Oʻzbekiston Respublikasi Prezidentining “Jahon iqtisodiyoti va diplomatiya Universitetini tuzish toʻgʻrisida” 1992-yil 23-sentabrdagi Farmoniga muvofiq Vazirlar Mahkamasi qaror qiladi:

1. Maʼlumot uchun qabul qilinsinki, Oʻzbekiston Xalq demokratik partiyasi Markaziy Kengashi Siyosiy ijroiya qoʻmitasining roziligiga koʻra tugatilgan Siyosatshunoslik va boshqaruv institutining binolari va inshootlari mol-mulki, kutubxonasi va arxivi bilan birgalikda Oʻzbekiston Respublikasi Prezidenti apparati Ishlar Boshqarmasi tomonidan Universitet uchun sotib olinadi.

2. Belgilab qoʻyilsinki, Universitet mustaqil yuridik shaxs hamda Oʻzbekistonning tashqi aloqalari bilan bogʻliq ixtisoslar boʻyicha mutaxassislar, ilmiy va ilmiy-pedagogik xodimlar tayyorlash va qayta tayyorlash boʻyicha bosh tashkilot hisoblanadi, respublika va xorijiy bank muassasalarida oʻz hisoblariga, shu jumladan, valyuta hisoblariga, muhr va tamgʻalarga ega boʻladi.

3. Oʻzbekiston Respublikasi Moliya vazirligi:

a) oʻquv-metodik qoʻllanmalar va asarlarni chiqarish, MDH mamlakatlarining davriy matbuotiga obunani rasmiylashtirish, sputnik aloqasi tizimlari vositalarini sotib olish, xalqaro axborot shoxobchalariga qoʻshilish, Universitet xodimlarini taʼminlash va uning professor-oʻqituvchilari malakasini oshirish uchun, tashkiliy davrda, 1994-1995 oʻquv yili boshlangunga qadar, zarur mablagʻlar;

b) binolarni jihozlash va asosli tuzatish uchun, shuningdek, oʻquv va ilmiy asbob-anjomlarni sotib olish uchun 1992-yil va keyingi yillarda zarur budjetdan ajratiladigan mablagʻlar;

v) 1993-yildan boshlab har yili vazirliklar va idoralarning buyurtmalariga koʻra Universitet huzuridagi Boshqaruv instituti bazasida mutaxassislarni oʻqitish va qayta tayyorlash, “Jahon iqtisodiyoti va diplomatiya Universitetida oʻqiganlik uchun talabalarning haq toʻlash shartlari toʻgʻrisida”gi Nizomga muvofiq haq toʻlashdan ozod qilinadigan talabalarni oʻqitishga sarflangan xarajatlarni qoplash uchun zarur budjetdan ajratiladigan mablagʻlar ajratsin.

4. Universitetga Vazirlar Mahkamasining zaxira jamgʻarmasidan quyidagilar ajratilsin:

1992-yilda xorijiy tillardagi oʻquv adabiyotlarini sotib olish va chet mamlakatlarning davriy matbuotiga obunani rasmiylashtirish uchun 150 ming AKSH dollari miqdorida soʻm bilan qoplanadigan valyuta;

1993-yilda zamonaviy kommunikatsiya va oʻqitish vositalarini sotib olish va chet ellik olimlar va mutaxassislarning oʻqituvchilik va konsultativ faoliyatiga haq toʻlash uchun 300 ming AQSH dollari.

5. Belgilab qoʻyilsinki, Universitetda oʻqish ham shartnoma asosida, ham Oʻzbekiston Respublikasi respublika budjeti mablagʻlari hisobiga amalga oshiriladi.

6. Universitet respublika va mahalliy valyuta jamgʻarmalariga majburiy valyuta ajratmalari toʻlashdan 1996-yilgacha ozod qilinsin.

7. Universitet rahbariyatiga mavjud mablagʻlar doirasida quyidagilarni mustaqil amalga oshirish huquqi berilsin:

jahon tajribasini hisobga olgan holda Universitetda ishlash uchun mutaxassislarni, shu jumladan chet el mutaxassislarini jalb qilishning turli iqtisodiy shakllaridan foydalanish;

ularning mehnatiga haq toʻlash, shu jumladan, cheklanmagan miqdorlarda erkin almashtiriladigan valyutada haq toʻlash, yuqori malakasi, xorijiy tillarni bilganligi, kompyuter texnikasida ishlash koʻnikmalariga ega boʻlganligi uchun maxsus ustamalar shartlarini belgilash;

tuzilmani, oʻquv, ilmiy-metodik rejalar va dasturlarni, shuningdek, Universitetning shtat jadvalini tasdiqlash;

Universitetga talabalar, tinglovchilarni qabul qilish, bir oʻqituvchi hisobiga toʻgʻri keladigan talabalar va tinglovchilar nisbatini belgilash;

oʻqituvchilik va tadqiqotchilik ishi uchun taklif qilingan chet ellik olimlar va mutaxassislarning yashash va transport xarajatlarini soʻmlarda toʻlash;

rahbar xodimlarni, boshqaruv boʻgʻinlarining xodimlarini oʻrindoshlik, shuningdek, shartnoma asosida hamkorlik qilishga jalb etish.

8. Universitetga oʻquv jarayonining amaliy yoʻnalishini taʼminlash hamda xoʻjalik va tijorat faoliyatini amalga oshirish uchun oʻquv maqsadlarida innovatsiya-investitsiya kompaniyasi va tijorat banki ochishga ruxsat berilsin.

9. Oʻzbekiston Respublikasi Prezidenti devoni Ishlar Boshqarmasi oʻqituvchilik va tadqiqotchilik ishiga taklif qilingan chet ellik mutaxassislar uchun Universitet talabnomalariga koʻra oʻzining mehmonxona fondidan joy ajratsin.

11. Universitetga oʻquv jarayonini va ishlab chiqarish-texnika ehtiyojlarini taʼminlash uchun zarur boʻlgan miqdorda yuk tashiydigan va yengil avtotransport ajratilsin.

12. Oʻzbekiston Respublikasi Milliy xavfsizlik xizmati, Mudofaa vazirligi va Davlat jismoniy tarbiya va sport qoʻmitasi alohida mavzu boʻyicha leksiyalar tayyorlashda va oʻqishda Universitetga tegishli ravishda yordam bersinlar, talabalar va tinglovchilarni harbiy va jismoniy jihatdan tayyorlash boʻyicha maxsus dastur tayyorlashni va amalga oshirishni taʼminlasinlar.

13. Oʻzbekiston Respublikasi Oliy va oʻrta maxsus taʼlim vazirligi hamda Oliy attestatsiya komissiyasi Universitet taqdimnomasiga muvofiq tashqi aloqalar boʻyicha kadrlar tayyorlashni Jahon iqtisodiyoti va diplomatiya Universitetida jamlab, ixtisoslar va oliy oʻquv yurtlarini ixtisoslashtirish roʻyxatiga ilmiy xodimlar mutaxassisligi nomenklaturasiga oʻzgartirishlar kiritsinlar.

14. 1992-yil 30-dekabrgacha Universitet oʻquv guruhlarini Oliy oʻquv yurtlarining Oʻzbekiston Respublikasi fuqarolari boʻlgan talabalari orasidan ixtiyoriy asosda test tanlovi yoʻli bilan toʻldirish tugallansin.

15. Oʻzbekiston Respublikasi Tashqi ishlar vazirligi va Tashqi savdo vazirligi:

bir oy muddat ichida respublikaning xorijiy muassasalarida ishlash uchun kadrlar tarkibi rezervini shakllantirish toʻgʻrisida Nizom ishlab chiqsinlar, bunda mehnat munosabatlarini oʻrnatishning kontrakt shaklini nazarda tutsinlar;

1993-yil yanvardan boshlab Universitetning diplomatiya kurslarida respublikaning chet ellardagi muassasalarida ishlash uchun kadrlar rezervi birinchi guruhini tayyorlashni taʼminlasinlar;

Universitetni bitiruvchilarni har yili oʻz tuzilma boʻlinmalariga, shu jumladan, kontrakt asosida taqsimlashni, ularni oʻqitish xarajatlarini oʻz mablagʻlari hisobiga qoplashni imkoniyati bilan amalga oshirsinlar.

16. “Oʻzbekturizm” milliy kompaniyasi, Davlat bojxona qoʻmitasi va “Oʻzbekiston havo yoʻllari” milliy aviakompaniyasining 1993-yil yanvardan boshlab Jahon iqtisodiyoti va diplomatiya Universitetining Boshqaruv institutida ushbu tashkilotlarning tashqi munosabatlar mutaxassisliklari boʻyicha xodimlarini shartnoma asosida oʻqitish haqidagi takliflariga rozilik bildirilsin.

17. Oʻzbekiston Respublikasi Davlat matbuot qoʻmitasi:

Universitetni maxfiy boʻlmagan matbaa asarlarining va kitob mahsulotlarining nazorat nusxalarini (2 nusxa) kutubxonani toʻldirish uchun bepul oluvchi tashkilotlar roʻyxatiga kiritsin;

Universitetning oʻquv-uslubiy va ilmiy mahsulotlarini tezkorlik bilan nashr qilishni tashkil etsin;

1993-yilda Universitetning oʻz matbaa va tahririyat-nashriyot bazasini barpo etishga yordam bersin.

18. Oʻzbekiston Respublikasi fuqarolari boʻlgan Universitet rahbariyatiga va doimiy ishlovchi xodimlariga Oʻzbekiston Respublikasi Prezidentining “Diplomatiya martabalari va unvonlari berish tartibi toʻgʻrisida”gi Farmoni, shuningdek, tegishli chet el pasportlarini berish tartibi tatbiq qilinsin.

Universitet rektori lavozimi Favqulodda va Muxtor elchi martabasiga tenglashtirilsin.

19. Universitet rektoriga Vazirlar Mahkamasining boʻlim mudiriga, rektor oʻrinbosarlariga va tuzilma asosiy boʻlinmalarining rahbarlariga — boʻlim mudiri oʻrinbosari uchun belgilangan maishiy taʼminot va tibbiy xizmat koʻrsatish sharoitlari joriy qilinsin.

Oʻzbekiston Respublikasi Prezidenti devoni Ishlar Boshqarmasining Tibbiyot-sanitariya birlashmasi Universitetning oʻquv boʻlinmalari rahbarlarini, professor-oʻqituvchilar tarkibini, xodimlarini va ularning oila aʼzolarini shartnoma asosida tibbiy xizmat koʻrsatishga qabul qilsin.

20. Tashqi ishlar vazirligi, Tashqi savdo vazirligi, Markaziy bank, Tashqi iqtisodiy faoliyat milliy banki Universitetga talabalarning oʻz tuzilma boʻlinmalarida, shu jumladan, chet elda tajriba orttirishlariga moliyaviy va tashkiliy texnikaviy yordam bersinlar.

21. Jahon iqtisodiyoti va diplomatiya Universiteti huzuridagi Boshqaruv institutida 1993-1994-yillarda qayta tayyorlanadigan mansabdor shaxslarning ilova qilinayotgan roʻyxati tasdiqlansin.

Universitet rahbariyati 1992-yil 30-dekabrga qadar turli boʻgʻinlardagi kadrlarni maxsus dasturlar boʻyicha oʻqitish va qayta tayyorlash toʻgʻrisida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar va konsernlar bilan shartnomalar tuzsin.

Jahon iqtisodiyoti va diplomatiya Universiteti huzurida Boshqaruv instituti tashkil etilishi munosabati bilan oʻrtoq M.Q. Qoraboyevga 15 kun muddat ichida kadrlar malakasini oshirish idoraviy institutlarining amaldagi tizimini tartibga solish yuzasidan takliflar kiritish yuklatilsin.

22. Moliya vazirligi, Avtomobil transporti vazirligi Universitetga ikkita yengil avtomobil saqlash uchun zarur limitlar ajratsin.

23. Oʻzbekiston Respublikasi Aloqa vazirligi Universitetni zarur zamonaviy aloqa turlari va vositalari bilan, shu jumladan, sputnik va hukumat aloqasi bilan taʼminlasin.

24. Toshkent viloyati hokimi Universitetning doimiy ishlovchi ilmiy-oʻquv markazi va sport-sogʻlomlashtirish zonasini qurish uchun yer uchastkasi ajratish masalasini hal qilsin.

25. Universitet Oʻzbekiston Respublikasi Prezidentining farmonlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi Oliy Kengashi sessiyasining materiallari bir nusxada albatta yuboriladigan tashkilotlar roʻyxatiga kiritilsin.

26. Mazkur qarorning bajarilishini nazorat qilish Vazirlar Mahkamasining Ijtimoiy masalalar, fan va taʼlim boʻlimiga yuklatilsin.

1. Oʻzbekiston Respublikasi Prezidenti devoni masʼul xodimlari;

2. Vazirlar Mahkamasi apparatining masʼul xodimlari;

3. Oʻzbekiston Respublikasi Oliy Kengashi, Qoraqalpogʻiston Respublikasi Oliy Kengashi, xalq deputatlari viloyat Kengashlari, komissiyalari va qoʻmitalarining raislari va aʼzolari;

4. Viloyatlar, shaharlar, tumanlarning hokimlari va ularning oʻrinbosarlari;

5. Vazirlar, davlat qoʻmitalarining raislari va ularning oʻrinbosarlari;

6. Davlat nazorati tashkilotlari apparatining rahbarlari va xodimlari;

7. Vazirliklar, idoralar, milliy kompaniyalarning hayʼat aʼzolari, apparat xodimlari;

8. Konsernlar, ishlab chiqarish birlashmalari va korxonalarining rahbarlari va xodimlari;

9. Markaziy muassasalar va tashkilotlarning rahbarlari va xodimlari;

10. Valyuta-moliya tashkilotlari va banklarining rahbarlari va xodimlari;

11. Tashqi iqtisodiy va tashqi savdo tashkilotlari apparatining rahbarlari va xodimlari;

12. Oliy oʻquv yurtlari, ilmiy-tadqiqot va loyiha-konstruktorlik muassasalarining rahbarlari;

13. Jamoat tashkilotlarining rahbarlari va masʼul xodimlari;

14. Ijodiy tashkilotlar va uyushmalarning rahbarlari va masʼul xodimlari;

15. Respublika, viloyat va tuman gazetalari va jurnallarning muharrirlari.