Kapital qurilishni tashkil etishni tartibga solish, tuzilma xususiyati va ahamiyatiga ega boʻlgan yirik obyektlar qurilishi boʻyicha investitsion loyihalarni amalga oshirishda zarur tartib oʻrnatish, valyuta mablagʻlaridan samarali foydalanish, shuningdek xorijiy hamkorlar oldida olingan majburiyatlarning soʻzsiz bajarilishini taʼminlash maqsadida:

1. Belgilab qoʻyilsinki, 1997-yil 1-noyabrdan boshlab:

moliyaviy taʼminot manbalaridan qatʼi nazar, qiymati 25 million soʻm va undan ortiq boʻlgan (1991-yil narxida) obyektlar;

har yili davlat budjeti bilan birgalikda tasdiqlanadigan respublika investitsion dasturiga kiritilgan obyektlar;

loyiha qiymatidan qatʼi nazar, hukumat kafilligida xorijiy investitsiyalar va kreditlar jalb etilgan holda barpo etilayotgan obyektlar boʻyicha qurilish, rekonstruksiya qilish hamda texnik qayta jihozlashga qaratilgan investitsiya loyihalarining texnik-iqtisodiy asoslari Oʻzbekiston Respublikasi Vazirlar Mahkamasi tomonidan tasdiqlanadi. Qabul qilingan xalqaro bitimlarda texnik-iqtisodiy asoslarni tasdiqlashning boshqacha tartibi koʻzda tutilgan boʻlsa, ana shu bitimlarda belgilangan tartiblar qoʻllaniladi.

Investitsion loyihalarning texnik-iqtisodiy asoslari va loyiha hujjatlari Oʻzbekiston Respublikasi Vazirlar Mahkamasi tasdiqlaganiga qadar belgilangan tartibda ekspertizadan oʻtkazilishi lozim.

Korxonalarning, joylardagi davlat organlarining oʻz mablagʻi, tijorat banklari kreditlari hamda bevosita xorijiy investitsiyalar hisobiga amalga oshirilayotgan boshqa investitsion loyihalar boʻyicha texnik-iqtisodiy asoslar koʻrsatilgan organlar, korxonalar yoki ularning yuqori tashkilotlari tomonidan tasdiqlanadi.

2. Belgilab qoʻyilsinki, qurilish materiallari va konstruksiyalar, butlovchi mahsulotlar hamda bajarilgan pudrat ishlari uchun erkin muomaladagi valyuta sarf qilingan holda barpo etilayotgan qurilishlarning manzil roʻyxatlari Oʻzbekiston Respublikasi Vazirlar Mahkamasi bilan kelishgan holda tuziladi.

3. Oʻzbekiston Respublikasi Markaziy banki, tijorat banklari obyektlar qurilishini moliyaviy jihatdan taʼminlashda mazkur Farmonda belgilangan investitsion loyihalarning texnik iqtisodiy asoslarini tasdiqlash va kelishish tartiblariga qatʼiy amal qilsinlar.

4. Investitsion loyihalarni barpo etish va amalga oshirishning belgilangan tartiblariga rioya qilish boʻyicha shaxsiy javobgarlik buyurtmachi vazifasini bajarayotgan vazirliklar, idoralar, konsernlar, uyushmalar, korporatsiyalar, kompaniyalar, korxona va tashkilotlar rahbarlari, Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimining kapital qurilish boʻyicha oʻrinbosarlari, tijorat banklari boshqaruvlari raislari zimmasiga yuklatilsin.

5. Makroiqtisodiyot va statistika vazirligi Moliya vazirligi, Oʻzbekiston Respublikasi Markaziy banki hamda boshqa manfaatdor tashkilotlar bilan hamkorlikda viloyatlar va buyurtmachilar misolida tugallanmagan qurilish boʻyicha yarim yillik statistik hisobotni ishlab chiqib, 1998-yil 1-yanvaridan joriy etsin.

Respublika, soha va hududiy miqyoslarda ijtimoiy-iqtisodiy taraqqiyot yakunlarini koʻrib chiqishda asosiy eʼtibor tugallanmagan qurilishlar tahlili hamda ularni kamaytirish choralariga qaratilsin.

6. Mazkur Farmonning bajarilishini nazorat qilish Oʻzbekiston Respublikasi Bosh vaziri Oʻ. Sultonov zimmasiga yuklansin.