Oʻzbekiston Respublikasi Prezidentining “Davlat budjetiga soliqlar va toʻlovlar boʻyicha imtiyozlar berishni tartibga solish toʻgʻrisida” 1999-yil 26-iyuldagi PF-2343-son Farmonini bajarish maqsadida Vazirlar Mahkamasi qaror qiladi:

1. Xayriya hamda boshqa jamgʻarmalar va jamiyatlarga, shuningdek ular tomonidan tashkil qilingan korxonalar va boshqa shuʼba tuzilmalariga soliqlar, yigʻimlar hamda bojxona toʻlovlari boʻyicha berilgan imtiyozlarning qoʻllanish tartibi toʻgʻrisidagi nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.

1. Ushbu Nizom Oʻzbekiston Respublikasi Prezidentining xayriya hamda boshqa jamgʻarmalar va jamiyatlarga* (bundan keyin notijorat tashkilotlar deb ataladi), shuningdek ular tomonidan tashkil qilingan korxonalar va boshqa shuʼba tuzilmalariga nisbatan “Davlat budjetiga soliqlar va toʻlovlar boʻyicha imtiyozlar berishni tartibga solish toʻgʻrisida” 1999-yil 26-iyuldagi PF-2343-son Farmonini amalga oshirish mexanizmini belgilaydi.

2. Yuqorida qayd etilgan Farmonning amal qilishi Oʻzbekiston Respublikasi Prezidentining alohida farmonlari, Vazirlar Mahkamasining qarorlari bilan Oʻzbekiston Respublikasining Soliq, Bojxona kodekslarida va “Boj tarifi toʻgʻrisida”gi Oʻzbekiston Respublikasi Qonunida nazarda tutilgan soliqlar, yigʻimlar va bojxona toʻlovlari boʻyicha imtiyozlarga qoʻshimcha belgilangan imtiyozlar notijorat tashkilotlarga, ular tomonidan tashkil qilingan korxonalarga hamda boshqa tuzilmalarga tatbiq etiladi.

3. Berilgan qoʻshimcha imtiyozlar doirasida:

3.1. Quyidagilardan bojxona toʻlovlari (bojxona rasmiylashtirishlari uchun yigʻimlar bundan mustasno) undirilmaydi:

a) oʻzining moddiy-texnika bazasini mustahkamlash uchun notijorat tashkilotlari, shuningdek ular tomonidan tashkil qilingan korxonalar va shuʼba tuzilmalari tomonidan olib kelinayotgan tovarlardan;

b) ustav vazifalari ijro etilishiga muvofiq muruvvat yordami maqsadida olib kelingan tovarlardan.

3.2. Quyidagilardan soliqlar va yigʻimlar undirilmaydi:

a) quyidagi:

— taʼsis hujjatlarida nazarda tutilgan tadbirkorlik faoliyatidan daromad olishni koʻzlamaydigan ijtimoiy-xayriya maqsadlari va boshqa maqsadlar uchun tashkil etilgan notijorat tashkilotlardan;

— mazkur tashkilotning xodimlari, muassislari yoki aʼzolarining shaxsiy manfaatlariga qaratilmagan moliyaviy va boshqa mablagʻlarni taqsimlovchi va investitsiyalovchi notijorat tashkilotlardan (qonun hujjatlarida belgilangan mehnat uchun taqdirlashdan tashqari);

b) ustavda nazarda tutilgan faoliyatni amalga oshirish uchun notijorat tashkilotlar tomonidan olingan yuridik va jismoniy shaxslarning homiylik badallari va boshqa ajratmalaridan.

4. Olib kelingan tovarlardan mazkur Nizomning 3.1-kichik bandida nazarda tutilmagan maqsadlarda foydalanilganda, yoxud keyinchalik tovarlar besh yil mobaynida haqi toʻlangan holda sotilganda Oʻzbekiston Respublikasiga olib kelishda bojxona toʻlovlari toʻlashdan ozod qilingan tovarlar qiymatidan amaldagi qonun hujjatlariga muvofiq belgilangan miqdorlarda penya qoʻshilgan va jazolar qoʻllanilgan holda, bojxona deklaratsiyasi rasmiylashtirilgan sanada amalda boʻlgan barcha bojxona toʻlovlari undiriladi.

5. Oʻzbekiston Respublikasi Soliq kodeksining 32-moddasida nazarda tutilgan hollarda Prezidentning alohida farmonlari va Oʻzbekiston Respublikasi Vazirlar Mahkamasining qarorlari bilan notijorat tashkilotlarning mulki boʻlgan korxonalar uchun daromad (foyda)dan olinadigan soliq yuzasidan soliq solinadigan baza ushbu notijorat tashkilotlarning ustavda qayd etilgan faoliyatini amalga oshirishga yoʻnaltiriladigan daromad (foyda)dan ajratmalar miqdoriga kamaytiriladi.

Koʻrsatib oʻtilgan imtiyoz faqat notijorat tashkilotlar mulki boʻlgan, yaʼni ustav sarmoyasi 100 foiz miqdorda ushbu jamgʻarmalar va jamiyatlar tomonidan shakllantirilgan korxonalarga va boshqa tuzilmalarga tatbiq etiladi.

Agar notijorat tashkilotlar korxona va boshqa tuzilmalarning muassislaridan biri boʻlgan taqdirda, yaʼni tashkil etilayotgan korxonaning ustav sarmoyasi notijorat tashkilotlar mablagʻlari hisobiga toʻliq shakllantirilmagan boʻlsa, u holda bunday korxonalarga va boshqa tuzilmalarga yuqorida koʻrsatib oʻtilgan imtiyoz tatbiq etilmaydi. Korxonalarning mazkur toifasiga, qonun hujjatlarida nazarda tutilgan hollardan tashqari, Oʻzbekiston Respublikasining Soliq kodeksiga muvofiq soliq solinadi.

6. Notijorat tashkilotlar hamda ular tomonidan tashkil etilgan korxonalar va boshqa tuzilmalar tomonidan tadbirkorlik faoliyati amalga oshirilgan taqdirda ularga nisbatan Oʻzbekiston Respublikasining Soliq, Bojxona kodekslarida va “Boj tarifi toʻgʻrisida”gi Oʻzbekiston Respublikasi Qonunida nazarda tutilgan soliqlar, yigʻimlar va bojxona toʻlovlari undirish tartibi tatbiq etiladi.