Oʻzbekiston Respublikasi Prezidentining “Yangi oliy oʻquv yurtlarini tashkil qilish toʻgʻrisida” 1992-yil 28-fevraldagi Farmonini amalga oshirish maqsadida Vazirlar Mahkamasi qaror qiladi:

1. Bir oy muddat ichida quyidagi binolar, inshootlar, oʻquv-moddiy bazalari, 1992-yil taqsimoti rejalarida koʻzda tutilgan moddiy-texnika resurslari, transportga limitlar hamda kapital qurilish va joriy tuzatish uchun amaldagi normativlar balansdan-balansga bepul oʻtkazilsin:

dorilfununlarga aylantirilgan, Xalq taʼlimi vazirligiga qarashli tugatiladigan davlat pedagogika institutlari — Oliy va oʻrta maxsus taʼlim vazirligiga;

Melioratsiya va suv xoʻjaligi vazirligining Qishloq xoʻjaligini irrigatsiyalash va mexanizatsiyalash muhandislari institutining Qarshi dehqonchilik-iqtisodiyot institutiga aylantirilgan Qarshi filiali — Qishloq xoʻjaligi vazirligiga.

2. Oliy va oʻrta maxsus taʼlim vazirligi Toshkent davlat dehqonchilik dorilfununining Nukus filialini tashkil etish uchun Nukus davlat dorilfununi dehqonchilik fakultetining moddiy-texnika bazasini, qishloq xoʻjaligini mexanizatsiyalash fakultetini va iqtisodiyot fakultetining tegishli qismini vaqtincha Qishloq xoʻjaligi vazirligi ixtiyoriga oʻtkazsin.

3. Oliy va oʻrta maxsus taʼlim vazirligi, Xalq taʼlimi vazirligi, Qishloq xoʻjaligi vazirligi, Sogʻliqni saqlash vazirligi va Aloqa vazirligi yangidan tashkil qilingan oʻziga qarashli oliy oʻquv yurtlarining ustav va tuzilmalarini, filiallar uchun — Nizom va tuzilmalarini bir oy muddat ichida ishlab chiqsinlar va tasdiqlasinlar. Tugatilayotgan oʻrta maxsus oʻquv yurtlari oʻquvchilarining oʻqishni tugatishlari uchun zarur shart-sharoitlar yaratilsin.

4. Oliy va oʻrta maxsus taʼlim vazirligi, Xalq taʼlimi vazirligi, Qishloq xoʻjaligi vazirligi bilan birgalikda yangidan tashkil qilingan oʻquv yurtlarini malakali va tajribali professor-oʻqituvchi kadrlar bilan mustahkamlash yuzasidan zarur chora-tadbirlar koʻrsin, mutaxassislar tayyorlashning yuqori saviyada boʻlishini taʼminlasin.

5. Oʻzbekiston Respublikasi taraqqiyot istiqbolini belgilash qoʻmitasi, “Oʻzshartnomasavdo”, Moliya vazirligi, “Soyuztorgoborudovaniye” ishlab chiqarish-savdo korxonasi mutaxassislar tayyorlash, budjet, kapital mablagʻlar rejasiga tegishli oʻzgartishlar kiritsinlar, yangidan tashkil qilingan va qaytadan tuzilgan oʻquv yurtlarini saqlash uchun qoʻshimcha mablagʻlar va moddiy-texnika resurslari ajratishni nazarda tutsinlar.

6. Qoraqalpogʻiston Respublikasi Vazirlar Kengashi, viloyatlarning hokimliklari bir oy muddat ichida yangi tashkil qilingan institutlar va oliy oʻquv yurtlari boʻlimlarini joylashtirish, shu maqsadda xalq taʼlimi va sogʻliqni saqlash muassasalarining bino va inshootlaridan foydalanmagan holda, qoʻshimcha maydonlar ajratish masalasini hal etsinlar, moddiy-texnika bazasini, shu jumladan, oʻquv jarayonini normal tashkil qilish maqsadida oʻquv-maslahat punktlariga doimiy amaliy yordam koʻrsatsinlar. Doimiy ishlash uchun yuboriladigan professor-oʻqituvchi kadrlarga turar joy ajratish nazarda tutilsin.

7. Qoraqalpogʻiston Respublikasi Vazirlar Kengashi, Qashqadaryo viloyat hokimligi, Oʻzbekiston Respublikasi Qishloq xoʻjaligi vazirligi Toshkent davlat dehqonchilik dorilfununining Nukus filialiga va Qarshi dehqonchilik-iqtisodiyot institutiga oʻquv-tajriba xoʻjaligi uchun bittadan sovxoz ajratsinlar.

8. Yangidan tashkil qilinishi, qayta tashkil etilishi va respublikaning huquqiy tasarrufiga berilishi hisobiga oʻquv yurtlari tarmoqlarining anchagina kengayishini hisobga olib Vazirlar Mahkamasining 1992-yil 8-yanvardagi 3-son qarorining 11-moddasi Oliy va oʻrta maxsus taʼlim vazirligiga tatbiq etilmasin.