Isteʼmol mollari va xizmatlari narxlarining oshishi davom etayotganligi va aholini ijtimoiy himoya qilishni taʼminlash zarurligi munosabati bilan Vazirlar Mahkamasi qaror qiladi:

1. 1992-yil 1-yanvardan boshlab xalq taʼlimi, sogʻliqni saqlash, madaniyat, ijtimoiy taʼminot, fan, davlat muassasalari va uy-joy-kommunal xoʻjaligi tarmoqlari xodimlarining ish haqi, respublika Hukumati belgilagan kompensatsiyalarni hisobga olgan holda, 2 baravar oshirilsin.

2. Oliy oʻquv yurtlari talabalariga, texnikumlar va hunar-texnika bilim yurtlari oʻquvchilariga beriladigan stipendiyalar, agar ular respublika Hukumatining qarorlariga muvofiq kiyim-kechak va oziq-ovqat bilan taʼminlanmaydigan boʻlsalar, 1992-yil 1-yanvardan boshlab 2,2 baravar (bunda 1-ilovaga muvofiq imtiyozli ovqatlanishga qoʻshimcha haq avvalgi miqdorida saqlab qolinsin), aspirantlar va doktorantlarniki esa 2 baravar oshirilsin.

3. 1992-yil 1-yanvardan boshlab Oʻzbekiston Respublikasi hududida ish haqi va mehnat pensiyasining eng oz miqdori (kompensatsiyani hisobga olgan xolda) oyiga 350 sum, fuqarolarning soliq qilinmaydigan eng oz daromadi miqdori oyiga 350 soʻm qilib belgilansin.

4. Oʻzbekiston Respublikasi Mehnat vazirligi Moliya vazirligi, Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi, Sogʻliqni saqlash vazirligi, Ijtimoiy taʼminot vazirligi, Uy-joy-kommunal xoʻjaligi vazirligi, Mudofaa ishlari vazirligi, Adliya vazirligi, Oliy Sudi, Oliy hakamlik sudi, Prokuraturasi, Davlat teleradioeshittirish kompaniyasi, Davlat jismoniy tarbiya va sport qoʻmitasi, Oʻzbekiston arxivlar bosh boshqarmasi hamda Oʻzbekiston Respublikasi davlat muassasalari organlari bilan birgalikda xalq taʼlimi, sogʻliqni saqlash, madaniyat, ijtimoiy taʼminot, fan, davlat muassasalari va uy-joy-kommunal xoʻjaligi tarmoqlari (nomoddiy ishlab chiqarish sohalari) xodimlari tarif stavkalari va maoshlarining yangi miqdorlarini ishlab chiqsin va tasdiqlasin.

5. Oʻzbekiston Respublikasi Prezidentining “Barcha turdagi maktablarning oʻqituvchilariga, bolalar uylarining tarbiyachilariga qoʻshimcha imtiyozlar berish, yuqori sinflar oʻqituvchilarining ish haqini oshirish toʻgʻrisida” 1990-yil 13-noyabrdagi Farmonining amal qilishi 1992-yil 1-yanvardan boshlab quyidagilarga ham tatbiq etilsin:

maktabgacha va maktabdan tashqari bolalar muassasalarining tarbiyachilariga, oʻqituvchilariga, respublika hunar-texnika taʼlimi tizimining oʻqituvchilariga va ishlab chiqarish ustalariga;

bolalar-oʻsmirlar sport maktablarining, olimpiya rezervlari maktablarining direktorlariga, direktor oʻrinbosarlariga, oʻrgatuvchi-oʻqituvchilariga, yoʻriqchi-metodistlariga;

Oʻzbekiston Respublikasi Madaniyat vazirligining bolalar musiqa maktablari va sanʼat maktablari direktorlariga, direktor oʻrinbosarlariga, oʻqituvchilariga, konsertmeystyerlariga;

internat maktablar va bolalar uylarining maxsus fanlar oʻqituvchilariga va musiqa rahbarlariga.

6. Oʻzbekiston Respublikasi Ijtimoiy taʼminot vazirligi 1992-yil 1-yanvardan boshlab pensiyalarning eng oz miqdorlarini 2-ilovaga muvofiq qayta hisoblab chiqishni taʼminlasin.

7. 1992-yil 1-yanvardan boshlab davlat boshqaruv organlari (ichki ishlar va milliy xavfsizlik organlaridan tashqari), respublika adliya, sud va prokuratura organlari, (Qoraqalpogʻiston Respublikasi Vazirlar Kengashi xodimlarining, mahalliy Kengashlar rahbarlarining lavozim maoshlari, kompensatsiyalarni hisobga olgan holda, 2 baravar koʻpaytirilsin.

Respublika vazirliklari, davlat qoʻmitalari, idoralari, adliya, sud va prokuratura organlari, (Qoraqalpogʻiston Respublikasi Vazirlar Kengashi xodimlari, mahalliy Kengashlar rahbarlari ayrim toifalarining lavozim maoshlari 3 va 4-ilovalarga muvofiq tasdiqlansin.

8. Respublika mahalla qoʻmitalari raislarining va masʼul kotiblarining lavozim maoshlari 2 baravar oshirilsin.

9. Oʻzbekiston Respublikasi Moliya vazirligi respublikaning 1992-yilgi budjetida koʻrsatilgan aholi toifalarining pensiyalarini, stipendiyalari va ish haqlarini oshirish uchun zarur mablagʻlarni nazarda tutsin, bunda ushbu maqsadlarga budjetdan tashqari va boshqa manbalarni jalb qilishni taʼminlashni hisobga olsin.

10. Oʻzbekiston Respublikasi Davlat banki, Oʻzbekiston sanoat-qurilish banki, Oʻzbekiston dehqonchilik-sanoat banki, Oʻzbekiston jamgʻarmalar banki mazkur qarorda belgilangan miqdorlardan kelib chiqqan holda ish haqi, stipendiyalar, pensiyalar va nafaqalar toʻlashga naqd pul berishni taʼminlasinlar,

11. Belgilab qoʻyilsinki, lavozim maoshlarini oshirish bilan bogʻliq xarajatlarning 20 foizi boshqaruv organlari apparati xodimlari sonini qisqartirish hisobiga amalga oshiriladi, Oʻzbekiston Respublikasi Moliya vazirligi koʻrsatilgan tartibga rioya etilishini nazorat qilsin.

12. Belgilab qoʻyilsinki, viloyatlar va shaharlar xodimlarini mehnatga haq toʻlash guruhlariga kiritish Oʻzbekiston Respublikasi Prezidenti huzuridagi Vazirlar Mahkamasi tomonidan belgilanadi.

Davlat hokimiyati va boshqaruv organlari xodimlariga mehnat haqi toʻlash sharoitlari boʻyicha Toshkent shahri “guruhdan tashqari” viloyatlar toifasiga tenglashtirilsin.

Davlat hokimiyati va boshqaruv organlari xodimlariga mehnat haqi toʻlash sharoitlari boʻyicha Qashqadaryo viloyati ikkinchi guruhdan birinchi guruhga oʻtkazilsin.

13. Oʻzbekiston Respublikasi Mehnat vazirligi manfaatdor vazirliklar, idoralar, konsernlar, birlashmalar, korxonalar va tashkilotlar bilan birgalikda KPSS Markaziy Komiteti, SSSR Ministrlar Soveti va VSSPSning 1986-yil 17-sentabrdagi 1115-son qarori bilan tasdiqlangan xalq xoʻjaligining ishlab chiqarish tarmoqlarida amalda boʻlgan tarif stavkalarini, 4,375** koeffitsiyentini qoʻllagan holda, qayta hisoblab chiqsin. Korxonalar rahbarlari, mutaxassislari va xizmatchilarining lavozim maoshlari, kompensatsiyalarni hisobga olgan holda, 2 baravar koʻpaytirilsin.

4,375 koeffitsiyenti — KPSS Markaziy Komiteti, SSSR Ministrlar Soveti va VSSPSning 1986-yil 17-sentabrdagi 1115-son qarori bilan xalq xoʻjaligining ishlab chiqarish tarmoqlari korxonalarining xodimlari uchun belgilangan amaldagi ish haqining eng oz miqdori darajasi Oʻzbekiston Respublikasi Prezidentining 1991-yil 29-dekabrdagi Farmoni bilan belgilangan ish haqining eng oz miqdori oʻrtasidagi nisbatlarning kattaligidir (350 soʻm : 80 soʻm = 4,375).

Yangi joriy qilinadigan tarif stavkalari amaldagi tarif stavkalarini 4,375 koeffitsiyentiga koʻpaytirish yoʻli bilan belgilanadi, bunda malaka guruhlari oʻrtasida qaror topgan miqyoslar buzilmaydi.

14. Vazirliklar, idoralar, uyushmalar, konsernlar, birlashmalar, korxonalar va xoʻjaliklar 1992-yilda ishlovchilarning ish haqini, uning belgilangan eng oz miqdorini hisobga olgan holda, yanada koʻpaytirishni taʼminlovchi chora-tadbirlarni amalga oshirishni nazarda tutsinlar, bunda erkin va shartnomaviy narxlardan keng foydalanishni, isteʼmol fondi boʻyicha barcha cheklashlarni bekor qilishni, ishlab chiqarishni oʻstirishning mavjud rezervlarini jalb qilishni koʻzda tutsinlar.

15. Oʻzbekiston Respublikasi Prezidenti huzuridagi Vazirlar Mahkamasining “Davlat boshqaruv organlari apparati, sud organlari va notarial idoralar xodimlarining lavozim maoshlari toʻgʻrisida” 1991-yil 23-noyabrdagi 298-son qarori oʻz kuchini yoʻqotgan deb hisoblansin.

16. Adliya vazirligi, Mehnat vazirligi manfaatdor vazirliklar va idoralar bilan birgalikda bir oy muddat ichida, mazkur qarordan kelib chiqqan xolda, amaldagi qonunchilikka oʻzgartishlar va qoʻshimchalar kiritish toʻgʻrisida takliflar tayyorlasinlar va kiritsinlar.

17. Mazkur qarorning bajarilishini nazorat qilish Vazirlar Mahkamasi Raisining oʻrinbosarlari — komplekslarning rahbarlariga yuklatilsin.