Oʻzbekiston Respublikasi Vazirlar Mahkamasining “Xalqaro tiklanish va taraqqiyot banki ishtirokida Moliyaviy sektorni institutsional rivojlantirish loyihasi doirasida Oʻzbekiston Respublikasi banklarini xususiylashtirish tadbirlarini amalga oshirish chora-tadbirlari toʻgʻrisida” 2001-yil 19-fevraldagi 82-son qaroriga muvofiq Vazirlar Mahkamasi qaror qiladi:

1. Banklar aksiyalarining davlatga tegishli paketlarini potensial investorlarga sotish boʻyicha davlat tender komissiyasi toʻgʻrisidagi nizom ilovaga muvofiq tasdiqlansin

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin

1. Ushbu Nizom banklarni xususiylashtirish va davlat tasarrufidan chiqarish masalalarini hal qilishda asoslanganlikni va tezkorlikni oshirish hamda xorijiy sarmoyani jalb etishni faollashtirish maqsadida ishlab chiqilgan.

2. Nizom Banklar aksiyalarining davlatga tegishli paketlarini potensial investorlarga sotish boʻyicha davlat tender komissiyasi (keyingi oʻrinlarda Komissiya deb ataladi)ning Oʻzbekiston Respublikasi Vazirlar Mahkamasi tomonidan belgilanadigan vazifalari, funksiyalari, huquqlari va majburiyatlarini belgilaydi.

3. Komissiyaning oʻz vakolatlari doirasida qabul qilingan qarorlari davlat boshqaruvi organlari va xususiylashtirilayotgan banklar tomonidan bajarilishi majburiydir.

4. Savdolar Komissiya tomonidan, Oʻzbekiston Respublikasi qonun hujjatlarida belgilangan tartibda oʻtkaziladi.

5. Quyidagilar Komissiyaning asosiy vazifalari hisoblanadi:

vakolatli davlat organlari va xususiylashtirilayotgan banklarning, shuningdek jalb etilgan texnik moliyaviy va boshqa konsultantlarning aksiyalarning davlatga tegishli paketlarini (keyingi oʻrinlarda tender obyekti deb ataladi) sotishdan oldin tayyorlash va potensial investorlarga sotish masalalari boʻyicha birgalikdagi faoliyatini tashkil etish;

texnik moliyaviy va boshqa konsultantlarni tender obyektini sotishdan oldin tayyorlash uchun jalb etish shartlarini belgilash;

talabgorlarning tender obyektini sotib olish boʻyicha eng foydali takliflarini ekspertizadan oʻtkazish va tanlab olish;

baholashning oshkoraligi, obyektivligi va talablarning yagonaligi asosida tender (qatnashchilari uchun teng raqobat sharoitlari yaratish.

6. Quyidagilar Komissiyaning asosiy funksiyalari hisoblanadi:

tender hujjatlarini, toʻlovlar tartibini, tender obyektining sotilish bahosini, tenderni oʻtkazish usullarini, tenderda qatnashish uchun garov va toʻlov miqdorini, takliflarni baholash tartibini koʻrib chiqish va tasdiqlash;

potensial investorlarni va tender obyektini sotishdan oldin tayyorlash uchun jalb etiladigan moliyaviy konsultantlar (ekspertlar)ni tanlash shartlari va mezonlarini belgilash hamda ularning roʻyxatini tasdiqlash;

tushgan tender takliflarini ochish;

baholash guruhining tushgan tender takliflari boʻyicha xulosalarini koʻrib chiqish va tender gʻoliblarini aniqlash.

7. Komissiya quyidagi huquqlarga ega:

oʻzining ish tartibini mustaqil ravishda ishlab chiqish va tasdiqlash;

tender qatnashchilarini malakali tanlash va tender takliflarini baholash uchun baholash guruhlari tuzish;

Oʻzbekiston Respublikasi Vazirlar Mahkamasi bilan kelishilgan holda tender obyektining boshlangʻich bahosini talab konʼyunkturasiga koʻra va aniq portfelli va strategik investorlar mavjud boʻlgan taqdirda oʻzgartirish;

Oʻzbekiston Respublikasi Vazirlar Mahkamasiga potensial investorlarga sotiladigan davlat ulushi miqdorini oʻzgartirish boʻyicha takliflar kiritish;

tenderni tayyorlash va oʻtkazish uchun tanlov asosida ekspertlarni taklif etish, ularning faoliyatiga Xalqaro tiklanish va taraqqiyot bankining moliya sektorini institutsional rivojlantirishga bergan qarz mablagʻlari, banklarni xususiylashtirishga doir tadbirlarni amalga oshirish uchun boshqa qarzlar va grantlar, shuningdek banklarni xususiylashtirishdan tushadigan umumiy mablagʻlar hisobidan haq toʻlash, keyinchalik xarajatlarni tender obyektini sotishdan tushgan mablagʻ hisobidan qoplash;

davlat boshqaruvi organlaridan, joylardagi davlat hokimiyati organlaridan, shuningdek xususiylashtirilayotgan banklardan oʻziga yuklangan vazifalarni taʼminlash uchun zarur boʻlgan axborotlarni olish.

8. Komissiya quyidagilarga majbur:

tenderlarning Oʻzbekiston Respublikasi qonun hujjatlariga va banklarni xususiylashtirish uchun qarz beradigan xalqaro moliya tashkilotlari tartibotlariga muvofiq oʻtkazilishini taʼminlash;

Oʻzbekiston Respublikasi Hukumatining tender obyektlarini sotishni tashkil etish boʻyicha qarorlarini bajarish;

tender obyektini sotishdan oldin tayyorlash uchun jalb etiladigan ekspertlarni, shuningdeq tender obyektini sotib olishga potensial investorlarni tanlash boʻyicha tenderlarning samarali oʻtkazilishini taʼminlash;

Komissiya majlislarida qabul qilingan qarorlar oʻz vaqtida bajarilishini nazorat qilish.

9. Tender savdolarini tashkil etish va oʻtkazish Oʻzbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari toʻgʻrisida” 1997-yil 18-avgustdagi 404-son qaroriga 3-ilova bilan belgilangan tartibda mazkur Nizom talablari hisobga olingan holda amalga oshiriladi.

10. Komissiya majlislari zaruriyatga qarab uning aʼzolarining kamida toʻrtdan uch qismi ishtirokida vaqti-vaqti bilan oʻtkaziladi. Komissiya qarorlari majlisda qatnashayotgan Komissiya aʼzolarining oddiy koʻpchilik ovozi bilan qabul qilinadi. Ovozlar teng boʻlib hisoblangan taqdirda Komissiya raisining ovozi hal qiluvchi ovoz hisoblanadi.

Komissiya qarorlari majlisda qatnashgan Komissiya aʼzolari tomonidan imzolanadigan va Komissiya raisi yoki uning oʻrinbosari tomonidan tasdiqlanadigan bayonnoma bilan rasmiylashtiriladi. Bayonnomani imzolashda Komissiya aʼzolari oʻzlarining alohida fikrlarini ifodalashga haqlidirlar.

11. Komissiya potensial investorni tanlash boʻyicha oʻtkazilgan tender natijalariga koʻra Oʻzbekiston Respublikasi Vazirlar Mahkamasiga Vazirlar Mahkamasining tegishli qarorini qabul qilish uchun takliflar kiritadi.

12. Tender takliflarini koʻrib chiqish va baholashning borishi toʻgʻrisidagi axborot baholash tartibotiga rasman aloqasi boʻlmagan shaxslarga maʼlum qilinmaydi.

Komissiya aʼzolari koʻrsatib oʻtilgan axborot oshkor qilinganligi uchun qonunda belgilangan tartibda javob beradilar.

13. Tenderlarni tashkil etish va oʻtkazish, shuningdek tender asosida ekspertlarni tanlash xarajatlari hamda ularga mukofotlar toʻlash:

xalqaro tiklanish va taraqqiyot bankining moliyaviy sektorni institutsional rivojlantirishga bergan qarzi boʻyicha;

Jahon bankining boshqa qarzlari va grantlardan;

tender obyektini sotishdan tushgan mablagʻlar hisobiga qoplanadi.

14. Tender obyektini sotishdan oldin tayyorlash uchun tender asosida ekspertlar taklif etilgan taqdirda, Komissiya Banklarni xususiylashtirish byurosi va ekspert oʻrtasida tuziladigan shartnoma loyihasini koʻrib chiqadi, quyidagilar shartnoma loyihasining asosiy mazmuni hisoblanadi:

texnik topshiriq;

mukofotlash summasi;

tomonlarning majburiyatlari va shartnomaning amal qilishini toʻxtatish shartlari.

Shartnoma Komissiya tomonidan maʼqullangandan keyin tuzilishi mumkin.

15. Baholovchi guruhlar alohida banklar boʻyicha Vazirlar Mahkamasi, Moliya vazirligi, Adliya vazirligi, Markaziy bank, Davlat mulki qoʻmitasi, Tashqi iqtisodiy aloqalar vazirligi, Moliyaviy sektorni rivojlantirish agentligi, Oʻzbekiston Respublikasi banklarini xususiylashtirish byurosining masʼul xodimlari, xususiylashtirilayotgan banklar vakillari, shuningdeq zaruriyat boʻlganda mustaqil ekspertlar, shu jumladan xorijiy ekspertlar tarkibida tashkil etiladi.

Baholovchi guruhning shaxsiy tarkibi Komissiya raisi yoki uning oʻrinbosari tomonidan tasdiqlanadi. Baholovchi guruh ish rejasi baholovchi guruh rahbari tomonidan tasdiqlanadi.

16. Quyidagilar baholovchi guruhning asosiy funksiyalari hisoblanadi:

tender takliflarini olish uchun moliyaviy maslahatchilar (ekspertlar)ning va potensial investorlarning dastlabki roʻyxatini aniqlash;

tender takliflarining tender hujjatlarida belgilangan talablarga muvofiqligini baholash;

ekspert baholash va tushgan tender takliflari boʻyicha xulosalar tayyorlash.

17. Baholovchi guruh rahbari tender obyektini sotishdan oldin tayyorlash uchun jalb qilinadigan ekspertlarning, shuningdek tender obyektini sotib olishga potensial investorlarning takliflarini koʻrib chiqishda tender komissiyasi majlislarida qatnashishi shart.

18. Baholovchi guruhlar majlislari qarorlari majlisda qatnashgan baholovchi guruh barcha aʼzolari tomonidan imzolanadigan va baholovchi guruh rahbari tomonidan tasdiqlanadigan bayonnoma bilan rasmiylashtiriladi.

Qaror guruhning majlisda hozir boʻlgan aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda rahbarning ovozi hal qiluvchi ovoz hisoblanadi.

19. Oʻzbekiston Respublikasi banklarini xususiylashtirish byurosi Komissiyaning tender savdolari tayyorlanishi va oʻtkazilishini (tender hujjatlarini ishlab chiqish va rasmiylashtirish, shuningdek ularni tarqatish, reklama ishi, ish yuritish va Komissiya hujjatlarini rasmiylashtirish) amalda tashkil etuvchi ishchi organi hisoblanadi.

20. Komissiyaning ishchi organi:

a) Komissiyaga:

texnikaviy, moliyaviy va boshqa xil maslahatchilarni, shuningdek potensial investorlarni taklif etish yuzasidan, ularning tender obyektini sotish oldidan tayyorlashda va sotib olishda qatnashishlari shartlari boʻyicha taklif kiritish;

tender savdolarini tayyorlash va oʻtkazishning moliyaviy va texnik shartlari, investitsiya takliflarini baholash tartibi, gʻolibni tanlash mezonlari, savdolarni oʻtkazish usuli, toʻlovlar tartibi va shartlari yuzasidan takliflar kiritish;

b) tender oʻtkazilishi munosabati bilan ayrim masalalar boʻyicha tushuntirishlar berish maqsadida tender oldidan muzokaralar va konferensiyalar oʻtkazish;

v) davlat boshqaruvi organlaridan, joylardagi davlat hokimiyati organlaridan, shuningdeq xususiylashtirilayotgan banklardan oʻziga yuklangan vazifalarni bajarish uchun zarur boʻlgan axborotlarni olish;

g) ommaviy axborot vositalarida tender savdolari oʻtkazish va ularning yakunlari toʻgʻrisida eʼlonlar berish huquqiga egadir.

21. Komissiyaning ishchi organi:

Komissiya tomonidan qabul qilingan qarorlarni oʻz vaqtida va toʻliq bajarishga;

tender obyektlari toʻgʻrisidagi axborotni toʻplash, tartibga solish va qayta ishlashni amalga oshirishga;

bevosita yoxud tender obyektini sotish oldidan tayyorlash uchun jalb qilingan ekspertlar bilan birgalikda Komissiya tasdiqlashi uchun kiritiladigan texnik topshiriq, kontrakt va boshqa tender hujjatlari loyihalarini ishlab chiqish hamda rasmiylashtirishga;

ekspertlarga va potensial investorlarga tender va tender obyekti toʻgʻrisidagi umumiy majburiy axborotlar, shuningdek ularning soʻrovlari boʻyicha qoʻshimcha axborotlar oʻz vaqtida tarqatilishini taʼminlashga;

tenderlar oʻtkazish yuzasidan reklama-maʼrifiy ishlarni tashkil etishga;

Komissiya majlislarini chaqirishning barcha tashkiliy masalalarini hal etishga;

Komissiya ish hujjatlarini aniq va toʻliq yuritishga, Komissiya xat-xabarlari hisobini olib borish va tasniflashga, Komissiyaning barcha majlislari protokollarini oʻz vaqtida va toʻliq rasmiylashtirishga majburdir.