Oʻzbekiston Respublikasining iqtisodiy salohiyatini mustahkamlash, uning aviatsiya sanoatini rivojlantirish, zamonaviy aviatsiya texnikasi va texnologiyasini vujudga keltirish, parvoz qiluvchi apparatlarning yangi avlodlarini ishlab chiqarish va ularni ishlatish sohasida yuqori malakali mutaxassislar tayyorlash maqsadida:

1. Toshkent davlat texnika universitetining samolyotsozlik fakulteti, Kiyev fuqaro aviatsiyasi xalqaro universitetining Toshkent filiali, “Oʻzbekiston havo yoʻllari” Milliy aviakompaniyasining oʻquv markazi negizida Toshkent davlat aviatsiya institutini tashkil qilish toʻgʻrisida Oʻzbekiston Respublikasi Oliy va oʻrta maxsus taʼlim vazirligining, “Oʻzbekiston havo yoʻllari” Milliy aviakompaniyasining, Oʻzbekiston “Oʻzbekkoinot” Davlat kosmik tadqiqotlar agentligining, Chkalov nomidagi Toshkent aviatsiya ishlab chiqarish birlashmasining takliflari qabul qilinsin.

2. Quyidagilar institut faoliyatining asosiy vazifalari va yoʻnalishlari qilib belgilansin:

— aviatsiya hamda aviasozlik korxonalari uchun mutaxassislar — konstruktorlar, texnologlar, taʼmirlovchilar va ishlatuvchilarni tayyorlash;

— aviatsiya tizimlarining asosiy va tatbiqiy tadqiqotlari sohasida jahon yutuqlarini oʻrganish negizida oʻz ilmiy-zakovat salohiyatini rivojlantirish;

— parvoz qiluvchi apparatlar yangi avlodlarining ijodiy loyihalarini ishlab chiqish;

— respublikada aviatsiya sanoati taraqqiyotini ilmiy tahlil qilish va istiqbolini belgilash;

— aviatsiya texnikasi va texnologiyasi sohasida jahon bozori konyunkturasini oʻrganish;

— aviatsiya sohasidagi mutaxassislar malakasini oshirish, jahon aviatsiya fani va texnologiyasining eng yangi yutuqlari negizida ularni qayta tayyorlash;

— Rossiya, Ukraina va boshqa mamlakatlarning yetakchi aviatsiya oʻquv hamda ilmiy markazlari bilan taʼlim va ilmiy-tadqiqot faoliyatini keng koʻlamda kooperatsiyalash.

3. Oʻrta maʼlumot negizida kichik mutaxassisliklarni tayyorlash maqsadida Toshkent aviatsiya texnikumi bazasida aviatsiya kolleji tashkil qilinsin.

4. Oʻzbekiston Respublikasining Vazirlar Mahkamasi 15 kun muddat ichida mazkur Farmonni amalga oshirish yuzasidan tashkiliy tadbirlarni koʻzda tutuvchi tegishli qaror qabul qilsin.