Oʻzbekiston Respublikasi Oliy Kengashining “Davlat uy-joy fondini xususiylashtirish toʻgʻrisida” Oʻzbekiston Respublikasi Qonunini amalga kiritish tartibi haqida”gi qarorini bajarish yuzasidan Vazirlar Mahkamasi qaror qiladi:

1. Quyidagilar tasdiqlansin:

Xususiylashtirilgan kvartiralarni, uylarni (uylarning bir qismi)ni sotib olish-sotish shartnomalarini rasmiylashtirish tartibi toʻgʻrisidagi Nizom 1-ilovaga muvofiq;

Oʻzbekiston Respublikasi Mudofaa vazirligi uy-joy fondini xususiylashtirish tartibi toʻgʻrisidagi Nizom 2-ilovaga muvofiq.

2. Xususiylashtirilgan kvartiralarni, uylarni (uylarning bir qismini) sotib olish-sotish, almashtirish va hadya qilishni tasdiqlaganlik uchun quyidagi miqdorlarda davlat boj stavkalari belgilansin:

mulkdorning umr yoʻldoshiga, farzandlariga, mulkdorning hamda uning umr yoʻldoshiga ota-onalariga, bobolariga, buvilariga, tugʻishgan aka-ukalariga, opa-singillariga — shartnoma summasining 1 foizi miqdorida;

boshqa jismoniy va yuridik shaxslarga — shartnoma summasining 20 foizi miqdorida;

xususiylashtirilgan kvartiralar kimoshdi savdosi orqali sotilganda — sotish narxining 15 foizi miqdorida.

3. Oʻzbekiston Respublikasi Davlat mulki qoʻmitasi va Oʻzbekiston Respublikasi Adliya vazirligining davlat uy-joy fondini xususiylashtirish toʻgʻrisida Nizomga hamda davlat uy-joy fondini xususiylashtirish, saqlash va undan foydalanish tartibi toʻgʻrisidagi Qoidalariga oʻzgartirish va qoʻshimchalar kiritish, shuningdek, Vazirlar Mahkamasining baʼzi qarorlarini 3-ilovaga muvofiq oʻz kuchini yoʻqotgan deb hisoblash haqidagi taklifi qabul qilinsin.

4. Mazkur qarorning bajarilishini nazorat qilish Vazirlar Mahkamasining Kapital qurilish, transport va aloqa hamda Yuridik boʻlimlariga yuklatilsin.

1. Xususiylashtirilgan uy-joylarga pulli, imtiyozli yoki bepul asosda mulk qilib berilgan kvartiralar, uylar (uylarning bir qismi) kiradi.

2. Xususiylashtirilgan kvartiraning, uyning (uyning bir qismining) egasi mazkur uy-joyga egalik qilish, undan foydalanish va uni tasarruf etish, shuningdek, jismoniy va yuridik shaxslarning huquqlarini hamda qonun bilan himoya qilinadigan manfaatlarini buzmasdan sotish huquqiga egadir.

Xususiylashtirilgan uy-joyning egasi ushbu uy-joyni oʻz xohishiga koʻra har qanday jismoniy yoki yuridik shaxsga yoxud koʻchmas mulkka doir operatsiyalarni amalga oshirishga vakil qilingan organga sotish, shuningdek, uni koʻchmas mulk sotiladigan kimoshdi savdosiga qoʻyish huquqiga egadir.

Kvartirani, uyni (uyning bir qismini) jismoniy va yuridik shaxslarga sotishda mulkdor sotib olish-sotish shartnomasini tasdiqlatish uchun kvartira joylashgan yerdagi notarial idoraga, kimoshdi savdosi orqali sotishda — koʻchmas mulk savdosini amalga oshirishga vakil qilingan organga murojaat qiladi.

3. Sotiladigan xususiylashtirilgan uy-joyning qiymati tomonlarning kelishuviga binoan, lekin baholash shkalasi boʻyicha aniqlangan qiymatdan past boʻlmagan miqdorda belgilanadi.

4. Koʻchmas mulk bilan operatsiyalarni amalga oshirishga vakil qilingan organ xususiylashtirilgan uy-joy egasining roziligiga koʻra mazkur uy-joyni tomonlar kelishgan narxda, biroq baholash shkalasi boʻyicha aniqlangan qiymatdan yuqori boʻlmagan narxda sotib olish huquqiga egadir.

Baholash shkalasi xususiylashtirilgan kvartiraning oʻrtacha bozor narxidan iborat boʻladi. Xususiylashtirish davridagi qoldiq balans qiymati (uni bitishuv amalga oshirilgan vaqt uchun belgilangan, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan yilning har choragida tasdiqlanadigan qiymatning oʻzgarish indeksiga oshirgan holda) asos qilib olinadi.

Sotib olish-sotishni amalga oshirish uchun zarur boʻlgan hujjatlarni rasmiylashtirishga koʻrsatiladigan xizmatlar uchun haq bu ishga vakil qilingan organlar bilan kelishilgan narxnomalarga muvofiq uy-joy egasi tomonidan toʻlanadi.

5. Kimoshdi savdosi orqali sotishda xususiylashtirilgan uy-joy egasining xohishiga koʻra uning qiymati MDH aʼzosi boʻlgan davlatlarning istalgan pul belgilarida, shuningdek, erkin muomaladagi valyutada belgilanishi mumkin.

Xususiylashtirilgan uy-joyni sotishdan olingan summa (davlat boji stavkalari va kimoshdi savdosida sotganlik uchun koʻrsatilgan xizmatlar qiymati chiqarib tashlangandan keyin) mulkdorning xohishiga koʻra naqd pul bilan olinishi, Oʻzbekiston Respublikasi va MDH aʼzosi boʻlgan davlatlar jamgʻarma banklarining koʻrsatilgan hisob schyotiga oʻtkazilishi mumkin.

6. Oʻzbekiston Respublikasining va boshqa davlatlarning fuqarolari, shuningdek, Oʻzbekiston Respublikasi hududida doimiy yashaydigan va propiskada boʻlgan fuqaroligi boʻlmagan shaxslar xususiylashtirilgan kvartirani, uyni (uyning bir qismini) sotib olish huquqiga egadirlar. Yuridik shaxslar ham oʻzlarining Oʻzbekiston Respublikasi hududida doimiy yashaydigan (propiskada boʻlgan) xodimlarini va pensionerlarini taʼminlash uchun uy-joylarni sotib olishlari mumkin.

7. Yuridik yoki jismoniy shaxslar tomonidan mulkdorlardan sotib olingan uy-joydan faqat belgilangan maqsadda foydalanish mumkin.

8. Xususiylashtirilgan uy-joyini sotish istagini bildirgan mulkdor quyidagi hujjatlarni taqdim etadi:

pasport yoki uning oʻrnini bosuvchi hujjat;

xususiylashtirilgan uy-joyga egalik qilish huquqini tasdiqlovchi davlat dalolatnomasi yoki Oʻzbekiston SSR Ministrlar Soveti va Oʻzsovprofning 1989-yil 21-iyundagi 203-son qaroriga muvofiq uy-joyni sotib olish-sotishning notarial tasdiqlangan shartnomasi;

kvartira, uy (uyning bir qismi) boʻyicha roʻyxatdan oʻtkazish yigʻma jildi;

oilaning birga yashaydigan, balogʻat yoshiga yetgan barcha aʼzolarining, shuningdek, uy-joy maydoniga huquqi boʻlgan, mazkur uy-joyda doimiy yashaydigan va propiskada boʻlgan shaxslarning notarial tasdiqlangan roziligi;

ilova qilinayotgan shakldagi maʼlumotnoma yoki uy daftari.

9. Sotib oluvchilar (Oʻzbekiston Respublikasining, boshqa davlatlarning fuqarolari, fuqaroligi boʻlmagan shaxslar) pasport yoki uning oʻrnini bosuvchi hujjatni taqdim etadilar.

10. Xususiylashtirilgan uy-joyni sotuvchi sotib olish-sotish hujjatlarini rasmiylashtirishda Oʻzbekiston Respublikasi Vazirlar Mahkamasi tomonidan belgilangan stavka boʻyicha davlat boji toʻlaydilar.

11. Kvartirani (alohida uyni, uyning bir qismini) sotib olish-sotish, almashtirish, hadya etish bitishuvlari amalga oshirilgandan keyin uning xususiylashtirilgan uy maqomi yoʻqoladi.

12. Notarial tasdiqlangan sotib olish-sotish shartnomani sotib olingan uy-joyga egalik qilish huquqini tasdiqlovchi hujjat hisoblanadi.

1. Mazkur Nizom Oʻzbekiston Respublikasi Mudofaa vazirligining uy-joy fondini xususiylashtirishning asoslarini, tartibini va shartlarini belgilaydi.

Mudofaa vazirligining uy-joy fondi kvartiralarini xususiylashtirish “Davlat uy-joy fondini xususiylashtirish toʻgʻrisida” Oʻzbekiston Respublikasi Qonuniga va tegishli normativ hujjatlarga muvofiq amalga oshiriladi.

2. Oʻzbekiston Respublikasi Qurolli Kuchlarining harbiy xizmatchilari, Mudofaa vazirligining uy-joy fondida yashayotgan ishchilar, xizmatchilar va boshqa shaxslar xususiylashtirish subyektlari hisoblanadilar.

3. Yopiq harbiy shaharchalardagi kvartiralar va uylar, yotoqxonalardagi kvartiralar, yashash uchun yaroqsiz deb topilgan yoki xizmat kvartiralari (xonalari) hisoblangan, ikki yoki undan koʻp ijarachilar yashaydigan kvartiralar (egallab turgan kvartiralarni xususiylashtirish boʻyicha ularning roziligi boʻlmagan taqdirda), boshqa davlatlarning Qurolli Kuchlarida xizmatni oʻtayotgan harbiy xizmatchilar tomonidan band etib turilgan boʻsh kvartiralar hamda band etib qoʻyilgan kvartiralar xususiylashtirilmaydi.

4. Kvartiralarni xususiylashtirishga doir hujjatlarni rasmiylashtirish shahar va viloyatlar hokimliklari huzuridagi tegishli organlar tomonidan uy-joy fondi egasi bilan tuzilgan shartnoma shartlari boʻyicha yoki Mudofaa vazirligining kvartiralardan foydalanish organlari tomonidan amalga oshiriladi.

5. Kvartiralarni xususiylashtirgan harbiy xizmatchilar, Oʻzbekiston Respublikasi Vazirlar Mahkamasi tomonidan tasdiqlangan xususiylashtirilgan kvartiralarni, uylarni (uylarning bir qismini) sotib olish-sotish shartnomalarini rasmiylashtirish tartibi toʻgʻrisidagi Nizomga muvofiq sotish, almashtirish va hadya etish bilan bogʻliq barcha harakatlarni amalga oshirish huquqiga egadirlar.

6. Harbiy xizmatchilar yangi xizmat joyiga joʻnab ketishayotganda oʻz xohishiga koʻra xususiylashtirgan uy-joyi boʻyicha Mudofaa vazirligining kvartiralardan foydalanish organlari bilan yoki ularning tavsiyasiga binoan navbatdagi harbiy xizmatchi bilan qoldiq balans qiymati boʻyicha sotib olish-sotish shartnomasini rasmiylashtirishlari mumkin, bunda ular uy-joyni topshirganligi toʻgʻrisida belgilangan namunadagi maʼlumotnoma oladilar.

1. Oʻzbekiston Respublikasi Vazirlar Mahkamasining “Oʻzbekiston Respublikasida davlat uy-joy fondini xususiylashtirishni davom ettirish toʻgʻrisida” 1993-yil 1-martdagi 114-son qarori bilan tasdiqlangan Oʻzbekiston Respublikasida davlat uy-joy fondini xususiylashtirish toʻgʻrisidagi Nizomga quyidagi oʻzgartirishlar va qoʻshimchalar kiritilsin:

muqaddimaning ikkinchi xatboshidagi va boshqa barcha bandlardagi “shaxsiy mulk” soʻzlari “mulk” soʻzi bilan almashtirilsin;

2-bandning ikkinchi xatboshidagi “tarixiy” soʻzidan oldin “arxitektura” soʻzi qoʻshilsin, “sovxozlar va boshqa davlat qishloq xoʻjaligi korxonalarining uy-joy fondidan tashqari” soʻzlari chiqarib tashlansin;

3-band quyidagi tahrirda bayon qilinsin:

“Oʻzbekiston Respublikasining, boshqa davlatlarning fuqarolari, Oʻzbekiston Respublikasi hududida doimiy yashaydigan (propiskada boʻlgan) fuqaroligi boʻlmagan shaxslar xususiylashtirish subyektlari hisoblanadilar.

Vazirliklar, davlat qoʻmitalari, idoralar, korxonalar, muassasalar, tashkilotlar va Oʻzbekiston Respublikasining, boshqa davlatlarning oʻzga yuridik shaxslari oʻz xodimlarini, pensionerlarini uy-joy bilan taʼminlash uchun mulkdordan uy-joy sotib olishlari mumkin”.

8-band quyidagi mazmundagi xatboshi bilan toʻldirilsin:

“Agar kvartira, uy (uyning bir qismi) uchun badalni toʻliq toʻlagan yoki Oʻzbekiston Respublikasi Prezidenti farmonlariga muvofiq arizani hokimiyatning mahalliy organida roʻyxatdan oʻtkazgan, biroq mulkka egalik qilish huquqini beruvchi davlat dalolatnomasini olmasdan vafot etgan taqdirda merosxoʻrlar ushbu kvartirani, uyni (uyning bir qismini) meros qilib olishga haqlidirlar”;

9, 10 va 19-bandlar chiqarib tashlansin;

23-band quyidagi tahrirda bayon qilinsin:

“Davlat uy-joy fondini xususiylashtirishning qanday borayotganini nazorat qilish mazkur uy-joy fondining egasi yoki ular tomonidan vakil qilingan organlar tomonidan amalga oshiriladi”.

2. Oʻzbekiston Respublikasi Vazirlar Mahkamasining “Oʻzbekiston Respublikasida davlat uy-joy fondini xususiylashtirishni davom ettirish toʻgʻrisida” 1993-yil 1-martdagi 114-son qarori bilan tasdiqlangan Oʻzbekiston Respublikasida davlat uy-joy fondini xususiylashtirish, saqlash va undan foydalanish Qoidalariga quyidagi oʻzgartirishlar va qoʻshimchalar kiritilsin:

20-band quyidagi mazmundagi xatboshi bilan toʻldirilsin:

“Agar kvartira, uy (uyning bir qismi) uchun badalni toʻliq toʻlagan yoki Oʻzbekiston Respublikasi Prezidentining farmonlariga muvofiq arizani hokimiyatning mahalliy organida roʻyxatdan oʻtkazgan, biroq mulkka egalik qilish huquqini beruvchi davlat dalolatnomasini olmasdan vafot etgan taqdirda merosxoʻrlar ushbu kvartirani, uyni (uyning bir qismini) meros qilib olishga haqlidirlar”;

22-band quyidagicha tahrirda bayon qilinsin:

“Xususiylashtirilgan kvartiraning, uyning (uyning bir qismining) egasi quyidagi huquqlarga egadir:

Oʻzbekiston Respublikasi qonunchiligiga muvofiq jismoniy va yuridik shaxslarning, davlatning huquqlarini, qonun bilan himoya qilinadigan manfaatlarini buzmagan holda ushbu uy-joyga egalik qilish, undan foydalanish va uni tasarruf etish;

Oʻzbekiston Respublikasi qonunchiligi bilan belgilangan tartibda kommunal xizmatlar uchun haq toʻlash, koʻchmas mulk soliqlari, sugʻurta badallarini toʻlash boʻyicha imtiyozlardan foydalanish;

egallab turgan uy-joy maydonidan qatʼi nazar, boshqa kvartirani, uyni (uyning bir qismini) sotib olish;

uy-joy maydonidan qatʼi nazar, “Davlat uy-joy fondini xususiylashtirish toʻgʻrisida” Oʻzbekiston Respublikasi Qonuniga muvofiq oila aʼzolarini va boshqa shaxslarni kvartiraga, uyga (uyning bir qismiga) propiska qilish;

propiska va turar joyi boʻyicha hech qanday cheklashlarsiz, kvartirani, uyni boshqa har qanday kvartiraga, shu jumladan, kooperativ uy-joyga almashtirish;

shirkatlar tashkil etish, uy-joylardan va birgalikda foydalaniladigan joylardan foydalanishni tashkil etishni, davlat uy-joylardan foydalanish va tuzatish-qurish tashkilotlarini, kooperativlarni, xususiy hamda boshqa xoʻjalik yurituvchi subyektlarni ham qoʻshganda, mustaqil ravishda belgilash, uy-joyga xizmat koʻrsatish va ularni tuzatish boʻyicha shartnomalar tuzish;

uy-joylarni va ular atrofidagi hududlarni saqlash boʻyicha bajariladigan ishlar sifatini baholashda bevosita yoxud shirkat tarkibida qatnashish, shartnoma majburiyatlarini bajarmaganlik yoki zarur darajada bajarmaganlik uchun korxonalar, muassasalar va tashkilotlarga, shuningdek, alohida shaxslarga nisbatan jarima sanksiyalarini qoʻllash boʻyicha materiallar taqdim etish;

xususiylashtirilgan uy-joylardan fuqarolarni koʻchirmasdan asosli tuzatishni amalga oshirish mumkin boʻlmagan vaqt uchun mulkdorlardan yoki uy-joylardan foydalanishga vakil qilingan organlardan uy-joyni ijaraga olish”;

23-band chiqarib tashlansin.

1. Oʻzbekiston Respublikasi Vazirlar Mahkamasining “Toshkent shahrida davlat uy-joy fondini xususiylashtirish toʻgʻrisida” 1992-yil 13-avgustdagi 378-son qarori;

2. Oʻzbekiston Respublikasi Vazirlar Mahkamasining “Oʻzbekiston Respublikasida davlat uy-joy fondini xususiylashtirishni davom ettirish toʻgʻrisida” 1993-yil 1-martdagi 114-son qarorining 10-bandi.