Charm-poyabzal tarmogʻini yanada rivojlantirish, ishlab chiqarish samaradorligini oshirish va tarmoq korxonalarining barqaror faoliyatini taʼminlash, charm xomashyosini yanada puxta qayta ishlash hamda raqobatbardoshli tayyor mahsulot ishlab chiqarishni kengaytirish maqsadida Vazirlar Mahkamasi qaror qiladi:

1. “Oʻzbekcharmpoyabzali” uyushmasi:

mahalliy xomashyodan furnitura, yordamchi va butlovchi materiallar hamda boshqa mahsulotlar ishlab chiqarishni mahalliylashtirishning tarmoq dasturini bir oy muddatda ishlab chiqsin va Vazirlar Mahkamasiga kiritsin;

Oʻzbekiston Respublikasi Moliya vazirligi, Kasaba uyushmalari Federatsiyasi Kengashi, Namangan va Fargʻona viloyatlari, Toshkent shahar hokimliklari bilan birgalikda 2002-yildan boshlab ilovaga* muvofiq ijtimoiy soha obyektlarini topshirish - qabul qilib olish dalolatnomalari asosida hokimliklar balansiga berish boʻyicha bir oy muddatda kelishilgan qaror qabul qilsin.

2. “Oʻzbekcharmpoyabzali” uyushmasi korxonalarining ishlamayotgan ishlab chiqarishlari 2001-yil 1-maydan boshlab uch yil muddatga mulk soligʻi toʻlashdan istisno tariqasida ozod qilinsin.

“Oʻzbekcharmpoyabzali” uyushmasi mavjud ishlab chiqarish potensialidan yanada toʻliq va samarali foydalanish dasturini ikki oy muddatda ishlab chiqsin va Vazirlar Mahkamasiga kiritsin, dasturda istiqbolsiz ishlab chiqarishlarni tugatish, ishlamayotgan ishlab chiqarishlarni, shu jumladan xorijiy investitsiyalarni jalb etgan holda, rekonstruksiya qilish, zamonaviylashtirish va texnika bilan qayta jihozlash, ularni raqobatbardoshli charm tovarlar va poyabzallar chiqarishga qayta ixtisoslashtirish chora-tadbirlarini nazarda tutsin.

Oʻzbekiston Respublikasi Moliya vazirligi, Davlat soliq qoʻmitasi “Oʻzbekcharmpoyabzali” uyushmasi bilan birgalikda shu yil 1-maygacha uyushmaning ishlamayotgan, mol-mulki qiymati belgilangan imtiyozga muvofiq soliqqa tortilmaydigan ishlab chiqarishlari roʻyxatini aniqlasinlar.

3. “Oʻzbekcharmpoyabzali” uyushmasi tashkilotlari tomonidan ishlab chiqariladigan bolalar poyabzali va maxsus poyabzallar narxini pasaytirish maqsadida ushbu mahsulotlar 2001-yil 1-iyundan 2003-yil 1-yanvargacha qoʻshilgan qiymat soligʻidan istisno tariqasida ozod qilinsin.

4. Xizmat koʻrsatuvchi tijorat banklariga “Oʻzbekcharmpoyabzali” uyushmasi ishlab chiqarish tashkilotlariga korxonalar hisob raqamlaridan yakka tartibdagi tadbirkorlar tomonidan ishlab chiqariladigan furnitura, yordamchi va butlovchi materiallar sotib olish uchun oʻz mahsulotlarini sotishdan olingan tushumlarning 10 foizi miqdorida naqd pul mablagʻlari berishga ruxsat etilsin.

Oʻzbekiston Respublikasi Markaziy banki Moliya vazirligi va “Oʻzbekcharmpoyabzali” uyushmasi bilan birgalikda tijorat banklari tomonidan “Oʻzbekcharmpoyabzali” uyushmasi ishlab chiqarish tashkilotlariga naqd pul mablagʻlari berish tartibini oʻn kun muddatda belgilangan tartibda ishlab chiqsin va tasdiqlasin.

5. Tashqi iqtisodiy faoliyat milliy banki, “Savdogarbank”, “Oʻzbekcharmpoyabzali” va “Oʻzbekcharmpoyabzali”ning 2001-yilda oʻz resurslari hisobidan “Oʻzbekcharmpoyabzali” uyushmasi korxonalari va tashkilotlarining aylanma mablagʻlarini toʻldirishga jami 1,0 mlrd soʻm miqdorida oʻrtacha muddatli kredit ajratish, mablagʻlarning bir qismini xorijiy banklarning asbob-anjomlar sotib olish uchun ajratilgan kreditlarini toʻlashga yoʻnaltirish toʻgʻrisidagi takliflari qabul qilinsin.

6. Oʻzbekiston Respublikasi Davlat bojxona qoʻmitasi:

“Oʻzbekcharmpoyabzali” uyushmasi tashkilotlariga import qilinadigan xomashyo, moddiy va texnika resurslari boʻyicha qoʻshilgan qiymat soligʻi, bojxona bojlari va yigʻimlari toʻlovini belgilangan tartibda 2 oy muddatgacha kechiktirsin;

charm va moʻyna (shuningdek nostandart), shu jumladan qorakoʻl xomashyosining (TIF TN kodlari 4101-4103, 4301-4302) respublikadan tashqariga noqonuniy olib ketilishini bartaraf etish maqsadida bojxona nazoratini kuchaytirsin.

Belgilab qoʻyilsinki, musodara qilingan charm va moʻyna xomashyosi qonunchilikda belgilangan tartibda “Oʻzbekcharmpoyabzali” uyushmasi tashkilotlariga, qorakoʻl xomashyosi esa – “Buxoro qorakoʻl” aksiyadorlik jamiyatiga beriladi.

7. “Oʻzbekcharmpoyabzali” uyushmasi Oʻzbekiston Respublikasi Davlat soliq qoʻmitasi, Moliya vazirligi, Davlat bojxona qoʻmitasi, Sogʻliqni saqlash vazirligining Davlat sanitariya-epidemiologiya nazorati Respublika markazi, Qishloq va suv xoʻjaligi vazirligi huzuridagi Davlat veterinariya bosh boshqarmasi bilan birgalikda bojxona organlari tomonidan musodara qilingan charm, moʻyna va qorakoʻl xomashyosini keyinchalik qayta ishlash uchun “Oʻzbekcharmpoyabzali” uyushmasi tashkilotlariga berish, toʻlov narxini belgilash tartibini bir oy muddatda, belgilangan tartibda ishlab chiqsin va tasdiqlasin.

8. Oʻzbekiston Respublikasi Ichki ishlar vazirligi Davlat soliq qoʻmitasi, Davlat bojxona qoʻmitasi bilan birgalikda charm, moʻyna va qorakoʻl xomashyosini noqonuniy tayyorlash, tashish hamda Oʻzbekiston Respublikasi tashqarisiga olib ketish hollarining oldini olish va bartaraf etish boʻyicha kelishilgan tadbirlarni bir oy muddatda ishlab chiqsin.

9. Oʻzbekiston Respublikasi Vazirlar Mahkamasining 1993-yil 22-martdagi 151-son qarori (Oʻzbekiston Respublikasi QT, 1993y., 3-son, 11-modda) bilan tasdiqlangan Musodara qilingan, egasiz mol-mulkni, vorislik huquqi boʻyicha davlat ixtiyoriga oʻtgan mol-mulkni va xazinalarni hisobga olish, baholash va sotish tartibi haqidagi Nizomning 27-bandi quyidagi tahrirda bayon qilinsin:

“Jun, goʻshtbop mollar, parranda, quyonlar, gʻalla, kanop va zigʻir tolasi hamda boshqa qishloq xoʻjaligi mahsulotlari, haqi olinib, davlat yoki kooperativ tayyorlov tashkilotlariga beriladi.

Charm va moʻyna xomashyosi, haqi olinib, “Oʻzbekcharmpoyabzali” uyushmasi tashkilotlariga, qorakoʻl xomashyosi esa “Buxoro qorakoʻl” aksiyadorlik jamiyatiga beriladi”.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari M.Z. Usmonov va R.S. Azimov zimmasiga yuklansin.