Oʻzbekiston Respublikasi Saylov kodeksining 14 va 16-moddalariga muvofiq, Oʻzbekiston Respublikasi Markaziy saylov komissiyasi qaror qiladi:

1. Oʻzbekiston Respublikasi Markaziy saylov komissiyasining 2019-yil 23-iyuldagi 924-son qarori bilan tasdiqlangan Oʻzbekiston Respublikasi Oliy Majlisining Qonunchilik palatasiga, Xalq deputatlari viloyat, tuman va shahar kengashlariga saylov oʻtkazuvchi uchastka saylov komissiyalarining faoliyati tartibi toʻgʻrisidagi nizom quyidagi mazmundagi 98¹-band bilan toʻldirilsin:

“98¹. Uchastka saylov komissiyasining ovozlarni sanab chiqish natijalari toʻgʻrisidagi qaroridan norozi boʻlgan Oʻzbekiston Respublikasi Oliy Majlisining Qonunchilik palatasi deputatligiga yoki mahalliy Kengash deputatligiga nomzodlar yohud siyosiy partiyalarning vakolatli vakillari ovozlarni qayta sanab chiqilishini soʻrab tegishli okrug saylov komissiyasiga, okrug saylov komissiyasi tomonidan saylov okrugi boʻyicha saylov natijalari yuzasidan qaror qabul qilinguniga qadar asoslarni keltirgan holda, murojaat qilish huquqiga ega.

Tegishli okrug saylov komissiyasi murojaatni darhol koʻrib chiqadi. Agar murojaatda keltirilgan vajlar asosli deb topilsa, okrug saylov komissiyasi uchastka saylov komissiyasida ovozlarni qayta sanab chiqish haqida qaror qabul qiladi.

Bunda, uchastka saylov komissiyasi okrug saylov komissiyasining kamida bir nafar aʼzosi ishtirokida tegishli saylov uchastkasida saylov byulletenlarini qayta sanab chiqadi. Ovozlarni dastlabki sanab chiqish chogʻida xatolikka yoʻl qoʻyilgani aniqlansa, uchastka saylov komissiyasi aniqlangan xatoliklarni tuzatadi. Bu haqida majlis oʻtkazib, dastlabki bayonnomani bekor qilish asoslarini koʻrsatgan holda qaror qabul qiladi hamda yangi qaror bilan tuzatilgan bayonnomani tasdiqlaydi. Hamma tanishib chiqishi uchun osib qoʻyilgan dastlabki bayonnoma darhol yangisi bilan almashtiriladi.

Agar saylov byulletenlarini qayta sanab chiqish natijasiga koʻra dastlabki natijalar toʻgʻri boʻlganligi aniqlansa, bu haqda bayonnoma tuziladi va oʻqib eshittiriladi.

Basharti, murojaatda keltirilgan vajlar okrug saylov komissiyasi tomonidan asossiz deb topilsa, bu haqda murojaatchi xabardor qilinadi.

Uchastka saylov komissiyasining bayonnomasi ushbu Nizomning 98-bandi birinchi xatboshida belgilangan tartibda okrug saylov komissiyasiga taqdim etiladi.

Oʻzbekiston Respublikasi Oliy Majlis Qonunchilik palatasi deputatligiga yoki mahalliy Kengash deputatligiga nomzodlar yoxud siyosiy partiyalarning vakolatli vakillari qayta ovozlarni sanab chiqish natijalaridan ham norozi boʻlgan taqdirda, yuqori turuvchi saylov komissiyasiga yoki sudga murojaat qilishi mumkin.

Ovozlarni takroran qayta sanab chiqish yuqori turuvchi saylov komissiyasi yoki sudning qaroriga asosan mazkur bandning ikkinchi xatboshisida belgilangan tartibda yuqori turuvchi saylov komissiyasi aʼzosi ishtirokida amalga oshiriladi”.

2. Ushbu qaror Oʻzbekiston Respublikasi Markaziy saylov komissiyasining rasmiy veb-saytida eʼlon qilinsin.

3. Mazkur qarorning ijrosini nazorat qilish Oʻzbekiston Respublikasi Markaziy saylov komissiyasi raisining oʻrinbosari M. Istamov zimmasiga yuklansin.