Oʻzbekiston Respublikasi Prezidentining “Jizzax” maxsus industrial zonasini barpo etish toʻgʻrisida” 2013-yil 18-martdagi PF-4516-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

“Jizzax” maxsus industrial zonasi toʻgʻrisidagi Nizom 1-ilovaga muvofiq;

“Jizzax” maxsus industrial zonasining Maʼmuriy kengashi toʻgʻrisidagi Nizom 2-ilovaga muvofiq;

“Jizzax” maxsus industrial zonasi direksiyasining Ustavi 3-ilovaga muvofiq;

Investitsiya loyihalarini tanlab olish va “Jizzax” maxsus industrial zonasi qatnashchilarini roʻyxatdan oʻtkazish tartibi toʻgʻrisidagi Nizom 4-ilovaga muvofiq tasdiqlansin.

2. Boshqaruv xodimlari soni 5 nafar va 5-ilovaga muvofiq tuzilmaga ega boʻlgan “Jizzax” maxsus industrial zonasi direksiyasi” (keyingi oʻrinlarda “Jizzax” MIZ direksiyasi deb ataladi) davlat unitar korxonasi tashkil etilsin.

“Jizzax” MIZning Maʼmuriy kengashiga “Jizzax” MIZ hududida amalga oshiriladigan loyihalar soni koʻpayishiga qarab “Jizzax” MIZ direksiyasi tuzilmasiga va xodimlari soniga oʻzgartirishlar kiritish huquqi berilsin.

3. Belgilansinki, “Jizzax” MIZ direksiyasi:

Oʻzbekiston Respublikasi Vazirlar Mahkamasi tomonidan taʼsis etiladi;

“Jizzax” MIZ budjeti mablagʻlari hisobiga taʼminlanadi;

“Jizzax” MIZ Maʼmuriy kengashi tomonidan qabul qilingan qarorlarga muvofiq “Jizzax” MIZ qatnashchilarini roʻyxatdan oʻtkazadi;

investorlar bilan “Jizzax” MIZ hududida investitsiyalash toʻgʻrisida bitimlar, “Jizzax” MIZ Maʼmuriy kengashining qarorlariga muvofiq davlat mulkini nolga teng xarid qiymati boʻyicha sotish toʻgʻrisida “Jizzax” MIZ qatnashchilari bilan shartnomalar tuzadi;

oʻz zimmasiga qabul qilingan majburiyatlarning investorlar tomonidan zarur tarzda bajarilishini nazorat qiladi, keyinchalik uning natijalarini “Jizzax” MIZ Maʼmuriy kengashiga taqdim etadi;

“Jizzax” MIZ faoliyatini tezkor boshqarish boʻyicha boshqa funksiyalarni amalga oshiradi.

4. Oʻzbekiston Respublikasi Moliya vazirligi 2013-2014-yillar davrida “Jizzax” MIZ direksiyasi taʼminoti uchun, keyingi yillarda uning oʻzini oʻzi moliyalashtirishga oʻtishi sharti bilan, asoslangan hisob-kitoblar boʻyicha Vazirlar Mahkamasining zaxira jamgʻarmasidan mablagʻlar ajratsin.

5. “Jizzax” MIZ direksiyasi quyidagi manzilga joylashtirilsin: Jizzax viloyati, Jizzax shahri, Sh. Rashidov shoh koʻchasi, 63-uy.

Jizzax viloyati hokimligi “Jizzax” MIZ direksiyasini koʻrsatilgan manzil boʻyicha xizmat xonalari bilan bepul taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom “Jizzax” maxsus industrial zonasi faoliyat koʻrsatishining huquqiy asoslarini belgilaydi.

2. Ushbu Nizom maqsadlari uchun quyidagi tushunchalardan foydalaniladi:

“Jizzax” maxsus industrial zonasi (keyingi oʻrinlarda “Jizzax” MIZ deb ataladi) — Oʻzbekiston Respublikasi Prezidentining ““Jizzax” maxsus industrial zonasini barpo etish toʻgʻrisida” 2013-yil 18-martdagi PF-4516-son Farmoniga 1-ilovaga muvofiq va “Jizzax” MIZ Maʼmuriy kengashining qarorlariga binoan chegaralar bilan Oʻzbekiston Respublikasi Jizzax va Sirdaryo viloyatlari hududining bir qismi;

“Jizzax” MIZning Maʼmuriy kengashi (keyingi oʻrinlarda Maʼmuriy kengash deb ataladi) — Oʻzbekiston Respublikasi Prezidentining Farmoni bilan “Jizzax” MIZ faoliyatini muvofiqlashtirish va davlat tomonidan boshqarish funksiyasini amalga oshiradigan, davlat va xoʻjalik boshqaruvi organlari vakillaridan tuziladigan kollegial organ;

“Jizzax” MIZ direksiyasi (keyingi oʻrinlarda Direksiya deb ataladi) — “Jizzax” MIZ faoliyatini tezkor boshqarish uchun tashkil etiladigan davlat unitar korxonasi shaklidagi yuridik shaxs;

investor — belgilangan tartibda tanlovdan oʻtgan hamda “Jizzax” MIZ hududida investitsiyalashni amalga oshiradigan investitsiya faoliyati subyekti;

“Jizzax” MIZ hududida investitsiyalash toʻgʻrisidagi bitim (keyingi oʻrinlarda investitsiyalash toʻgʻrisidagi bitim deb ataladi) — Direksiya bilan investor (investorlar) oʻrtasida tuziladigan, ularning huquqlari, majburiyati va javobgarligini belgilaydigan bitim;

“Jizzax” MIZ xoʻjalik faoliyati qatnashchisi (keyingi oʻrinlarda “Jizzax” MIZ qatnashchisi deb ataladi) — belgilangan tartibda “Jizzax” MIZ hududida roʻyxatdan oʻtkazilgan va Direksiya tomonidan “Jizzax” MIZ qatnashchilari reyestriga kiritilgan xoʻjalik yurituvchi subyekt;

yer uchastkasidan foydalanish toʻgʻrisidagi shartnoma — Jizzax va (yoki) Sirdaryo viloyati hokimliklari bilan “Jizzax” MIZ qatnashchisi oʻrtasida tuziladigan “Jizzax” MIZ hududida yer uchastkasidan muddatli foydalanish toʻgʻrisidagi shartnoma;

“Jizzax” MIZ hududidagi faoliyat — “Jizzax” MIZ qatnashchisining “Jizzax” MIZ hududi doirasida investitsiyalash toʻgʻrisidagi bitimda nazarda tutilgan tovarlar va mahsulotlarni ishlab chiqarish hamda qayta ishlash, shuningdek ularni sotish boʻyicha xoʻjalik faoliyati.

3. “Jizzax” MIZ hududida davlat organlarining faoliyati va Oʻzbekiston Respublikasi qonun hujjatlarining qoʻllanilishi Oʻzbekiston Respublikasi Prezidentining “Jizzax” maxsus industrial zonasini barpo etish toʻgʻrisida” 2013-yil 18-martdagi PF-4516-son Farmonida va uni ijro etish maqsadida qabul qilingan normativ-huquqiy hujjatlarda, investitsiyalash toʻgʻrisidagi xalqaro shartnomalar va bitimlarda, shuningdek ushbu Nizomda nazarda tutilgan xususiyatlar hisobga olingan holda amalga oshiriladi.

4. “Jizzax” MIZ hududida arxitektura va shaharsozlik faoliyati qurishning dastlabki rejasiga yoki “Jizzax” MIZni rivojlantirish bosh rejasiga muvofiq amalga oshiriladi. Loyiha-smeta hujjatlari belgilangan tartibda Oʻzbekiston Respublikasi Davlat arxitektura va qurilish qoʻmitasi bilan kelishiladi.

5. “Jizzax” MIZ hududidagi yer uchastkalari toʻgʻridan-toʻgʻri Jizzax va Sirdaryo viloyati hokimliklarining tasarrufida boʻladi va ular tomonidan qatnashchilarga Maʼmuriy kengashning qaroriga koʻra, belgilangan tartibda beriladi.

6. “Jizzax” MIZning faoliyat koʻrsatish muddati 30 yilni tashkil etadi. Ushbu muddat Oʻzbekiston Respublikasi Prezidentining qarori bilan uzaytirilishi mumkin.

7. Quyidagilar “Jizzax” maxsus industrial zonasining asosiy vazifalari va faoliyati yoʻnalishlari hisoblanadi:

ichki va jahon bozorlarida raqobatbardoshli boʻlgan, yuqori qoʻshilgan qiymatga ega mahsulot ishlab chiqarish boʻyicha zamonaviy, yuqori texnologiyali innovatsion ishlab chiqarishlarni barpo etish va ularning samarali faoliyat yuritishi uchun investitsiyalar, eng avvalo, toʻgʻridan-toʻgʻri investitsiyalarni jalb etish;

maxsus industrial zonaga kiruvchi mintaqaning ishlab chiqarish va resurs salohiyatidan kompleks va samarali foydalanishni taʼminlash, mineral-xom ashyo resurslarini va qishloq xoʻjaligi xom ashyosini yanada chuqur qayta ishlash boʻyicha yangi ishlab chiqarishlarni barpo etish;

maxsus industrial zona va umuman respublika tashkilotlari oʻrtasida mustahkam kooperatsiya aloqalari oʻrnatish hamda sanoat kooperatsiyasini rivojlantirish asosida mahalliy xom ashyo va materiallar negizida yuqori texnologiyali mahsulot ishlab chiqarishni mahalliylashtirish jarayonlarini chuqurlashtirish;

“Jizzax” MIZ hududida transport, muhandislik-kommunikatsiya va ijtimoiy infratuzilmani jadal rivojlantirishni hamda ulardan samarali foydalanishni taʼminlash.

8. “Jizzax” MIZ faoliyatini muvofiqlashtirish va davlat tomonidan tartibga solish funksiyasi Maʼmuriy kengash tomonidan amalga oshiriladi.

9. “Jizzax” MIZ faoliyatini tezkor boshqarish Direksiya tomonidan amalga oshiriladi.

10. Direksiya:

Maʼmuriy kengashning qabul qilingan qarorlariga muvofiq “Jizzax” MIZ qatnashchilarini roʻyxatdan oʻtkazadi;

“Jizzax” MIZning Maʼmuriy kengashi qarorlariga muvofiq investorlar bilan “Jizzax” MIZ hududida investitsiyalash toʻgʻrisida bitimlar, davlat mulkini nolga teng xarid qiymati boʻyicha sotish toʻgʻrisida “Jizzax” MIZ qatnashchilari bilan shartnomalar tuzadi;

belgilangan tartibda tanlab olingan investorlar tomonidan oʻz zimmalariga qabul qilingan majburiyatlarning zarur tarzda bajarilishini tizimli nazorat qiladi, keyinchalik uning natijalarini Maʼmuriy kengashga taqdim etadi;

“Jizzax” MIZ hududida joylashgan davlat mulki boʻlgan koʻchmas mulk obyektlarini oʻziga berilgan vakolatlar doirasida boshqaradi;

ekologik holatning yaxshilanishi ustidan nazoratni taʼminlaydi, shuningdek tarixiy-madaniy boyliklarning but saqlanishi uchun javobgar boʻladi;

“Jizzax” MIZ faoliyatini tezkor boshqarish boʻyicha boshqa funksiyalarni amalga oshiradi.

11. Direksiya Oʻzbekiston Respublikasi Moliya vazirligi bilan kelishgan holda, har yili tegishli moliyaviy yil uchun “Jizzax” MIZning mustaqil budjeti loyihasini ishlab chiqadi va tasdiqlash uchun Maʼmuriy kengashga taqdim etadi.

“Jizzax” MIZning mustaqil budjeti:

davlat mulki boʻlgan va “Jizzax” MIZ hududida joylashgan binolar va inshootlarni ijaraga berishdan tushumlar;

xizmatlar koʻrsatishdan olingan daromadlar;

“Jizzax” MIZ qatnashchilarining Maʼmuriy kengash tomonidan belgilanadigan miqdorlardagi ajratmalari;

investitsiya dasturida nazarda tutilgan maqsadli budjet mablagʻlari;

qonun hujjatlarida taqiqlanmagan boshqa tushumlar hisobiga shakllantiriladi.

12. “Jizzax” MIZ budjeti mablagʻlaridan:

mablagʻlari “Jizzax” MIZ infratuzilmasini rivojlantirishga va uning faoliyat koʻrsatishi samaradorligini oshirishga yoʻnaltiriladigan “Jizzax” MIZni rivojlantirish jamgʻarmasini tashkil etish;

belgilangan tartibda “Jizzax” MIZ direksiyasi taʼminoti;

Oʻzbekiston Respublikasi Prezidentining “Jizzax” maxsus industrial zonasini barpo etish toʻgʻrisida” 2013-yil 18-martdagi PF-4516-son Farmonini bajarishga yoʻnaltirilgan boshqa vazifalar amalga oshirilishini moliyalashtirish uchun foydalaniladi.

“Jizzax” MIZni rivojlantirish jamgʻarmasi toʻgʻrisidagi nizom Maʼmuriy kengash tomonidan tasdiqlanadi.

13. Direksiyaning shtat jadvali va xarajatlari smetasi Maʼmuriy kengash tomonidan tasdiqlanadi.

14. Quyidagilar “Jizzax” MIZ qatnashchisi maqomini berish uchun xoʻjalik yurituvchi subyektlarni tanlab olish mezonlari hisoblanadi:

zamonaviy ishlab chiqarishlar tashkil etish yoki ishlab turgan korxonalarni chuqur modernizatsiya qilish, ularni, eng avvalo, mahalliy mineral xom ashyo resurslarini va qishloq xoʻjaligi xom ashyosini chuqur qayta ishlash boʻyicha yuqori texnologik asbob-uskunalar va texnologiyalar bilan jihozlash;

strategik tabiiy xom ashyo resurslarini qazib olish va dastlabki qayta ishlash korxonalaridan tashqari, faoliyat sohasining “Jizzax” MIZning asosiy vazifalariga muvofiqligi;

muassislarning oʻz mablagʻlari va ular tomonidan Oʻzbekiston Respublikasi kafolatlari berilmagan jalb etilgan kreditlar hisobiga investitsiyalarni amalga oshirish;

“Jizzax” MIZda importning oʻrnini bosuvchi va eksportga yoʻnaltirilgan raqobatbardoshli mahsulotlar ishlab chiqarish boʻyicha texnologik bogʻliqlikni bosqichma-bosqich shakllantirish;

imtiyozlar amal qilishi mobaynida ularning qoʻllanilishidan olingan daromadning kamida 50 foizini tashkilotga qayta investitsiyalash boʻyicha investorlar tomonidan majburiyatlar qabul qilinishi.

15. “Jizzax” MIZ qatnashchisiga beriladigan guvohnoma uning “Jizzax” MIZ hududidagi faoliyatiga nisbatan uning alohida soliq rejimi va bojxona imtiyozlarini qoʻllash huquqlarining tasdigʻi hisoblanadi.

16. “Jizzax” MIZ qatnashchisiga, u belgilangan tartibda roʻyxatdan oʻtkazilgandan keyin “Jizzax” MIZ hududidagi faoliyatga tegishli qismi yuzasidan investitsiyalash toʻgʻrisidagi tegishli bitimda mustahkamlangan majburiyatlar yuklanadi.

“Jizzax” MIZ qatnashchisi investitsiyalash toʻgʻrisidagi bitim boʻyicha oʻz huquq va majburiyatlarini boshqa shaxsga berishga haqli emas.

17. Oʻzbekiston Respublikasi Prezidentining ““Jizzax” maxsus industrial zonasini barpo etish toʻgʻrisida” 2013-yil 18-martdagi PF-4516-son Farmonida belgilangan imtiyozlar va ustunliklar faqat Direksiya bilan tuziladigan investitsiyalash toʻgʻrisidagi bitimda nazarda tutilgan “Jizzax” MIZ qatnashchisi faoliyati turlariga joriy etiladi.

18. “Jizzax” MIZ qatnashchilari boʻlmagan xoʻjalik yurituvchi subyektlar “Jizzax” MIZ hududida faoliyatni qonun hujjatlariga muvofiq amalga oshirish huquqiga ega.

19. “Jizzax” MIZ qatnashchilari tomonidan Oʻzbekiston Respublikasida “Jizzax” MIZ hududidan tashqarida oʻz filiallarini tashkil etishga yoʻl qoʻyilmaydi.

20. “Jizzax” MIZ qatnashchisi maqomidan mahrum etishga sud tartibida yoki “Jizzax” MIZ Maʼmuriy kengashining qarori bilan yoʻl qoʻyiladi.

21. “Jizzax” MIZ hududidagi faoliyat bilan bogʻliq nizolar qonun hujjatlariga va investitsiyalash toʻgʻrisidagi bitimlarga muvofiq hal etiladi.

22. Maxsus soliq rejimi va bojxona imtiyozlarining amal qilishi faqat qatnashchilarning “Jizzax” MIZ hududida amalga oshiriladigan faoliyatiga tatbiq etiladi.

23. Qonun hujjatlarida belgilangan imtiyozlar va ustunliklarning amal qilish muddati xoʻjalik yurituvchi subyekt “Jizzax” MIZ qatnashchilari reyestriga kiritilgan sanadan boshlab hisoblanadi.

24. “Jizzax” MIZ qatnashchilarining Investitsiyalash toʻgʻrisidagi bitimda kelishilmagan boshqa sohalardagi faoliyatini tartibga solish qonun hujjatlarida belgilangan tartibda amalga oshiriladi.

25. “Jizzax” MIZ faoliyati uni tashkil etishning belgilangan muddati tamom boʻlgandan keyin toʻxtatilishi mumkin.

26. “Jizzax” MIZ faoliyatining muddatidan oldin toʻxtatilishiga Oʻzbekiston Respublikasining milliy xavfsizligi manfaatlarini himoya qilishni taʼminlash zarur boʻlganda, shuningdek Oʻzbekiston Respublikasi qonun hujjatlarida belgilangan boshqa hollarda yoʻl qoʻyiladi.

27. “Jizzax” MIZ faoliyatini toʻxtatish toʻgʻrisidagi qaror Oʻzbekiston Respublikasi Prezidenti tomonidan qabul qilinadi.

1. Ushbu Nizom “Jizzax” maxsus industrial zonasi Maʼmuriy kengashining (keyingi oʻrinlarda Maʼmuriy kengash deb ataladi) faoliyat koʻrsatishi tartibini belgilaydi.

2. Maʼmuriy kengash Oʻzbekiston Respublikasi Prezidenti Farmoni bilan davlat va xoʻjalik boshqaruvi organlari vakillaridan tashkil etiladigan kollegial organ hisoblanadi.

3. Maʼmuriy kengash oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasining boshqa normativ-huquqiy hujjatlariga, shuningdek ushbu Nizomga amal qiladi.

Maʼmuriy kengashning oʻz vakolatlari doirasida qabul qilgan qarorlari viloyatlar, shaharlar va tumanlar hokimliklari, shuningdek ularda faoliyat koʻrsatuvchi davlat va xoʻjalik boshqaruvi organlari, xoʻjalik yurituvchi subyektlar tomonidan bajarilishi majburiy hisoblanadi.

4. Quyidagilar Maʼmuriy kengashning asosiy vazifalari hisoblanadi:

“Jizzax” maxsus industrial zonasi qatnashchilari boʻlgan xoʻjalik yurituvchi subyektlarga MIZ hududida amalga oshirish uchun istiqbolli investitsiya loyihalarini ishlab chiqish, xorijiy investorlarni jalb etish, moliyalashtirish manbalarini aniqlashda koʻmaklashish;

tashkilotlarga “Jizzax” MIZ qatnashchisi maqomini berish toʻgʻrisida qarorlar qabul qilish;

“Jizzax” MIZda loyihalarning amalga oshirilishi uchun masʼul boʻlgan vazirliklar va idoralar, xoʻjalik birlashmalarining loyiha, tender va kontrakt hujjatlarini oʻz vaqtida tayyorlash hamda ularni ekspertizadan oʻtkazish boʻyicha ishlarini, shuningdek mahalliy davlat hokimiyati organlarining “Jizzax” MIZning faoliyat koʻrsatishi bilan bogʻliq masalalar boʻyicha ishlarini muvofiqlashtirish;

ishlamayotgan tashkilotlarni va davlat mulkida boʻlgan mol-mulklarni nolga teng xarid qiymati boʻyicha “Jizzax” MIZ qatnashchilariga sotish toʻgʻrisida qarorlar qabul qilish;

“Jizzax” MIZda obyektlarni qurish va oʻz vaqtida ishga tushirish boʻyicha tasdiqlangan investitsiya loyihalarining amalga oshirilishini tizimli asosda nazorat qilish;

“Jizzax” MIZning transport, muhandislik-kommunikatsiya va ijtimoiy infratuzilmasini jadal rivojlantirish dasturlari va loyihalarini ishlab chiqish;

“Jizzax” MIZda faoliyatni amalga oshirayotgan tashkilotlarning ishlab chiqarish va moliyaviy koʻrsatkichlari doimiy monitoringini tashkil etish, ularga investitsiya loyihasida nazarda tutilgan parametrlarga erishishda, ishlab chiqarish quvvatlarini eng toʻliq darajada ish bilan taʼminlashda, barqaror kooperatsiya aloqalarini yoʻlga qoʻyishda va ishlab chiqarilgan mahsulotlarni eksport qilishda koʻmaklashish;

“Jizzax” MIZning samarali faoliyat koʻrsatishini tashkil etish, “Jizzax” MIZ direksiyasini shakllantirish boʻyicha chora-tadbirlar kompleksini amalga oshirish va uning faoliyatini nazorat qilish;

“Jizzax” MIZ faoliyati samaradorligini oshirishga yoʻnaltirilgan boshqa vazifalarni amalga oshirish.

5. Yuklangan vazifalarga muvofiq Maʼmuriy kengash quyidagi funksiyalarni amalga oshiradi:

Oʻzbekiston Respublikasi Vazirlar Mahkamasiga “Jizzax” MIZni oʻrta muddatli va uzoq muddatli rivojlantirish hamda uning faoliyat koʻrsatishi samaradorligini oshirishning strategik yoʻnalishlari boʻyicha takliflar kiritadi;

“Jizzax” MIZ hududida amalga oshirish uchun investitsiya loyihalarini tanlab oladi, “Jizzax” MIZ qatnashchisi maqomini olishga buyurtmanomalarni va loyihalarning biznes-rejalarini koʻrib chiqadi, investitsiyalash toʻgʻrisidagi bitimlarning asosiy shartlarini belgilaydi;

“Jizzax” MIZ hududida belgilangan mezonlarga muvofiq boʻlgan tashkilotlarni joylashtirish, ularga “Jizzax” MIZ qatnashchisi maqomini berish, shuningdek ishlamayotgan tashkilotlarni va davlat mulki boʻlgan mol-mulklarni nolga teng xarid qiymati boʻyicha “Jizzax” MIZ qatnashchilariga sotish toʻgʻrisida qarorlar qabul qiladi;

“Jizzax” MIZni rivojlantirishning Bosh rejasini koʻrib chiqadi va “Jizzax” MIZning markazlashtirilgan manbalar hisobiga moliyalashtiriladigan ishlab chiqarish infratuzilmasini qurish loyihalarini tasdiqlaydi;

“Jizzax” MIZ direksiyasi faoliyatiga rahbarlik qiladi va uning faoliyati yuzasidan nazoratni amalga oshiradi, “Jizzax” MIZ direksiyasi direktorini tayinlaydi, “Jizzax” MIZ direksiyasi ish rejasini tasdiqlaydi, shuningdek “Jizzax” MIZning mustaqil budjeti va “Jizzax” MIZni rivojlantirish jamgʻarmasi mablagʻlaridan maqsadli foydalanilishini nazorat qiladi;

davlat va xoʻjalik boshqaruvi organlari hamda mahalliy davlat hokimiyati organlarining “Jizzax” MIZning faoliyat koʻrsatishi bilan bogʻliq masalalar boʻyicha faoliyatini muvofiqlashtirishni amalga oshiradi;

“Jizzax” MIZning ishlab chiqarish va transport infratuzilmasini, shuningdek “Jizzax” MIZ hududida joylashgan ijtimoiy infratuzilma obyektlarini jadal rivojlantirish loyihalarini amalga oshirish boʻyicha dasturlar ishlab chiqadi va takliflar kiritadi;

“Jizzax” MIZ hududida loyihalarning amalga oshirilishi yuzasidan doimiy monitoring olib boradi, “Jizzax” MIZ direksiyasining moliya-xoʻjalik faoliyati toʻgʻrisidagi hisobotlarni har chorakda eshitadi, vujudga keladigan muammoli masalalarni hal etish chora-tadbirlari ishlab chiqilishini va amalga oshirilishini taʼminlaydi;

qabul qilingan majburiyatlar bajarilmagan taqdirda investitsiyalash toʻgʻrisidagi bitimlarni muddatidan oldin bekor qilish toʻgʻrisida qaror qabul qiladi;

“Jizzax” MIZni rivojlantirish jamgʻarmasi toʻgʻrisidagi Nizomni, “Jizzax” MIZni rivojlantirish jamgʻarmasi mablagʻlarini shakllantirish va ulardan foydalanishning har yilgi smetasini tasdiqlaydi;

qonun hujjatlariga muvofiq boshqa funksiyalarni amalga oshiradi.

6. Maʼmuriy kengash oʻziga yuklangan vazifalarni bajarish uchun:

davlat va xoʻjalik boshqaruvi organlaridan, mahalliy davlat hokimiyati organlaridan, “Jizzax” MIZ qatnashchilaridan “Jizzax” MIZning vakolatiga tegishli boʻlgan axborotlarni belgilangan tartibda soʻrash va olish;

“Jizzax” MIZ qatnashchilarining investitsiya loyihalari amalga oshirilishini, berilgan imtiyozlar va preferensiyalarning qatnashchilar tomonidan qoʻllanishining toʻgʻriligini, shu jumladan joyiga borgan holda oʻrganishni tashkil etish;

davlat va xoʻjalik boshqaruvi organlari, mahalliy davlat hokimiyati organlari vakillarining, shuningdek Maʼmuriy kengash aʼzolarining Maʼmuriy kengash vakolatiga tegishli masalalar boʻyicha hisobotlari va axborotlarini majlislarda eshitish;

Maʼmuriy kengash faoliyatining eng muhim masalalarini va unga yuklangan vazifalarning amalga oshirilishini oʻrganish va takliflar tayyorlash uchun ishchi guruhlar tashkil etish;

davlat va xoʻjalik boshqaruvi organlaridan, mahalliy davlat hokimiyati organlaridan, shuningdek “Jizzax” MIZ hududida ishlab chiqarishni joylashtirish uchun investitsiya buyurtmanomalari berayotgan investorlardan taklif etilayotgan loyiha bilan bogʻliq statistik va boshqa maʼlumotlarni soʻrash huquqiga ega.

Maʼmuriy kengash qonun hujjatlariga muvofiq boshqa huquqlarga ham ega boʻlishi mumkin.

7. Maʼmuriy kengashga rais boshchilik qiladi, uning vakolatiga quyidagilar kiradi:

Maʼmuriy kengash majlislari kun tartibini belgilash va ularni chaqirish;

Maʼmuriy kengash tomonidan qabul qilingan qarorlarning bajarilishi yuzasidan nazoratni tashkil etish;

Maʼmuriy kengash aʼzolarining yuklangan vazifalarni bajarish boʻyicha ishlarini muvofiqlashtirish;

Maʼmuriy kengashning samarali ishlashini taʼminlash yuzasidan qonun hujjatlarida taqiqlanmagan boshqa saʼy-harakatlarni amalga oshirish.

8. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Maʼmuriy kengashning ishchi organi (keyingi oʻrinlarda ishchi organ deb ataladi) hisoblanadi.

9. Ishchi organ:

Maʼmuriy kengashning navbatdagi majlisiga barcha zarur materiallarning oʻz vaqtida tayyorlanishini taʼminlaydi hamda unga “Jizzax” MIZ direksiyasidan, davlat va xoʻjalik boshqaruvi organlaridan, mahalliy davlat hokimiyati organlaridan va Maʼmuriy kengash aʼzolaridan zarur materiallar va ekspert xulosalarni olish huquqi beriladi;

Maʼmuriy kengash aʼzolari, Direksiya, loyihalar tashabbuskorlari, investorlar, manfaatdor vazirliklar va idoralarning takliflariga muvofiq Maʼmuriy kengash majlisi kun tartibini shakllantiradi hamda kelishish uchun Maʼmuriy kengash raisiga kiritadi;

kun tartibidagi masalalar boʻyicha tahliliy materiallar tayyorlanishini tashkil qiladi va koʻrib chiqish uchun ularni Maʼmuriy kengashga taqdim etadi;

Maʼmuriy kengashning qarorlariga muvofiq boshqa materiallarni uning koʻrib chiqishi uchun taqdim etadi;

Maʼmuriy kengash majlislari protokollarini yuritadi va ularni Maʼmuriy kengash aʼzolari bilan kelishib oladi;

Maʼmuriy kengash qarorlarining bajarilishini nazorat qiladi;

Maʼmuriy kengashga uning qarorlarining bajarilishi toʻgʻrisida muntazam ravishda axborot beradi;

Maʼmuriy kengash aʼzolariga Direksiyadan tushgan investitsiya buyurtmanomalari, biznes-rejalar va “Jizzax” MIZ hududida loyihalarni amalga oshirish yuzasidan boshqa materiallarni koʻrib chiqish uchun yuboradi.

10. Maʼmuriy kengash oʻz majlisini zaruriyatga koʻra, biroq har chorakda kamida bir marta oʻtkazadi.

11. Majlisni Maʼmuriy kengash raisi, u boʻlmaganda esa — Maʼmuriy kengash raisining oʻrinbosari oʻtkazadi.

Maʼmuriy kengash majlisi, agar roʻyxatdan oʻtkazish tamom boʻlish paytida majlisda qatnashish uchun Maʼmuriy kengash aʼzolarining kamida uchdan ikki qismi roʻyxatdan oʻtgan boʻlsa huquqiy vakolatli boʻladi (kvorumga ega boʻladi).

12. Maʼmuriy kengashning qarori majlisda qatnashayotgan aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda Maʼmuriy kengash raisining ovozi hal qiluvchi hisoblanadi.

Maʼmuriy kengashning har bir aʼzosi qabul qilinayotgan qarorlar boʻyicha oʻz fikrini yozma ifodalash huquqiga ega.

Maʼmuriy kengash raisi qarorlarni tezkor qabul qilish maqsadida komissiya aʼzolari bilan kelishilgan ayrim masalalar boʻyicha soʻrov oʻtkazish yoʻli bilan kengashning qarorini tasdiqlashi mumkin.

13. Maʼmuriy kengash qarorlari Maʼmuriy kengash majlisining protokoli bilan rasmiylashtiriladi. Maʼmuriy kengash majlisining protokoliga uning barcha aʼzolari viza qoʻyadi, u kotib tomonidan imzolanadi, Maʼmuriy kengash raisi tomonidan tasdiqlanadi va bir hafta muddatda Maʼmuriy kengash aʼzolariga hamda manfaatdor tashkilotlarga yuboriladi.

Maʼmuriy kengash protokolining asl nusxasi va unga oid materiallar ishchi organ tomonidan saqlanadi.

14. Maʼmuriy kengash qarorlarining bajarilishini nazorat qilish ishchi organ tomonidan amalga oshiriladi.

15. Ishchi organ Maʼmuriy kengash qarorlarining bajarilishini muntazam ravishda oʻrganadi va koʻrib chiqadi, zaruriyat boʻlsa Maʼmuriy kengash raisiga tegishli takliflar kiritadi.

16. Maʼmuriy kengash aʼzolaridan birining tashabbusi bilan navbatdan tashqari majlis oʻtkazilishi mumkin. Maʼmuriy kengashning navbatdan tashqari majlisini oʻtkazish toʻgʻrisidagi asoslangan talab yozma shaklda ishchi organga yuboriladi.

17. Navbatdagi majlisda koʻrib chiqish uchun Maʼmuriy kengash kun tartibiga kiritilgan masalalar ishchi organ tomonidan majlisni oʻtkazish sanasidan kamida besh kun oldin Maʼmuriy kengashning har bir aʼzosiga yuboriladi.

18. Kun tartibi oʻzgargan taqdirda ishchi organ Maʼmuriy kengashning har bir aʼzosini majlis boshlanishidan oldin uch kundan kechikmay bunday oʻzgarishlar toʻgʻrisida xabardor qiladi.

19. Maʼmuriy kengash oʻz faoliyatini “Jizzax” MIZ belgilangan tartibda tugatilgandan keyin yoki Oʻzbekiston Respublikasi Hukumati qaroriga binoan muddatidan oldin toʻxtatadi.

1. “Jizzax” maxsus industrial zonasi direksiyasi” davlat unitar korxonasi (keyingi oʻrinlarda Direksiya deb ataladi) tezkor boshqaruv uchun oʻziga berilgan davlat mulki boʻlgan mulk bazasida davlat unitar korxonasi shaklida tashkil etilgan tijorat tashkiloti hisoblanadi, u oʻziga birkitilgan mulkka nisbatan, qonunda belgilangan doirada, oʻz faoliyati maqsadlariga, Muassis topshiriqlariga muvofiq egalik qilish, foydalanish va tasarruf etish huquqini amalga oshiradi.

2. Direksiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlariga, farmoyishlariga, boshqa normativ-huquqiy hujjatlarga, shuningdek ushbu Ustavga amal qiladi.

3. Direksiya yuridik shaxs hisoblanadi, alohida mulkka, mustaqil balansga, banklarda hisob raqamlariga, shu jumladan valyuta hisob raqamlariga, ramzga, shtamplar va blankalarga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega boʻladi.

4. Direksiyaning rasmiy nomi:

a) davlat tilida:

toʻliq nomi – “Jizzax” maxsus industrial zona Direktsiyasi” Davlat unitar korxonasi;

qisqartirilgan nomi – “Jizzax” MIZ Direktsiyasi” DUK;

b) rus tilida:

toʻliq nomi – Gosudarstvennoye unitarnoye predpriyatiye “Direksiya spetsialnoy industrialnoy zoni “Jizzax”;

qisqartirilgan nomi – GUP “Direksiya SIZ “Jizzax”;

v) ingliz tilida:

toʻliq nomi – “Directorate of special industrial zone “Jizzakh” State Unitary Company;

qisqartirilgan nomi – “Directorate of SIZ “Jizzakh” SUC.

5. Direksiyaning joylashgan joyi (pochta manzili): Jizzax viloyati, Jizzax shahri, Sh. Rashidov shoh koʻchasi, 63-uy.

6. Oʻzbekiston Respublikasi Vazirlar Mahkamasi Direksiyaning muassisi (keyingi oʻrinlarda Muassis deb ataladi) hisoblanadi.

7. Direksiya oʻz nomidan qonun hujjatlarida belgilangan tartibda mulkiy va shaxsiy nomulkiy huquqlarni olishi va amalga oshirishi, majburiyatlar olishi, sudda daʼvogar va javobgar boʻlishi, nizolarni hal etishda boshqa organlarda vakillik qilishi mumkin.

8. Direksiya Muassisning roziligiga koʻra tijorat tashkilotlarining, shuningdek Oʻzbekiston Respublikasi qonun hujjatlariga muvofiq yuridik shaxslarning qatnashishiga yoʻl qoʻyiladigan notijorat tashkilotlarda qatnashchi (aksiyador, aʼzo) boʻlishi mumkin.

9. Direksiya davlat boshqa korxonasining muassisi boʻlishi mumkin emas.

10. “Jizzax” maxsus industrial zonasi (keyingi oʻrinlarda “Jizzax” MIZ deb ataladi) faoliyatini, shu jumladan “Jizzax” MIZni rivojlantirish davlat dasturlarining toʻliq va oʻz vaqtida bajarilishini, “Jizzax” MIZ hududida alohida huquqiy rejimga rioya etilishini taʼminlash yoʻli bilan tezkor boshqarish, shuningdek “Jizzax” MIZ hududidagi xoʻjalik faoliyati qatnashchilariga (keyingi oʻrinlarda “Jizzax” MIZ qatnashchilari” deb ataladi) xizmatlar koʻrsatishdan hamda ushbu Ustavda nazarda tutilgan boshqa ishlar va xizmatlarni bajarishdan foyda olish Direksiya faoliyatining maqsadi hisoblanadi.

11. Quyidagilar Direksiya faoliyatining asosiy yoʻnalishlari hisoblanadi:

“Jizzax” MIZ qatnashchilarini roʻyxatdan oʻtkazish va ularning reyestrini yuritish, ularga tegishli guvohnomalar berish;

“Jizzax” MIZ hududida “Jizzax” MIZ qatnashchilari hisoblanmaydigan boshqa xoʻjalik yurituvchi subyektlar hisobini yuritish;

belgilangan tartibda tanlangan investorlar bilan “Jizzax” MIZning Maʼmuriy kengashi (keyingi oʻrinlarda Maʼmuriy kengash deb ataladi) qarorlariga muvofiq “Jizzax” MIZ hududida investitsiyalash toʻgʻrisida bitimlar, “Jizzax” MIZ qatnashchilari bilan faoliyat koʻrsatmay turgan tashkilotlarni va davlat mulki boʻlgan mol-mulkni nolga teng xarid qiymati boʻyicha sotish toʻgʻrisida shartnomalar tuzish;

belgilangan tartibda tanlangan investorlar tomonidan oʻz zimmasiga qabul qilgan majburiyatlarning zarur darajada bajarilishini nazorat qilish, keyinchalik uning natijalarini Maʼmuriy kengashga taqdim etish;

“Jizzax” MIZ hududida joylashgan davlat mulki boʻlgan koʻchmas mulk obyektlarini Direksiyaga berilgan vakolatlar doirasida boshqarish;

“Jizzax” MIZ qatnashchilariga investitsiya loyihalarini oʻz vaqtida amalga oshirish, tashkilotlarni ishga tushirish va ularning faoliyati uchun zarur boʻlgan infratuzilma (elektr energiya, gaz va suv taʼminoti, kanalizatsiya, kirish yoʻllari va boshqalar) bilan taʼminlash bilan bogʻliq masalalarni hal etishda koʻmaklashish;

“Jizzax” MIZ qatnashchilariga, shu jumladan davlat organlarida ularning manfaatlarini ifodalash yoʻli bilan xizmatlar koʻrsatish;

Maʼmuriy kengash vakolatlariga kiruvchi masalalar boʻyicha uning majlislarida koʻrib chiqish uchun materiallar tayyorlash;

“Jizzax” MIZ faoliyatini tezkor boshqarish boʻyicha boshqa funksiyalarni amalga oshirish.

Oʻzbekiston Respublikasi qonun hujjatlarida ushbu Ustavda nazarda tutilgan tegishli faoliyat turining litsenziyalanishi zarurligi belgilangan taqdirda Direksiya faoliyatning ushbu turini litsenziya olmasdan, tegishli litsenziyalovchi organ bilan tuzilgan litsenziya bitimi asosida amalga oshirishga haqlidir.

12. Direksiya Oʻzbekiston Respublikasi qonun hujjatlarida taqiqlanmagan faoliyatning boshqa turlarini amalga oshirishi mumkin.

13. Direksiya Muassisga va Maʼmuriy kengashga hisobot beradi.

14. Muassis quyidagi huquqlarga ega:

Direksiya faoliyatining maqsadi va yoʻnalishlarini belgilash;

Direksiya Ustaviga oʻzgartirish va qoʻshimchalar kiritish toʻgʻrisida qarorlar qabul qilish;

Direksiyaning ortiqcha, foydalanilmayotgan yoxud belgilangan maqsadda foydalanilmayotgan mulkini olib qoʻyish va tasarruf etish;

Direksiyaga berilgan mulkdan foydalanishdan olingan sof foydaning bir qismini yoki hammasini olish;

Direksiya mulki bilan amalga oshirilgan bitishuvlarni haqqoniy emas deb eʼtirof etish toʻgʻrisida sudga daʼvo arizasi bilan murojaat qilish;

Direksiyaga yetkazilgan zararlarni qoplash toʻgʻrisida daʼvo taqdim etish;

Direksiyani qayta tashkil etish yoki tugatish toʻgʻrisida qaror qabul qilish, tugatish komissiyasini tayinlash va tugatish balansini tasdiqlash;

mehnatga oid qonun hujjatlarida belgilangan tartibda Direksiya rahbari bilan mehnat shartnomasini muddatidan oldin toʻxtatish;

Oʻzbekiston Respublikasi qonun hujjatlariga muvofiq boshqa huquqlarga ega boʻlish.

15. Maʼmuriy kengash Direksiya faoliyatiga rahbarlikni va nazoratni, shuningdek “Jizzax” MIZning mustaqil budjeti hamda “Jizzax” MIZni rivojlantirish jamgʻarmasi mablagʻlaridan maqsadli foydalanilishi yuzasidan nazoratni amalga oshiradi.

16. Maʼmuriy kengash vakolatiga quyidagilar kiradi:

“Jizzax” MIZni rivojlantirish boʻyicha Direksiyaning strategik vazifalarini va faoliyati yoʻnalishlarini belgilash hamda “Jizzax” MIZni rivojlantirishning tegishli oʻrta muddatli va uzoq muddatli dasturlarini ishlab chiqishni tashkil etish;

“Jizzax” MIZning samarali faoliyatini taʼminlash uchun zarur boʻlgan tashkiliy-texnik tadbirlarni tasdiqlash, shuningdek ularning bajarilishi toʻgʻrisidagi hisobotlarni koʻrib chiqish;

Direksiyaning moliya-xoʻjalik faoliyatini har chorakda oʻrganishni tashkil etish;

har chorakda Direksiya faoliyati toʻgʻrisidagi hisobotni eshitish;

Muassis nomidan Direksiya direktorini yollash toʻgʻrisida mehnat shartnomasi (kontrakt)ni tuzish va bekor qilish;

Direksiyaning boshqaruv apparati tuzilmasini maʼqullash;

Direksiyaning shtatlar roʻyxatini va xarajatlari smetasini tasdiqlash;

Oʻzbekiston Respublikasi qonun hujjatlariga muvofiq boshqa vakolatlar.

17. Maʼmuriy kengash oʻziga yuklangan vazifalarni bajarish uchun Direksiya faoliyatiga taalluqli hujjatlarni talab qilib olish huquqiga ega. Olingan hujjatlardan Maʼmuriy kengash tomonidan faqat xizmat maqsadlarida foydalaniladi.

18. Direksiyaning joriy faoliyatiga rahbarlikni Maʼmuriy kengash tomonidan lavozimga tayinlanadigan va lavozimdan ozod etiladigan Direktor amalga oshiradi.

19. Direktor ijro etuvchi organ hisoblanadi.

20. Direktor:

Oʻzbekiston Respublikasi qonun hujjatlari talablarini bajarishga, Direksiya xodimlarining mehnat sharoitlarini muhofaza qilish va yaxshilashga, atrof muhitni muhofaza qilish va tabiiy resurslardan oqilona foydalanish sohasidagi norma va qoidalarga rioya etilishini taʼminlashga yoʻnaltirilgan tadbirlarni ishlab chiqadi va joriy etadi;

“Jizzax” MIZni rivojlantirish dasturlari amalga oshirilishini tashkil qiladi;

Direksiyaning asosiy faoliyatini takomillashtirishga, boshqarishning eng yangi uslublarini joriy etishga yoʻnaltirilgan tadbirlarni amalga oshirish chora-tadbirlarini koʻradi;

Direksiya nomidan ishonchnomasiz harakat qiladi, barcha tashkilotlarda, shu jumladan xorijiy tashkilotlarda uning manfaatlarini ifodalaydi;

xodimlarni ishga qabul qiladi, ular bilan mehnat shartnomalari (kontraktlari) tuzadi hamda ularni oʻzgartiradi va toʻxtatadi;

Oʻzbekiston Respublikasi qonun hujjatlarida belgilangan tartibda ishonchnomalar beradi;

kadrlarni tayyorlash va oʻqitish, ularning malakasini oshirish chora-tadbirlarini koʻradi;

Direksiyaning barcha xodimlari uchun majburiy boʻlgan buyruqlar, farmoyishlar va koʻrsatmalar chiqaradi;

Direksiyaning ichki ish tartibini va xoʻjalik faoliyatini tartibga soluvchi hujjatlarni tasdiqlaydi;

Direksiya tomonidan Oʻzbekiston Respublikasi qonun hujjatlariga rioya qilinishini tashkil etish va nazorat qilishni taʼminlaydi;

Direksiyaga yuklangan maqsadlar va vazifalarni amalga oshirish uchun zarur boʻlgan boshqa funksiyalarni amalga oshiradi.

21. Direktor muassis va Maʼmuriy kengash oldida Direksiya faoliyati toʻgʻrisida belgilangan tartibda hisobot beradi.

22. Direktor oʻz huquqlarini amalga oshirishda va vazifalarini bajarishda Direksiya manfaatlarini koʻzlagan holda harakat qilishi lozim hamda budjetga va budjetdan tashqari jamgʻarmalarga toʻlovlar, ish haqining oʻz vaqtida toʻlanishi, mehnatga oid huquqiy munosabatlardan kelib chiquvchi barcha talablarning va ularga tenglashtirilgan toʻlovlarning qondirilishi, bevosita ishlab chiqarish faoliyati bilan bogʻliq ehtiyojlarga mablagʻlar oʻtkazilmaganligi, Direksiyaning xatti-harakatlari (harakatsizligi) bilan, shu jumladan Direksiyaga berilgan davlat mol-mulki yoʻqotilgan taqdirda yetkazilgan zarar yuzasidan qonun hujjatlarida belgilangan tartibda javob beradi.

23. Direktor “Jizzax” MIZning Oʻzbekiston Respublikasi Moliya vazirligi bilan kelishgan holda Maʼmuriy kengash tomonidan tasdiqlanadigan mustaqil budjet mablagʻlarining tasarruf etuvchisi hisoblanadi hamda Oʻzbekiston Respublikasi Moliya vazirligiga “Jizzax” MIZning mustaqil budjeti ijrosi toʻgʻrisidagi hisobotni kelishish uchun belgilangan tartibda taqdim etadi.

24. Direktor oʻz zimmasiga yuklangan vazifalarning bajarilishi, shuningdek Direksiyaga berilgan davlat mulkining saqlanishi va undan maqsadli foydalanilishi yuzasidan qonun hujjatlarida belgilangan tartibda javob beradi.

25. Direksiyaning ustav fondi “Jizzax” MIZ faoliyatini tezkor boshqarishni amalga oshirish uchun Muassis tomonidan oʻziga berilgan mablagʻlar, mulklar va boshqa aktivlar yigʻindisidan iborat boʻladi.

26. Direksiya ustav fondining miqdori 1,0 mlrd soʻmni tashkil qiladi.

27. Direksiyaning ustav fondini koʻpaytirish yoki kamaytirish Oʻzbekiston Respublikasi qonun hujjatlarida belgilangan tartibda, Muassis qaroriga binoan amalga oshiriladi.

28. Muassis tomonidan Direksiyaga tezkor boshqaruv huquqi bilan birkitilgan asosiy fondlar va aylanma mablagʻlar Direksiya mulkini tashkil qiladi.

29. Direksiyaning asosiy fondlari va aylanma mablagʻlari boʻlinmaydi va ulushlar (hissalar, paylar) boʻyicha taqsimlanishi mumkin emas.

30. Maʼmuriy kengash Direksiyaga berilgan davlat mulkidan belgilangan maqsadda foydalanilishini va uning saqlanishini, shuningdek oʻzgaga berilishini Muassis nomidan nazorat qiladi.

31. Direktor Muassis bilan kelishgan holda Direksiya mulkini quyidagi holatlarda tasarruf etishi mumkin:

asosiy vositalarni sotish, ularni ijaraga yoki garovga berish;

mulkni boshqa xoʻjalik jamiyatining ustav fondiga ulush sifatida kiritish;

boshqa xoʻjalik jamiyatlarining aksiyalari (ulushlari)ni sotib olish va sotish;

mulkni boshqacha tarzda tasarruf etish.

32. Direksiya daromadi:

xizmatlar koʻrsatishdan olingan daromadlar;

davlat mulki boʻlgan va “Jizzax” MIZ hududida joylashgan binolar va inshootlarni ijaraga berishdan tushumlarning bir qismi;

Oʻzbekiston Respublikasi qonun hujjatlarida taqiqlanmagan boshqa tushumlar hisobiga shakllantiriladi.

33. Direksiya oʻz tasarrufida qoladigan sof foyda hisobiga zaxira fondini, shuningdek boshqa fondlarni tashkil etishi mumkin, ularning miqdori va shakllantirish tartibi Muassis tomonidan tasdiqlanadi.

34. Direksiyada qoladigan sof foyda barcha soliqlar hamda budjetga va budjetdan tashqari jamgʻarmalarga boshqa majburiy toʻlovlar, shuningdek davlat korxonasining sof foydasidan davlat budjetiga Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi tomonidan belgilanadigan ajratmalar toʻlangandan keyin Direksiya tasarrufida qoladi va undan Muassis qaroriga koʻra foydalaniladi.

35. Muassis oʻz qarori bilan begona yuridik va jismoniy shaxslarga homiylik yordami koʻrsatishga yoʻnaltiriladigan pul mablagʻlarining cheklangan summasini, ularni tasarruf etish huquqini Direktorga bergan holda belgilaydi.

36. Direksiyaning xoʻjalik faoliyati natijasida koʻrilgan zararlarini qoplash ushbu maqsadlar uchun tashkil etilgan zaxira fondi mablagʻlari hisobiga amalga oshirilishi mumkin.

37. Direksiya hisobot davri tugagach vakolatli organlarga moliya hisobotini va roʻyxati Oʻzbekiston Respublikasi qonun hujjatlarida belgilangan boshqa hujjatlarni taqdim etadi hamda hujjatlarning saqlanishi va ularning davlat tomonidan saqlashga berilishi yuzasidan belgilangan tartibda javob beradi.

38. Direksiyaning xoʻjalik subyekti sifatidagi faoliyatini nazorat qilish Maʼmuriy kengash tomonidan, Oʻzbekiston Respublikasi qonun hujjatlarida belgilangan tartibda amalga oshiriladi.

39. Direktor har chorakda Direksiya faoliyati natijalari va tasdiqlangan rivojlantirish dasturlarining amalga oshirilishi toʻgʻrisida Maʼmuriy kengashga hisobot beradi.

40. Direksiya oʻz majburiyatlari boʻyicha oʻziga tegishli mulk bilan javob beradi. Muassis Direksiyaning mulki yetarli boʻlmagan taqdirda uning majburiyatlari boʻyicha subsidiar javobgarlikni amalga oshiradi.

41. Direksiya Muassis majburiyatlari boʻyicha javob bermaydi.

42. Direksiya Muassisning qaroriga koʻra, Oʻzbekiston Respublikasi qonun hujjatlarida nazarda tutilgan tartibda yoki sud qaroriga binoan tugatilishi yoki qayta tashkil etilishi mumkin.

43. Direksiyani tugatish Direksiya faoliyatining huquq va majburiyatlar huquqiy vorislik tartibida boshqa shaxslarga oʻtmagan holda toʻxtatilishiga sabab boʻladi, Direksiya qayta tashkil etilgan taqdirda huquq va majburiyatlar huquqiy vorisga oʻtadi.

1. Ushbu Nizom “Jizzax” maxsus industrial zonasida (keyingi oʻrinlarda “Jizzax” MIZ deb ataladi) joylashtirish uchun investorlarni tanlab olish va “Jizzax” MIZ hududida tadbirkorlik faoliyatini amalga oshirish uchun uning qatnashchilarini roʻyxatdan oʻtkazish tartibini belgilaydi.

2. “Jizzax” MIZda amalga oshirish uchun investitsiya loyihalarini tanlab olish boʻyicha tashkiliy masalalarni hal etish “Jizzax” MIZning Maʼmuriy kengashi ishchi organiga va Direksiyasiga (keyingi oʻrinlarda Direksiya deb ataladi) yuklanadi.

3. “Jizzax” MIZda amalga oshirish uchun investitsiya loyihalarini tanlab olish ushbu Nizomning 1-ilovasiga muvofiq sxema boʻyicha ikki bosqichda amalga oshiriladi.

4. Tanlab olishning birinchi bosqichida investor Direksiyaga “Jizzax” MIZ hududida ishlab chiqarishni joylashtirish yuzasidan, Maʼmuriy kengash tomonidan tasdiqlanadigan shakl boʻyicha toʻldirilgan investitsiya buyurtmanomasini (keyingi oʻrinlarda investitsiya buyurtmanomasi deb ataladi) taqdim etadi, unga quyidagilar ilova qilinadi:

investor roʻyxatdan oʻtkazilgan joy boʻyicha savdo reyestridan koʻchirma yoki ushbu investorning faoliyatini tasdiqlovchi boshqa hujjat;

tavsiya qilinayotgan loyihaning biznes-rejasi;

investorning tegishli sohadagi ish tajribasi mavjudligini tasdiqlovchi, shuningdek tegishli sohada amalga oshirilgan shunga oʻxshash loyihalar toʻgʻrisidagi maʼlumot;

oxirgi uch yil uchun moliyaviy hisobotlar boʻyicha auditorlik tashkilotining xulosasi;

investor vakolatli shaxslarining imzolari namunalarini tasdiqlovchi hujjat.

Barcha hujjatlar investorlar tomonidan Direksiyaga davlat tili yoki rus tilidagi tarjimasi ilova qilingan, belgilangan tartibda tasdiqlangan holda taqdim etiladi. Investor taqdim etilayotgan maʼlumotlar va hujjatlarning ishonchliligi yuzasidan javob beradi.

5. Direksiyaga taqdim etilayotgan biznes-rejada quyidagi asosiy qoidalar aks ettirilgan boʻlishi kerak:

ishlab chiqarilishi rejalashtirilayotgan mahsulotning nomi, hajmlari va turi;

ishlab chiqarilayotgan mahsulotning moʻljallanayotgan narxlari va sotish bozorlari, mahsulotni ishlab chiqarish va eksport qilish hajmlari;

tavsiya etilayotgan loyihani amalga oshirish uchun zarur boʻlgan infratuzilma va muhandislik inshootlari;

ishlab chiqarishni oqilona joylashtirish uchun “Jizzax” MIZ hududidagi uchastkaning moʻljallanayotgan oʻlchamlari;

xom ashyo bazasining mavjudligi hamda loyihani amalga oshirish davrida xom ashyo va materiallar bilan taʼminlanishning kafolatlangan imkoniyati;

moʻljallanayotgan ishlab chiqarish texnologiyasining ekologik talablar hisobga olingan holdagi tavsifi;

foydalanilishi moʻljallanayotgan savdo markasi toʻgʻrisidagi maʼlumot;

iqtisodiy samaradorlikning hisob-kitoblari, shuningdek loyihani amalga oshirishning eng samarali texnik, tashkiliy va iqtisodiy yechimi;

kiritish moʻljallanayotgan investitsiyalarning hajmi, turi va muddatlari, moliyalashtirish manbalari va qarz mablagʻlari jalb etilgan taqdirda moʻljallanayotgan garov taʼminoti;

ishlab chiqarishni mahalliylashtirish darajasi, dastlabki 4 ta belgilar darajasida boshlangʻich xom ashyoga nisbatan Oʻzbekiston Respublikasi tashqi iqtisodiy faoliyat tovar nomenklaturasi kodi boʻyicha yakuniy mahsulot tovar pozitsiyasining oʻzgarishi;

ishlab chiqarishda foydalanilishi moʻljallanayotgan texnologik asbob-uskunalarning xarakteri, ularning zamonaviy sifat standartlariga muvofiqligi, loyihada xalqaro standartlarga muvofiq boʻlgan sifatni boshqarish tizimining mavjudligi;

tashkil etiladigan ish oʻrinlarining soni;

tashkil etiladigan korxonaning shtatdagi xodimlarini jalb etilgan xodimlar umumiy sonining kamida 80 foizi miqdorida Oʻzbekiston Respublikasi fuqarolari bilan toʻldirish, ularga tajriba orttirishdan va malaka oshirishdan oʻtish imkoniyatini berish.

6. Direksiya taqdim etilgan hujjatlarni ushbu Nizomning 4 va 5-bandlarida nazarda tutilgan talablarga muvofiqligi yuzasidan 5 ish kuni mobaynida koʻrib chiqadi.

Alohida hollarda tanlab olishda qatnashish uchun investitsiya buyurtmanomasini koʻrib chiqishda loyiha boʻyicha qoʻshimcha maʼlumot va (yoki) hujjatlar soʻrab olinishi mumkin. Bu holda taqdim etilgan hujjatlar qoʻshimcha ravishda soʻrab olingan va (yoki) hujjat taqdim etilgan vaqtdan boshlab 5 ish kuni mobaynida Direksiya tomonidan koʻrib chiqiladi.

7. Ushbu Nizomning 4-bandi talablari buzilgan holda taqdim etilgan investitsiya buyurtmanomalari koʻrib chiqilmasdan investorga qaytariladi.

8. Investor tomonidan taqdim etilgan investitsiya buyurtmanomalari va hujjatlar Direksiya tomonidan Maʼmuriy kengashning ishchi organiga beriladi, ularga hujjatlar toʻplamining, shu jumladan biznes-rejaning ushbu Nizomning 4 va 5-bandlari talablariga muvofiqligi yuzasidan Direksiya direktori imzolagan tegishli xulosa ilova qilinadi.

9. Ishchi organ investitsiya buyurtmanomalarini Maʼmuriy kengashga koʻrib chiqish uchun belgilangan tartibda kiritadi.

10. “Jizzax” MIZ hududida amalga oshirish uchun investitsiya loyihasini tanlab olish toʻgʻrisida qaror qabul qilishda Maʼmuriy kengash quyidagilarni koʻrib chiqadi:

strategik tabiiy xom ashyo resurslarini qazib olish va dastlabki qayta ishlash boʻyicha korxonalarni qoʻshmagan holda, faoliyat sohasining “Jizzax” MIZning asosiy vazifalariga muvofiqligi;

eng avvalo, mahalliy mineral xom ashyo resurslarini va mahalliy xodimlardan foydalangan holda qishloq xoʻjaligi xom ashyosini chuqur qayta ishlash boʻyicha yuqori texnologiyali uskunalar va texnologiyalar bilan jihozlangan yangi zamonaviy ishlab chiqarishlar tashkil etish yoki ishlayotganlarini chuqur modernizatsiyalash boʻyicha investorning majburiyatlari;

talab katta boʻlgan import oʻrnini bosadigan va eksportga moʻljallangan raqobatbardoshli mahsulotlar ishlab chiqarish boʻyicha texnologik izchillikni bosqichma-bosqich shakllantirish;

tavsiya etilayotgan ishlab chiqarishning ekologiya va atrof muhitni muhofaza qilish talablariga muvofiqligi;

muassislarning oʻz mablagʻlari va ular tomonidan Oʻzbekiston Respublikasi kafolatisiz jalb etilgan kreditlar hisobiga investitsiyalarning amalga oshirilishi;

imtiyozlarning amal qilish muddati mobaynida ularni qoʻllashdan olingan daromadning kamida 50 foizini korxonaga qayta investitsiyalash boʻyicha majburiyatlarning investor (investorlar) tomonidan qabul qilinishi;

investorning moliyaviy va texnologik quvvatga egaligi;

loyihaning umumiy iqtisodiy samaradorligi va uni amalga oshirishning maqsadga muvofiqligi (ishlab chiqarish quvvatlarining maqbul joylashtirilishi, tashkil etiladigan ish oʻrinlari, tarmoqdagi tarkibiy qayta oʻzgartirishlarga taʼsiri, ishlayotgan quvvatlardan foydalanilishi, zarur xom ashyo, materiallar va infratuzilmaning mavjudligi);

tayyor mahsulotni ichki va tashqi bozorda sotish imkoniyati va istiqbollari;

ishlab chiqarishni mahalliylashtirish darajasi, dastlabki 4 ta belgilar darajasida boshlangʻich xom ashyoga nisbatan Oʻzbekiston Respublikasi tashqi iqtisodiy faoliyat tovar nomenklaturasi kodi boʻyicha yakuniy mahsulot tovar pozitsiyasining oʻzgarishi;

texnologik uskunalarning zamonaviy sifat standartlariga muvofiqligi, loyihada xalqaro standartlarga muvofiq boʻlgan sifatni boshqarish tizimining mavjudligi;

tashkil etiladigan korxonaning shtatdagi xodimlarini jalb etilgan xodimlar umumiy sonining kamida 80 foizi miqdorida Oʻzbekiston Respublikasi fuqarolari bilan toʻldirish, ularga tajriba orttirishdan va malaka oshirishdan oʻtish imkoniyatini berish;

investitsiyalar kiritish hajmi, turi va muddatlari;

Maʼmuriy kengash qarori bilan belgilanadigan boshqa omillar.

Investitsiya buyurtmanomalarini koʻrib chiqishda “Jizzax” MIZ hududida tayyor mahsulotlar ishlab chiqarishda xom ashyo va yarim tayyor fabrikatlarni izchil texnologik qayta ishlashda oʻzaro hamkorlik qiladigan korxonalar tashkil etish orqali talab katta boʻlgan, import oʻrnini bosadigan va eksportga moʻljallangan raqobatbardoshli mahsulotlar ishlab chiqarishning toʻliq sikli taʼminlanishini nazarda tutadigan loyihalarga ustunlik beriladi.

11. Maʼmuriy kengash investitsiya buyurtmanomalarini 10 ish kuni mobaynida koʻrib chiqadi va:

“Jizzax” MIZ hududida investitsiya loyihasini amalga oshirishning mumkinligi;

aniq va asoslangan mulohazalar hamda kamchiliklarni koʻrsatgan holda, taqdim etilgan hujjatlarni puxtalashtirishning zarurligi;

“Jizzax” MIZ hududida investitsiya loyihasini amalga oshirishning maqsadga muvofiq emasligi toʻgʻrisida qaror qabul qiladi.

12. Agar investitsiya buyurtmanomasini koʻrib chiqish jarayonida Maʼmuriy kengash aʼzolari tomonidan investorning oʻzi toʻgʻrisida notoʻgʻri maʼlumotlar taqdim etganligidan dalolat beruvchi faktlar aniqlansa, uning investitsiya buyurtmanomasini koʻrib chiqish toʻxtatiladi va investorga asoslangan xulosa yuboriladi.

Maʼmuriy kengash aʼzolari, ishchi organ va Direksiya investor (investorlar) tomonidan taqdim etilgan maʼlumotning maxfiyligini oshkor qilganligi uchun qonun hujjatlariga muvofiq javob beradilar.

13. Ushbu Nizomning 11-bandi uchinchi xatboshisiga muvofiq puxtalashtirilgan investitsiya buyurtmanomalari Maʼmuriy kengashga koʻrib chiqish uchun takroran kiritiladi.

14. Maʼmuriy kengashning investitsiya buyurtmanomasi boʻyicha ijobiy qarori Maʼmuriy kengash majlisining protokoli bilan rasmiylashtiriladi hamda Direksiya va investor (investorlar) oʻrtasida “Jizzax” MIZ hududida investitsiyalash toʻgʻrisidagi bitimni (keyingi oʻrinlarda investitsiyalash toʻgʻrisida bitim deb ataladi) tuzish uchun asos hisoblanadi.

15. Maʼmuriy kengash majlisi protokolining nusxasi protokolni Maʼmuriy kengash tasdiqlagan kundan boshlab 3 ish kuni mobaynida ishchi organ tomonidan investorga yoki uning vakolatli shaxsiga yuboriladi.

16. Ikkinchi bosqichda investitsiya loyihalarini tanlab olish natijalari boʻyicha tadbirkorlik subyektlari yuridik shaxs sifatida davlat roʻyxatidan hamda “Jizzax” MIZ qatnashchilari sifatida roʻyxatdan oʻtkaziladi.

17. Investitsiyalash toʻgʻrisidagi bitim Direksiya va investor (investorlar) oʻrtasida tuziladi va unda quyidagilar koʻrsatilishi kerak:

obyekt, investitsiyalar kiritish hajmi, turi va muddatlari, “Jizzax” MIZ hududida amalga oshiriladigan faoliyat turlari;

investitsiyalash toʻgʻrisidagi bitimning amal qilish muddatlari va shartlari;

investorning huquqlari va majburiyatlari;

Direksiyaning huquqlari va majburiyatlari, shu jumladan loyihani amalga oshirish jadvallari, investitsiya loyihasi amalga oshirilishi yuzasidan texnik nazorat toʻgʻrisidagi axborotni olish tartibiga oid huquqlari;

investor (investorlar) tomonidan uning majburiyatlari bajarilishi toʻgʻrisidagi hisobotlarni taqdim etish tartibi va muddatlari;

tomonlarning investitsiyalash toʻgʻrisidagi bitim shartlariga rioya etilmaganligi yuzasidan javobgarligi;

investitsiyalash toʻgʻrisidagi bitimga oʻzgartirish va qoʻshimchalar kiritish tartibi;

investitsiyalash toʻgʻrisidagi bitimni toʻxtatish tartibi;

investitsiyalash toʻgʻrisidagi bitimdan kelib chiqadigan nizolarni hal etish tartibi va koʻrib chiqish joyi.

18. Investorning investitsiyalash toʻgʻrisidagi bitimda nazarda tutiladigan huquqlari, burchi va majburiyatlari quyidagilarni oʻz ichiga oladi:

moʻljallanayotgan investitsiyalarning hajmi, turi va muddatlari, moliyalashtirish manbalari va qarz mablagʻlari jalb etilgan taqdirda moʻljallanayotgan garov taʼminoti;

moʻljallanayotgan ishlab chiqarish texnologiyasining ekologik talablar hisobga olingan holdagi tavsifi;

foydalanilishi moʻljallanayotgan savdo markasi toʻgʻrisidagi maʼlumot;

ishlab chiqarishda foydalanilishi moʻljallanayotgan texnologik uskunalarning xarakteri, ularning zamonaviy sifat standartlariga muvofiqligi, loyihada xalqaro standartlarga muvofiq boʻlgan sifatni boshqarish tizimining mavjudligi;

ishlab chiqarilishi rejalashtirilayotgan mahsulotning nomi, hajmlari va turi;

rejalashtirilayotgan mahsulotni ishlab chiqarish va eksport qilish hajmi;

tavsiya etilayotgan loyihani amalga oshirish uchun zarur boʻlgan infratuzilma va muhandislik inshootlari;

ishlab chiqarishni oqilona joylashtirish uchun “Jizzax” MIZ hududidagi uchastkaning moʻljallanayotgan oʻlchamlari;

xom ashyo bazasining mavjudligi hamda loyihani amalga oshirish davrida xom ashyo va materiallar bilan taʼminlanishning kafolatlangan imkoniyati;

ishlab chiqarishni mahalliylashtirish darajasi va dastlabki 4 ta belgilar darajasida boshlangʻich xom ashyoga nisbatan Oʻzbekiston Respublikasi tashqi iqtisodiy faoliyat tovar nomenklaturasi kodi boʻyicha yakuniy mahsulot tovar pozitsiyasining oʻzgarishi;

tashkil etiladigan ish oʻrinlarining soni;

tashkil etiladigan korxonaning shtatdagi xodimlarini jalb etilgan xodimlar umumiy sonining kamida 80 foizi miqdorida Oʻzbekiston Respublikasi fuqarolari bilan toʻldirish, ularga tajriba orttirishdan va malaka oshirishdan oʻtish imkoniyatini berish.

19. Investitsiyalash toʻgʻrisidagi bitimda investitsiya loyihasining xususiyatiga koʻra boshqa shartlar ham mavjud boʻlishi mumkin.

20. Investor tomonidan taqdim etilgan investitsiyalash toʻgʻrisidagi bitim loyihasi u olingan kundan boshlab 10 ish kuni mobaynida Direksiya tomonidan koʻrib chiqiladi. Unga investitsiyalash toʻgʻrisidagi bitim loyihasini koʻrib chiqish uchun zarur boʻladigan boshqa hujjatlar, asoslashlar, materiallar ilova qilinishi mumkin.

Zarurat boʻlganda, Direksiya investitsiyalash toʻgʻrisidagi bitimning alohida qoidalari boʻyicha vakolatli davlat organlari xulosalarini soʻrab olishi mumkin. Bunda investitsiyalash toʻgʻrisidagi bitim loyihasini koʻrib chiqishning umumiy muddati ushbu bandning birinchi xatboshida koʻrsatilgan muddatdan oshmasligi kerak.

21. Zarurat boʻlganda, investitsiyalash toʻgʻrisidagi bitim qoidalarini kelishish maqsadida Direksiya va investor (investorlar) oʻrtasida muzokaralar oʻtkazilishi mumkin.

22. Investitsiyalash toʻgʻrisidagi bitim “Jizzax” MIZning faoliyat koʻrsatish muddatidan oshmaydigan muddatga tuziladi.

23. Investor (investorlar) va Direksiya oʻrtasidagi investitsiyalash toʻgʻrisidagi bitim ushbu Nizomning 29-bandiga muvofiq, investor (investorlar) tomonidan “Jizzax” MIZ qatnashchisi sifatida tashkil etiladigan tadbirkorlik subyekti roʻyxatdan oʻtkazilgan sanadan boshlab kuchga kiradi.

24. Investitsiyalash toʻgʻrisidagi bitimning amal qilishi:

investitsiyalash toʻgʻrisidagi bitim tuzilgan muddati tugaganda;

shaxs “Jizzax” MIZ qatnashchisi maqomidan mahrum etilganda;

“Jizzax” MIZ muddatidan oldin tugatilganda;

Oʻzbekiston Respublikasi qonun hujjatlarida nazarda tutilgan boshqa hollarda toʻxtatiladi.

25. Agar investitsiyalash toʻgʻrisidagi bitimda boshqacha tartib nazarda tutilmagan boʻlsa, u imzolangan kundan boshlab 10 ish kunidan kechikmay investor roʻyxatdan oʻtkazuvchi organga oʻzi yuridik shaxs sifatida tashkil etgan tadbirkorlik subyektini davlat roʻyxatidan oʻtkazish uchun zarur hujjatlarni taqdim etadi.

26. “Jizzax” MIZ hududida joylashtirish uchun investor tomonidan yuridik shaxs sifatida tashkil etilgan tadbirkorlik subyektini davlat roʻyxatidan oʻtkazish Oʻzbekiston Respublikasining qonun hujjatlarida yuridik shaxslarni davlat roʻyxatidan oʻtkazish uchun belgilangan tartibda amalga oshiriladi.

27. Tadbirkorlik subyektini yuridik shaxs sifatida davlat roʻyxatidan oʻtkazish uchun zarur boʻlgan hujjatlarni tayyorlash investorning soʻroviga koʻra, shartnoma asosida Direksiya tomonidan amalga oshirilishi mumkin.

28. Tadbirkorlik subyekti yuridik shaxs sifatida davlat roʻyxatidan oʻtkazilgandan keyin investor tomonidan Direksiyaga quyidagi hujjatlar taqdim etiladi:

“Jizzax” MIZ qatnashchisi sifatida roʻyxatdan oʻtkazish uchun ariza;

yuridik shaxs davlat roʻyxatidan oʻtkazilganligi toʻgʻrisidagi guvohnoma;

“Jizzax” MIZ qatnashchisi sifatida roʻyxatdan oʻtkazish uchun Maʼmuriy kengash tomonidan belgilanadigan miqdorda toʻlov toʻlanganligini tasdiqlovchi hujjatlar;

yer uchastkasi ajratish uchun qonunchilikda nazarda tutilgan hujjatlar.

29. Direksiya ushbu Nizomning 28-bandida koʻrsatilgan hujjatlar olingan kundan boshlab 2 ish kuni mobaynida tadbirkorlik subyektini “Jizzax” MIZ qatnashchisi sifatida roʻyxatdan oʻtkazadi va ushbu Nizomga 2-ilovaga muvofiq shakl boʻyicha “Jizzax” MIZ qatnashchisi guvohnomasini beradi.

30. Direksiya tadbirkorlik subyekti “Jizzax” MIZ qatnashchisi sifatida roʻyxatdan oʻtkazilgan kundan boshlab bir kun mobaynida tadbirkorlik subyekti joylashgan joydagi davlat soliq va bojxona organlarini xabardor qiladi.

31. Direksiya tadbirkorlik subyekti “Jizzax” MIZ qatnashchisi sifatida roʻyxatdan oʻtkazilgan kundan boshlab bir kun mobaynida barcha zarur hujjatlarni yer uchastkasi ajratish uchun Jizzax va (yoki) Sirdaryo viloyati hokimligiga beradi.

32. “Jizzax” MIZ qatnashchilariga yer uchastkalari ajratish tartibi qonun hujjatlarida belgilangan tartibda belgilanadi.

33. Investorga “Jizzax” MIZ hududida yer uchastkasi ajratish toʻgʻrisidagi hujjatlar qonun hujjatlarida belgilangan muddatda Jizzax va (yoki) Sirdaryo viloyati hokimligi tomonidan Direksiyaga, keyinchalik investorga taqdim etish uchun yuboriladi.

34. Tadbirkorlik subyektini “Jizzax” MIZ qatnashchisi maqomidan mahrum qilishga ixtiyoriy tartibda yoki Maʼmuriy kengashning qaroriga koʻra yoʻl qoʻyiladi va bu investitsiyalash toʻgʻrisidagi bitimning amal qilishi toʻxtatilishiga sabab boʻladi.

Tadbirkorlik subyektini “Jizzax” MIZ qatnashchisi maqomidan ixtiyoriy tartibda mahrum qilish toʻgʻrisidagi qaror tadbirkorlik subyektining uni bunday maqomdan mahrum qilish toʻgʻrisidagi arizasiga koʻra yoxud u Oʻzbekiston Respublikasi qonun hujjatlariga muvofiq tugatilgan taqdirda Maʼmuriy kengash tomonidan qabul qilinishi mumkin.

Tadbirkorlik subyektini “Jizzax” MIZ qatnashchisi maqomidan Maʼmuriy kengash qaroriga koʻra mahrum qilish “Jizzax” MIZ qatnashchisi tomonidan Oʻzbekiston Respublikasi qonunchiligi buzilganda, investor (investorlar) tomonidan investitsiyalash toʻgʻrisidagi bitim boʻyicha asosiy majburiyatlar bajarilmaganda va ularni bartaraf etish choralari Maʼmuriy kengash belgilagan muddatlarda koʻrilmaganda, Direksiya arizasiga koʻra amalga oshirilishi mumkin.

Direksiya “Jizzax” MIZ qatnashchilari reyestriga Maʼmuriy kengashning tadbirkorlik subyektining qatnashchi maqomidan mahrum etilganligi toʻgʻrisidagi qarori kuchga kirgan sanadan boshlab 3 ish kuni mobaynida tadbirkorlik subyektining “Jizzax” MIZ qatnashchisi maqomidan mahrum etilganligi toʻgʻrisidagi yozuvni kiritadi.

35. Direksiya “Jizzax” MIZ qatnashchilari reyestriga tegishli yozuv kiritilgan kundan boshlab bir ish kuni mobaynida davlat soliq va bojxona xizmati organlarini tadbirkorlik subyektining “Jizzax” MIZ qatnashchisi maqomidan mahrum etilgani toʻgʻrisidagi maʼlumotlardan xabardor qiladi.