PF-4262-сон 05.01.2011. Oʻzbekiston Respublikasida pasport tizimini takomillashtirishga doir qoʻshimcha chora-tadbirlar toʻgʻrisida

Oʻzbekiston Respublikasi Prezidentining Farmoni, 05.01.2011 yildagi PF-4262-son

Kuchga kirish sanasi

05.01.2011

Рус

Eng

Ўзб

O’zb

O‘zb|Рус

Hujjat 30.05.2017 sanasi holatiga

Hujjat 25.05.2024 sanasi holatiga

PDF-faylidagi rasmiy manba

Oʻzbekiston Respublikasi Prezidentining

Farmoni

OʻZBEKISTON RESPUBLIKASIDA PASPORT TIZIMINI TAKOMILLASHTIRISHGA DOIR QOʻSHIMCHA CHORA-TADBIRLAR TOʻGʻRISIDA

Oʻzbekiston Respublikasi Prezidentining 2009-yil 23-iyunda qabul qilingan “Oʻzbekiston Respublikasida pasport tizimini yanada takomillashtirish chora-tadbirlari toʻgʻrisida”gi PF-4117-sonli Farmoniga muvofiq hamda zamonaviy xalqaro standartlar va talablarni inobatga olgan holda Oʻzbekiston Respublikasi fuqarosi pasportini, shuningdek, fuqaroligi boʻlmagan shaxslarga harakatlanish hujjatlarini rasmiylashtirish, berish va almashtirish tartibini yanada takomillashtirish maqsadida:

1. Quyidagilar:

Oʻzbekiston Respublikasida pasport tizimi toʻgʻrisidagi nizom 1-ilovaga muvofiq;

Oʻzbekiston Respublikasi fuqarosining biometrik pasporti toʻgʻrisidagi nizom 1-ilovaga muvofiq;

Oʻzbekiston Respublikasining fuqaroligi boʻlmagan shaxslarining biometrik harakatlanish hujjati toʻgʻrisidagi nizom 2-ilovaga muvofiq tasdiqlansin.

2. Oʻzbekiston Respublikasi Prezidentining 1999-yil 26-fevralda qabul qilingan PF-2240-sonli Farmoni bilan tasdiqlangan Oʻzbekiston Respublikasida pasport tizimi toʻgʻrisidagi nizom, Oʻzbekiston Respublikasi fuqarosining amaldagi pasporti va fuqaroligi boʻlmagan shaxsning shaxsini tasdiqlovchi guvohnoma 2015-yil 31-dekabrgacha haqiqiyligi maʼlumot uchun qabul qilinsin.

3. Oʻzbekiston Milliy teleradiokompaniyasi (A. Xoʻjayev), Oʻzbekiston Milliy axborot agentligi (M. Hazratqulov) ommaviy axborot vositalarida (matbuot, televideniye, radioeshittirish) fuqarolar oʻrtasida mazkur Farmonning asosiy qoidalarini keng targʻib qilish boʻyicha chiqishlar va mavzuga oid koʻrsatuvlar tayyorlashni taʼminlasin.

4. Oʻzbekiston Respublikasi Tashqi ishlar vazirligi (E. Gʻaniyev) belgilangan tartibda xorijiy davlatlar hukumatlarini, Xalqaro fuqaro aviatsiyasi tashkilotini va Xalqaro standartlashtirish tashkilotini Oʻzbekistonda milliy pasport tizimini takomillashtirish boʻyicha amalga oshirilayotgan tadbirlar toʻgʻrisida xabardor qilsin.

5. Oʻzbekiston Respublikasi Prezidentining 2003-yil 9-dekabrda qabul qilingan PF-3358-sonli Farmoni bilan tasdiqlangan Respublika davlat boshqaruvi organlari roʻyxatining V boʻlimi quyidagi mazmundagi 7-band bilan toʻldirilsin:

“7. Oʻzbekiston Respublikasi Vazirlar Mahkamasi huzuridagi Davlat personallashtirish markazi”.

6. Oʻzbekiston Respublikasi Ichki ishlar vazirligi (B. Matlyubov) Adliya vazirligi (R. Muhitdinov) va boshqa manfaatdor vazirliklar, idoralar bilan birgalikda ikki oy muddatda qonun hujjatlariga mazkur Farmondan kelib chiqqan holda tegishli oʻzgartish va qoʻshimchalar kiritish toʻgʻrisida Oʻzbekiston Respublikasi Vazirlar Mahkamasiga takliflar kiritsin.

7. Ushbu Farmonning ijrosini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2011-yil 5-yanvar,

PF-4262-son

Oʻzbekiston Respublikasi Prezidentining 2011-yil 5-yanvardagi PF-4262-sonli Farmoniga
1-ILOVA

Oʻzbekiston Respublikasida pasport tizimi toʻgʻrisidagi

NIZOM

I. Umumiy qoidalar

1. Oʻzbekiston Respublikasida pasport tizimi toʻgʻrisidagi Nizom (keyingi oʻrinlarda — Nizom) Oʻzbekiston Respublikasi fuqarosining biometrik pasportini rasmiylashtirish, berish, almashtirish, undan foydalanish, roʻyxatga olish, roʻyxatdan chiqarish tartibini, shuningdek pasport tizimi qoidalarini buzganlik uchun javobgarlikni belgilaydi.

2. Ushbu Nizomda quyidagi asosiy tushunchalardan foydalaniladi:

Oʻzbekiston Respublikasi fuqarosining biometrik pasporti (keyingi oʻrinlarda — pasport) — Oʻzbekiston Respublikasining fuqaroligini va egasining shaxsini tasdiqlovchi, pasport egasining shaxsiy biografik maʼlumotlari va biometrik parametrlari kiritilgan elektron tashuvchi qurilma (chip)ga ega boʻlgan hujjat;

personallashtirish — pasport egasining biografik maʼlumotlarini va biometrik parametrlarini pasport blankasiga kiritish;

verifikatsiya — pasportga kiritilgan biometrik parametrlarning pasport egasining biometrik parametrlari bilan mosligini mashina yordamida tekshirish;

fuqaroni roʻyxatga olish va roʻyxatdan chiqarish — fuqaroning Oʻzbekiston Respublikasi hududidagi muayyan joyda doimiy yoki vaqtincha yashash faktining Oʻzbekiston Respublikasi Ichki ishlar vazirligining tegishli xizmatlari tomonidan ushbu Nizomda belgilangan tartibda qayd qilinishi;

xorijda doimiy yashaydigan Oʻzbekiston Respublikasi fuqarolari — Oʻzbekiston Respublikasidagi doimiy yashash joyidan roʻyxatdan chiqib, xorijga doimiy yashashga chiqish uchun belgilangan tartibda ruxsatnoma rasmiylashtirgan Oʻzbekiston Respublikasi fuqarolari;

xorijda vaqtincha boʻladigan Oʻzbekiston Respublikasi fuqarolari — Oʻzbekiston Respublikasida doimiy yashaydigan, xorijga chiqib, vaqtincha u yerda boʻladigan Oʻzbekiston Respublikasi fuqarolari;

konsullik muassasasi — Oʻzbekiston Respublikasi diplomatik vakolatxonasining konsullik boʻlimi, Oʻzbekiston Respublikasining xorijiy davlatda taʼsis etiladigan bosh konsulxonasi, konsulxonasi, vitse-konsulxonasi va konsullik agentligi;

konsullik roʻyxati — tegishli konsullik okrugi hududiga kelgan Oʻzbekiston Respublikasi fuqarolarini xorijdagi Oʻzbekiston Respublikasining konsullik muassasalari qoshida belgilangan tartibda qayddan oʻtkazish;

doimiy konsullik roʻyxati — doimiy yashash uchun xorijga chiqish ruxsatnomasi belgilangan tartibda rasmiylashtirilgan, Oʻzbekiston Respublikasining xorijdagi konsullik muassasasi konsullik okrugi hududida doimiy yashayotgan Oʻzbekiston Respublikasi fuqarolarini qayddan oʻtkazish;

vaqtincha konsullik roʻyxati — Oʻzbekiston Respublikasida doimiy yashaydigan, xorijda vaqtincha boʻladigan, xorijga vaqtincha chiqish ruxsatnomasini belgilangan tartibda rasmiylashtirgan Oʻzbekiston Respublikasi fuqarolarini xorijdagi Oʻzbekiston Respublikasi konsullik muassasalari tomonidan qayddan oʻtkazish;

konsullik okrugi — konsullik muassasasiga konsullik vazifalarini bajarish uchun biriktirilgan bir yoki bir necha davlat hududi;

maʼlumotlarni yigʻish punkti — pasport olish uchun murojaat qilgan fuqarolarning biografik maʼlumotlarini va biometrik parametrlarini jamlash, ushbu maʼlumotlarni Oʻzbekiston Respublikasi Vazirlar Mahkamasi huzuridagi Davlat personallashtirish markaziga (keyingi oʻrinlarda — DPM) topshirish hamda fuqarolarga biometrik parametrlarga ega pasportlar berish boʻyicha vazifalarni bajaruvchi ichki ishlar idoralarining xorijga chiqish-kelish va fuqarolikni rasmiylashtirish xizmatlari, Oʻzbekiston Respublikasi Tashqi ishlar vazirligining konsullik boshqarmasi, Oʻzbekiston Respublikasining xorijdagi konsullik muassasalari;

pasport olish uchun talabnoma — pasport oluvchi haqida maʼlumotlarni yigʻish punkti tomonidan shakllantirilgan biografik maʼlumotlar va biometrik parametrlarni oʻz ichiga olgan elektron hujjat (keyingi oʻrinlarda — talabnoma).

3. Pasport Oʻzbekiston Respublikasi hududida va undan tashqarida Oʻzbekiston Respublikasining fuqaroligini va egasining shaxsini tasdiqlovchi asosiy hujjatdir.

4. Pasport Oʻzbekiston Respublikasi mulkidir va uning egasi Oʻzbekiston Respublikasi himoyasidadir.

5. 16 yoshga toʻlgan, Oʻzbekiston Respublikasi hududida va undan tashqarida yashovchi Oʻzbekiston Respublikasi fuqarolari (keyingi oʻrinlarda — fuqarolar) pasportga ega boʻlishlari shart.

6. Pasport fuqarolarga 10 yil muddatga beriladi.

Hali 16 yoshga toʻlmagan va Oʻzbekiston Respublikasidan tashqariga chiqayotgan shaxslarga pasport 5 yildan ortiq boʻlmagan muddatga beriladi.

Pasportning amal qilish muddati tugagach, 16 yoshga toʻlmagan shaxs uni maʼlumotlarni yigʻish punktiga topshirishi shart.

7. Fuqaro pasport olish uchun doimiy roʻyxatda turadigan yoki konsullik roʻyxatida turadigan joyidagi maʼlumotlarni yigʻish punktiga pasportining amal qilish muddati tugagach bir oydan kechikmasdan, birinchi marta pasport olayotgan shaxs esa 16 yoshga toʻlganidan keyin bir oydan kechikmasdan murojaat etadi.

8. Pasport blanki qatʼiy hisobga olinadigan hujjat hisoblanadi.

Pasport blanklarini ishlab chiqarish “Davlat belgisi” Davlat ishlab chiqarish birlashmasida, biometrik pasportlarni personallashtirish va yoʻq qilish — DPMda, pasportlarni egalariga topshirish — maʼlumotlarni yigʻish punktlarida amalga oshiriladi.

Pasportlarni Oʻzbekiston Respublikasi hududida yetkazib berish Oʻzbekiston Respublikasi Vazirlar Mahkamasi tomonidan belgilangan tartibda Oʻzbekiston Aloqa va axborotlashtirish agentligi Davlat feldyegerlik xizmati (keyingi oʻrinlarda — DFX) tomonidan amalga oshiriladi.

Pasportlarni xorijdagi maʼlumotlarni yigʻish punktlariga va konsullik muassasalaridan Oʻzbekiston Respublikasiga yetkazib berish belgilangan tartibda diplomatik pochta vositasi orqali amalga oshiriladi.

9. Oʻzbekiston Respublikasi Qurolli Kuchlari safiga muddatli harbiy xizmatni oʻtashga chaqirilgan fuqarolarning pasportlari mudofaa ishlari boʻyicha boʻlimlar tomonidan olib qoʻyiladi va xizmat tugagunicha saqlanadi. Muddatli harbiy xizmat tugagach mudofaa ishlari boʻyicha boʻlimlar bir oy muddat ichida fuqarolarga olib qoʻyilgan pasportlarini qaytarishlari shart.

Kontrakt asosida harbiy xizmatga kirgan, oliy harbiy-taʼlim muassasalariga oʻqishga kirgan fuqarolarning pasportlari harbiy qismlarning va oliy harbiy-taʼlim muassasalarining kadrlar boʻlimlari tomonidan olib qoʻyilib, shtablarda saqlanadi.

Oʻzbekiston Respublikasidan tashqariga chiqayotgan harbiy xizmatchilarning pasporti boʻlmasa, shuningdek ularga pasport berish zarurati bilan bogʻliq boshqa hollarda, pasportlar Oʻzbekiston Respublikasi mudofaa, ichki ishlar, favqulodda vaziyatlar vazirliklari, Milliy xavfsizlik xizmati (keyingi oʻrinlarda — vazirliklar va idoralar)ning yozma iltimosnomalari asosida ushbu Nizomda belgilangan tartibda maʼlumotlarni yigʻish punktlari tomonidan beriladi.

Harbiy xizmatchi xizmat tugaganidan keyin bir oy muddatdan kechikmay doimiy roʻyxatda turadigan joyidagi maʼlumotlarni yigʻish punktiga pasportni rasmiylashtirish uchun murojaat etishi shart.

Harbiy xizmatchilarning vazirliklar va idoralarning tegishli boʻlinmalarida saqlanayotgan pasportlari amal qilish muddati tugagandan keyin belgilangan tartibda yoʻq qilish uchun maʼlumotlarni yigʻish punktiga joʻnatiladi.

10. Talabnoma DPMga yuborilganidan keyin pasport Oʻzbekiston Respublikasi hududida oʻn ish kuni mobaynida, xorijda — oʻn besh ish kuni mobaynida beriladi.

Fuqaro pasportini yoʻqotib qoʻygan taqdirda, yoʻqolgani haqida ariza berilgan kundan soʻng bir oy mobaynida belgilangan tartibda yangi pasport beriladi.

11. Pasport belgilangan namuna boʻyicha tayyorlanadi va oʻzbek hamda ingliz tillarida, Qoraqalpogʻiston Respublikasi uchun esa — qoraqalpoq, oʻzbek va ingliz tillarida personallashtiriladi.

12. Pasport blankasiga quyidagi asosiy maʼlumotlar kiritiladi:

pasportni bergan davlatning nomi;

hujjatning nomi;

hujjatning turi;

pasportni bergan davlatning kodi;

pasportning raqami;

familiyasi, ismi, otasining ismi;

millati;

fuqaroligi;

tugʻilgan sanasi;

tugʻilgan joyi;

jinsi;

berilgan vaqti;

kim tomonidan berilgani;

personallashtiruvchi idora;

amal qilish muddati tugaydigan sana;

egasining raqamli surati;

egasi haqidagi mashina oʻqiydigan maʼlumotlar.

13. Chipga quyidagi maʼlumotlar kiritiladi:

pasport egasi toʻgʻrisidagi biografik maʼlumotlar;

egasining raqamli surati;

qoʻl barmoq izlari.

14. Pasportdagi millati haqidagi yozuv ota-onaning millatiga muvofiq yoziladi. Agar ota-onalar turli millatga mansub boʻlishsa, birinchi marta pasport berilayotganda pasport egasining xohishiga qarab otasining yoki onasining millati yoziladi. Keyinchalik, fuqaroning yozma arizasiga koʻra millati haqidagi yozuv faqat bir marta otasi yoki onasining millatiga oʻzgartirilishi mumkin.

15. Pasportga:

harbiy majburiyat toʻgʻrisidagi;

nikoh qayd etilganligi yoki bekor qilinganligi toʻgʻrisidagi;

pasport egasining roʻyxatdan oʻtganligi va roʻyxatdan chiqqanligi toʻgʻrisidagi;

xorijga chiqish uchun ruxsatnoma yozuvi toʻgʻrisidagi (stiker);

hamrohlik qilayotgan shaxslar toʻgʻrisidagi (16 yoshgacha boʻlgan bolalar uchun);

Oʻzbekiston Respublikasining Davlat chegarasidan oʻtish toʻgʻrisidagi;

konsullik roʻyxatiga olingani yoki konsullik roʻyxatidan chiqarilgani toʻgʻrisidagi;

xorijiy davlatlarga kirish uchun ruxsatnoma (viza) toʻgʻrisidagi;

ilgari qoʻyilgan qaydlarni bekor qilish toʻgʻrisidagi maʼlumotlar kiritiladi.

Pasportda egasining imzosi boʻlishi lozim.

Fuqarolarning roziligiga koʻra ularning pasportlariga pasport egasining qon guruhi va qaysi rezusga mansubligi toʻgʻrisidagi maʼlumotlar kiritiladi.

16. Pasportga:

ichki ishlar idoralari boʻlinmalari tomonidan — pasport egasining roʻyxatdan oʻtganligi va roʻyxatdan chiqqanligi, xorijga chiqish uchun ruxsatnoma yozuvlari, hamrohlik qiluvchi shaxslar (16 yoshgacha boʻlgan bolalar uchun) haqidagi, ilgari qoʻyilgan qaydlarni bekor qilish haqidagi, shuningdek harbiy majburiyat va pasport almashtirilgan hollarda nikoh qayd qilinganligi haqidagi;

mudofaa ishlari boʻyicha boʻlimlar tomonidan — harbiy majburiyat toʻgʻrisidagi;

chegara nazorati boʻlinmalari tomonidan — Oʻzbekiston Respublikasining Davlat chegarasidan oʻtganlik holati haqidagi va ilgari qoʻyilgan qaydlarni bekor qilish haqidagi;

fuqarolik holatlari dalolatnomalarini yozish idoralari tomonidan — nikohni qayd etish va bekor qilish haqidagi;

sogʻliqni saqlash muassasalari tomonidan — qon guruhi va qaysi rezusga mansubligi haqidagi;

Oʻzbekiston Respublikasining konsullik muassasalari tomonidan — konsullik roʻyxatiga olish yoki konsullik roʻyxatidan chiqarish haqidagi, xorijga chiqish uchun ruxsatnoma yozuvi haqidagi, hamrohlik qiluvchi shaxslar haqidagi (16 yoshga toʻlmagan bolalar uchun), nikohni qayd etish va bekor qilish haqidagi, ilgari qoʻyilgan qaydlarni bekor qilish haqidagi;

xorijiy davlatlarning diplomatik vakolatxonalari va konsullik muassasalari tomonidan — xorijiy davlatlarga kirish ruxsatnomalari (vizalar) haqidagi qaydlar kiritiladi.

Pasportga ushbu Nizomda koʻzda tutilmagan yozuvlar va qaydlarni kiritish taqiqlanadi.

II. Pasportni rasmiylashtirish, berish va undan foydalanish tartibi

17. Quyidagi hollarda pasport rasmiylashtiriladi va beriladi:

shaxs 16 yoshga toʻlganda;

16 yoshga toʻlmagan shaxs Oʻzbekiston Respublikasidan tashqariga chiqayotganida;

farzand xorijda tugʻilganida;

Oʻzbekiston Respublikasi fuqaroligi olinganida;

pasportning amal qilish muddati tugaganida;

familiyasi, ismi, otasining ismi, millati, tugʻilgan sanasi oʻzgarganida;

yozuvlarda noaniqliklar va xatolar mavjudligi aniqlanganida;

roʻyxatga olish (roʻyxatdan chiqarish), alohida maʼlumotlar yoki vizalar uchun moʻljallangan betlar ishlatilib boʻlinganida;

pasport blankasi yaroqsiz holga kelganida;

pasport yoʻqotib qoʻyilganida.

Pasport egasining familiyasi, ismi, otasining ismi, millati, tugʻilgan sanasi oʻzgarganligi yoki yozuvlarda noaniqliklar mavjudligi aniqlanganligi munosabati bilan almashtirilayotganida, fuqaro maʼlumotlarni yigʻish punktiga ushbu holatlarni tasdiqlovchi hujjatlarni taqdim etadi.

Agar fuqaro Oʻzbekiston Respublikasidan tashqariga chiqayotganida pasportning amal qilish muddati bir yildan kamroq vaqtni tashkil etsa, ushbu hujjat almashtirilishi mumkin.

Alohida holatlarda — agar shaxs respublika hududidan tashqariga chiqayotgan vaqtda uning yoshi 15 dan oshgan boʻlsa, Oʻzbekiston Respublikasi fuqarosi pasporti 16 yoshga toʻlmagan shaxsga berilishi mumkin.

18. Oʻzbekiston Respublikasi hududida doimiy yashovchi fuqaro pasport olishi uchun doimiy roʻyxatda turadigan joyidagi maʼlumotlarni yigʻish punktiga quyidagilarni taqdim etadi:

belgilangan shakldagi ariza;

ilgari berilgan pasport;

tugʻilganlik haqida guvohnoma (birinchi marta rasmiylashtirilayotganda);

35 x 45 mm oʻlchamdagi fotosurat;

davlat boji toʻlanganligi haqida kvitansiya.

19. Haqiqiy harbiy xizmatni oʻtab, Oʻzbekiston Respublikasi Qurolli Kuchlari rezerviga boʻshatilgan va pasporti boʻlmagan harbiy xizmatchilarga pasport kontrakt asosida xizmat qilgan harbiy xizmatchining shaxsini tasdiqlovchi guvohnoma yoki Oʻzbekiston Respublikasi Qurolli Kuchlari ofitserining shaxsini tasdiqlovchi guvohnoma asosida ular doimiy roʻyxatda turadigan maʼlumotlarni yigʻish punkti tomonidan beriladi.

Oʻzbekiston Respublikasi Qurolli Kuchlarining haqiqiy harbiy xizmatni oʻtayotgan harbiy xizmatchilariga pasportlar harbiy qism joylashgan joydagi maʼlumotlarni yigʻish punkti tomonidan tegishli vazirliklar va idoralar rahbarlarining iltimosnomalari asosida beriladi.

20. Oʻzbekiston Respublikasining xorijdagi konsullik muassasalarida doimiy va vaqtincha konsullik roʻyxatiga olingan fuqarolar ushbu Nizomning 17-bandida koʻrsatilgan hollarda pasportni rasmiylashtirish uchun maʼlumotlarni yigʻish punktiga quyidagi hujjatlarni taqdim etadilar:

belgilangan shakldagi ariza;

ilgari berilgan pasport;

tugʻilganlik haqidagi guvohnoma (birinchi marta pasport rasmiylashtirilayotganda);

35 x 45 mm oʻlchamdagi fotosurat:

pasportni yoʻqotib qoʻyganligi haqidagi maʼlumotnoma (pasportni yoʻqotib qoʻyganda);

konsullik yigʻimi va boshqa yigʻimlar toʻlanganligi haqida kvitansiya.

21. Maʼlumotlarni yigʻish punkti taqdim etilgan hujjatlar asosida arizachining biografik maʼlumotlarini, elektron koʻrinishdagi qoʻl barmoq izlarini yigʻadi, shaxsni old tomondan raqamli formatda suratga oladi va pasportni rasmiylashtirish uchun talabnoma tuzib, soʻng DPM ga joʻnatadi.

22. Agar fuqaro qoʻl barmoq izlari olinishidan bosh tortsa va koʻzoynakda yoki bosh kiyimda suratga tushish istagidan qaytmasa, maʼlumotlarni yigʻish punkti unga pasport rasmiylashtirishni rad etish huquqiga ega.

23. Maʼlumotlarni yigʻish punkti fuqaroga yangi pasport berish chogʻida ilgari berilgan pasportni olib qoʻyadi va uni yoʻq qilish uchun DPMga joʻnatadi.

24. DPM Oʻzbekiston Respublikasi fuqarosining tayyor boʻlgan pasportini DFX orqali pasport rasmiylashtirish uchun talabnoma joʻnatgan maʼlumotlarni yigʻish punktiga yoki diplomatik kanallar orqali maʼlumotlarni yigʻish punktlariga yetkazib berish uchun Oʻzbekiston Respublikasi Tashqi ishlar vazirligiga topshiradi. Maʼlumotlarni yigʻish punktlari esa pasportlarni egalariga berishni taʼminlashlari kerak.

25. Oʻzbekiston Respublikasining xorijdagi konsullik muassasalarida doimiy konsullik roʻyxatiga olingan va vaqtincha Oʻzbekiston Respublikasida boʻladigan fuqarolar ushbu Nizomning 17-bandida koʻrsatilgan hollarda pasport olish va almashtirish uchun ushbu Nizomning 20-bandida koʻrsatilgan hujjatlar bilan Oʻzbekiston Respublikasi Tashqi ishlar vazirligiga murojaat etadilar.

26. Xorijga doimiy yashash uchun belgilangan tartibda chiqqan, ammo Oʻzbekiston Respublikasining konsullik muassasasida konsullik roʻyxatida turmagan va Oʻzbekiston Respublikasida boʻlgan paytida pasportini yoʻqotib qoʻygan fuqarolar soʻnggi doimiy roʻyxatda turgan joylaridagi maʼlumotlarni yigʻish punktiga murojaat etadilar.

Agar arizachining turar joyi boʻlsa, ichki ishlar idoralari uni vaqtincha roʻyxatdan oʻtkazadi va manfaatdor vazirliklar hamda idoralar bilan birga unga pasport rasmiylashtiradi.

Agar arizachini vaqtincha roʻyxatdan oʻtkazish uchun uning turar joyi boʻlmasa, ichki ishlar idoralari Oʻzbekiston Respublikasi Tashqi ishlar vazirligi bilan kelishgan holda unga istisno tariqasida pasport rasmiylashtiradi.

27. Agar fuqaro kelgan mamlakatda Oʻzbekiston Respublikasining konsullik muassasasi boʻlmasa, u Oʻzbekiston Respublikasining mazkur mamlakat konsullik okrugiga kiradigan xorijdagi konsullik muassasasiga murojaat etadi.

28. Fuqaro pasportini ehtiyot qilib saqlashi shart.

Pasportini yoʻqotib qoʻygan fuqaro zudlik bilan doimiy roʻyxatda turadigan joyidagi maʼlumotlarni yigʻish punktiga xabar berishi lozim. Mazkur maʼlumotlarni yigʻish punkti qonun hujjatlarida koʻzda tutilgan amallarni bajarganidan keyin unga ushbu Nizomda nazarda tutilgan tartibda yangi pasport beradi.

Vaqtincha xorijda boʻlgan fuqarolar pasportlarini yoʻqotib qoʻysalar, pasport yaroqsiz holga kelsa yoki uning amal qilish muddati tugasa, Oʻzbekiston Respublikasiga qaytish guvohnomasini olish uchun Oʻzbekiston Respublikasining konsullik vakolatxonasiga murojaat etadilar, ushbu Nizomning 20-bandida koʻrsatilgan shaxslar bundan mustasno.

29. Topib olingan pasport ichki ishlar idorasiga yoki Oʻzbekiston Respublikasining xorijdagi konsullik muassasasiga topshirilishi lozim.

30. Vafot etgan shaxsning pasporti fuqarolik holatlari dalolatnomalarini yozish idorasiga topshiriladi. Ushbu idora hujjatni yoʻq qilish maqsadida DPMga topshirish uchun maʼlumotlarni yigʻish punktiga joʻnatadi.

Xorijda vafot etgan fuqaroning pasporti Oʻzbekiston Respublikasining konsullik muassasasi tomonidan Oʻzbekiston Respublikasi Tashqi ishlar vazirligiga joʻnatiladi. Ushbu vazirlik esa hujjatni yoʻq qilish uchun DPMga yuboradi.

31. Hibsga olingan yoki ozodlikdan mahrum etishga hukm qilingan shaxsning pasporti surishtiruv, tergov idoralari yoki sud tomonidan olib qoʻyiladi. Agar shaxs sudning hukmi bilan qamoqda qoldirilsa, uning pasporti Oʻzbekiston Respublikasi Ichki ishlar vazirligi Jazoni ijro etish bosh boshqarmasiga joʻnatiladi.

Shaxs qamoqdan ozod etilganida yoki jazo muddatini oʻtab boʻlgach, unga pasporti tergov, sud idoralari yoki jazoni ijro etish muassasasi maʼmuriyati tomonidan qaytariladi.

Hibsga olingan yoki ozodlikdan mahrum etishga hukm qilingan shaxslarning tergov, sud idoralarida yoki jazoni ijro etish muassasasi maʼmuriyatida saqlanayotgan muddati oʻtgan pasportlari ushbu Nizomda belgilangan tartibda yoʻq qilish uchun maʼlumotlarni yigʻish punktiga joʻnatiladi.

32. Tekshirish, verifikatsiya (solishtirib oʻqish) jarayonida noaniqliklar yoki chegara (migratsiya) belgilari, xorijiy vizalar, ruxsatnoma yozuvlari qalbakilashtirilgani alomatlari aniqlangan, shuningdek belgilangan tartibda haqiqiy emas deb topilgan pasportlar tegishli vazirliklar va idoralarga joʻnatish uchun chegara nazorati boʻlinmalari tomonidan olib qoʻyilishi mumkin.

33. Ushbu Nizomning 9, 18, 20, 23, 30, 31 va 32-bandlarida koʻzda tutilgan hollardan tashqari, fuqarolardan pasportlarini olib qoʻyish taqiqlanadi.

Majburiyatni bajarish maqsadida pasportni garov sifatida qabul qilish va topshirish taqiqlanadi.

34. Ushbu Nizom talablarini amalga oshirish uchun zarur boʻlgan shtamplar va blankalar namunalari tegishli ravishda Oʻzbekiston Respublikasi Ichki ishlar, Tashqi ishlar, Sogʻliqni saqlash, Adliya, Mudofaa vazirliklari va Milliy xavfsizlik xizmati tomonidan tasdiqlanadi.

35. Pasport berish uchun Oʻzbekiston Respublikasi Vazirlar Mahkamasi tomonidan belgilangan miqdorda davlat boji undiriladi. Toʻliq davlat taʼminotida boʻlgan shaxslar davlat boji toʻlashdan ozod etiladilar.

III. Fuqaroni roʻyxatdan oʻtkazish va roʻyxatdan chiqarish

36. Fuqarolar doimiy yoki vaqtincha yashash joyida roʻyxatdan oʻtishlari shart.

37. Vaqtincha roʻyxatdan oʻtkazish shaxsning muayyan yashash joyida boʻlish muddatida amalga oshiriladi.

38. Oʻzbekiston Respublikasi hududi doirasida boshqa joyga olti oydan ortiq muddatga boradigan fuqarolar avvalgi yashash joyidan roʻyxatdan chiqishlari shart, xizmat safariga, taʼtilga, oʻqishga va davolanishga boradigan fuqarolar bundan mustasno.

39. Fuqaroni roʻyxatdan oʻtkazish va roʻyxatdan chiqarish ichki ishlar idorasi tomonidan amalga oshiriladi. Ushbu ichki ishlar idorasi ketish va kelish varaqalarini oʻz vaqtida hududiy manzil-maʼlumotnoma byurosiga yuborishi shart. Mehmonxonalar, davolash muassasalari, sanatoriylar va dam olish uylarining masʼul xodimlari bu yerlarga joylashgan, roʻyxatdan oʻtishi lozim boʻlgan shaxslar boʻyicha anketa-arizalarni hisobga olish uchun bir sutka ichida ushbu muassasalar joylashgan hududdagi manzil-maʼlumotnoma byurosiga joʻnatishlari shart.

Ichki ishlar idoralari har oyda kamida bir marta hududiy statistika idoralariga fuqarolarning roʻyxatdan oʻtishi — roʻyxatdan chiqishi haqida maʼlumotnoma joʻnatadi.

40. Fuqaro yashashi moʻljallanayotgan joyga doimiy roʻyxatdan oʻtishi uchun quyidagilarni taqdim etadi:

belgilangan shakldagi ariza;

Oʻzbekiston Respublikasi fuqarosining pasporti;

tugʻilganlik haqida guvohnoma (16 yoshga toʻlmagan, ota-onasidan, vasiylaridan yoki homiylaridan alohida yashaydigan shaxslar uchun);

kontrakt asosidagi harbiy xizmatchining shaxsini tasdiqlovchi guvohnoma yoki Oʻzbekiston Respublikasi Qurolli Kuchlari ofitserining shaxsini tasdiqlovchi guvohnoma (kazarmadan, kemadan tashqarida yashovchi harbiy xizmatchilar uchun);

turar joy hujjatlari;

davlat boji toʻlanganligi haqida kvitansiya.

Hali 16 yoshga toʻlmagan va ota-onalari (vasiylari, homiylari) bilan birga yashaydigan bolalarni roʻyxatdan oʻtkazish tugʻilganlik toʻgʻrisidagi guvohnoma boʻyicha ular haqidagi maʼlumotlarni uy daftarlariga (roʻyxatdan oʻtkazish kartochkalariga) kiritish orqali amalga oshiriladi.

Chegara zonasida joylashgan aholi punktlarida roʻyxatdan oʻtkazish qonun hujjatlarida belgilangan tartibda amalga oshiriladi.

41. Fuqarolar yangi yashash joyiga kelgandan soʻng uch ish kuni mobaynida hujjatlarini roʻyxatdan oʻtish uchun kelgan joylaridagi ichki ishlar idoralarining boʻlinmalariga topshirishlari shart.

Roʻyxatdan chiqish hujjatlari doimiy yashash joylaridagi ichki ishlar idoralarining boʻlinmalari tomonidan rasmiylashtiriladi.

42. Quyidagi Oʻzbekiston Respublikasi fuqarolari, shuningdek belgilangan tartibda Oʻzbekiston Respublikasi hududida istiqomat uchun berilgan guvohnomaga ega boʻlgan chet el fuqarolari va fuqaroligi boʻlmagan shaxslar, yashash joyi maydoni qanchaligidan qatʼi nazar, doimiy roʻyxatdan oʻtish huquqiga ega:

turar joy mulkdori;

ota-onalar — farzandlarining yashash joyiga;

xotin (er) — eri (xotini)ning yashash joyiga;

voyaga yetmagan farzandlar va vasiylikka olinganlar — ota-onalarining va vasiylarining yashash joylariga;

oʻz oilalariga ega boʻlmagan yoki voyaga yetmagan farzandlari boʻlgan, ammo nikohdan oʻtmagan voyaga yetgan farzandlar — ota-onalarining yashash joylariga;

voyaga yetmagan va ota-onasi boʻlmagan tugʻishgan aka-ukalar va opa-singillar, shuningdek yoshidan qatʼi nazar, mehnatga layoqatsiz tugʻishgan aka-ukalar va opa-singillar, agar ular oʻz oilalariga ega boʻlmasalar — akasi va opasining (ukasi va singlisining) yashash joyiga;

ilgari mazkur aholi punktida yashagan, mehnat shartnomasi boʻyicha ishlash uchun vaqtincha boshqa joyga ketgan shaxslar, shuningdek amaldagi qonun hujjatlariga koʻra vaqtincha boshqa joyga ketganda turar joydan foydalanish huquqi saqlanib qoladigan fuqarolar — ilgarigi turar joylariga yoki qarindoshlarinikiga;

jazoni ijro etish joylaridan ozodlikka chiqqan shaxslar — ilgarigi turar joylariga, oila aʼzolarinikiga, qarindoshlarinikiga yoki hukm etilgunlarigacha yashagan shaxslarnikiga;

Mudofaa, Ichki ishlar, Favqulodda vaziyatlar vazirliklari, Milliy xavfsizlik xizmati, Oʻzbekiston Aloqa va axborotlashtirish agentligining kontrakt asosidagi harbiy xizmatchilari (va ularning oila aʼzolari), shu jumladan rezervga yoki isteʼfoga boʻshatilganlar — qarindoshlarinikiga yoki boshqa shaxslarnikiga, yashash joyi olgunicha (sotib olgunicha) boʻlgan davrga.

43. Roʻyxatdan oʻtkazish va roʻyxatdan chiqarish uchun Oʻzbekiston Respublikasi Vazirlar Mahkamasi tomonidan belgilangan miqdorda davlat boji undiriladi.

44. Oʻzbekiston Respublikasining qonun hujjatlariga koʻra ayrim mintaqalarda roʻyxatdan oʻtkazishning boshqacha tartibi joriy etilishi, shuningdek baʼzi joylarda aholining sogʻligʻini va xavfsizligini muhofaza qilish maqsadida fuqarolarning kelishiga cheklovlar oʻrnatilishi mumkin.

Cheklovlar amalda boʻlgan joylarda roʻyxatdan oʻtishlariga ruxsat etilmagan shaxslar shu joylarda joylashgan tashkilotlarga ishga qabul qilinishlari mumkin emas va yetti kun ichida ushbu joyni tark etishlari lozim. Ular chiqib ketishdan boʻyin tovlasalar, ichki ishlar idoralari tomonidan qonun hujjatlarida belgilangan tartibda chiqarib yuboriladilar.

45. Turar joy mulkdori yashash joyi maydonidan qatʼi nazar, oʻz oila aʼzolarini va boshqa yaqin qarindoshlarini roʻyxatdan oʻtkazish huquqiga ega.

Turar joy mulkdori qonun talablariga rioya etilgan taqdirda Oʻzbekiston Respublikasining boshqa fuqarolarini, shuningdek belgilangan tartibda Oʻzbekiston Respublikasi hududida istiqomat uchun berilgan guvohnomaga ega boʻlgan chet el fuqarolarini va fuqaroligi boʻlmagan shaxslarni roʻyxatdan oʻtkazish huquqiga ega.

46. Bir nechta uyga yoki xonadonga ega boʻlgan mulkdor ulardan faqat bittasigagina doimiy roʻyxatdan oʻtishi mumkin.

47. Sudning egallab turgan turar joyidan koʻchirib yuborish yoki ushbu turar joydan foydalanish huquqi bekor boʻlgan deb topish toʻgʻrisidagi kuchga kirgan qaroriga binoan roʻyxatdan oʻtish bekor qilinishi lozim.

Roʻyxatdan oʻtish qonunda koʻzda tutilgan boshqa hollarda ham sud qaroriga koʻra bekor qilinishi mumkin.

48. Ozodlikdan mahrum etishga hukm qilingan shaxslarni roʻyxatdan chiqarish ushbu shaxslarga nisbatan hukmlar qonuniy kuchga kirganidan soʻng amalga oshiriladi.

49. Vafot etganlar oʻlim qayd etilganidan keyin roʻyxatdan chiqarilishi lozim.

Oʻlim toʻgʻrisidagi guvohnoma shakli Oʻzbekiston Respublikasi Adliya vazirligi tomonidan belgilanadi.

50. Fuqarolarni roʻyxatdan oʻtkazish va roʻyxatdan chiqarishga taalluqli roʻyxatdan oʻtkazish (roʻyxatdan chiqarish) haqidagi arizalar, uy daftarlari (roʻyxatdan oʻtkazish kartochkalari), manzil varaqalari va boshqa hujjatlarning shakllari Oʻzbekiston Respublikasi Ichki ishlar vazirligi tomonidan belgilanadi.

IV. Konsullik roʻyxati

51. Belgilangan tartibda xorijga doimiy yashash uchun chiqib ketgan, shuningdek vaqtincha xorijda boʻladigan fuqarolar Oʻzbekiston Respublikasining xorijdagi konsullik muassasalarida doimiy yoki vaqtincha konsullik roʻyxatiga olinadilar.

52. Xorijga doimiy yashash uchun chiqqan va xorijga doimiy yashash uchun chiqishlarini belgilangan tartibda rasmiylashtirgan fuqarolar doimiy konsullik roʻyxatiga olinadilar.

53. Xorijga xizmat safariga, oʻqish, davolanish va shartnoma boʻyicha ishlashga chiqqan va xorijga vaqtincha chiqishlarini belgilangan tartibda rasmiylashtirgan fuqarolar vaqtincha konsullik roʻyxatiga olinadilar.

Fuqaro oʻzi borayotgan mamlakatga qonuniy tarzda va olti oydan ortiq muddatga kelgan taqdirda, u vaqtincha konsullik roʻyxatiga olinadi.

54. Agar fuqarolar doimiy yashash, ish, oʻqish yoki xizmat safari joyi oʻzgarishi munosabati bilan olti oydan ortiq muddatga Oʻzbekiston Respublikasining boshqa konsullik muassasasining konsullik okrugi hududiga koʻchib oʻtishsa, ilgari turgan joylaridagi konsullik roʻyxatidan (doimiy, vaqtincha) chiqishlari va yangi kelgan joylarida konsullik roʻyxatiga olinishlari lozim.

55. Konsullik roʻyxatiga olish uchun Oʻzbekiston Respublikasi Vazirlar Mahkamasi tomonidan belgilangan miqdorda yigʻim undiriladi.

56. Fuqarolarning konsullik roʻyxatiga olish va konsullik roʻyxatidan chiqarish toʻgʻrisidagi arizalarining, ularni konsullik roʻyxatiga olish va konsullik roʻyxatidan chiqarishga taalluqli qayd qilish kitoblari va boshqa hujjatlarning shakllari Oʻzbekiston Respublikasi Tashqi ishlar vazirligi tomonidan belgilanadi.

V. Pasport tizimi qoidalarini buzganlik uchun javobgarlik

57. Qonun hujjatlarida quyidagilar uchun javobgarlik belgilanadi:

pasportga ega boʻlishi shart boʻlgan fuqaroning pasportsiz yoki haqiqiy boʻlmagan pasport bilan, vaqtincha yoki doimiy roʻyxatdan oʻtmay yashashi, pasportni ataylab yaroqsiz holga keltirganligi, shuningdek pasportni ehtiyot qilib saqlamaganligi oqibatida yoʻqotib qoʻyganligi;

fuqarolar oʻz pasportlaridan gʻarazli maqsadlari yoʻlida foydalanganligi, soʻng ularni yoʻqotib qoʻyganligi toʻgʻrisida ariza berganligi, shuningdek boshqa fuqarolarga tegishli pasportlardan foydalanganligi;

pasport tizimi qoidalariga rioya etilishi uchun masʼul boʻlgan shaxslar tomonidan fuqarolarning pasportsiz yoki haqiqiy boʻlmagan pasport bilan yoxud vaqtincha yoki doimiy roʻyxatdan oʻtmay yashashiga yoʻl qoʻyganligi, shuning barobarida fuqarolarning oʻzlari egallab turgan turar joylarda pasportsiz, vaqtincha yoki doimiy roʻyxatdan oʻtmagan shaxslarning yashashiga yoʻl qoʻyganligi;

pasportsiz yoki pasporti haqiqiy boʻlmagan fuqarolarni, shuning barobarida vaqtincha yoki doimiy roʻyxatdan oʻtmagan fuqarolarni ishga qabul qilish, shuningdek fuqarolarning pasportlarini noqonuniy olib qoʻyish yoki pasportlarni garov sifatida qabul qilish;

chegara zonasiga kirish yoki bu zonada yashash, shuningdek fuqarolarning kirishi va boʻlishi vaqtincha cheklangan joylarga kirish va bu joylarda boʻlish qoidalarini buzish;

gʻarazli yoki boshqa tuban maqsadlarda pasportni egallab olish, xuddi shuningdek uni yoʻq qilish, yaroqsiz holga keltirish, yashirish.

Oʻzbekiston Respublikasi Prezidentining 2011-yil 5-yanvardagi PF-4262-sonli Farmoniga
1-ILOVA

Oʻzbekiston Respublikasi fuqarosining biometrik pasporti toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi fuqarosining biometrik pasportidan foydalanish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

Oʻzbekiston Respublikasi fuqarosining biometrik pasporti (keyingi oʻrinlarda — pasport) — Oʻzbekiston Respublikasining fuqaroligini va egasining shaxsini Oʻzbekiston Respublikasi hududida tasdiqlovchi, pasport egasining shaxsiy biografik maʼlumotlari va biometrik parametrlari kiritilgan elektron tashuvchi qurilma (chip)ga ega boʻlgan hujjat;

personallashtirish — pasport egasining biografik maʼlumotlarini va biometrik parametrlarini pasport blankasiga kiritish;

verifikatsiya — pasportga kiritilgan biometrik parametrlarning pasport egasining biometrik parametrlari bilan mosligini mashina yordamida tekshirish;

xorijda doimiy yashaydigan Oʻzbekiston Respublikasi fuqarolari — Oʻzbekiston Respublikasidagi doimiy yashash joyidan roʻyxatdan chiqib, xorijga doimiy yashashga chiqish uchun belgilangan tartibda ruxsatnoma rasmiylashtirgan Oʻzbekiston Respublikasi fuqarolari;

xorijda vaqtincha boʻladigan Oʻzbekiston Respublikasi fuqarolari — Oʻzbekiston Respublikasida doimiy yashaydigan, xorijga chiqib, vaqtincha u yerda boʻladigan Oʻzbekiston Respublikasi fuqarolari;

konsullik muassasasi — Oʻzbekiston Respublikasi diplomatik vakolatxonasining konsullik boʻlimi, Oʻzbekiston Respublikasining xorijiy davlatda taʼsis etiladigan bosh konsulxonasi, konsulxonasi, vitse-konsulxonasi va konsullik agentligi;

konsullik roʻyxati — tegishli konsullik okrugi hududiga kelgan Oʻzbekiston Respublikasi fuqarolarini xorijdagi Oʻzbekiston Respublikasining konsullik muassasalari qoshida belgilangan tartibda qayddan oʻtkazish;

doimiy konsullik roʻyxati — doimiy yashash uchun xorijga chiqish ruxsatnomasi belgilangan tartibda rasmiylashtirilgan, Oʻzbekiston Respublikasining xorijdagi konsullik muassasasi konsullik okrugi hududida doimiy yashayotgan Oʻzbekiston Respublikasi fuqarolarini qayddan oʻtkazish;

vaqtincha konsullik roʻyxati — Oʻzbekiston Respublikasida doimiy yashaydigan, xorijda vaqtincha boʻladigan, xorijga vaqtincha chiqish ruxsatnomasini belgilangan tartibda rasmiylashtirgan Oʻzbekiston Respublikasi fuqarolarini xorijdagi Oʻzbekiston Respublikasi konsullik muassasalari tomonidan qayddan oʻtkazish;

konsullik okrugi — konsullik muassasasiga konsullik vazifalarini bajarish uchun biriktirilgan bir yoki bir necha davlat hududi;

maʼlumotlarni yigʻish punkti — pasport olish uchun murojaat qilgan fuqarolarning biografik maʼlumotlarini va biometrik parametrlarini jamlash, ushbu maʼlumotlarni Oʻzbekiston Respublikasi Adliya vazirligi huzuridagi Personallashtirish agentligiga topshirish hamda fuqarolarga biometrik parametrlarga ega pasportlar berish boʻyicha vazifalarni bajaruvchi ichki ishlar organlarining migratsiya va fuqarolikni rasmiylashtirish boʻlinmalari.

3. Pasport u berilgan kundan boshlab 10 yil davomida amalda boʻladi va 2030-yil 31-dekabrgacha Oʻzbekiston Respublikasi fuqarosining identifikatsiyalovchi ID-kartasi (keyingi oʻrinlarda — ID-karta) bilan bir qatorda Oʻzbekiston Respublikasi hududida Oʻzbekiston Respublikasining fuqaroligini va egasining shaxsini tasdiqlovchi asosiy hujjatdir.

4. Pasport Oʻzbekiston Respublikasi mulkidir va uning egasi Oʻzbekiston Respublikasi himoyasidadir.

5. Oʻzbekiston Respublikasi Qurolli Kuchlari safiga muddatli harbiy xizmatni oʻtashga chaqirilgan fuqarolarning pasportlari mudofaa ishlari boʻlimlari tomonidan olib qoʻyiladi va xizmat tugagunicha saqlanadi. Muddatli harbiy xizmat tugagach mudofaa ishlari boʻlimlari bir oy muddat ichida fuqarolarga olib qoʻyilgan pasportlarini qaytarishlari shart.

6. Pasport blankasiga quyidagi asosiy maʼlumotlar kiritilgan boʻlishi lozim:

pasportni bergan davlatning nomi;

hujjatning nomi;

hujjatning turi;

pasportni bergan davlatning kodi;

pasportning raqami;

familiyasi, ismi, otasining ismi;

millati;

fuqaroligi;

tugʻilgan sanasi;

tugʻilgan joyi;

jinsi;

berilgan sanasi;

kim tomonidan berilgani;

personallashtiruvchi idora;

amal qilish muddati tugaydigan sana;

egasining raqamli surati;

egasi haqidagi mashina oʻqiydigan maʼlumotlar.

7. Chipga quyidagi maʼlumotlar kiritilgan boʻlishi lozim:

pasport egasi toʻgʻrisidagi biografik maʼlumotlar;

egasining raqamli surati;

qoʻl barmoq izlari.

8. Fuqaroning yozma arizasiga koʻra millati haqidagi yozuv faqat bir marta otasi yoki onasining millatiga oʻzgartirilishi mumkin.

9. Pasportga:

harbiy majburiyat toʻgʻrisidagi;

nikoh qayd etilganligi yoki bekor qilinganligi toʻgʻrisidagi;

xorijga chiqish biometrik pasporti berilganligi toʻgʻrisidagi;

Oʻzbekiston Respublikasining Davlat chegarasidan oʻtish toʻgʻrisidagi;

konsullik roʻyxatiga olingani yoki konsullik roʻyxatidan chiqarilgani toʻgʻrisidagi;

ilgari qoʻyilgan qaydlarni bekor qilish toʻgʻrisidagi maʼlumotlar kiritiladi.

Pasportda egasining imzosi boʻlishi lozim.

Fuqarolarning roziligiga koʻra ularning pasportlariga pasport egasining qon guruhi va rezus mansubligi (faktori) toʻgʻrisidagi maʼlumotlar kiritiladi.

10. Pasportga:

ichki ishlar organlari boʻlinmalari tomonidan — xorijga chiqish biometrik pasporti berilganligi, ilgari qoʻyilgan qaydlarni bekor qilish haqidagi;

mudofaa ishlari boʻlimlari tomonidan — harbiy majburiyat toʻgʻrisidagi;

chegara nazorati boʻlinmalari tomonidan — Oʻzbekiston Respublikasining Davlat chegarasidan oʻtganlik holati haqidagi va ilgari qoʻyilgan qaydlarni bekor qilish haqidagi;

fuqarolik holatlari dalolatnomalarini yozish idoralari tomonidan — nikohni qayd etish va bekor qilish haqidagi;

sogʻliqni saqlash muassasalari tomonidan — qon guruhi va rezus mansubligi (faktori) haqidagi;

Oʻzbekiston Respublikasining konsullik muassasalari tomonidan — konsullik roʻyxatiga olish yoki konsullik roʻyxatidan chiqarish haqidagi, nikohni qayd etish va bekor qilish haqidagi, ilgari qoʻyilgan qaydlarni bekor qilish haqidagi qaydlar kiritiladi.

Pasportga ushbu Nizomda nazarda tutilmagan yozuvlar va qaydlarni kiritish taqiqlanadi.

2-bob. Pasportni almashtirish tartibi

11. Pasport quyidagi hollarda ID-kartaga almashtiriladi:

pasportning amal qilish muddati tugaganida;

familiyasi, ismi, otasining ismi, millati, tugʻilgan sanasi oʻzgarganida;

pasportdagi yozuvlarda noaniqliklar va xatolar mavjudligi aniqlanganida;

sud ajrimi bilan pasportning amal qilishi toʻxtatib turilganda;

pasport blankasi yaroqsiz holga kelganida;

pasport yoʻqotib qoʻyilganida.

Ichki ishlar organlarining migratsiya va fuqarolikni rasmiylashtirish boʻlinmalari pasportning amal qilishi toʻxtatib turilganligi toʻgʻrisidagi sud ajrimini Oʻzbekiston Respublikasi Tashqi ishlar vazirligining Konsullik-huquqiy departamenti orqali Oʻzbekiston Respublikasining xorijdagi konsullik muassasalariga maʼlumot uchun yuboradi.

Fuqaro pasportining amal qilish muddati tugagandan soʻng yoki familiyasi, ismi, otasining ismi, tugʻilgan yili va millati oʻzgargandan soʻng pasporti bir oy muddatda ID-kartaga almashtirishi lozim.

12. Topib olingan pasport ichki ishlar organlariga yoki Oʻzbekiston Respublikasining xorijdagi konsullik muassasasiga topshirilishi lozim.

13. Vafot etgan shaxsning pasporti mavjud boʻlgan taqdirda fuqarolik holati dalolatnomalarini yozish organiga topshiriladi va fuqarolik holati dalolatnomalarini yozish organi hujjatni yoʻq qilish maqsadida maʼlumotlarni yigʻish punktiga yuboradi.

14. Hibsga olingan yoki ozodlikdan mahrum etishga hukm qilingan shaxsning pasporti tergovga qadar tekshiruv, surishtiruv, tergov organlari yoki sud tomonidan olib qoʻyiladi. Agar shaxs sudning hukmi bilan ozodlikdan mahrum etilsa, uning pasporti Oʻzbekiston Respublikasi Ichki ishlar vazirligi Jazoni ijro etish departamentiga yuboriladi.

Shaxs hibsdan ozod qilinganda yoki jazoni ijro etish muassasasidan ozod etilganida, unga pasporti tergovga qadar tekshiruv, surishtiruv, tergov organlari, sud yoxud jazoni ijro etish muassasasining maʼmuriyati tomonidan qaytariladi.

15. Tekshirish, verifikatsiya (solishtirib oʻqish) jarayonida noaniqliklar yoki chegara (migratsiya) belgilari, xorijiy vizalar, ruxsatnoma yozuvlari qalbakilashtirilgani alomatlari aniqlangan, shuningdek belgilangan tartibda haqiqiy emas deb topilgan pasportlar tegishli vazirliklar va idoralarga joʻnatish uchun chegara nazorati boʻlinmalari tomonidan olib qoʻyilishi mumkin.

16. Ushbu Nizomning 5 va 12 — 15-bandlarida nazarda tutilgan hollardan tashqari, fuqarolardan pasportlarini olib qoʻyish taqiqlanadi.

17. Fuqaro pasportini ehtiyot qilib saqlashi shart.

Pasportini yoʻqotib qoʻygan fuqaro zudlik bilan oʻziga qulay boʻlgan maʼlumotlarni yigʻish punktiga xabar berishi lozim, unga qonun hujjatlarida nazarda tutilgan tartibda va muddatlarda yangi ID-karta rasmiylashtirib beriladi.

Vaqtincha xorijda boʻlgan fuqarolar pasportini yoʻqotgan, pasporti yaroqsiz holga kelgan yoki uning amal qilish muddati tugagan hollarda Oʻzbekiston Respublikasiga qaytish guvohnomasini olish uchun Oʻzbekiston Respublikasining konsullik muassasasiga murojaat etadilar.

18. Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslarning pasportini yoki shaxsni tasdiqlovchi boshqa hujjatini yoʻqotganliklari haqidagi arizalari boʻyicha ichki ishlar organlarining migratsiya va fuqarolikni rasmiylashtirish boʻlinmasi tomonidan tegishincha mazkur Nizomning 1 va 2-ilovalariga muvofiq belgilangan shakldagi maʼlumotnoma beriladi.

19. Pasport yoʻqolganligi toʻgʻrisidagi arizalar hisobga olish jurnalida Oʻzbekiston Respublikasi Ichki ishlar vazirligi tomonidan oʻrnatilgan tartibda roʻyxatga olinadi.

20. Fuqarolar topilgan pasportlarni zudlik bilan ichki ishlar organlariga topshirishlari lozim.

21. Topilgan pasportlarda oldingi yashash joyidan roʻyxatdan chiqqanligi haqida shtamplar mavjud boʻlsa, bunday pasportlar ularni bergan ichki ishlar organlariga yoʻq qilinish uchun yuboriladi.

22. Pasport oʻgʻirlangan hollarda bu haqidagi arizalar jinoyat sodir etilgan joydagi yoki fuqaroning yashash joyidagi hududiy ichki ishlar organlarining navbatchilik qismlari xodimlari tomonidan qabul qilinadi. Bunday arizalar qabul qilinganligi haqida fuqarolarga maʼlumotnomalar beriladi va ular javobgarlikka tortilmaydi.

Jazoni ijro etish muassasasida jazoni oʻtab chiqqan, tabiiy va texnogen xususiyatli favqulodda vaziyatlar, shu jumladan maishiy tusdagi ofatlar (turar joylarning yoki yashash uchun moʻljallanmagan joylarning yongʻini, qulashi, transport vositalarining yonishi) yuz berganligi oqibatida pasporti yoʻqolganligi yoki yaroqsiz holga kelganligi toʻgʻrisida ariza bilan murojaat etgan shaxslar ham javobgarlikka tortilmaydi.

Bunda, jazoni ijro etish muassasasida jazoni oʻtab chiqqan shaxs bu holatni tasdiqlovchi tegishli hujjatni arizaga ilova qiladi, tabiiy va texnogen xususiyatli favqulodda vaziyatlar, shu jumladan maishiy tusdagi ofatlar (turar joylarning yoki yashash uchun moʻljallanmagan joylarning yongʻini, qulashi, transport vositalarining yonishi) yuz berganligi holatini tasdiqlash zarurati boʻlganda, ichki ishlar organlarining migratsiya va fuqarolikni rasmiylashtirish boʻlimlari tomonidan soʻrov asosida qonunchilikda belgilangan vakolatli idoralardan maʼlumotnoma olinadi.

Ichki ishlar organlarining muayyan yashash joyiga ega boʻlmagan shaxslarni reabilitatsiya qilish markazlaridan ozod etilgan va pasportini yoʻqotgan shaxslarga mazkur Nizomning 1-ilovasiga muvofiq shakl boʻyicha maʼlumotnoma beriladi.

Bunday shaxslarga ID-karta berish masalalari ilgari hujjatlashtirilgan yoki soʻnggi doimiy yashash joyi boʻyicha roʻyxatdan oʻtgan yoxud vaqtincha turgan joyi boʻyicha hisobga olingan joyidagi ichki ishlar organlari tomonidan, agar ular Oʻzbekiston Respublikasi fuqarolari boʻlsalar, koʻrib chiqiladi.

23. Agar fuqaro kelgan davlatida Oʻzbekiston Respublikasining konsullik muassasasi boʻlmasa, u Oʻzbekiston Respublikasining mazkur davlat konsullik okrugiga kiradigan xorijdagi konsullik muassasasiga murojaat qiladi.

24. Oʻzbekiston Respublikasi fuqaroligini yoʻqotgan shaxs pasportini soʻnggi yashash joyidagi ichki ishlar organiga yoki turgan joyi boʻyicha Oʻzbekiston Respublikasining xorijdagi diplomatik vakolatxonasi yoxud konsullik muassasasiga topshirishi shart.

3-bob. Sud ajrimi bilan amal qilishi toʻxtatib turilgan pasport

25. Qidiruvda boʻlgan ayblanuvchi yoki sudlanuvchi respublika hududida ushlangan taqdirda sud ajrimi bilan amal qilishi toʻxtatib turilgan pasport ichki ishlar organlari yoki chegara nazorati boʻlinmalari tomonidan maʼlumotlarni yigʻish punktiga yoʻq qilish uchun joʻnatish maqsadida olib qoʻyiladi va unga pasporti olib qoʻyilganligi haqida dalolatnoma beriladi.

26. Vaqtincha xorijda boʻlgan pasportining amal qilishi toʻxtatib turilgan ayblanuvchi yoki sudlanuvchi Oʻzbekiston Respublikasiga qaytish guvohnomasini olish uchun Oʻzbekiston Respublikasining konsullik muassasasiga murojaat etganda uning pasporti olib qoʻyiladi va unga bu haqida dalolatnoma beriladi. Olib qoʻyilgan pasportni yoʻq qilish uchun Oʻzbekiston Respublikasi Tashqi ishlar vazirligi orqali maʼlumotlarni yigʻish punktiga yuboriladi.

27. Sud ajrimi bilan pasportining amal qilishi toʻxtatib turilgan ayblanuvchiga yoki sudlanuvchiga ID-karta maʼlumotlarni yigʻish punkti tomonidan qonunchilik hujjatlariga muvofiq rasmiylashtirib beriladi.

4-bob. Yakunlovchi qoida

28. Qonun hujjatlarida quyidagilar uchun javobgarlik belgilanadi:

Oʻzbekiston Respublikasi fuqarosining pasportsiz yoxud haqiqiy boʻlmagan pasport bilan yashashi, pasportini qasddan yaroqsizlantirishi yoki uni ehtiyot qilib saqlamaganligi oqibatida yoʻqotib qoʻyganligi;

fuqarolar tomonidan yoʻqolganligi toʻgʻrisida ariza berilgan oʻz pasportlaridan, shuningdek, boshqa shaxslarga tegishli boʻlgan pasportlardan gʻarazli maqsadlarda foydalanganligi;

pasport tizimi qoidalariga rioya etish uchun masʼul boʻlgan shaxslar tomonidan shaxslarning shaxsini tasdiqlovchi hujjatlarsiz yashashiga yoʻl qoʻyilganligi, xuddi shuningdek fuqarolar tomonidan oʻz turar joylarida shaxslarning shaxsini tasdiqlovchi hujjatlarsiz, doimiy yashash va vaqtincha turgan joyi boʻyicha roʻyxatdan oʻtmasdan yashashiga yoʻl qoʻyilganligi;

boshqa shaxsga tegishli boʻlgan pasportni qonunga xilof ravishda olib qoʻyilganda yoki pasportni garov sifatida qabul qilinganda;

chegara zonasiga kirish yoki bu zonada yashash, shuningdek fuqarolarning kirishi va boʻlishi vaqtincha cheklangan joylarga kirish va bu joylarda boʻlish qoidalarini buzish;

gʻarazli maqsadlarda pasportni egallab olish, xuddi shuningdek, uni yoʻq qilish, yaroqsiz holga keltirish, yashirish.

Oʻzbekiston Respublikasi fuqarosining biometrik pasporti toʻgʻrisidagi nizomga
1-ILOVA

‎‎Hududiy ichki ishlar organining shtampi

‎

‎‎20___ y. “____” _____________
‎ _______________________-son

‎

‎‎MAʼLUMOTNOMA

‎

‎‎Rasm uchun
‎ joy ‎‎
‎
‎‎

‎

Fuqaro________________________________________________________________________________
‎familiyasi, ismi, otasining ismi
‎
‎______________________________________________________________________________________
‎tugʻilgan yili va joyi
‎______________________________________________________________________________________
‎pasporti (ID-karta)ning yoʻqotilganligi haqida murojaat qildi.
‎‎‎

‎

‎‎Amal qilish muddati “______” ___________________ 20_____ y.

‎

‎‎TSHIIB MvaFRB boshligʻi________________________________________________________________‎

‎

‎‎M.Oʻ.

‎

Oʻzbekiston Respublikasi fuqarosining biometrik pasporti toʻgʻrisidagi nizomga
2-ILOVA

‎‎Hududiy ichki ishlar organining shtampi

‎

‎‎20___ y. “____” _____________
‎ _______________________-son

‎

‎‎MAʼLUMOTNOMA

‎

‎‎Rasm uchun
‎ joy ‎‎
‎
‎‎

‎

Chet el fuqarosi (fuqaroligi boʻlmagan shaxs)
‎______________________________________________________________________________________

‎

‎‎(keraksizi oʻchirilsin)

‎

‎‎______________________________________________________________________________________
‎familiyasi, ismi, otasining ismi
‎
‎______________________________________________________________________________________
‎tugʻilgan yili va joyi
‎
‎______________________________________________________________________________________

‎

‎‎milliy pasportning, xizmat pasportining, shaxsni tasdiqlovchi boshqa hujjatning yoʻqotilganligi haqida murojaat qildi.
‎____________________________________(keraksizi oʻchirilsin)
‎
‎Yuqoridagi shaxs haqiqatdan _____________________________________________________________da

‎

‎‎(migratsiya va fuqarolikni rasmiylashtirish boʻlimining nomi)

‎

‎‎20____ y. “_____” __________________dan 20____ y. “_____” _______________gacha __________________________________________________-son milliy pasport (fuqaroligi yoʻq shaxsning guvohnomasi) boʻyicha doimiy yashash joyi boʻyicha roʻyxatga olingan.

‎

‎‎Amal qilish muddati “______” ___________________ 20_____ y.

‎

‎‎TSHIIB MvaFRB boshligʻi________________________________________________________________‎

‎

‎‎M.Oʻ.

‎

Oʻzbekiston Respublikasi Prezidentining 2011-yil 5-yanvardagi PF-4262-sonli Farmoniga
2-ILOVA

Oʻzbekiston Respublikasining fuqaroligi boʻlmagan shaxslarining biometrik harakatlanish hujjati toʻgʻrisidagi

NIZOM

I. Umumiy qoidalar

1. Fuqaroligi boʻlmagan shaxslarning biometrik harakatlanish hujjati toʻgʻrisidagi Nizom (keyingi oʻrinlarda — Nizom) fuqaroligi boʻlmagan shaxslarning xorijga chiqishi uchun biometrik harakatlanish hujjatini rasmiylashtirish, berish, almashtirish tartibini belgilab beradi.

2. Ushbu Nizomda quyidagi asosiy tushunchalardan foydalaniladi:

fuqaroligi boʻlmagan shaxsning biometrik harakatlanish hujjati (keyingi oʻrinlarda — harakatlanish hujjati) — Oʻzbekiston Respublikasida doimiy yashovchi fuqaroligi boʻlmagan shaxsning xorijda shaxsini tasdiqlovchi, harakatlanish hujjati egasining shaxsiy biografik maʼlumotlari va biometrik parametrlari kiritilgan elektron tashuvchi qurilma (chip)ga ega boʻlgan hujjat;

personallashtirish — harakatlanish hujjati blankasiga uning egasi toʻgʻrisidagi biografik maʼlumotlar va biometrik parametrlarni kiritish;

verifikatsiya — harakatlanish hujjatiga kiritilgan biometrik parametrlarning harakatlanish hujjati egasining biometrik parametrlari bilan mosligini mashina yordamida tekshirish;

konsullik roʻyxati — tegishli konsullik okrugi hududiga kelgan fuqaroligi boʻlmagan shaxsni xorijdagi Oʻzbekiston Respublikasining konsullik muassasalari qoshida belgilangan tartibda qayddan oʻtkazish;

doimiy konsullik roʻyxati — doimiy yashash uchun xorijga chiqish ruxsatnomasini belgilangan tartibda rasmiylashtirgan, Oʻzbekiston Respublikasining xorijdagi konsullik muassasasi konsullik okrugi hududida doimiy yashayotgan fuqaroligi boʻlmagan shaxsni qayddan oʻtkazish;

vaqtincha konsullik roʻyxati — xorijga vaqtincha chiqish ruxsatnomasini belgilangan tartibda rasmiylashtirgan, Oʻzbekiston Respublikasida doimiy yashovchi fuqaroligi boʻlmagan shaxslarni Oʻzbekiston Respublikasining xorijdagi konsullik muassasalari tomonidan qayddan oʻtkazish;

konsullik okrugi — konsullik muassasasiga konsullik vazifalarini bajarish uchun biriktirilgan bir yoki bir necha davlat hududi;

maʼlumotlarni yigʻish punkti — pasport olish uchun murojaat qilgan fuqarolarning biografik maʼlumotlarini va biometrik parametrlarini jamlash, ushbu maʼlumotlarni Oʻzbekiston Respublikasi Adliya vazirligi huzuridagi Personallashtirish agentligiga (keyingi oʻrinlarda — Personallashtirish agentligi) topshirish hamda fuqarolarga biometrik parametrlarga ega pasportlar berish boʻyicha vazifalarni bajaruvchi ichki ishlar organlarining migratsiya va fuqarolikni rasmiylashtirish boʻlinmalari, Oʻzbekiston Respublikasi Tashqi ishlar vazirligining Konsullik-huquq departamenti, Oʻzbekiston Respublikasining xorijdagi konsullik muassasalari;

harakatlanish hujjati olish uchun talabnoma — harakatlanish hujjati oluvchi haqida maʼlumotlarni yigʻish punkti tomonidan shakllantirilgan biografik maʼlumotlar va biometrik parametrlarni oʻz ichiga olgan elektron hujjat (keyingi oʻrinlarda — talabnoma).

3. Fuqaroligi boʻlmagan shaxslarga harakatlanish hujjati besh yil muddatga beriladi.

16 yoshga toʻlmagan shaxslarga harakatlanish hujjati Oʻzbekiston Respublikasi Vazirlar Mahkamasi tomonidan belgilangan tartibda besh yildan ortiq boʻlmagan muddatga beriladi.

Harakatlanish hujjatining amal qilish muddati tugagach, shaxs uni maʼlumotlarni yigʻish punktiga topshirishi shart.

3. Fuqaroligi boʻlmagan shaxs harakatlanish hujjati olish uchun doimiy yashash joyi boʻyicha roʻyxatga olingan joyi boʻyicha maʼlumotlarni yigʻish punktiga murojaat qiladi.

Fuqaroligi boʻlmagan shaxslarga harakatlanish hujjati besh yil muddatga beriladi.

Bir yoshga toʻlmagan fuqaroligi boʻlmagan shaxslarga harakatlanish hujjati ikki yil muddatga beriladi;

Harakatlanish hujjatining amal qilish muddati tugagach, shaxs uni maʼlumotlarni yigʻish punktiga topshirishi shart.

Oʻzgalar yordamiga muhtoj qariyalar va nogironligi boʻlgan shaxslarga harakatlanish hujjatini rasmiylashtirish va berish tegishli murojaat asosida belgilangan tartibda ushbu shaxslarning doimiy yashash yoki boʻlish joyiga borgan holda amalga oshiriladi.

4. Harakatlanish hujjati blanki qatʼiy hisobga olinadigan hujjat hisoblanadi.

Harakatlanish hujjati blanklarini ishlab chiqarish “Davlat belgisi” Davlat ishlab chiqarish birlashmasida, harakatlanish hujjatini personallashtirish va yoʻq qilish — DPMda, harakatlanish hujjatini egalariga berish — maʼlumotlarni yigʻish punktlarida amalga oshiriladi.

Harakatlanish hujjati blanklarini ishlab chiqarish “Davlat belgisi” Davlat ishlab chiqarish birlashmasida, harakatlanish hujjatini personallashtirish va yoʻq qilish — Personallashtirish agentligida, harakatlanish hujjatini egalariga berish — maʼlumotlarni yigʻish punktlarida amalga oshiriladi.

Harakatlanish hujjatlarini Oʻzbekiston Respublikasi hududidagi maʼlumotlarni yigʻish punktlariga yetkazib berish Oʻzbekiston Respublikasi Vazirlar Mahkamasi tomonidan belgilangan tartibda Oʻzbekiston Aloqa va axborotlashtirish agentligi Davlat feldyegerlik xizmati (keyingi oʻrinlarda — DFX) tomonidan amalga oshiriladi.

Harakatlanish hujjatlarini Oʻzbekiston Respublikasi hududidagi maʼlumotlarni yigʻish punktlariga yetkazib berish Oʻzbekiston Respublikasi Vazirlar Mahkamasi tomonidan belgilangan tartibda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Davlat feldyegerlik xizmati (keyingi oʻrinlarda — DFX) tomonidan amalga oshiriladi.

Harakatlanish hujjatlarini xorijdagi maʼlumotlarni yigʻish punktlariga va konsullik muassasalaridan Oʻzbekiston Respublikasiga yetkazib berish belgilangan tartibda diplomatik pochta vositasi orqali amalga oshiriladi.

5. Oʻzbekiston Respublikasi hududida harakatlanish hujjati talabnoma DPMga joʻnatilganidan keyin maʼlumotlarni yigʻish punktida oʻn ish kuni mobaynida, xorijda — oʻn besh ish kuni mobaynida beriladi.

5. Oʻzbekiston Respublikasi hududida harakatlanish hujjati talabnoma Personallashtirish agentligiga joʻnatilganidan keyin maʼlumotlarni yigʻish punktida oʻn ish kuni mobaynida, xorijda — oʻn besh ish kuni mobaynida beriladi.

6. Harakatlanish hujjati belgilangan namuna boʻyicha tayyorlanadi va oʻzbek hamda ingliz tillarida, Qoraqalpogʻiston Respublikasi uchun esa qoraqalpoq, oʻzbek va ingliz tillarida personallashtiriladi.

7. Harakatlanish hujjati blankasiga quyidagi asosiy maʼlumotlar kiritiladi:

harakatlanish hujjatini bergan davlatning nomi;

hujjatning nomi;

hujjatning turi;

harakatlanish hujjatini bergan davlatning kodi;

harakatlanish hujjatining raqami;

familiyasi, ismi, otasining ismi;

millati;

fuqaroligi;

tugʻilgan sanasi;

tugʻilgan joyi;

jinsi;

berilgan sanasi;

kim tomonidan berilgani;

personallashtiruvchi idora;

amal qilish muddati tugaydigan sana;

egasining raqamli surati;

egasi haqidagi mashina oʻqiydigan maʼlumotlar.

8. Chipga quyidagi maʼlumotlar kiritiladi:

harakatlanish hujjatining egasi toʻgʻrisidagi biografik maʼlumotlar;

egasining raqamli surati;

qoʻl barmoq izlari.

pasport egasining qoʻl barmoqlari izlari — 16 yoshga yetganidan keyin.

9. Harakatlanish hujjatiga:

xorijga chiqish uchun ruxsatnoma yozuvi toʻgʻrisidagi (stiker);

hamrohlik qilayotgan shaxslar toʻgʻrisidagi (16 yoshgacha boʻlgan bolalar uchun);

Oʻzbekiston Respublikasining Davlat chegarasidan oʻtish toʻgʻrisidagi;

konsullik roʻyxatiga olingani yoki konsullik roʻyxatidan chiqarilgani toʻgʻrisidagi;

xorijiy davlatlarga kirish uchun ruxsatnoma (viza) toʻgʻrisidagi;

vaqtincha qayd toʻgʻrisidagi;

ilgari qoʻyilgan qaydlarni bekor qilish toʻgʻrisidagi maʼlumotlar kiritiladi.

Fuqaroligi boʻlmagan shaxslarning roziligiga koʻra ularning harakatlanish hujjatlariga hujjat egasining qon guruhi va qaysi rezusga mansubligi toʻgʻrisidagi qaydlar kiritiladi.

10. Harakatlanish hujjatiga:

ichki ishlar idoralari boʻlinmalari tomonidan — xorijga chiqish uchun ruxsatnoma yozuvlari, hamrohlik qiluvchi shaxslar (16 yoshgacha boʻlgan bolalar uchun) haqidagi, vaqtincha roʻyxatdan oʻtganlik haqidagi, ilgari qoʻyilgan qaydlarni bekor qilish haqidagi;

ichki ishlar organlari boʻlinmalari tomonidan — hamrohlik qiluvchi shaxslar (16 yoshgacha boʻlgan bolalar uchun) haqidagi, vaqtincha turgan joyi boʻyicha roʻyxatga olinganligi haqidagi, ilgari qoʻyilgan qaydlarni bekor qilish haqidagi;

chegara nazorati boʻlinmalari tomonidan — Oʻzbekiston Respublikasining Davlat chegarasidan oʻtganlik holati haqidagi va ilgari qoʻyilgan qaydlarni bekor qilish haqidagi;

sogʻliqni saqlash muassasalari tomonidan — qon guruhi va qaysi rezusga mansubligi haqidagi;

Oʻzbekiston Respublikasining konsullik muassasalari tomonidan — konsullik roʻyxatiga olish yoki konsullik roʻyxatidan chiqarish haqidagi, xorijga chiqish uchun ruxsatnoma yozuvchi haqidagi, hamrohlik qiluvchi shaxslar haqidagi (16 yoshga toʻlmagan bolalar uchun), ilgari qoʻyilgan qaydlarni bekor qilish haqidagi;

Oʻzbekiston Respublikasining konsullik muassasalari tomonidan — konsullik roʻyxatiga olish yoki konsullik roʻyxatidan chiqarish haqidagi, hamrohlik qiluvchi shaxslar haqidagi (16 yoshga toʻlmagan bolalar uchun), ilgari qoʻyilgan qaydlarni bekor qilish haqidagi;

xorijiy davlatlarning diplomatik vakolatxonalari va konsullik muassasalari tomonidan — xorijiy davlatlarga kirish ruxsatnomalari (vizalar) haqidagi qaydlar kiritiladi.

Harakatlanish hujjatiga ushbu Nizomda nazarda tutilmagan yozuv va qaydlarni kiritish taqiqlanadi.

II. Harakatlanish hujjatini rasmiylashtirish, berish va undan foydalanish tartibi

11. Harakatlanish hujjati quyidagi hollarda rasmiylashtiriladi va beriladi:

fuqaroligi boʻlmagan shaxs xorijga chiqayotganda;

fuqaroligi boʻlmagan shaxslar uchun Oʻzbekiston Respublikasi harakatlanish hujjatlari bilan hujjatlashtirilgan shaxslarning farzandi Oʻzbekiston Respublikasidan tashqarida tugʻilganida;

amal qilish muddati tugaganida;

shaxsning familiyasi, ismi, otasining ismi, millati, tugʻilgan sanasi oʻzgarganida;

yozuvlarda noaniqliklar va xatolar mavjudligi aniqlanganda;

alohida maʼlumotlar yoki vizalar uchun moʻljallangan betlari ishlatilib boʻlinganida;

sud ajrimi bilan harakatlanish hujjatining amal qilishi toʻxtatilganida;

harakatlanish hujjati blankasi yaroqsiz holga kelganida;

harakatlanish hujjati yoʻqotib qoʻyilganida.

Harakatlanish hujjati egasining familiyasi, ismi, otasining ismi, millati, tugʻilgan sanasi oʻzgarganligi yoki yozuvlarda noaniqliklar mavjudligi aniqlanganligi munosabati bilan almashtirilayotganda, fuqaroligi boʻlmagan shaxs maʼlumotlarni yigʻish punktiga ushbu holatlarni tasdiqlovchi hujjatlarni taqdim etadi.

Agar fuqaroligi boʻlmagan shaxs Oʻzbekiston Respublikasidan tashqariga chiqayotganida harakatlanish hujjatining amal qilish muddati bir yildan kamroq vaqtni tashkil etsa, ushbu hujjat almashtirilishi mumkin.

12. Oʻzbekiston Respublikasi hududida doimiy yashovchi fuqaroligi boʻlmagan shaxs harakatlanish hujjatini olish va almashtirish uchun oʻzi doimiy roʻyxatda turadigan joydagi maʼlumotlarni yigʻish punktiga quyidagilarni taqdim etadi:

belgilangan shakldagi ariza;

ilgari berilgan harakatlanish hujjati;

fuqaroligi boʻlmagan shaxsning Oʻzbekiston Respublikasida istiqomat uchun berilgan guvohnomasi;

tugʻilganlik haqida guvohnoma (16 yoshga toʻlmagan shaxslar uchun);

35 x 45 mm oʻlchamdagi 3 ta fotosurat;

davlat boji toʻlanganligi haqida kvitansiya.

13. Oʻzbekiston Respublikasining xorijdagi konsullik muassasalarida doimiy va vaqtincha konsullik roʻyxatiga olingan fuqaroligi boʻlmagan shaxslar ushbu Nizomning 11-bandida koʻrsatilgan hollarda harakatlanish hujjatini olish uchun maʼlumotlarni yigʻish punktiga quyidagi hujjatlarni taqdim etadilar:

belgilangan shakldagi ariza;

ilgari berilgan harakatlanish hujjati;

tugʻilganlik haqida guvohnoma (birinchi marta harakatlanish hujjatini olish paytida);

35 x 45 mm oʻlchamdagi 3 ta fotosurat;

harakatlanish hujjati yoʻqotib qoʻyilganligi toʻgʻrisida maʼlumotnoma (u yoʻqotib qoʻyilgan holda);

konsullik yigʻimi va boshqa yigʻimlar toʻlanganligi toʻgʻrisida kvitansiya.

14. Maʼlumotlarni yigʻish punkti taqdim etilgan hujjatlar asosida arizachining biografik maʼlumotlarini, elektron koʻrinishdagi qoʻl barmoq izlarini yigʻadi, shaxsni old tomonidan raqamli formatda suratga oladi va harakatlanish hujjatini rasmiylashtirish uchun talabnoma tuzib, soʻng DPMga joʻnatadi.

12. Oʻzbekiston Respublikasi hududida doimiy yashovchi fuqaroligi boʻlmagan shaxs harakatlanish hujjatini olish va almashtirish uchun oʻzi doimiy yashash joyi boʻyicha roʻyxatga olingan joydagi maʼlumotlarni yigʻish punktiga quyidagilarni taqdim etadi:

belgilangan shakldagi ariza;

ilgari berilgan harakatlanish hujjati;

fuqaroligi boʻlmagan shaxsning Oʻzbekiston Respublikasida istiqomat qilishi uchun berilgan guvohnomasi yoki ID-kartasi;

tugʻilganlik haqida guvohnoma (16 yoshga toʻlmagan shaxslar uchun);

ota-onalar, vasiylar (homiylar)ning fuqaroligi boʻlmagan shaxsga (voyaga yetmaganlar uchun) xorijga chiqishi uchun notarial tasdiqlangan roziligi;

fuqaroligi boʻlmagan shaxsga (voyaga yetmaganlar uchun) hamrohlik qiluvchi shaxsning notarial tasdiqlangan majburiyati;

35 x 45 mm oʻlchamdagi 2 ta fotosurat;

davlat boji toʻlanganligi haqida kvitansiya.

15 yoshdan 18 yoshgacha boʻlgan fuqaroligi boʻlmagan shaxslar ota-onalar, vasiylar (homiylar)ning voyaga yetmagan shaxsning mustaqil ravishda xorijga chiqishiga notarial tasdiqlangan roziligi boʻlgan taqdirda xorijga kuzatuvchisiz chiqishi mumkin.

belgilangan shakldagi ariza;

ilgari berilgan harakatlanish hujjati;

tugʻilganlik haqida guvohnoma (birinchi marta harakatlanish hujjatini olishda);

35 x 45 mm oʻlchamdagi 2 ta fotosurat;

harakatlanish hujjati yoʻqotib qoʻyilganligi toʻgʻrisida maʼlumotnoma (u yoʻqotib qoʻyilganda);

fuqaroligi boʻlmagan shaxsga (voyaga yetmaganlar uchun) hamrohlik qiluvchi shaxsning notarial tasdiqlangan majburiyati;

konsullik yigʻimi va haqiqatda qilingan xarajatlarni qoplash hisobiga yigʻimlar toʻlanganligi toʻgʻrisida kvitansiya.

13^1. Voyaga yetmagan fuqaroligi boʻlmagan shaxsga harakatlanish hujjatini rasmiylashtirishda quyidagi hollarda ota-onalardan birining roziligi talab qilinmaydi:

ota-onaning biri vafot etganida (vafot etganlik toʻgʻrisidagi guvohnomaning nusxasi taqdim etilgan taqdirda);

fuqarolik holati dalolatnomalarini yozish organi tomonidan berilgan yolgʻiz ona toʻgʻrisidagi maʼlumotnoma mavjud boʻlganda;

agar bolaning ota-onasidan biri chet el fuqarosi boʻlsa;

ota-onalardan biri sud tomonidan ota-onalik huquqidan mahrum qilinganida (sud qarorining nusxasi taqdim etilgan taqdirda);

ota-onalardan biri sud tomonidan bedarak yoʻqolgan deb topilganda (sud qarorining nusxasi taqdim etilgan taqdirda);

ota-onalardan biri sud tomonidan muomalaga layoqatsiz deb topilganda (sud qarorining nusxasi taqdim etilgan taqdirda);

agar ota-onalardan biri Oʻzbekiston Respublikasi hududidan oʻchirilganda va xorijda doimiy yashayotganda.

Ushbu masala yuzasidan ota-onalar yoki ularning oʻrnini bosuvchi shaxslar oʻrtasida chiqqan har qanday nizolar sud tartibida hal qilinadi.

Ota-onalardan biri oʻz bolasining xorijga chiqishiga rozi boʻlmagan taqdirda, uning xorijga chiqish huquqini cheklash uchun sudga murojaat qilish huquqiga ega.

16 yoshga toʻlmagan shaxslar nomidan ularning ota-onalari, vasiylari (homiylari), ushbu shaxslarni xorijga yuborayotgan tashkilotlarning vakillari tegishli arizalar bilan murojaat qiladilar.

14. Maʼlumotlarni yigʻish punkti taqdim etilgan hujjatlar asosida arizachining biografik maʼlumotlarini, elektron koʻrinishdagi (16 yoshdan katta shaxslar uchun) qoʻl barmoq izlarini yigʻadi, shaxsni old tomonidan raqamli formatda suratga oladi va harakatlanish hujjatini rasmiylashtirish uchun talabnoma tuzib, soʻng Personallashtirish agentligiga joʻnatadi.

15. Agar fuqaroligi boʻlmagan shaxs qoʻl barmoq izlari olinishidan bosh tortsa va koʻzoynakda yoki bosh kiyimda suratga tushish istagidan qaytmasa, maʼlumotlarni yigʻish punkti unga harakatlanish hujjati rasmiylashtirishni rad etish huquqiga ega.

16. Maʼlumotlarni yigʻish punkti fuqaroligi boʻlmagan shaxsga yangi harakatlanish hujjati berish chogʻida ilgari berilgan hujjatni olib qoʻyadi va uni yoʻq qilish uchun DPMga joʻnatadi.

17. DPM fuqaroligi boʻlmagan shaxsning tayyor harakatlanish hujjatini DFX orqali hujjat rasmiylashtirish uchun talabnoma joʻnatgan maʼlumotlarni yigʻish punktiga yoki diplomatik kanallar orqali maʼlumotlarni yigʻish punktlariga yetkazib berish uchun Oʻzbekiston Respublikasi Tashqi ishlar vazirligiga topshiradi. Maʼlumotlarni yigʻish punktlari esa harakatlanish hujjatlarini egalariga berishni taʼminlashlari kerak.

16. Maʼlumotlarni yigʻish punkti fuqaroligi boʻlmagan shaxsga yangi harakatlanish hujjati berish chogʻida ilgari berilgan hujjatni olib qoʻyadi va uni yoʻq qilish uchun Personallashtirish agentligiga joʻnatadi.

17. Personallashtirish agentligi fuqaroligi boʻlmagan shaxsning tayyor harakatlanish hujjatini DFX orqali hujjat rasmiylashtirish uchun talabnoma joʻnatgan maʼlumotlarni yigʻish punktiga yoki diplomatik kanallar orqali maʼlumotlarni yigʻish punktlariga yetkazib berish uchun Oʻzbekiston Respublikasi Tashqi ishlar vazirligiga topshiradi. Maʼlumotlarni yigʻish punktlari esa harakatlanish hujjatlarini egalariga berishni taʼminlashlari kerak.

17^1. 16 yoshga toʻlmagan fuqaroligi boʻlmagan shaxslarning harakatlanish hujjati ularning ota-onalariga, vasiylari (homiylari)ga, harakatlanish hujjati berish haqida ariza bilan murojaat qilgan tashkilotlarning vakillariga beriladi.

18. Oʻzbekiston Respublikasining xorijdagi konsullik muassasalarida doimiy konsullik roʻyxatiga olingan va vaqtincha Oʻzbekiston Respublikasida boʻladigan fuqaroligi boʻlmagan shaxslar ushbu Nizomning 11-bandida koʻrsatilgan hollarda harakatlanish hujjatini olish va almashtirish uchun ushbu Nizomning 13-bandida koʻrsatilgan hujjatlar bilan Oʻzbekiston Respublikasi Tashqi ishlar vazirligiga murojaat etadilar.

19. Xorijga doimiy yashash uchun belgilangan tartibda chiqqan, ammo Oʻzbekiston Respublikasining konsullik muassasasida konsullik roʻyxatiga olinmagan va Oʻzbekiston Respublikasida boʻlgan paytlarida harakatlanish hujjatlarini yoʻqotib qoʻygan fuqaroligi boʻlmagan shaxslar soʻnggi doimiy roʻyxatda turgan joylaridagi maʼlumotlarni yigʻish punktlariga murojaat etadilar.

19. Xorijga doimiy yashash uchun belgilangan tartibda chiqqan, ammo Oʻzbekiston Respublikasining konsullik muassasasida konsullik roʻyxatiga olinmagan va Oʻzbekiston Respublikasida boʻlgan paytlarida harakatlanish hujjatlarini yoʻqotib qoʻygan fuqaroligi boʻlmagan shaxslar soʻnggi doimiy yashash joyi boʻyicha roʻyxatga olingan joylaridagi maʼlumotlarni yigʻish punktlariga murojaat etadilar.

20. Agar fuqaroligi boʻlmagan shaxs kelgan mamlakatda Oʻzbekiston Respublikasining konsullik muassasasi boʻlmasa, u Oʻzbekiston Respublikasining mazkur mamlakat konsullik okrugiga kiradigan xorijdagi konsullik muassasasiga murojaat etadi.

21. Fuqaroligi boʻlmagan shaxs harakatlanish hujjatini ehtiyot qilib saqlashi shart.

Fuqaroligi boʻlmagan shaxs harakatlanish hujjatini Oʻzbekiston Respublikasi hududida yoʻqotib qoʻygan taqdirda bu haqda oʻz vaqtida uni bergan maʼlumotlarni yigʻish punktiga xabar berishi lozim. Mazkur maʼlumotlarni yigʻish punkti qonunda nazarda tutilgan choralarni koʻrganidan keyin unga ushbu Nizomda koʻzda tutilgan tartibda yangi harakatlanish hujjatini beradi.

22. Fuqaroligi boʻlmagan shaxslar boshqa davlat fuqaroligini olgan taqdirda harakatlanish hujjatini keyin DPMga yoʻq qilish maqsadida topshirish uchun oʻzlari kelgan joydagi maʼlumotlarni yigʻish punktiga topshirishlari shart.

22. Fuqaroligi boʻlmagan shaxslar boshqa davlat fuqaroligini olgan taqdirda harakatlanish hujjatini keyin Personallashtirish agentligiga yoʻq qilish maqsadida topshirish uchun oʻzlari kelgan joydagi maʼlumotlarni yigʻish punktiga topshirishlari shart.

23. Topib olingan harakatlanish hujjati ichki ishlar idorasiga yoki Oʻzbekiston Respublikasining xorijdagi konsullik muassasasiga topshirilishi lozim.

23. Topib olingan harakatlanish hujjati ichki ishlar organlariga yoki Oʻzbekiston Respublikasining xorijdagi konsullik muassasasiga topshirilishi lozim.

24. Vafot etgan shaxsning harakatlanish hujjati fuqarolik holatlari dalolatnomalarini yozish idorasiga topshiriladi. Ushbu idora esa hujjatni yoʻq qilish maqsadida DPMga topshirish uchun maʼlumotlarni yigʻish punktiga joʻnatadi.

24. Vafot etgan shaxsning harakatlanish hujjati fuqarolik holatlari dalolatnomalarini yozish idorasiga topshiriladi. Ushbu idora esa hujjatni yoʻq qilish maqsadida Personallashtirish agentligiga topshirish uchun maʼlumotlarni yigʻish punktiga joʻnatadi.

Xorijda vafot etgan fuqaroligi boʻlmagan shaxsning harakatlanish hujjati Oʻzbekiston Respublikasining konsullik muassasasi tomonidan Oʻzbekiston Respublikasi Tashqi ishlar vazirligiga joʻnatiladi. Ushbu vazirlik esa hujjatni yoʻq qilish uchun DPMga yuboradi.

25. Hibsga olingan yoki ozodlikdan mahrum etishga hukm qilingan fuqaroligi boʻlmagan shaxsning harakatlanish hujjati surishtiruv, tergov idoralari yoki sud tomonidan olib qoʻyiladi. Agar shaxs sudning hukmi bilan qamoqda qoldirilsa, uning harakatlanish hujjati Oʻzbekiston Respublikasi Ichki ishlar vazirligi Jazoni ijro etish bosh boshqarmasiga joʻnatiladi.

Shaxs qamoqdan ozod etilganida yoki jazo muddatini oʻtab boʻlgach, unga harakatlanish hujjati tergov, sud idoralari yoki jazoni ijro etish muassasasi maʼmuriyati tomonidan qaytariladi.

Hibsga olingan yoki ozodlikdan mahrum etishga hukm qilingan shaxslarning tergov, sud idoralarida yoki jazoni ijro etish muassasasi maʼmuriyatida saqlanayotgan muddati oʻtgan harakatlanish hujjatlari ushbu Nizomda belgilangan tartibda yoʻq qilish uchun maʼlumotlarni yigʻish punktiga joʻnatiladi.

26. Tekshirish, verifikatsiya (solishtirib oʻqish) jarayonida noaniqliklar yoki chegara (migratsiya) belgilari, xorijiy vizalar, ruxsatnoma yozuvlari qalbakilashtirilgani alomatlari aniqlangan, belgilangan tartibda haqiqiy emas deb topilgan harakatlanish hujjatlari tegishli vazirliklar va idoralarga joʻnatish uchun chegara nazorati boʻlinmalari tomonidan olib qoʻyilishi mumkin.

27. Ushbu Nizomning 16, 25 va 26-bandlarida koʻzda tutilgan xollardan tashqari fuqaroligi boʻlmagan shaxslardan harakatlanish hujjatlarini olib qoʻyish taqiqlanadi.

Majburiyatni bajarish maqsadida harakatlanish hujjatini garov sifatida qabul qilish va topshirish taqiqlanadi.

28. Harakatlanish hujjati:

amal qilish muddati tugaganida;

harakatlanish hujjati blankasi yaroqsiz holga kelganida;

sud ajrimi bilan amal qilishi toʻxtatib turilganida;

egasi biror-bir davlat fuqaroligini qabul qilganida;

uni rasmiylashtirish chogʻida ataylab yolgʻon maʼlumotlar taqdim qilinganida oʻz kuchini yoʻqotadi.

29. Ushbu Nizom talablarini amalga oshirish uchun zarur boʻlgan shtamplar va blankalar namunalari tegishli ravishda Oʻzbekiston Respublikasi Ichki ishlar, Tashqi ishlar, Sogʻliqni saqlash vazirliklari va Milliy xavfsizlik xizmati tomonidan tasdiqlanadi.

30. Harakatlanish hujjatini berish uchun Oʻzbekiston Respublikasi Vazirlar Mahkamasi tomonidan belgilangan miqdorda davlat boji undiriladi.

30. Harakatlanish hujjatini berish uchun Oʻzbekiston Respublikasining qonunchilik hujjatlarida belgilangan miqdorda davlat boji yoki konsullik yigʻimlari undiriladi.

Jazoni ijro etish muassasasida jazoni oʻtab chiqqan, tabiiy va texnogen xususiyatli favqulodda vaziyatlar, shu jumladan maishiy tusdagi ofatlar (turar joylarning yoki yashash uchun moʻljallanmagan joylarning yongʻini, qulashi, transport vositalarining yonishi) yuz berganligi oqibatida harakatlanish hujjati yoʻqolganligi yoki yaroqsiz holga kelganligi toʻgʻrisida ariza bilan murojaat etgan shaxs javobgarlikka tortilmaydi.

Bunda, jazoni ijro etish muassasasida jazoni oʻtab chiqqan shaxs bu holatni tasdiqlovchi tegishli hujjatni arizaga ilova qiladi, tabiiy va texnogen xususiyatli favqulodda vaziyatlar, shu jumladan maishiy tusdagi ofatlar (turar joylarning yoki yashash uchun moʻljallanmagan joylarning yongʻini, qulashi, transport vositalarining yonishi) yuz berganligi holatini tasdiqlash zarurati boʻlganda, ichki ishlar organlarining migratsiya va fuqarolikni rasmiylashtirish boʻlimlari tomonidan soʻrov asosida qonunchilik hujjatlarida belgilangan vakolatli idoralardan maʼlumotnoma olinadi.

II^1. Sud ajrimi bilan amal qilishi toʻxtatib turilgan harakatlanish hujjati oʻrniga yangi harakatlanish hujjati berish tartibi

30^1. Qidiruvda boʻlgan ayblanuvchi yoki sudlanuvchi respublika hududida ushlangan taqdirda sud ajrimi bilan amal qilishi toʻxtatib turilgan harakatlanish hujjati ichki ishlar organlari yoki chegara nazorati boʻlinmalari tomonidan maʼlumotlarni yigʻish punktiga yoʻq qilish uchun joʻnatish maqsadida olib qoʻyiladi va unga harakatlanish hujjati olib qoʻyilganligi haqida dalolatnoma beriladi.

30^2. Vaqtincha xorijda boʻlgan sud ajrimi bilan harakatlanish hujjatining amal qilishi toʻxtatib turilgan ayblanuvchi yoki sudlanuvchi Oʻzbekiston Respublikasiga qaytish guvohnomasini olish uchun Oʻzbekiston Respublikasining konsullik muassasasiga murojaat etganda uning harakatlanish hujjati olib qoʻyiladi va unga bu haqida dalolatnoma beriladi. Olib qoʻyilgan harakatlanish hujjati yoʻq qilish uchun Oʻzbekiston Respublikasi Tashqi ishlar vazirligi orqali maʼlumotlarni yigʻish punktiga yuboriladi.

30^3. Sud ajrimi bilan harakatlanish hujjatining amal qilishi toʻxtatib turilgan ayblanuvchiga yoki sudlanuvchiga yangi harakatlanish hujjati maʼlumotlarni yigʻish punkti tomonidan ushbu bandda koʻrsatib oʻtilgan hujjatlar taqdim etilgan kundan boshlab oʻn kun ichida beriladi.

Yangi harakatlanish hujjatini olish uchun quyidagi hujjatlar taqdim etilishi lozim:

belgilangan shakldagi ariza;

protsessual majburlov chorasi bekor qilinganligi haqida tasdiqlangan qaror nusxasi;

davlat boji toʻlanganligi haqida kvitansiya.

Sud ajrimi bilan harakatlanish hujjatining amal qilishi toʻxtatib turilgan ayblanuvchi yoki sudlanuvchi pasport tizimi qoidalarini buzganlik uchun maʼmuriy javobgarlikka tortilmaydi.

30^4. Tergov hibsxonalari yoki vaqtincha saqlash hibsxonalarida saqlanayotgan shaxsga yangi harakatlanish hujjatini rasmiylashtirish ushbu shaxslar saqlanayotgan joyga borgan holda amalga oshiriladi.

III. Konsullik roʻyxati

31. Belgilangan tartibda xorijga doimiy yashash uchun chiqqan, shuningdek vaqtincha xorijda boʻladigan fuqaroligi boʻlmagan shaxslar Oʻzbekiston Respublikasining xorijdagi konsullik muassasalarida doimiy yoki vaqtincha konsullik roʻyxatida turishlari shart.

32. Xorijga doimiy yashash uchun chiqqan va xorijga doimiy yashash uchun chiqishlarini belgilangan tartibda rasmiylashtirgan fuqaroligi boʻlmagan shaxslar doimiy konsullik roʻyxatiga olinadilar.

33. Xorijga xizmat safariga, oʻqish, davolanish va shartnoma boʻyicha ishlash uchun chiqqan va xorijga vaqtincha chiqishlarini belgilangan tartibda rasmiylashtirgan fuqaroligi boʻlmagan shaxslar vaqtincha konsullik roʻyxatiga olinadilar.

33. Xorijga xizmat safari, oʻqish, davolanish, ishlash va oʻz oilasi bilan birlashish maqsadida chiqib ketgan va xorijga vaqtincha chiqishlarini oʻrnatilgan tartibda rasmiylashtirgan fuqaroligi boʻlmagan shaxslar vaqtincha konsullik roʻyxatiga olinadilar.

Fuqaroligi boʻlmagan shaxs oʻzi borayotgan mamlakatga qonuniy tarzda va olti oydan ortiq vaqtga kelgan taqdirda, u vaqtincha konsullik roʻyxatiga olinadi.

34. Agar fuqaroligi boʻlmagan shaxslar doimiy yashash, shuningdek ish, oʻqish yoki xizmat safari joyi oʻzgarishi munosabati bilan olti oydan ortiq muddatga Oʻzbekiston Respublikasining boshqa konsullik muassasasining konsullik okrugi hududiga koʻchib oʻtishsa, ilgari turgan joylaridagi konsullik roʻyxatidan (doimiy, vaqtincha) chiqishlari va yangi kelgan joylarida konsullik roʻyxatiga turishlari lozim.

35. Konsullik roʻyxatiga olish uchun Oʻzbekiston Respublikasi Vazirlar Mahkamasi tomonidan belgilangan miqdorda yigʻim undiriladi.

35. Doimiy konsullik roʻyxatiga olish uchun Oʻzbekiston Respublikasining qonun hujjatlarida belgilangan miqdorda konsullik yigʻimlari undiriladi.

36. Fuqaroligi boʻlmagan shaxslarning konsullik roʻyxatiga olish va konsullik roʻyxatidan chiqarish toʻgʻrisidagi arizalarining, ularni konsullik roʻyxatiga olish va konsullik roʻyxatidan chiqarishga taalluqli qayd qilish kitoblari va boshqa hujjatlarning shakllari Oʻzbekiston Respublikasi Tashqi ishlar vazirligi tomonidan belgilanadi.

IV. Fuqaroligi boʻlmagan shaxsning harakatlanish hujjatidan foydalanish qoidalarini buzganlik uchun javobgarlik

37. Qonun hujjatlarida quyidagilar uchun javobgarlik belgilanadi:

fuqaroligi boʻlmagan shaxsning haqiqiy boʻlmagan harakatlanish hujjatidan foydalanganligi, harakatlanish hujjatini ataylab yaroqsiz holga keltirganligi, shuningdek uni ehtiyot qilib saqlamaganligi oqibatida yoʻqotib qoʻyganligi;

fuqaroligi boʻlmagan shaxslar oʻzlarining harakatlanish hujjatlaridan gʻarazli maqsadlari yoʻlida foydalanganligi, soʻng ularni yoʻqotib qoʻyganligi toʻgʻrisida ariza berganligi, shuningdek boshqa shaxslarga tegishli harakatlanish hujjatlaridan foydalanganligi;

gʻarazli yoki boshqa maqsadlarda harakatlanish hujjatiga egalik qilganligi, uni yoʻq qilganligi, yaroqsiz holga keltirganligi, yashirganligi.

Ko‘rinish

Ko‘rinish