Oʻzbekiston Respublikasi Oliy Majlisining “Oʻzbekiston Respublikasining 2002-yilgi Davlat budjeti toʻgʻrisida” 2001-yil 6-dekabrdagi 305-II-son qaroriga muvofiq Vazirlar Mahkamasi qaror qiladi:

6. Oʻzbekiston Respublikasining Soliq kodeksiga muvofiq 2002-yil 1-yanvardan boshlab:

yuridik shaxslardan daromad (foyda) soligʻi stavkalari 3-ilovaga* muvofiq;

yuridik shaxslar yalpi daromadidan soliq stavkalari 4, 5 va 6-ilovalarga* muvofiq;

soliq solishning soddalashtirilgan tizimini qoʻllayotgan mikrofirmalar va kichik korxonalar uchun yagona soliq stavkalari 7-ilovaga* muvofiq;

yuridik va jismoniy shaxslarga toʻlanadigan dividendlar va foizlar tarzida olinadigan daromadlardan soliq stavkalari 8-ilovaga* muvofiq;

yuridik va jismoniy shaxslarning tadbirkorlik faoliyati daromadlaridan olinadigan chegaralangan soliq stavkalari 9, 10-ilovalarga* muvofiq;

ishlab chiqariladigan va chetdan keltiriladigan aksiz soligʻiga tortiladigan tovarlardan olinadigan aksiz soligʻi stavkalari 11-1, 11-2-ilovalarga* muvofiq;

suv resurslaridan foydalanganlik uchun soliq stavkalari 12-ilovaga* muvofiq;

yer osti boyliklaridan foydalanganlik uchun soliq stavkalari 13-ilovaga* muvofiq;

yuridik shaxslardan olinadigan mulk soligʻi stavkalari 14-ilovaga* muvofiq;

jismoniy shaxslardan olinadigan mulk soligʻi stavkalari 15-ilovaga* muvofiq;

yagona yer soligʻi stavkalari 16-ilovaga* muvofiq;

yagona yer soligʻi toʻlashga oʻtmagan toʻlovchilar uchun yer soligʻi stavkalari 17-ilovaga* muvofiq;

Qoraqalpogʻiston Respublikasi, viloyatlar va Toshkent shahar davlat hokimiyati organlari tomonidan joriy etiladigan mahalliy soliqlar va yigʻimlar stavkalari 18-ilovaga* muvofiq tasdiqlansin.

7. 2002-yilda:

barcha soliq solinadigan aylanmalar boʻyicha qoʻshilgan qiymat soligʻi stavkasi 20 foiz miqdorida;

pudrat qurilish tashkilotlari tomonidan qoʻshilgan qiymat soligʻi toʻlash tartibi;

“OʻzDEUavto” aksiyadorlik jamiyatining dilyerlari rasmiy maqomiga ega boʻlmagan jismoniy va yuridik shaxslardan yigʻim stavkasi “OʻzDEUavto” aksiyadorlik jamiyatida ishlab chiqarilgan olib chiqib ketiladigan avtomobillar dvigatel hajmining 1 kub. santimetri hisobiga 3,0 AQSh dollari miqdorida;

sotilmagan tayyor mahsulotning normativdan ortiqcha qoldigʻi uchun toʻlov, uni mahalliy budjetlar daromadlariga oʻtkazgan holda, ularning haqiqiy ishlab chiqarish tannarxining 2 foizi miqdorida;

normativdagi muddatlarda oʻrnatilmagan mulkdan va foydalanilmagan asbob-uskunalardan olinadigan soliqning oshirilgan stavkalari;

xorijiy investitsiyalar ishtirokidagi ishlab chiqarish korxonalari uchun daromad (foyda)dan olinadigan soliq stavkasiga pasaytiruvchi koeffitsiyentlar, foydalaniladigan mahalliy xomashyo, materiallar va butlovchi buyumlar qiymati salmogʻidan kelib chiqqan holda, 19-ilovaga* muvofiq;

ifloslantiruvchi moddalarni tabiiy muhitga chiqarib tashlaganlik, oqizganlik va chiqindilarni Oʻzbekiston Respublikasi hududiga joylashtirganlik uchun toʻlov va toʻlovni taqsimlash tartibi 20-1, 20-2, 20-3, 20-4-ilovalarga* muvofiq;

Qoraqalpogʻiston Respublikasi va Xorazm viloyati qishloq xoʻjaligi tovar ishlab chiqaruvchilari uchun yagona yer soligʻini taqsimlashning amaldagi normativlari Oʻzbekiston Respublikasi Moliya vazirligi, Davlat soliq qoʻmitasi hamda Qishloq va suv xoʻjaligi vazirligi tomonidan belgilanadigan tartibda;

Oʻzbekiston Respublikasi Vazirlar Mahkamasining “Jismoniy shaxslar ayrim toifalari daromadlariga imtiyozli soliq solish toʻgʻrisida” 1997-yil 24-dekabrdagi 562-son qarorining amal qilishi;

ijtimoiy sugʻurtaga hamda Respublika yoʻl jamgʻarmasiga majburiy badallar va ajratmalarning amaldagi miqdorlari 21, 22-ilovalarga* muvofiq saqlab qolinsin.

Davlat mulki hisoblanadigan, yashash uchun moʻljallanmagan joylar ijaraga berilganligi uchun ijara haqini taqsimlash normativlari 23-ilovaga* muvofiq belgilansin.

8. Oʻzbekiston Respublikasi Vazirlar Mahkamasining “Budjet tashkilotlarini mablagʻ bilan taʼminlash tartibini takomillashtirish toʻgʻrisida” 1999-yil 3-sentabrdagi 414-son qarori 4-bandining amal qilishi 2005-yil 1-yanvargacha uzaytirilsin, budjet tashkilotlari xodimlarini ijtimoiy muhofaza qilish va moddiy ragʻbatlantirish tadbirlariga yoʻnaltiriladigan mablagʻlar ulushini 25 foizgacha koʻpaytirish nazarda tutilsin.

9. Belgilansinki, 2002-yil 1-yanvardan boshlab:

ijtimoiy infratuzilmani rivojlantirish soligʻi va obodonchilik ishlari uchun yigʻim oʻrniga 18-ilovaga* muvofiq infratuzilmani rivojlantirish soligʻi;

fuqarolarning transport vositalari boʻyicha mol-mulk soligʻi oʻrniga 18-ilovaga* muvofiq jismoniy shaxslardan transport vositalari uchun benzin, dizel yonilgʻisi va suyultirilgan gazdan foydalanganlik uchun soliq;

yuridik shaxslardan olinadigan daromad (foyda) soligʻini hisoblab chiqarishda Oʻzbekiston Respublikasi Vazirlar Mahkamasi qaroriga koʻra oʻz mablagʻlari hisobiga kollejlar va litseylar qurilishi xarajatlari summasiga soliq solinadigan bazani kamaytirishga doir, lekin soliq solinadigan daromad (foyda)ni kamaytirishning belgilangan chegarasidan ortiq boʻlmagan miqdorda, qoʻshimcha imtiyozlar joriy etiladi.

10. Avtotransportni qisqa muddatga saqlash uchun toʻxtash joylaridan belgilangan soliq undirilishi 2002-yil 1-yanvardan boshlab 9-ilovaga* muvofiq yuridik shaxs maqomiga ega boʻlmagan hamda mulkchilik shakllaridan qatʼi nazar, yuridik shaxslarga (budjetdagi tashkilotlardan tashqari) biriktirib qoʻyilgan hududda joylashgan barcha avtotransportni qisqa muddatga saqlash uchun pulli toʻxtash joylariga joriy etilsin.

11. Belgilansinki, 2002-yil 1-iyuldan boshlab qonun hujjatlarida belgilangan muddatlarda ustav sarmoyasi (jamgʻarmasi)ni shakllantirmagan xorijiy investitsiyalar ishtirokidagi korxonalar qonun hujjatlarida belgilangan barcha soliqlar va toʻlovlarni toʻliq hajmda, butun faoliyati davrida imtiyozlar qoʻllanmagan holda toʻlaydilar.

Oʻzbekiston Respublikasi Moliya vazirligi Davlat soliq qoʻmitasi bilan birgalikda bir oy muddatda Qonun hujjatlarida belgilangan muddatlarda ustav sarmoyasi (jamgʻarmasi)ni shakllantirmagan xorijiy investitsiyalar ishtirokidagi korxonalardan soliq undirish tartibi toʻgʻrisidagi Nizomni ishlab chiqsin va belgilangan tartibda tasdiqlasin.

12. Belgilansinki, 2002-yil 1-yanvardan boshlab:

yalpi daromad soligʻini hamda mikrofirmalar va kichik korxonalar uchun yagona soliqni hisoblab chiqarishda soliq solinadigan daromadga davlat obligatsiyalari va davlatning boshqa qimmatli qogʻozlari boʻyicha olingan dividendlar va foizlar sifatida olingan daromadlar qoʻshilmaydi;

yuridik shaxslar tomonidan dividendlar sifatida olingan hamda yuridik shaxsning daromad olingan ustav sarmoyasi (jamgʻarmasi)ga yoʻnaltirilgan daromadlariga soliq solinmaydi.

yalpi daromaddan, savdo binolarini, maydonlarini va asbob-uskunalarini ijaraga berishdan daromad oluvchi soliq toʻlovchilar soliqlar, yigʻimlar va toʻlovlarning barcha turlarini qonun hujjatlarida belgilangan tartibda toʻlaydilar;

yuridik shaxslarning mol-mulkidan amortizatsiya va soliq hisoblab chiqarish asosiy fondlarning har yili qayta baholanadigan qiymatidan kelib chiqqan holda amalga oshiriladi;

mulkchilik shakllaridan qatʼi nazar, xoʻjalik yurituvchi subyektlar har yili 1-yanvardagi holatiga koʻra asosiy vositalar qiymatini, ularni joriy narxlarga muvofiqlashtirish uchun Oʻzbekiston Respublikasi Makroiqtisodiyot va statistika vazirligi tomonidan tasdiqlangan tartibda qayta baholaydilar.

13. Belgilab qoʻyilsinki, qishloq xoʻjaligi tovar ishlab chiqaruvchilari tomonidan toʻlanadigan yagona yer soligʻidan Oʻzbekiston Respublikasi Moliya vazirligi huzuridagi Qishloqni qishloq xoʻjaligi texnikasi bilan taʼminlashni davlat tomonidan ragʻbatlantirish jamgʻarmasiga 28 foiz miqdoridagi ajratmalar toʻlovchilar tomonidan Dehqon va fermer xoʻjaliklarini qoʻllab-quvvatlash jamgʻarmasiga belgilangan tartibda ajratilgandan keyin, Qoraqalpogʻiston Respublikasi va Xorazm viloyati hududida paxtachilik va gʻallachilikdagi ortiqcha xarajatlar qoplangandan keyin toʻlanadi.

19. Oʻzbekiston Respublikasi Moliya vazirligi hamda Mehnat va aholini ijtimoiy muhofaza qilish vazirligi manfaatdor vazirliklar va idoralar bilan birgalikda bir oy muddatda:

ish haqi, stipendiyalar, nafaqalar va pensiyalar toʻlash xarajatlarini moliyalashtirish tartibi va muddatlari toʻgʻrisidagi nizomni;

boshqaruv organlari taʼminoti xarajatlarini, ular xodimlari sonini 5 foizga qisqartirishni va boʻshab qolgan mablagʻlarni yuqori malakali xodimlarni moddiy ragʻbatlantirishga yoʻnaltirishni nazarda tutgan holda, moliyalashtirish tartibini ishlab chiqsinlar va belgilangan tartibda tasdiqlasinlar.

20. 2002-yil 1-yanvardan boshlab bolalarning maktabgacha bolalar muassasalaridagi taʼminoti va musiqa maktablarida oʻqiganligi uchun ota-onalar tomonidan toʻlanadigan toʻlovlarning tabaqalangan miqdorlari 28 va 29-ilovalarga* muvofiq belgilansin.

24. Oʻzbekiston Respublikasi Hukumatining 30-ilovaga* muvofiq qarorlari oʻz kuchini yoʻqotgan deb hisoblansin.

Oʻzbekiston Respublikasi Hukumatining 31-ilovaga* muvofiq ayrim qarorlariga oʻzgartirishlar va qoʻshimchalar kiritilsin.

25. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda mazkur qaror qabul qilinishi munosabati bilan amaldagi qonun hujjatlariga oʻzgartirishlar va qoʻshimchalar kiritish boʻyicha Vazirlar Mahkamasiga ikki hafta muddatda takliflar kiritsin.

Vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir hafta muddatda ilgari chiqarilgan normativ hujjatlarni mazkur qarorga muvofiqlashtirsinlar.