq, Oʻzbekiston Respublikasi davlat kadastrlari yagona tizimining amalda boʻlishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasining alohida muhofaza etiladigan tabiiy hududlari davlat kadastrini yuritish tartibi toʻgʻrisidagi ilova qilinayotgan Nizom tasdiqlansin.

2. Mazkur qarorning bajarilishini nazorat qilish Vazirlar Mahkamasining Agrosanoat kompleksi Kotibiyatiga yuklansin.

1. Alohida muhofaza etiladigan hududlar davlat kadastri Oʻzbekiston Respublikasi Davlat tabiatni muhofaza qilish qoʻmitasi tomonidan Fanlar akademiyasi bilan birgalikda yuritiladi va tabiiy muhitning alohida muhofaza etiladigan toifalariga kiritilgan obyektlari boʻyicha birxillashtirilgan maʼlumotlar toʻplamidan iborat boʻladi, u Oʻzbekiston Respublikasi Davlat kadastrlari yagona tizimining tarkibiy qismi hisoblanadi.

2. Alohida muhofaza etiladigan tabiiy hududlar davlat kadastri ana shunday hududlar tarmoqlarini rejalashtirish, ularni muhofaza qilishni taʼminlash, ilmiy tadqiqotlar oʻtkazish, tegishli tartibga rioya qilinishi ustidan davlat nazorati darajasini oshirish, alohida muhofaza qilinadigan tabiiy hududlarning asosiy tavsiflari bilan tezkorlik bilan tanishish, shuningdek ularning ishlab chiqaruvchi kuchlarni rivojlantirish va joylashtirishni rivojlantirishdagi rolini hisobga olish uchun moʻljallangan.

3. Quyidagilar alohida muhofaza etiladigan tabiiy hududlar davlat kadastrini hisobga olish obyektlari hisoblanadi:

davlat qoʻriqxonalari (shu jumladan biosfera, geologiya qoʻriqxonalari va boshqalar), davlat milliy bogʻlari, davlat tabiat yodgorliklar, davlat zakazniklari, suvni muhofaza qilish ihotalari (hududlari), kurort va rekreatsion hududlar), yer usti va yer osti suvlari hosil boʻladigan hududlar (daryo vodiylari, surilma konuslari, togʻ etaklari), noyob va qimmatbaho metallar konlari, alohida muhofaza etiladigan tabiiy hududlarning qoʻriqlanadigan (bufer) hududlari, baliqchilik xoʻjaligi hududlari, taqiqlangan oʻrmon ihotazorlari, tarixiy-tabiiy va yodgorlik bogʻlar, botanika va zoologiya bogʻlari, dendrariylar hamda qonunchilik va xalqaro shartnomalar bilan alohida muhofaza etiladigan toifaga kiritilgan boshqa hududlar.

4. Alohida muhofaza etiladigan tabiiy hududlar oʻzining faoliyat koʻrsatish xususiyatlariga va huquqiy maqomiga koʻra quyidagi uch toifaga boʻlinadi.

I. Davlat qoʻriqxonalari, davlat milliy (tabiiy) bogʻlari.

II. Davlat zakazniklari, davlat tabiat yodgorliklari.

III. Boshqa alohida muhofaza etiladigan tabiiy hududlar (zoologiya, botanika, dendrologiya bogʻlari (parklari), suvni muhofaza etish rekreatsion, baliqchilik xoʻjaliklari hududlari, taqiqlangan oʻrmon ihotazorlari, yer usti va yer osti suvlari hosil boʻladigan hududlar, noyob va qimmatbaho metallar konlari va nishonalari, tabiiy kurort hududlari va boshqalar).

5. Alohida muhofaza etiladigan tabiiy hududlar oʻzining boʻysunishi, muhimligi, shuningdek tabiiy obyektlarining noyobligiga koʻra tuman, viloyat (Qoraqalpogʻiston Respublikasi) va respublika ahamiyatiga ega boʻlishi mumkin.

6. Faqat qonunchilikda belgilangan tartibda tashkil etilgan obyektlargina roʻyxatdan oʻtkaziladi va alohida muhofaza etiladigan tabiiy hududlar kadastriga kiritiladi.

Obyektlarni kadastrga kiritish uchun zarur boʻladigan hujjatlar roʻyxati Davlat tabiatni muhofaza qilish qoʻmitasi tomonidan belgilanadi.

7. Alohida muhofaza etiladigan tabiiy hududlar davlat kadastri ushbu hududlarning huquqiy maqomi va tartibi, ularning jugʻrofiy holati, miqdori va sifatiga oid tavsiflari, ekologik, ilmiy, maʼrifiy, tarixiy va boshqa qimmatlari, idoraviy mansubligi, yer egalari va yerdan foydalanuvchilar, shuningdek hisobga olingan har bir obyekt boʻyicha ushbu hududlardagi tabiiy resurslardan foydalanish xarakteri toʻgʻrisidagi maʼlumotlardan iborat boʻladi.

Kadastr hujjatlari kartografiya, fotografiya, hisobot, hisobga olish materiallarini va boshqa materiallarni, alohida muhofaza etiladigan tabiiy hududlarning holati toʻgʻrisidagi, kadastr shakllarini tuzishda hisobga olinadigan maʼlumotlarni oʻz ichiga oladi.

8. Alohida muhofaza etiladigan tabiiy hududlar kadastri quyidagi asosiy shakllarni oʻz ichiga oladi:

1-shakl (yigʻma) — “Alohida muhofaza etiladigan tabiiy hududlar roʻyxati”;

2-shakl — “Alohida muhofaza etiladigan I toifa tabiiy hududlarning yer-suv resurslari”;

3-shakl — “Alohida muhofaza etiladigan I toifa tabiiy hududlarning oʻsimliklar dunyosi”;

4-shakl — “ Alohida muhofaza etiladigan I toifa tabiiy hududlarning hayvonot dunyosi”;

5-shakl — “Alohida muhofaza etiladigan II toifa tabiiy hududlarning umumiy tavsifi”;

6-shakl — “Alohida muhofaza etiladigan III toifa tabiiy hududlarning umumiy tavsifi”;

7-shakl — “Alohida muhofaza etiladigan tabiiy hududlar tabiatni muhofaza qilish faoliyatining asosiy natijalari”.

Shakllarning tuzilishi va mazmuni Davlat tabiatni muhofaza qilish qoʻmitasi tomonidan belgilanadi.

9. 7-shakldan tashqari, barcha shakllar boʻyicha maʼlumotlar tuman (“T” literli shakl), viloyat (“V” literli shakl) va respublika (litersiz shakl) darajasida ishlab chiqiladi. 7-shakl boʻyicha maʼlumotlar faqat tuman darajasidagina beriladi.

Barcha shakllarga (tuman, viloyat va respublika darajasida) alohida muhofaza etiladigan tabiiy hududlarning hozirgi holati va uning oʻzgarishi darajasi tahlil qilingan holdagi qisqacha izohnoma beriladi.

10. Tuman darajasida — alohida muhofaza etiladigan tabiiy hududlar kadastri tarkibiga “T” literi bilan barcha shakllar boʻyicha maʼlumotlar, alohida muhofaza etiladigan tabiiy hududlar rahbarlarining hisobotlari, tadqiqotlar, izlanishlar materiallari, hisobga olish maʼlumotlari va boshqa birlamchi kadastr hujjatlari kiritiladi.

Viloyat darajasida — alohida “muhofaza etiladigan tabiiy hududlar kadastri tarkibiga “T” va “V” literlari bilan barcha shakllar boʻyicha maʼlumotlar kiritiladi.

Respublika darajasida — alohida muhofaza etiladigan tabiiy hududlar kadastri tarkibiga “V” literi bilan va litersiz barcha shakllar boʻyicha maʼlumotlar kiritiladi.

11. Alohida muhofaza etiladigan tabiiy hududlar kadastri Davlat tabiatni muhofaza qilish qoʻmitasining uchchala darajalardagi organlari tomonidan yuritiladi:

tuman (shahar) darajasida — tuman tabiatni muhofaza qilish inspeksiyasi tomonidan;

viloyat (Qoraqalpogʻiston Respublikasi) darajasida — Qoraqalpogʻiston Respublikasi Davlat tabiatni muhofaza qilish qoʻmitasining, viloyatlar va Toshkent shahar tabiatni muhofaza qilish inspeksiya xizmati tomonidan;

respublika darajasida — Davlat tabiatni muhofaza qilish qoʻmitasining respublika inspeksiya xizmati tomonidan.

12. 3 va 4-shakllar boʻyicha maʼlumotlarni tayyorlashda Oʻzbekiston Respublikasi Fanlar akademiyasi ishtirok etadi.

13. Yer osti chuchuk suvlari manbalarining hamda noyob va qimmatbaho metallar konlari va nishonalarining shakllanish hududlari kadastrlari Oʻzbekiston Respublikasi Davlat geologiya va mineral resurslar qoʻmitasi tomonidan yuritiladi. Belgilangan shakldagi yakuniy maʼlumotlar umumiy kadastrga kiritish uchun ushbu Nizomda nazarda tutilgan muddatlarda Davlat tabiatni muhofaza qilish organlariga taqdim etiladi.

14. Kadastr tadrijiy ravishda yuritiladi, shakllar boʻyicha maʼlumotlar, hisobot yilidan keyingi yilning 1-yanvaridagi holat boʻyicha, har yili bir marta taqdim etiladi.

15. Tuman darajasida — 2-t, 3-t, 4-t, 5-t, 7-t shakllari boʻyicha alohida muhofaza etiladigan III toifa tabiiy hududlar boʻyicha maʼlumotlardan tashqari maʼlumotlar (hisobotlar) tuman (shahar) tabiatni muhofaza qilish (obyekt joylashgan yerdagi) inspeksiyasiga alohida muhofaza etiladigan hududlar rahbarlari* tomonidan hisobot yilidan keyingi yilning 1-fevraligacha taqdim etiladi.

6-t va 7-t shakllari boʻyicha alohida muhofaza etiladigan III toifa tabiiy hududlar — boʻyicha maʼlumotlar yerlarni hisobga olish hujjatlari asosida tuman tabiatni muhofaza qilish inspeksiyasi tomonidan tayyorlanadi.

Tuman inspeksiyalari taqdim etilgan maʼlumotlar (hisobotlar)ning toʻgʻriligini aniqlaydilar, tuman (shahar) boʻyicha alohida muhofaza etiladigan tabiiy hududlar roʻyxatini tuzadilar (1-t yigʻma shakl) barcha kadastr materiallarini tuman hokimligi bilan kelishib oladilar va 1-t, 2-t, 3-t, 4-t, 5-t, 6-t, 7-t shakllari boʻyicha 1-martgacha ularni Qoraqalpogʻiston Respublikasi Davlat tabiatni muhofaza qilish qoʻmitasiga, viloyatlar va Toshkent shahar tabiatni muhofaza qilish qoʻmitalariga taqdim etadilar.

16. Viloyat darajasida — olingan materiallar viloyat inspeksiya xizmati tomonidan umumlashtiriladi va tahlil qilinadi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishib olinadi hamda 1-aprelgacha 1-“V”, 2-“V”, 3-“V”, 4-“V”, 5-“V”, 6-“V” shakllari boʻyicha Davlat tabiatni muhofaza qilish qoʻmitasiga joʻnatiladi.

17. Respublika darajasida — alohida muhofaza etiladigan tabiiy hududlar davlat kadastri Davlat tabiatni muhofaza qilish qoʻmitasining “Boshersuvnazorat” boshqarmasi tomonidan yuritiladi.