Mamlakat iqtisodiyotini uzoq muddatli rivojlantirish borasida keng koʻlamli islohotlar amalga oshirilayotgan sharoitda samarali soliqqa tortish tizimi va davlat soliq xizmati organlarining uygʻunlashgan faoliyati alohida ahamiyat kasb etadi.

Shu bilan birga, soliq nazoratining eskirgan uslub va prinsiplariga asoslangan davlat soliq xizmati organlari faoliyatini tashkil etish mazkur organlar oldiga qoʻyilgan yangi vazifalarni hal qilish, jumladan soliq solinadigan bazani kengaytirish va soliqlar yigʻiluvchanligining oshirilishini taʼminlash imkonini bermaydi, oʻz yechimini topmagan sezilarli muammolarning mavjudligi ushbu holatni yanada ogʻirlashtirmoqda, xususan:

birinchidan, soliq solishning qoʻshimcha manbalarini izlamasdan soliq hisoboti bilan cheklanib qolgan, asosan prognoz koʻrsatkichlarini bajarish bilan bogʻliq boʻlgan soliq maʼmuriyatchiligining past darajasi;

ikkinchidan, soliq maʼmuriyatchiligida korrupsiyaviy muhitni shakllantirayotgan, davlat soliq xizmati organlarining deyarli barcha boʻgʻinlarida xodimlar korrupsiyalashuviga olib kelayotgan sezilarli shart-sharoitlarning mavjudligi;

uchinchidan, soliq maʼmuriyatchiligini toʻliq amalga oshirish, soliq solinadigan qoʻshimcha bazani aniqlash, iqtisodiyotda xufiyona aylanmalar darajasini qisqartirishga imkon bermaydigan axborot-kommunikatsiya texnologiyalaridan oqilona foydalanmaslik;

toʻrtinchidan, kameral nazoratni, jumladan soliq imtiyozlari va preferensiyalaridan maqsadli foydalanilishi ustidan kameral nazoratni amalga oshirish uchun tashqi manbalarni yigʻishni taʼminlaydigan taʼsirchan dasturiy mahsulotlarning mavjud emasligi;

beshinchidan, soliqlar toʻlashdan boʻyin tovlashning turli sxemalari yaratilishiga olib kelayotgan, savdo, umumiy ovqatlanish korxonalari, bozorlar va savdo komplekslari faoliyatini nazorat qilish boʻyicha berilgan vakolatlardan samarasiz foydalanilishi;

oltinchidan, maqsadli tekshiruvlar tashkil etish uchun soliqlarni toʻlashdan muntazam ravishda boʻyin tovlayotgan shaxslarni, shuningdek, soliqqa oid huquqbuzarliklarni keltirib chiqaruvchi omillarni aniqlashning aniq mezonlari mavjud emasligi;

yettinchidan, mavjud resurslardan davlat soliq xizmati organlari xodimlarini moddiy ragʻbatlantirish uchun yetarlicha foydalanilmayotganligi va intizomiy javobgarlikka tortish darajasi haddan tashqari yuqoriligi umuman soliq tizimining samaradorligiga salbiy taʼsir koʻrsatmoqda.

Mavjud muammolarni bartaraf qilish, Oʻzbekiston Respublikasi soliq siyosatini takomillashtirishning asosiy yoʻnalishlarini va 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalarni amalga oshirish maqsadida:

1. Quyidagilar Oʻzbekiston Respublikasi soliq maʼmuriyatchiligi tizimini takomillashtirishning eng muhim yoʻnalishlari hisoblansin:

birinchidan, davlat soliq xizmati organlarini soliq toʻlovchilarning biznes-hamkori va maslahatchisi sifatidagi yangi imidjini yaratish orqali xizmat koʻrsatishga yoʻnaltirilgan idoraga aylantirish, har bir xodim tomonidan “Soliq xizmati — insofli soliq toʻlovchilarning ishonchli hamkori” degan maqsadli vazifani soʻzsiz bajarish;

ikkinchidan, eksterritoriallik prinsipi asosida soliq toʻlovchilar oʻz soliq majburiyatlarini ixtiyoriy bajarishi, biznesni qonuniy, shaffof va qulay yuritish uchun maqbul shart-sharoitlar yaratish, soliq toʻlovchilarning qoniqish darajasining oshishini taʼminlash;

uchinchidan, soliq maʼmuriyatchiligi va nazoratining mutlaqo yangi tizimini yaratish, shuningdek, korrupsiyaviy omillarga yoʻl qoʻymaslik boʻyicha preventiv va oldini olish choralarini qoʻllash;

toʻrtinchidan, soliq toʻlovlarining oʻz vaqtida va bir xildagi tushumini taʼminlash, maʼmuriy tartib-taomillarni maksimal darajada kamaytirish va soddalashtirish, soliq solinadigan bazani kengaytirish va iqtisodiyotda xufiyona aylanmalarni qisqartirish hisobiga budjetlarning daromad qismini barqaror shakllantirish;

beshinchidan, tekshiruvdan oldingi tahlil va masofaviy nazorat-tahlil ishlarini amalga oshirish uchun maʼlumotlarni toʻliq yigʻish va qayta ishlashni taʼminlaydigan zamonaviy, ilgʻor axborot-kommunikatsiya texnologiyalarini joriy etish choralarini yanada kuchaytirish;

oltinchidan, davlat soliq xizmati organlari xodimlariga korporativ etikani singdirish, davlat soliq xizmati organlarining strategik maqsad va vazifalariga erishish uchun oʻz xizmat faoliyati samaradorligini oshirish motivatsiyasi tizimini joriy etish.

2. Belgilansinki, 2019-yil 1-yanvardan davlat soliq xizmati organlari xizmat koʻrsatish, savdo va umumiy ovqatlanish sohasidagi tadbirkorlik subyektlari uchun yagona soliq toʻlovini, yagona yer soligʻini, yuridik shaxslardan yer soligʻini, shuningdek, bank aylanmalari haqidagi maʼlumotlar, shuningdek, boshqa tashqi manbalar asosida deklaratsiya qilinadigan daromadlar boʻyicha jismoniy shaxslardan olinadigan daromad soligʻini hisoblash tarzida soliq toʻlovchilarga servis xizmatlari koʻrsatadi hamda hisoblangan soliqlar summasi haqida soliq toʻlovchining “shaxsiy kabineti” orqali xabarnoma yuboradi.

Oʻzbekiston Respublikasi Davlat soliq qoʻmitasi, Moliya vazirligi, Markaziy banki va Savdo-sanoat palatasi bir oy muddatda xorijiy mamlakatlarning ilgʻor tajribasini oʻrganish yakuniga koʻra tashqi maʼlumotlar va soliq toʻlovchilarning deklaratsiyalari asosida davlat soliq xizmati organlari tomonidan hisoblanadigan soliqlar va boshqa majburiy toʻlovlar roʻyxatini bosqichma-bosqich kengaytirish boʻyicha kompleks chora-tadbirlarni tasdiqlasin.

4. Belgilab qoʻyilsinki, 2018-yil 1-oktabrdan:

davlat soliq xizmati organlari xoʻjalik yurituvchi subyektlar faoliyatida oʻtkazilgan xronometraj natijalariga koʻra oxirgi hisobot davri uchun tovar (ish, xizmat)lar realizatsiyasidan kamaytirib koʻrsatilgan tushum va xodimlar soni qayta hisob-kitob qilingan soliqlarni hisoblashni amalga oshirish haqida talabnoma yuboradi, kamaytirib koʻrsatish takroran aniqlanganda, ushbu harakatlar soliq toʻlashdan boʻyin tovlash sifatida malakalanadi;

uchinchi shaxslar tomonidan soliq toʻlovchi-jismoniy shaxs uchun toʻlangan soliq summasi soliq toʻlovchining soliq solinadigan daromadi hisoblanmaydi;

davlat soliq xizmati organlari soliqlar va boshqa majburiy toʻlovlarni hisoblash uchun asos boʻladigan koʻzdan kechirish dalolatnomasini tuzish orqali soliq toʻlovchilarning pasportlashtirilishini yuritadi.

5. Davlat soliq xizmati organlari faoliyati samaradorligini baholashning quyidagi asosiy mezonlari belgilansin:

davlat soliq xizmati organlari ishining sifatini qoniqarli baholaydigan soliq toʻlovchilar, shuningdek, ularning harakatlari va qarorlari ustidan shikoyatlarning soni;

kameral nazorat natijasi boʻyicha undirilgan soliqlar va boshqa majburiy toʻlovlarning umumiy summasi;

xronometraj va koʻzdan kechirish natijalari boʻyicha aniqlangan davlat budjeti daromadlarini oshirish zaxiralari summasi va ularni undirish darajasi;

pasportlari tuzilgan soliq toʻlovchilarning soni;

hisoblangan soliq va boshqa majburiy toʻlovlar undirilishining toʻliqligi va soliq qarzdorligining pasayish darajasi;

davlat soliq xizmati organlari bilan oʻzaro munosabatlarda “shaxsiy kabinet”dan foydalanish darajasi;

elektron hisobvaraq-fakturalarni hisobga olish va onlayn nazorat-kassa mashinalarini avtomatlashtirilgan monitoring qilish boʻyicha dasturiy mahsulotlarni qoʻllayotgan soliq toʻlovchilarning qamrab olinishi.

6. Davlat soliq xizmati organlari xodimlari Oʻzbekiston Respublikasi Davlat soliq qoʻmitasining Moddiy yordam, ijtimoiy himoya, soliq organlarini rivojlantirish va koʻzda tutilmagan xarajatlar maxsus jamgʻarmasi (keyingi oʻrinlarda Maxsus jamgʻarma deb yuritiladi) hisobidan quyidagi summalarning 10 foiziga qadar miqdorda mukofotlanishi belgilansin:

kameral nazorat natijasi boʻyicha undirilgan soliqlar va boshqa majburiy toʻlovlar;

bir oy mobaynida xronometraj va pasportlashtirish natijasi boʻyicha aniqlangan, soliq toʻlovchi tomonidan toʻlangan soliq;

soliq tekshiruvlari natijasi boʻyicha undirilgan soliqlar.

Oʻzbekiston Respublikasi Davlat soliq qoʻmitasi bir oy muddatda yakuniy natijalarga erishishdan kelib chiqib davlat soliq xizmati organlari faoliyatining samaradorligini baholash mezonlarini va ularni moddiy ragʻbatlantirish chora-tadbirlarini tasdiqlasin.

Maxsus jamgʻarmaga soliq toʻgʻrisidagi qonun hujjatlarini buzganlik uchun moliyaviy sanksiyalar va maʼmuriy huquqbuzarlik uchun jarimalar summasidan ajratmalar miqdori 25 foizdan 40 foizga oshirilsin, bunda qoʻshimcha tushadigan mablagʻlar xodimlarni shaxsiy mukofotlashga maqsadli yoʻnaltirilsin.

7. Davlat soliq xizmati organlariga quyidagi huquqlar berilsin:

soliq toʻlovchi qayd etilgan manzilda boʻlmagan, shuningdek, soliq toʻlovchi tomonidan soliq yoki moliyaviy hisobot, kameral nazorat natijalari yuzasidan tafovutlarning asoslari yoxud aniqlashtirilgan soliq hisoboti belgilangan muddatda taqdim etilmagan hollarda soliq toʻlovchi-yuridik shaxslarning bank hisobvaraqlari boʻyicha operatsiyalarni toʻxtatib turish;

davlat ulushlari boʻyicha dividendlarni va davlat unitar korxonalarining sof foydasidan Oʻzbekiston Respublikasi Davlat budjetiga ajratmalarni undirish;

soliq toʻlovchi tomonidan taqdim etiladigan axborotning ishonchliligini hamda soliq toʻlovchining hisobotlarida aks ettirilgan soliq va bojxona imtiyozlarini qoʻllashning qonuniyligini tasdiqlash uchun kameral nazorat natijasi boʻyicha joyiga chiqqan holda mavzuga oid va ekspress-oʻrganishlarni amalga oshirish;

yuzaga kelgan soliq qarzdorligini soliq toʻlovchi-jismoniy shaxslarning plastik kartalariga xizmat koʻrsatuvchi bank hisobvaraqlaridan oyiga eng kam oylik ish haqining ikki baravari miqdoridan koʻp boʻlmagan summada soʻzsiz hisobdan chiqarish.

8. Oʻzbekiston Respublikasi Davlat soliq qoʻmitasining “Respublika axborot-maslahat markazi” va “Soliq deklaratsiyalarini qayta ishlash markazi” davlat unitar korxonalari negizida “Soliq-servis” davlat unitar korxonasini (keyingi oʻrinlarda — “Soliq-servis” DUK) uning hududiy markazlarini tuzgan holda tashkil etish toʻgʻrisidagi taklifi maʼqullansin.

Quyidagilar “Soliq-servis” DUKning asosiy vazifalari etib belgilansin:

soliq toʻlovchilarga soliq majburiyatlarini bajarishda texnik jihatdan koʻmaklashish, shuningdek, hisobotlar va deklaratsiyalarni qabul qilish boʻyicha soliq toʻlovchilarga xizmat koʻrsatish yuzasidan davlat soliq xizmati organlariga amaliy yordam berish;

davlat soliq xizmati organlarining avtomatlashtirilgan axborot tizimini texnik, dasturiy va axborot taʼminotini boshqarish;

davlat soliq xizmati organlari faoliyati natijasida yuzaga keladigan hujjatlarni qogʻoz va elektron shaklda markazlashgan holda arxivda saqlash;

“call-markaz” maxsus servisi orqali aholiga axborot xizmatlarini koʻrsatish;

soliq toʻlovchilarni elektron hisobvaraq-fakturalarni yuritish qoidalari boʻyicha oʻqitish, ularga soliq toʻgʻrisidagi qonun hujjatlari normalarini yetkazish;

axborotni himoya qilish tadbirlarini amalga oshirish;

davlat soliq xizmati organlari xodimlarining bilim va malakasini oshirish.

Davlat soliq qoʻmitasi:

davlat soliq xizmati hududiy organlarining yuqorida koʻrsatilgan funksiyalarni bajaradigan boshqaruv xodimlari shtat birliklarini qisqartirish;

Maʼlumotlarni qayta ishlash markazi ishini tubdan takomillashtirish, jumladan soliq toʻlovchilar uchun yangi dasturiy mahsulotlar va servislarni ishlab chiqish boʻyicha kompleks chora-tadbirlarni qabul qilishni nazarda tutsin.

9. “Soliq-servis” DUKning xizmatlari budjet mablagʻlari va Maxsus jamgʻarma mablagʻlari, shuningdek, qonun hujjatlari bilan taqiqlanmagan boshqa manbalar hisobidan toʻlanishi belgilansin.

“Soliq-servis” DUK tomonidan koʻrsatiladigan barcha xizmatlar soliqlar va boshqa majburiy toʻlovlar toʻlashdan ozod etilsin.

10. Oʻzbekiston Respublikasi Moliya vazirligi huzurida Soliq toʻlovchilar va davlat soliq xizmati organlari oʻrtasidagi soliq nizolarini sudgacha hal qilish kengashi tashkil qilinsin, quyidagilar uning asosiy vazifalari etib belgilansin:

soliq toʻgʻrisidagi qonun hujjatlarini qoʻllashda nizoli masalalar yuzasidan xulosalar chiqarish;

soliq toʻgʻrisidagi qonun hujjatlari buzilishini aniqlashda soliq toʻlovchilar va davlat soliq xizmati organlari oʻrtasida yuzaga keladigan nizolarni koʻrib chiqish;

soliq nizolarini koʻrib chiqish jarayonida aniqlangan soliq toʻgʻrisidagi qonun hujjatlaridagi kamchiliklarni bartaraf etish boʻyicha takliflar kiritish.

Oʻzbekiston Respublikasi Vazirlar Mahkamasi bir oy muddatda Soliq toʻlovchilar va davlat soliq xizmati organlari oʻrtasidagi soliq nizolarini sudgacha hal qilish kengashining tarkibi va nizomini tasdiqlasin.

11. Oʻzbekiston Respublikasi Davlat soliq qoʻmitasi tuzilmasida:

yirik soliq toʻlovchilarga xizmat koʻrsatish, jumladan soliq hisobotlarini qabul qilish, kameral nazorat oʻtkazish, soliqlar va boshqa majburiy toʻlovlarni undirish majburiyati yuklatilgan Yirik soliq toʻlovchilar boʻyicha hududlararo davlat soliq inspeksiyasi;

davlat soliq xizmati organlari faoliyatining samaradorligini baholash va ularning rivojlanish strategiyasini ishlab chiqish vazifasi yuklatilgan Tahlil boshqarmasi tashkil etilsin.

12. Davlat soliq xizmati organlari xodimlari faoliyatida korrupsiyaviy jihatlarga barham berish maqsadida Chakana savdo va xizmat koʻrsatish sohasida huquqbuzarliklarni profilaktika qilish bosh boshqarmasi hamda uning hududiy boʻlinmalari tugatilsin.

13. Soliq akademiyasi Oʻzbekiston Respublikasi Davlat soliq qoʻmitasi huzuridagi Malaka oshirish markazi etib qayta tashkil qilinsin.

Oʻzbekiston Respublikasi Vazirlar Mahkamasi bir oy muddatda:

Oʻzbekiston Respublikasi Davlat soliq qoʻmitasi huzuridagi Malaka oshirish markazi faoliyatini tashkil qilish, uning moddiy-texnika bazasini mustahkamlash, oʻqitishning zamonaviy uslublarini, jumladan malaka oshirishning masofaviy shakllarini joriy etish, shuningdek, hududiy filiallarini tuzishni nazarda tutgan holda hukumat qarorini qabul qilsin;

qayta tashkil etilayotgan Soliq akademiyasining bakalavriat va magistratura talabalarining oʻqishini tegishli yoʻnalishlar boʻyicha Toshkent davlat iqtisodiyot universiteti va Toshkent moliya institutiga koʻchirish choralarini koʻrsin.

14. Quyidagilar:

Oʻzbekiston Respublikasi Davlat soliq qoʻmitasining tashkiliy tuzilmasi 1-ilovaga muvofiq;

Oʻzbekiston Respublikasi Davlat soliq qoʻmitasi markaziy apparatining tuzilmasi 2-ilovaga muvofiq tasdiqlansin.

15. Davlat soliq xizmati organlari boshqaruv xodimlarining cheklangan soni 11 903 nafar, jumladan Oʻzbekiston Respublikasi Davlat soliq qoʻmitasi markaziy apparati boshqaruv xodimlarining cheklangan soni 257 nafar etib belgilansin.

Oʻzbekiston Respublikasi Davlat soliq qoʻmitasi raisiga Oʻzbekiston Respublikasi Prezidenti devoni bilan kelishilgan holda quyidagi huquqlar berilsin:

Oʻzbekiston Respublikasi Davlat soliq qoʻmitasi markaziy apparatining tasdiqlangan tuzilmasiga boshqaruv xodimlarining belgilangan umumiy soni doirasida oʻzgartishlar kiritish;

Qoraqalpogʻiston Respublikasi, viloyatlar va Toshkent shahar davlat soliq boshqarmalari, tuman (shahar)lar davlat soliq inspeksiyalari, shuningdek, Yirik soliq toʻlovchilar boʻyicha hududlararo davlat soliq inspeksiyasining tuzilmasini tasdiqlash;

davlat soliq xizmatining hududiy organlari boshqaruv xodimlarining cheklangan sonini, jumladan “Soliq-servis” DUK tashkil etilishi munosabati bilan boshqaruv xodimlarining shtat birliklari qisqartirilishini hisobga olgan holda tasdiqlash;

Maxsus jamgʻarma mablagʻlari hisobidan davlat soliq xizmati organlari boshqaruv xodimlari mutaxassislarining qoʻshimcha shtat birliklarini joriy etish.

16. Quyidagilar:

a) Oʻzbekiston Respublikasi Davlat soliq qoʻmitasi raisining:

Oʻzbekiston Respublikasi Davlat budjeti va davlat maqsadli jamgʻarmalariga tushumlar prognozining bajarilishi;

soliqlar va boshqa majburiy toʻlovlarning toʻliq va oʻz vaqtida tushishini taʼminlash ustidan lozim darajada nazorat oʻrnatilishi;

Oʻzbekiston Respublikasi Prezidenti, Vazirlar Mahkamasining qarorlari, boshqa normativ-huquqiy hujjatlar talablarining oʻz vaqtida va sifatli bajarilishi;

davlat soliq xizmati organlariga yuqori maʼnaviy-axloqiy sifatlarga ega malakali xodimlarni jalb etishga qaratilgan, kadrlarni tanlash, joy-joyiga qoʻyish va ragʻbatlantirishning mutlaqo yangi tizimi yaratilishi;

xodimlarning xizmatga boʻlgan munosabatini tubdan oʻzgartirish, qonun buzilishining barcha koʻrinishlariga nisbatan murosasiz munosabatda boʻlish muhiti yaratilishi, jamoada sogʻlom muhit shakllantirilishi;

davlat soliq xizmati organlari faoliyatining ochiqligi taʼminlanishi, soliq toʻlovchilar bilan toʻgʻridan-toʻgʻri aloqasiz muloqot oʻrnatilishi;

soliq maʼmuriyatchiligining zamonaviy uslublarini joriy etish sohasida xalqaro ekspertlar, grantlarni jalb etish ishlari;

davlat soliq xizmati organlarining moddiy-texnika jihatdan taʼminlanishi uchun;

b) Oʻzbekiston Respublikasi Davlat soliq qoʻmitasi raisi birinchi oʻrinbosarining:

Oʻzbekiston Respublikasi Davlat budjetiga va davlat maqsadli jamgʻarmalariga soliqlar va boshqa majburiy toʻlovlar toʻliq va oʻz vaqtida tushishining taʼminlanishi;

soliq toʻgʻrisidagi qonun hujjatlari va huquqni qoʻllash amaliyotini takomillashtirish boʻyicha takliflar tayyorlanishi, soliq nazoratini amalga oshirishning zamonaviy uslublari joriy etilishi, soliq sohasidagi huquqbuzarliklarning sabab va shart-sharoitlari tahlil qilinishi, ularga barham berish choralari koʻrilishi;

soliq solish bazasini kengaytirish boʻyicha, jumladan makroiqtisodiy koʻrsatkichlar dinamikasi va hududlarning soliq salohiyatini tizimli tahlil qilish orqali kompleks chora-tadbirlar koʻrilishi;

nazorat amalga oshirilishi va soliq qarzdorligi oshishiga yoʻl qoʻyilmasligi, xalqaro tajribani chuqur oʻrganish orqali soliq tizimi modernizatsiya qilinishi uchun;

v) Oʻzbekiston Respublikasi Davlat soliq qoʻmitasi raisi oʻrinbosarlarining:

soliq maʼmuriyatchiligi samaradorligini oshirishga koʻmaklashuvchi soliq toʻgʻrisidagi qonun hujjatlarini ishlab chiqish va qoʻllash metodologiyasi takomillashtirilishi;

Oʻzbekiston Respublikasi Davlat budjeti daromadlari darajasini oshirish uchun zaxiralarni izlash va aniqlash boʻyicha tizimli ishlar olib borilishi;

soliq majburiyatlarini oʻz vaqtida bajarganligi uchun tadbirkorlik subyektlarini ragʻbatlantirish choralari koʻrilishi;

soliq solish qismida iqtisodiyotning xufiyona sektorini legallashtirishga qaratilgan tizimli nazorat taʼminlanishi;

sifatsiz, qalbaki (yasama) va noqonuniy olib kirilgan tovarlar ishlab chiqarilishi, shuningdek, realizatsiya qilinishiga qarshi kurashishning holati va samaradorligi;

soliq maʼmuriyatchiligi jarayoniga zamonaviy axborot-kommunikatsiya texnologiyalari va tahlilning ilgʻor avtomatlashtirilgan uslublari, elektron hisobvaraq-fakturalarni hisobga olish va onlayn nazorat-kassa mashinalarining avtomatlashtirilgan monitoringi boʻyicha dasturiy mahsulotlar joriy etilishi hamda samarali faoliyat koʻrsatishi;

jismoniy va yuridik shaxslarning murojaatlari puxta, har tomonlama, toʻliq va obyektiv koʻrib chiqilishi, fuqarolar shaxsan qabul qilinishi;

Oʻzbekiston Respublikasi Davlat soliq qoʻmitasi huzuridagi Malaka oshirish markazi va soliq kollejlari faoliyati samarali tashkil etilishi uchun shaxsiy javobgarligi belgilab qoʻyilsin.

17. Davlat soliq xizmati organlari faoliyati va soliq maʼmuriyatchiligini takomillashtirish boʻyicha chora-tadbirlar dasturi 3-ilovaga* muvofiq tasdiqlansin.

Vazirlik va idoralar rahbarlari Dasturda nazarda tutilgan chora-tadbirlarning oʻz vaqtida va samarali amalga oshirilishi uchun shaxsan javobgar ekanligi belgilansin.

18. Oʻzbekiston Respublikasi Davlat soliq qoʻmitasi manfaatdor vazirlik va idoralar bilan birgalikda:

bir oy muddatda soliq toʻlashdan boʻyin tovlayotgan shaxslar, yashirilgan soliq solish obyektlari, shuningdek, noqonuniy olib kirilgan tovarlar yetkazilishi, saqlanishi va realizatsiya qilinishi, yashirin sexlarni aniqlash yuzasidan tizimli qoʻshma reydlarni tashkil etish boʻyicha chora-tadbirlarni qabul qilsin;

ikki oy muddatda davlat soliq xizmati organlarining huquqni muhofaza qiluvchi organlar bilan oʻzaro hamkorlik qilish tartibi toʻgʻrisidagi nizomni, jumladan offshor zonalarda roʻyxatdan oʻtgan shaxslar bilan operatsiyalarni amalga oshiradigan soliq toʻlovchilarni monitoring qilishni nazarda tutgan holda tasdiqlasin;

uch oy muddatda soliq sohasida fuqarolar tomonidan jamoatchilik nazorati amalga oshirilishi uchun ijtimoiy tarmoqlar va dasturiy mahsulotlarning salohiyatidan foydalanish mumkin boʻlgan, jumladan ularga tadbirkorlik subyektlarining soliqqa oid huquqbuzarliklari toʻgʻrisida xabar qilish imkonini beruvchi veb-portal ochish boʻyicha chora-tadbirlarni amalga oshirsin;

bir oy muddatda qoʻshilgan qiymat soligʻini elektron boshqarish tizimini, jumladan soliqlar yigʻiluvchanligini oshirish va insofsiz soliq toʻlovchilarni aniqlash maqsadida barcha aylanmalar zanjirini tahlil va nazorat qilish uchun davlat soliq xizmati organlarida elektron hisobvaraq-fakturalarni hisobga olish boʻyicha dasturiy kompleksni joriy etish yuzasidan takliflar kiritsin.

19. 2018-yil 1-avgustdan mahalliy budjetlarning daromad bazasini kengaytirish zaxiralarini aniqlash faoliyatini moddiy ragʻbatlantirishni oshirish va korrupsiya holatlarining oldini olish maqsadida Yagona tarif setkasi boʻyicha mehnatga haq toʻlashning tasdiqlangan razryadlariga muvofiq davlat soliq xizmati organlari xodimlarining lavozim maoshini belgilashda tarif koeffitsiyenti 1,7 baravarga oshirilgan miqdorda qoʻllanilishi belgilansin.

Mazkur bandda nazarda tutilgan tadbirlarni amalga oshirish bilan bogʻliq xarajatlar budjet mablagʻlari hisobidan amalga oshiriladi.

20. Oʻzbekiston Respublikasi Moliya vazirligi:

Iqtisodiyot vazirligi bilan birgalikda ikki oy muddatda soliq imtiyozlarini qoʻllash samaradorligini monitoring qilish va baholash tizimini joriy etish, samarasiz foydalanilgan imtiyoz summalarini budjetga majburiy qaytarish mexanizmlarini mustahkamlashni nazarda tutadigan soliq imtiyozlarini maqsadli berish tartibini tasdiqlasin;

Davlat soliq qoʻmitasi bilan birgalikda ikki hafta muddatda Oʻzbekiston Respublikasi Davlat soliq qoʻmitasining xarajatlar smetasi va shtatlar jadvaliga mazkur qarorga muvofiq tegishli qoʻshimcha va oʻzgartishlar kiritsin;

Oʻzbekiston Respublikasi Davlat soliq qoʻmitasiga Maʼlumotlarni qayta ishlash markazini kengaytirish, zamonaviy elektron maʼmuriyatchilik tizimini, jumladan elektron hisobvaraq-fakturalarni hisobga olish va onlayn nazorat-kassa mashinalarini avtomatlashtirilgan monitoring qilish tizimi dasturiy mahsulotlarini joriy etish, shuningdek, davlat soliq xizmati organlari binolarini qurish, rekonstruksiya qilish va kapital taʼmirlash uchun 2018-yilda zarur mablagʻlarni ajratsin, 2019-yildan boshlab esa har yili Oʻzbekiston Respublikasi Davlat budjeti parametrlarida nazarda tutsin.

21. Oʻzbekiston Respublikasi Davlat soliq qoʻmitasi raisi quyidagilar boʻyicha taʼsirchan choralar koʻrsin:

yuqori professional malaka va maʼnaviy-axloqiy sifatlarga ega boʻlgan professional kadrlarni tanlash va joy-joyiga qoʻyish;

mamlakat iqtisodiy manfaatlarini himoya qilish borasida vijdonan xizmat qilayotgan xodimlarni ularning shaxsiy hissasidan kelib chiqqan holda ragʻbatlantirish mexanizmlarini yaratish;

davlat soliq xizmati organlari xodimlari tomonidan korrupsiya koʻrinishlari va mansab suiisteʼmolchiliklari sodir etilishining barcha xavflarini bartaraf qilish;

aholi va xoʻjalik yurituvchi subyektlar oʻrtasida keng tushuntirish, profilaktika ishlarini olib borish;

davlat soliq inspeksiyalarining ish yuklamasi va soliqlarni yigʻish faoliyatining iqtisodiy samaradorligidan kelib chiqib ularning sonini optimallashtirish.

22. Oʻzbekiston Respublikasi Moliya vazirligiga davlat soliq xizmati organlarining maʼlumotlar bazasini boshqa davlat organlari maʼlumotlar bazalari bilan taqqoslash, joylarda soliq tekshiruvlari dalolatnomalarini oʻrganish orqali soliq toʻlovchilarning va soliq solish obyektlarining toʻliq qamrab olinishiga alohida eʼtibor qaratgan holda, soliqlar va boshqa majburiy toʻlovlarning toʻgʻri, toʻliq va oʻz vaqtida toʻlanishini monitoring qilish vazifasi yuklansin.

Oʻzbekiston Respublikasi Davlat soliq qoʻmitasi va Davlat bojxona qoʻmitasi ikki hafta muddatda mavjud maʼlumotlar bazasiga Moliya vazirligining ulanishini taʼminlasin.

23. Oʻzbekiston Respublikasi Vazirlar Mahkamasi ikki oy muddatda:

Oʻzbekiston Respublikasi Davlat soliq qoʻmitasi toʻgʻrisidagi;

Oʻzbekiston Respublikasi davlat soliq xizmati organlarida xizmatni oʻtash toʻgʻrisidagi yangilangan nizomlarni tasdiqlasin.

24. Oʻzbekiston Respublikasi Davlat soliq qoʻmitasi ikki oy muddatda manfaatdor vazirlik va idoralar bilan birgalikda:

qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisidagi takliflarning Vazirlar Mahkamasiga kiritilishini;

oʻzlari qabul qilgan idoraviy normativ-huquqiy hujjatlarning ushbu qarorga muvofiqlashtirilishini taʼminlasin.

25. Oʻzbekiston Respublikasi Prezidentining 2017-yil 1-avgustdagi “Davlat soliq xizmati organlari faoliyatini yanada takomillashtirish chora-tadbirlari toʻgʻrisida”gi PQ-3168-son qarori oʻz kuchini yoʻqotgan deb hisoblansin.

26. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasining Bosh prokurori O.B. Murodov, Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi Davlat soliq qoʻmitasi raisining birinchi oʻrinbosari B.A. Musayev zimmasiga yuklansin.