Farmatsevtika mahsulotlari, davolash oziq-ovqatlari va tibbiy texnika sifatini nazorat qilish, standartlash va sertifikatsiyalash sohasida yagona davlat siyosatini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligining ushbu vazirlik tarkibida Dorivor vositalar va tibbiy texnika sifatini nazorat qilish bosh boshqarmasini tashkil etish toʻgʻrisidagi taklifi qabul qilinsin.

Bosh boshqarmaga dorivor vositalar va diagnostika vositalari, tibbiy texnika va tibbiy buyumlar sifati ustidan davlat nazoratini tashkil etish va amalga oshirish, dorivor vositalar, tibbiy buyumlar, davolash oziq-ovqatlari va tibbiy texnikani ekspertizadan oʻtkazuvchi, standartlashtiruvchi, roʻyxatdan oʻtkazuvchi va sertifikatsiyalovchi muassasalar va tashkilotlar faoliyatini muvofiqlashtirish va ularga rahbarlik qilish yuklansin.

Koʻrsatib oʻtilgan Bosh boshqarmani tashkil etish vazirlik markaziy apparati xodimlarining belgilangan soni doirasida amalga oshirilsin.

2. Farmakopeya qoʻmitasi “Oʻzfarmsanoat” davlat konserni ixtiyoridan sogʻliqni saqlash vazirligi tizimiga oʻtkazilsin.

3. Vazirlar Mahkamasi huzuridagi Oʻzbekiston davlat standartlash, metrologiya va sertifikatsiya markazi va Oʻzbekiston Respublikasi Sogʻliqni saqlash vazirligi dorivor vositalar, diagnostika, muhofazalash, pardoz vositalari va xom ashyosini, davolash-profilaktika oziq-ovqatlarini, oziq-ovqat qoʻshilmalari va sanitariya-gigiyena buyumlarini ekspertizadan oʻtkazuvchi nazorat-tahlil qilish laboratoriyalarini, farmatsevtika va oziq-ovqat mahsulotlarini, shuningdek tibbiy texnikani sinaydigan klinika va tajriba bazalarini ikki oy muddatda attestatsiyadan oʻtkazsin va akkreditatsiya qilsinlar.

4. Oʻzbekiston Respublikasi Sogʻliqni saqlash vazirligi:

ikki hafta muddatda Dorivor vositalar, tibbiy texnika sifatini nazorat qilish bosh boshqarmasi haqidagi Nizomni tasdiqlasin;

dorivor vositalar, tibbiy texnika va tibbiy buyumlar sifatini ekspertiza qilish, klinikada sinab koʻrish va davlat tomonidan nazorat qilishni tashkil etish va amalga oshirishni tartibga soluvchi normativ hujjatlarni bir oy muddatda qayta koʻrib chiqsin va belgilangan tartibda tasdiqlash uchun taqdim etsin.

5. Vazirlar Mahkamasining “Oʻzbekiston farmatsevtika sanoati (“Oʻzfarmsanoat”) davlat-aksionerlik konsernini tashkil qilish va uning faoliyati masalalari toʻgʻrisida” 1993-yil 17-iyundagi 290-son qarori 6-bandining ikkinchi xatboshi oʻz kuchini yoʻqotgan deb hisoblansin hamda ushbu qarorga 1-ilovadagi “Farmakopeya qoʻmitasi” soʻzlari chiqarib tashlansin.

6. Mazkur qarorning bajarilishini nazorat qilish Bosh vazir oʻrinbosari S.S. Saidqosimov zimmasiga yuklansin.