O‘zbekiston Respublikasi Hukumati va Amerika Qo‘shma Shtatlari Hukumati, bundan keyin Tomonlar deb ataluvchilar,
1963-yildagi Konsullik aloqalari to‘g‘risidagi Vena Konvensiyasi qoidalari, 1995-yilning 20-iyunidagi O‘zbekiston Respublikasi va Amerika Qo‘shma Shtatlari o‘rtasida hamjihatlik memorandumi, 1995-yil 29-avgustdagi O‘zbekiston Respublikasi va Amerika Qo‘shma Shtatlari o‘rtasidagi almashuv notalari, hamda 1996-yilning 7-martidagi Konsullik masalalari bo‘yicha qo‘shma kommyunikesini inobatga olib,
1998-yil fevralida Vashingtonda bo‘lib o‘tgan ikki tomonlama qo‘shma komissiya ishi va tomonlarning vakillari o‘rtasidagi maslahatlashishlarning yakunlariga muvofiq,
1. Tomonlar konsullik aloqalarini saqlashga va doimiy ravishda konsullik masalalarini muhokama qilishni rejalashtirdilar. Aloqa punktlari etib, AQSh tomonidan — AQShning Toshkentdagi Elchixonasi konsullik bo‘limi va Davlat departamenti, o‘zbek tomonidan — O‘zbekistonning Vashingtondagi Elchixonasi va O‘zbekiston Respublikasi Tashqi ishlar vazirligi hisoblanadi.
2. Tomonlar O‘zbekiston Hukumati uchun konsullik xodimlari tayyorlash zaruratini muhokama qildilar. Qo‘shma Shtatlar O‘zbekiston Hukumatiga konsullik xodimlari tayyorlashda hamjihatlik ko‘rsatishdan manfaatdorligini izhor etish bilan birga o‘z resurslarining chegaralanganligini ma’lum qildi. Tomonlar Qo‘shma Shtatlarning Konsullik ishlari bo‘yicha byuro mutaxassislari ko‘magi bilan kadrlarga maxsus konsullik tayyorligini berishda tegishli yordam ko‘rsatish imkoniyatini muhokama qildilar.
3. Ikkala hukumat konsullik munosabatlarini kengaytirish va chuqurlashtirishni istaydilar. Bu maqsadga erishish uchun Tomonlar viza olish talablari va protseduralarini engillashtirish, shu jumladan, hozirda mavjud o‘zaro vizalar jadvalini kengaytirish, hamda konsullik yig‘imlari miqdorini kamaytirish imkoniyatini ko‘rib chiqish istagini bildirdilar.
4. Ikkala davlatning tub maqsadlari vizasiz borish-kelish tartibini o‘rnatishga erishishdan iborat. Bunday natijaga etishgunga qadar, Tomonlar mavjud o‘zaro jadvalni ko‘pchilik kategoriyadagi, jumladan diplomatik, xizmat va turistik, vizalarni amal qilishi muddatini uzaytirishni rejalashtiradilar. Tomonlar barcha kategoriyadagi vizalar uchun to‘lovlarni, jumladan vizalar berish uchun yig‘imlar va amaliy xarajatlar uchun to‘lovlar miqdorini o‘zaro kamaytirishga intilishadilar. Mazkur masalalar notalar almashish yo‘li bilan atroflicha hal etiladi.
5. Ikki mamlakatga qilinadigan safarlarni qulaylashtirish maqsadida ikkala davlat hukumatlari safarlarni rasmiylashtirish protseduralarini soddalashtirishga, viza berishdagi taklifnoma yoki sayohat vaucherini rasmiylashtirish talablarini bekor qilish yo‘llarini izlash istagini bildirdilar.
6. Tomonlar konsullik masalalari bo‘yicha keyinchalik hamkorlik O‘zbekiston Respublikasi Hukumatining konsullik munosabatlarini muvofiqlashtiruvchi ko‘ptomonlama xalqaro bitimlarda ishtirok etishi yo‘li bilan erishish mumkinligiga ishonch bildirdilar.
7. Amerika Qo‘shma Shtatlari Hukumati Bolalarni himoya qilish va davlatlararo farzand asrab olish sohasida hamkorlik qilish to‘g‘risidagi Gaaga Konvensiyasi AQShga nisbatan 2000-yilda kuchga kirishi haqidagi o‘z istagini bayon qildi. U shuningdek, O‘zbekiston Respublikasi Hukumatini Qo‘shma Shtatlarda farzandlikka olish tartibiga aloqador tegishli ma’lumot va shuningdek farzandlikka olish bo‘yicha agentliklarning legitimligi to‘g‘risidagi ma’lumotlar olish yo‘llarini ko‘rsatadi, hamda Qo‘shma Shtatlarda farzandlikka olingan o‘zbek fuqarolarining yashash sharoitlarini kuzatish uchun imkoniyatlarni yaratib beradi.
8. O‘zbekiston Hukumati bolalarni xorijiy fuqarolari tomonidan farzandlikka olish shartlari va tartibini belgilovchi qonun aktlarini yaqin kelajakda ishlab chiqishga ahd qilganini yana bir bor tasdiqlaydi.
9. O‘zbekiston Hukumati, tegishli iltimos bo‘lganida, O‘zbekistonda yashovchi va AQShdan ijtimoiy sug‘urta bo‘yicha moddiy yordam oluvchi shaxslarning tug‘ilgani, nikohi va o‘limi to‘g‘risida axborot berish, hamda benefitsariylardan foydalanish imkonini berishga tayyorligini bildiradi.
10. Tomonlar xorijiy shaxslarning o‘z chegaralaridan noqonuniy o‘tishlari va qalbaki yo‘l hujjatlari yasashlariga qarshi kurashni kuchaytirish, hamda bu sohada axborot va ma’lumot almashishni kengaytirishga kelishdilar. Qo‘shma Shtatlar O‘zbekiston Respublikasi Hukumatiga shaxslarning noqonuniy ko‘chishlariga qarshi kurashda va, kerak bo‘lganda, O‘zbekiston mas’ul shaxslarini vaqti-vaqti bilan o‘qitish va ularga texnik yordam ko‘rsatishga tayyorliklarini bildiradilar.
11. O‘zbekiston Hukumati Amerika Qo‘shma Shtatlari Hukumati bilan safar shartlariga oid o‘zgarishlar, shuningdek, konsullik qonunchiligi va ma’lumotlar to‘g‘risida axborot berish sohasida o‘zarolik asosida yanada kengroq hamkorlikka ishtiyoq bildirdi.
12. Tomonlar jinoiy ishlar bo‘yicha huquqiy yordam ko‘rsatishda hamkorlikni davom ettirishga qiziqish bildirdilar va qulay sharoitlar tug‘ilganda, bu sohada ikki tomonlama bitimlarni tuzishga qaratilgan muzokaralarni boshlashni o‘ylab ko‘rishlari mumkin.