Maktabgacha taʼlim tizimini yanada takomillashtirish, moddiy-texnika bazasini mustahkamlash, maktabgacha taʼlim muassasalari tarmogʻini kengaytirish, malakali pedagog kadrlar bilan taʼminlash, bolalarni maktab taʼlimiga tayyorlash darajasini tubdan yaxshilash, taʼlim-tarbiya jarayoniga zamonaviy taʼlim dasturlari va texnologiyalarini tatbiq etish, bolalarni har tomonlama intellektual, axloqiy, estetik va jismoniy rivojlantirish uchun shart-sharoitlar yaratish maqsadida:

1. Quyidagilarni oʻz ichiga olgan Maktabgacha taʼlim tizimini yanada takomillashtirish boʻyicha 2017 — 2021-yillarga moʻljallangan dastur (keyingi oʻrinlarda Dastur deb yuritiladi):

maktabgacha taʼlim tizimini yanada takomillashtirish boʻyicha 2017 — 2021-yillarga moʻljallangan chora-tadbirlar rejasi 1-ilovaga* muvofiq;

2017 — 2021-yillarda maktabgacha taʼlim muassasalarini yangidan qurish, rekonstruksiya qilish va mukammal taʼmirlashning asosiy parametrlari, moliyalashtirish hajmi va manbalari 2, 3-ilovalarga* muvofiq;

2017 — 2021-yillarda maktabgacha taʼlim muassasalarida bolalarni maktab taʼlimiga tayyorlash boʻyicha qisqa muddatli guruhlarni tashkil qilishning asosiy parametrlari 4-ilovaga* muvofiq tasdiqlansin.

2. Dasturning asosiy maqsadli vazifalari va yoʻnalishlari etib quyidagilar belgilansin:

ilgʻor xorijiy tajribani hisobga olgan holda bolalarni har tomonlama intellektual, axloqiy, estetik va jismoniy rivojlantirish sharoitlarini yaratish;

maktabgacha taʼlim sifatini oshirish, maktabgacha taʼlim muassasalarida bolalarni maktabga sifatli tayyorlashni tubdan yaxshilash, taʼlim-tarbiya jarayoniga jahon amaliyotida keng qoʻllaniladigan zamonaviy taʼlim dasturlari va texnologiyalarini joriy etish;

maktabgacha taʼlim muassasalarida 5-6 yoshdagi bolalarni maktab taʼlimiga tayyorlash boʻyicha 6100 ta qisqa muddatli guruhni tashkil etish;

zamonaviy pedagogik texnologiyalar va uslublarni inobatga olgan holda maktabgacha taʼlim muassasalariga pedagog kadrlarni tayyorlash va malakasini oshirishning oʻquv reja va dasturlarini takomillashtirish;

2200 ta maktabgacha taʼlim muassasasining moddiy-texnika bazasini mustahkamlash, shu jumladan qishloq joylarda maktabgacha taʼlim muassasalarini yangidan qurish, ularni zamonaviy talablarga javob beradigan inventar, jihoz, oʻquv-metodik qoʻllanmalar va multimediali vositalar bilan taʼminlash.

3. Maktabgacha taʼlim tizimini yanada takomillashtirish boʻyicha 2017 — 2021-yillarga moʻljallangan dasturning bajarilishini muvofiqlashtiruvchi respublika komissiyasi (keyingi oʻrinlarda Respublika komissiyasi deb yuritiladi) tarkibi 5-ilovaga* muvofiq tasdiqlansin.

Respublika komissiyasi (A.N. Aripov) Dasturda nazarda tutilgan chora-tadbirlarning amalga oshirilishi yuzasidan masʼul boʻlgan vazirlik, idoralar va mahalliy davlat hokimiyati organlari faoliyatini tizimli asosda muvofiqlashtirishni, belgilangan tadbirlarning toʻliq va sifatli bajarilishi hamda asosiy parametrlarga erishilishi ustidan monitoring va nazoratni amalga oshirsin.

Respublika komissiyasiga Oʻzbekiston Respublikasi Xalq taʼlimi vazirligi, Iqtisodiyot vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari taqdimnomasi boʻyicha maktabgacha taʼlim muassasalarini yangidan qurish, rekonstruksiya qilish va mukammal taʼmirlashning har yili tasdiqlanadigan manzilli roʻyxatiga tasdiqlangan asosiy parametrlar doirasida oʻzgartirishlar kiritish huquqi berilsin.

4. Quyidagilar Dasturni amalga oshirishni moliyalashtirish manbalari etib belgilansin:

maktabgacha taʼlim muassasalarini yangidan qurish, rekonstruksiya qilish va mukammal taʼmirlash, shuningdek oʻyin maydonchalari, bolalar ayvonlari qurish va ularning hududini oʻrash maqsadlari uchun — Oʻzbekiston Respublikasi Moliya vazirligi huzuridagi budjetdan tashqari Umumtaʼlim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasi mablagʻlari (keyingi oʻrinlarda Jamgʻarma deb yuritiladi);

maktabgacha taʼlim muassasalari hududini obodonlashtirish va ichimlik suvi bilan taʼminlash uchun — Qoraqalpogʻiston Respublikasi budjeti, viloyatlar va Toshkent shahar mahalliy budjetlarining mablagʻlari;

maktabgacha taʼlim muassasalarini jihozlash uchun — Oʻzbekiston Respublikasi Davlat budjeti mablagʻlari;

xalqaro moliyaviy institutlar, tashkilotlar va donor mamlakatlar mablagʻlari, yuridik va jismoniy shaxslarning homiylik xayriyalari, shuningdek qonun hujjatlarida taqiqlanmagan boshqa manbalar.

Oʻzbekiston Respublikasi Moliya vazirligi 2017-yildan boshlab Jamgʻarma parametrlarida hamda Oʻzbekiston Respublikasi Xalq taʼlimi vazirligining xarajatlar smetasida Dasturni amalga oshirish uchun zarur mablagʻlarning taʼlim sohasiga har yilgi ajratiladigan budjet mablagʻlari doirasida alohida satr bilan ajratilishini nazarda tutsin.

5. Belgilansinki:

maktabgacha taʼlim muassasalarini yangidan qurish namunaviy loyihalar boʻyicha amalga oshiriladi;

maktabgacha taʼlim muassasalarini yangidan qurish, rekonstruksiya qilish va mukammal taʼmirlash ishlarini amalga oshirish boʻyicha buyurtmachi vazifasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” injiniring kompaniyasi zimmasiga yuklatiladi;

maktabgacha taʼlim muassasalarini jihozlash, mol-mulkidan samarali foydalanish hamda malakali kadrlar bilan taʼminlash Oʻzbekiston Respublikasi Xalq taʼlimi vazirligi zimmasiga yuklatiladi.

6. Oʻzbekiston Respublikasi Davlat arxitektura va qurilish qoʻmitasi:

Oʻzbekiston Respublikasi Xalq taʼlimi vazirligi buyurtmasi asosida “ToshuyjoyLITI” aksiyadorlik jamiyati bilan birgalikda xorijiy tajribadan va mamlakatimizning iqlim sharoitlaridan kelib chiqqan holda, yangidan qurilishi belgilangan quvvati 70 va 120 oʻrinli zamonaviy maktabgacha taʼlim muassasalarining namunaviy loyihasini ishlab chiqsin;

Dastur doirasida maktabgacha taʼlim muassasalarini yangidan qurish, rekonstruksiya qilish va mukammal taʼmirlash ishlari boʻyicha loyiha-smeta hujjatlarining belgilangan tartibda davlat ekspertizasidan oʻtkazilishini taʼminlasin;

buyurtmachilar bilan pudratchilar oʻrtasidagi shartnoma majburiyatlarining bajarilishi, jumladan tasdiqlangan namunaviy loyihalarga muvofiq bajariladigan loyiha va qurilish-montaj ishlariga qoʻyiladigan talablarga hamda shaharsozlik normalari va qoidalariga rioya etilishi ustidan tizimli monitoring oʻrnatsin.

7. Oʻzbekiston Respublikasi Iqtisodiyot vazirligi, Moliya vazirligi, Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

ushbu qarorning 2-ilovasiga muvofiq, tasdiqlangan maktabgacha taʼlim muassasalarini yangidan qurish, rekonstruksiya qilish va mukammal taʼmirlashning asosiy parametrlari samarali va sifatli bajarilishini taʼminlash;

har yili Oʻzbekiston Respublikasi Investitsiya dasturi loyihasi va qurilishning manzilli roʻyxatini shakllantirishda yangidan qurish, rekonstruksiya qilish va mukammal taʼmirlash hamda ularni zaruriy jihoz va inventarlar bilan taʼminlashning moliyalashtirish hajmini aniqlagan holda, maktabgacha taʼlim muassasalarining aniq soni va roʻyxatini belgilash choralarini koʻrsin.

8. Oʻzbekiston Respublikasi Xalq taʼlimi vazirligi, Davlat arxitektura va qurilish qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari rahbarlari zimmasiga quyidagilarni amalga oshirishda shaxsiy masʼuliyat yuklatilsin:

maktabgacha taʼlim muassasalarini yangidan qurish, rekonstruksiya qilish va mukammal taʼmirlash manzilli roʻyxatiga kiritilgan obyektlar boʻyicha tanlov (tender) savdolarini oʻz vaqtida oʻtkazish;

maktabgacha taʼlim muassasalarida qurilish-montaj ishlarining bajarilishi va foydalanishga topshirilishida tasdiqlangan namunaviy loyiha, shaharsozlik normalari va qoidalariga qatʼiy rioya qilish.

9. Oʻzbekiston Respublikasi Xalq taʼlimi vazirligi, Moliya vazirligi hamda boshqa vazirliklar va idoralar bir oy muddatda oʻzlarining normativ-huquqiy hujjatlarini ushbu qarorga muvofiqlashtirsinlar.

10. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.