N. Axmedov R. Abdiyevaga nisbatan bolani olib berish haqida sudga da’vo ariza bilan murojaat qilib, javobgar bilan turmushlaridan uch nafar farzandlari borligini, o‘zaro kelishmovchiliklar tufayli 2011-yil apreldan birga yashamayotganliklarini, 2001-yil 14-yanvarda tug‘ilgan Abror ismli farzandi fuqarolik ishlari bo‘yicha viloyat sudi kassatsiya instansiyasining 2012-yil 8-maydagi ajrimiga asosan onasining tarbiyasiga olib berilganligini, o‘g‘li Abror onasi bilan yashashni xohlamasligini, farzandining tarbiyasi uchun barcha sharoitlar yetarli ekanliginini bayon qilib, uni o‘z tarbiyasiga olib berishni so‘ragan.
Fuqarolik ishlari bo‘yicha viloyat sudi kassatsiya instansiyasining 2013-yil 12-fevraldagi ajrimi bilan o‘zgarishsiz qoldirilgan tumanlararo sudining 2013-yil 12-fevraldagi ajrimi bilan fuqarolik ishi ish yuritishdan tugatilgan.
Quyidagi asoslarga ko‘ra, Oliy sud fuqarolik ishlari bo‘yicha sudlov hay’atining 2013-yil 23-dekabrdagi ajrimi bilan sud qarorlari o‘zgartirilgan.
Ish hujjatlariga ko‘ra, taraflar 1999-yil 13-noyabrdan qonuniy nikohda bo‘lib, 2001-yilda tug‘ilgan Abror, 2004-yilda tug‘ilgan Akbar va 2006-yilda tug‘ilgan Dilnavo ismli farzandlari bor.
Fuqarolik ishlari bo‘yicha tumanlararo sudining 2012-yil 14-fevraldagi hal qiluv qaroriga ko‘ra, R. Abdiyevaning N. Axmedovga nisbatan bolani olib berish haqidagi, shuningdek G. Abdiyevning R. Axmedovaga nisbatan bolani olib berish haqidagi qarshi da’vosi rad qilingan.
Fuqarolik ishlari bo‘yicha viloyat sudi kassatsiya instansiyasining 2012-yil 8-maydagi ajrimi bilan hal qiluv qarorining R. Axmedovaning da’vo talabini rad qilish qismi bekor qilingan va 2001-yilda tug‘ilgan Abror ismli farzandini uning tarbiyasiga olib berish haqida yangi hal qiluv qarori qabul qilingan.
O‘zbekiston Respublikasi FPK 100-moddasining 2-bandiga ko‘ra, ayni bir taraflar o‘rtasida, ayni bir predmet to‘g‘risidagi va aynan bir asoslar bo‘yicha chiqqan nizo yuzasidan sudning qonuniy kuchga kirgan hal qiluv qarori yoki da’vogarning arz qilgan talablaridan voz kechishini qabul qilish to‘g‘risidagi yoxud taraflarning kelishuv bitimini tasdiqlash to‘g‘risidagi ajrimi mavjud bo‘lsa, sud ish yuritishni tugatadi.
Sud ayni bir taraflar o‘rtasida, ayni bir predmet to‘g‘risidagi va aynan bir asoslar bo‘yicha chiqqan nizo yuzasidan sudning qonuniy kuchga kirgan hal qiluv qarori mavjudligini va fuqarolik ishi FPK 100-moddasining 2-bandiga asosan ish yuritishdan tugatish lozimligini inobatga olmasdan, FPK 100-moddasining 1-bandiga asosan ish yuritishdan tugatib, protsessual xatolikka yo‘l qo‘ygan.