Oʻzbekiston Respublikasi Vazirlar Mahkamasining 2004-yil 24-iyundagi 293-sonli “Oʻzbekiston Respublikasi Vazirlar Mahkamasi huzuridagi Davlat test markazi faoliyatini takomillashtirish toʻgʻrisida”gi va 2006-yil 10-fevraldagi 21-sonli “Oʻzbekiston Respublikasi taʼlim muassasalarini davlat akkreditatsiyasidan oʻtkazish tartibi toʻgʻrisidagi nizomni tasdiqlash haqida”gi qarorlariga muvofiq, Oʻzbekiston Respublikasi Vazirlar Mahkamasi huzuridagi Davlat test markazi, Oliy va oʻrta maxsus taʼlim vazirligi hamda Xalq taʼlimi vazirligi qaror qiladi:

1. Oʻzbekiston Respublikasi Vazirlar Mahkamasi huzuridagi Davlat test markazi, Oʻzbekiston Respublikasi Oliy va oʻrta maxsus taʼlim vazirligi va Xalq taʼlimi vazirligining 2008-yil 12-iyundagi 01-193, 173 va 25-sonli qarori (roʻyxat raqami 1836, 2008-yil 14-iyul) (Oʻzbekiston Respublikasi qonun hujjatlari toʻplami, 2008-y., 29-30-son, 287-modda) bilan tasdiqlangan Oʻzbekiston Respublikasi taʼlim muassasalarini attestatsiyadan oʻtkazish mezonlari va texnologiyalari boʻyicha yoʻriqnomaning 13-bandi oltinchi xatboshisi quyidagi tahrirda bayon etilsin:

“Tinglovchilarning fan dasturlarini oʻzlashtirish darajasi (bilimi) Komissiya tomonidan taʼlim muassasasi oʻtkazgan yakuniy nazoratlarni tahlil qilish orqali baholanadi”.

2. Mazkur qaror Oʻzbekiston Respublikasi Sogʻliqni saqlash vazirligi, Qishloq va suv xoʻjaligi vazirligi, Tashqi ishlar vazirligi, Madaniyat va sport ishlari vazirligi, Oʻrta maxsus kasb-hunar taʼlimi markazi, “Oʻzbekiston temir yoʻllari” davlat aksiyadorlik temir yoʻl kompaniyasi, Aloqa, axborotlashtirish va telekommunikatsiya texnologiyalari davlat qoʻmitasi, Davlat soliq qoʻmitasi, Navoiy kon-metallurgiya kombinati va Oʻzbekiston Badiiy akademiyasi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.