Maʼlumotlar uzatish xizmatlari koʻrsatadigan korxonalarni rivojlantirishni ragʻbatlantirish hamda davlat hokimiyati va boshqaruv organlari, oʻquv yurtlari va yirik korporativ mijozlarning Oʻzbekiston Respublikasining butun hududida maʼlumotlar uzatishning sifatli xizmatlariga boʻlgan ehtiyojlarini qondirish, isteʼmolchilarning axborot resurslaridan keng foydalanishini taʼminlash maqsadida Vazirlar Mahkamasi qaror qiladi:

1. Oʻzbekiston aloqa va axborotlashtirish agentligi hamda Oʻzbekiston Respublikasi Davlat mulki qoʻmitasining “Telecommunications services” kompaniyasi (AQSh) bilan birgalikda “UzPAK” maʼlumotlarni uzatish davlat tarmogʻi korxonasi negizida masʼuliyati cheklangan jamiyat shaklidagi “UzPAK Teleservice” qoʻshma korxonasi tashkil etish toʻgʻrisidagi taklifi maʼqullansin.

2. “UzPAK Teleservice” qoʻshma korxonasining ustav fondida tomonlarning ulushi quyidagicha taqsimlanishiga rozilik berilsin:

boshqarish uchun Oʻzbekiston aloqa va axborotlashtirish agentligiga berilayotgan davlat ulushi — 26 foiz;

“Oʻzbektelekom” aksiyadorlik kompaniyasi ulushi — 15 foiz;

“Xalqaro aloqa” tashkilotining ulushi — 10 foiz;

“Telecommunications services” kompaniyasi (AQSh) ulushi — 49 foiz.

Quyidagilar:

“UzPAK” maʼlumotlarni uzatish davlat tarmogʻi korxonasining mol-mulki qoʻshma korxona ustav fondiga davlat tomonidan qoʻshilgan ulush hisoblanadi;

“Oʻzbektelekom” aksiyadorlik kompaniyasi filiallarining xalqaro ichki zona kanallari va traktlari, binolari, inshootlari berilishi “Oʻzbektelekom” aksiyadorlik kompaniyasining ulushi hisoblanadi;

pul mablagʻlari “Telecommunications services” kompaniyasi (AQSh) va “Xalqaro aloqa” tashkilotining ulushi hisoblanadi.

3. Belgilansinki, “UzPAK Teleservice” qoʻshma korxonasi “UzPAK” maʼlumotlarni uzatish davlat tarmogʻi korxonasining huquqiy vorisi, shu jumladan Vazirlar Mahkamasining “Oʻzbekiston Respublikasi Maʼlumotlar uzatish milliy tarmogʻini zamonaviylashtirish va rivojlantirish loyihasini amalga oshirish chora-tadbirlari toʻgʻrisida” 2001-yil 5-dekabrdagi 466-son qarori bilan belgilangan miqdorlar va muddatlarda Oʻzbekiston Respublikasi Hukumati tomonidan kafolatlangan kreditlarni qaytarishga doir “UzPAK” maʼlumotlarni uzatish davlat tarmogʻi korxonasining majburiyatlari boʻyicha huquqiy vorisi hisoblanadi.

4. Quyidagilar “UzPAK Teleservice” qoʻshma korxonasi faoliyatining asosiy yoʻnalishlari hisoblanishi maʼlumot uchun qabul qilinsin:

davlat va jamoat organlari, fuqarolar, mulkchilik shakllaridan qatʼi nazar korxonalar, muassasalar va tashkilotlarning axborot ehtiyojlarini har tomonlama qondirish maqsadida Maʼlumotlarni uzatish milliy tarmogʻining faoliyat koʻrsatishi va rivojlanishini taʼminlash;

“UzPAK Teleservice” qoʻshma korxonasining maʼlumotlarni uzatish tarmogʻida axborot resurslari himoya qilinishini taʼminlash, konstitutsiyaviy tuzumni zoʻravonlik bilan oʻzgartirishga, urushni, zoʻravonlik va pornografiyani targʻib qilishga, diniy va milliy adovatni avj oldirishga, insonning or-nomusi va qadr-qimmatini kamsitishga qaratilgan chaqiriqlar mavjud boʻlgan axborot va amaldagi qonun hujjatlarida tarqatish taqiqlangan boshqa axborot tarqatilishiga yoʻl qoʻymaslik;

texnik vositalarni joriy etish, Internet-texnologiyalarni rivojlantirish, respublikaning yagona axborot makoni kommunikatsiya asoslarini takomillashtirish va uning jahon axborot hamjamiyatiga kirishi imkoniyatlarini kengaytirish.

5. Oʻzbekiston Respublikasi Davlat mulki qoʻmitasi Oʻzbekiston aloqa va axborotlashtirish agentligi bilan birgalikda bir oy muddatda qoʻshma korxonaning ustav fondidagi Oʻzbekiston tomonining ulushini belgilangan tartibda shakllantirsin.

6. Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qaroriga 2-ilovadan 289-pozitsiya chiqarib tashlansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.