1. O‘zbekiston Respublikasi Oliy Majlisining Cenati tomonidan rad etilgan qonun yuzasidan yuzaga kelgan kelishmovchiliklarni bartaraf etish uchun O‘zbekiston Respublikasi Oliy Majlisi palatalarining kelishuv komissiyasini (bundan buyon matnda kelishuv komissiyasi deb yuritiladi) tuzish va uning faoliyatini tashkil etish tartibi O‘zbekiston Respublikasining Konstitutsiyasi (84-modda), “O‘zbekiston Respublikasi Oliy Majlisining Qonunchilik palatasi to‘g‘risida”gi (30-31-moddalar), “O‘zbekiston Respublikasi Oliy Majlisining Senati to‘g‘risida”gi (25-modda) O‘zbekiston Respublikasi Konstitutsiyaviy qonunlari, “O‘zbekiston Respublikasi Oliy Majlisi Qonunchilik palatasining Reglamenti to‘g‘risida”gi (16-modda), “O‘zbekiston Respublikasi Oliy Majlisi Senatining Reglamenti to‘g‘risida”gi (11-12-moddalar) O‘zbekiston Respublikasi qonunlari hamda O‘zbekiston Respublikasi Oliy Majlisi Qonunchilik palatasining Reglamenti (137—144-moddalar) va O‘zbekiston Respublikasi Oliy Majlisi Senatining Reglamentiga (28-modda) muvofiq ishlab chiqildi.
2. O‘zbekiston Respublikasi Oliy Majlisining Qonunchilik palatasi (bundan buyon matnda Qonunchilik palatasi deb yuritiladi) tomonidan qabul qilingan qonunni ko‘rib chiqish natijalari asosida O‘zbekiston Respublikasi Oliy Majlisining Senati (bundan buyon matnda Senat deb yuritiladi) quyidagi qarorlardan birini qabul qilishi mumkin:
qonunni rad etish hamda kelishuv komissiyasini tuzish haqida Qonunchilik palatasiga taklif kiritish to‘g‘risidagi qaror.
3. Senatning qonunni rad etish to‘g‘risidagi qarorida rad etish vajlari ko‘rsatilishi kerak. Unda bir vaqtning o‘zida qonunga o‘zgartishlar va qo‘shimchalar kiritish zarurligi to‘g‘risidagi, shuningdek Senatdan kelishuv komissiyasiga a’zo etib saylangan senatorlarning familiyalarini aniq ko‘rsatgan holda kelishuv komissiyasini tuzish haqidagi takliflar bayon etilishi mumkin. Senatning qonunni rad etish to‘g‘risidagi qarori mazkur qaror qabul qilingan kundan e’tiboran o‘n kun ichida Qonunchilik palatasiga yuboriladi.
4. Senat tomonidan rad etilgan qonun yuzasidan Senat va Qonunchilik palatasi yuzaga kelgan kelishmovchiliklarni bartaraf etish uchun Senat a’zolari va Qonunchilik palatasi deputatlari orasidan tenglik asosida kelishuv komissiyasini tuzishi mumkin.
5. Kelishuv komissiyasi tarkibiga nomzodlar yuzasidan Senat Raisi va Qonunchilik palatasining Spikeri tomonidan o‘zaro maslahatlashuvlar o‘tkaziladi.
6. Kelishuv komissiyasining majlislari komissiya a’zolarining xohishiga ko‘ra Qonunchilik palatasida yoki Senatda o‘tkaziladi.
7. Kelishuv komissiyasining ishini tashkiliy, axborot, hujjatlashtirish jihatidan va boshqacha tarzda ta’minlash komissiya qayerda ishlashiga qarab, tegishincha Qonunchilik palatasi Devoni yoki Senat Devoni tomonidan amalga oshiriladi.
8. Senatda kelishuv komissiyasi tuzish to‘g‘risidagi tashabbus Senat Raisidan, shuningdek Senat a’zolari umumiy sonining kamida beshdan bir qismini tashkil etuvchi senatorlardan chiqishi mumkin.
9. Kelishuv komissiyasi tarkibiga, qoida tariqasida, qonunni dastlabki tarzda ko‘rib chiqish uchun mas’ul qo‘mita a’zolari saylanadi. Boshqa qo‘mitalarning mazkur qonun bo‘yicha maxsus bilimi bo‘lgan senatorlari ham komissiya tarkibiga kiritilishi mumkin.
10. Kelishuv komissiyasi tarkibi Senatning kamida uchta a’zosini o‘z ichiga olishi va Qonunchilik palatasi bilan birgalikda tenglik asosida belgilanadigan miqdorda bo‘lishi kerak.
11. Kelishuv komissiyasining Senatdan ko‘rsatilgan tarkibi uning yalpi majlisida, Senat majlislari oralig‘idagi davrda esa uning Kengashi tomonidan tasdiqlanadi. Kelishuv komissiyasi tuzish va uning tarkibiga senatorlarni saylash to‘g‘risidagi to‘xtam Senatning qarori bilan rasmiylashtiriladi, qaror loyihasini mas’ul qo‘mita Kengashga kiritadi, keyinchalik masala Senatning yalpi majlisiga kiritiladi. Komissiya tarkibi Kengash tomonidan tasdiqlangan taqdirda (Senat majlislari oralig‘idagi davrda), uning to‘xtami Kengash qarori bilan rasmiylashtiriladi.
12. Kelishuv komissiyasining Senatdan ko‘rsatilgan a’zolari o‘z tarkibidan ko‘pchilik ovoz bilan komissiya hamraisini saylaydilar. Komissiyaning Senat tarafidan hamraisi saylanganligi kelishuv komissiyasining Senatdan ko‘rsatilgan a’zolari qarori bilan rasmiylashtiriladi.
13. Kelishuv komissiyasi a’zosi bo‘lgan senatorning vakolatlari tugagan (muddatidan oldin tugatilgan) taqdirda u Senat tomonidan maxsus qaror qabul qilinmasdanoq komissiya tarkibidan chiqariladi. Kelishuv komissiyasi tarkibidan chiqib ketgan a’zosi o‘rniga Senat yoki uning Kengashi tomonidan kelishuv komissiyasining yangi a’zosi saylanadi.
14. Kelishuv komissiyasining yangi a’zosini saylash to‘g‘risida Senat yoki uning Kengashi qabul qilgan qaror Qonunchilik palatasiga yuboriladi.
15. Senat tomonidan rad etilib, Qonunchilik palatasiga kelib tushgan qonun Qonunchilik palatasining Spikeri tomonidan mas’ul qo‘mitaga xulosa tayyorlash uchun topshiriladi. Senat tomonidan taqdim etilgan hujjatlarni ko‘rib chiqib, Qonunchilik palatasining mas’ul qo‘mitasi Qonunchilik palatasi muhokamasiga quyidagi tavsiyalardan birini kiritishi mumkin:
16. Qonunchilik palatasida kelishuv komissiyasi tuzish to‘g‘risidagi tashabbus Qonunchilik palatasi Spikeridan, siyosiy partiyalar fraksiyalaridan va deputatlar guruhlaridan chiqishi mumkin.
17. Kelishuv komissiyasi tarkibiga, qoida tariqasida, qonunni dastlabki tarzda ko‘rib chiqish uchun mas’ul qo‘mita a’zolari saylanadi. Boshqa qo‘mitalarning mazkur qonun bo‘yicha maxsus bilimi bo‘lgan deputatlari komissiya tarkibiga kiritilishi mumkin.
18. Kelishuv komissiyasi tarkibi Qonunchilik palatasining kamida uchta deputatini o‘z ichiga olishi va Senat bilan birgalikda tenglik asosida belgilanadigan miqdorda bo‘lishi kerak.
19. Senatning kelishuv komissiyasi tuzish haqidagi taklifi qabul qilingan taqdirda, kelishuv komissiyasining Qonunchilik palatasidan ko‘rsatilgan tarkibi Qonunchilik palatasining majlisida tasdiqlanadi.
20. Kelishuv komissiyasi tuzish to‘g‘risidagi va uning tarkibiga deputatlarni saylash haqidagi to‘xtam Qonunchilik palatasining qarori bilan rasmiylashtiriladi. Qaror loyihasi masala Qonunchilik palatasi navbatdagi majlisining kun tartibi loyihasiga kiritilishi uchun Kengashga mas’ul qo‘mita tomonidan kiritiladi,
21. Kelishuv komissiyasining Qonunchilik palatasidan ko‘rsatilgan a’zolari o‘z tarkibidan ko‘pchilik ovoz bilan komissiya hamraisini saylaydilar. Komissiyaning Qonunchilik palatasi tarafidan hamraisi saylanganligi kelishuv komissiyasining Qonunchilik palatasidan ko‘rsatilgan a’zolari qarori bilan rasmiylashtiriladi.
22. Kelishuv komissiyasi a’zosi bo‘lgan deputatning vakolatlari tugagan (muddatidan oldin tugatilgan) taqdirda u Qonunchilik palatasi tomonidan maxsus qaror qabul qilinmasdanoq komissiya tarkibidan chiqariladi. Kelishuv komissiyasi tarkibidan chiqib ketgan a’zosi o‘rniga Qonunchilik palatasi tomonidan kelishuv komissiyasining yangi a’zosi saylanadi.
23. Kelishuv komissiyasining yangi a’zosini saylash to‘g‘risida Qonunchilik palatasi qabul qilgan qaror Senatga yuboriladi.
24. Kelishuv komissiyasi tarkibiga saylangan deputat yoki senator uning majlislarida hozir bo‘lishi shart. Kelishuv komissiyasi majlisida hozir bo‘lish imkoniyati yo‘qligi to‘g‘risida deputat yoki senator kelishuv komissiyasining tegishli palatadan saylangan hamraisini oldindan xabardor etadi.
25. Kelishuv komissiyasining majlislarida kelishuv komissiyasining tegishli palatadan saylangan hamraislari navbatma-navbat raislik qiladilar.
26. Kelishuv komissiyasi qonunning yagona matnini ishlab chiqish maqsadida Senatning har bir e’tirozini alohida-alohida ko‘rib chiqadi. Kelishuv komissiyasi qonunning Senat tomonidan e’tiroz bildirilmagan ayrim moddalari tahririni o‘zgartirish to‘g‘risida, agar bunday o‘zgartirishni kelishuv komissiyasi tomonidan qo‘llab-quvvatlangan Senat takliflari asosida ishlab chiqilgan qonun moddalarining yangi tahriri taqozo etadigan bo‘lsa, qaror qabul qilishga haqli.
27. Kelishuv komissiyasi qarorlari kelishuv komissiyasi tarkibiga kirgan deputatlar va senatorlarning alohida-alohida ovoz berishi orqali qabul qilinadi. Qaror, agar komissiyaning har bir palatadan saylangan a’zolarining ko‘pchiligi uni yoqlab ovoz bergan bo‘lsa, qabul qilingan hisoblanadi. Agar kelishuv komissiyasi tomonidan boshqacha tartib belgilangan bo‘lmasa, qaror ochiq ovoz berish orqali qabul qilinadi.
28. Kelishuv komissiyasi qonun bo‘yicha kelishmovchiliklarni ko‘rib chiqishda olimlar va mutaxassislardan maslahatlar olishga, zarur materiallar va ma’lumotlarni talab qilishga haqlidir.
29. Kelishuv komissiyasining majlisida bayonnoma yuritiladi. Zarurat bo‘lganda kelishuv komissiyasining qaroriga binoan komissiya majlisi stenogramma qilinadi.
30. Agar kelishuv komissiyasining ish yakunlari bo‘yicha qonun yuzasidan kelishuvga erishilmagan bo‘lsa, Qonunchilik palatasi qonunni Senat tomonidan rad etilgan qonun sifatida qayta ko‘rib chiqishi kerak. Kelishuvga erishish imkoniyati bo‘lmagan taqdirda, bayonnoma tuzilib, komissiya hamraislari imzolagach, Senatga va Qonunchilik palatasiga yuboriladi.
31. Agar kelishuv komissiyasi yagona fikrga kelgan bo‘lsa, o‘z ishining natijalari asosida komissiya kelishmovchiliklarni bartaraf etish bo‘yicha takliflarni o‘z ichiga olgan xulosa qabul qiladi. Xulosaga qonunga doir o‘zgartish va qo‘shimchalar loyihasining matni ilova etiladi.
32. Kelishuv komissiyasi xulosasi komissiyaning Senatdan va Qonunchilik palatasidan saylangan hamraislari tomonidan imzolanadi hamda tegishincha Senatga va Qonunchilik palatasiga yuboriladi.
33. Kelishuv komissiyasining Qonunchilik palatasidan saylangan hamraisi qonunni qayta ko‘rib chiqish sanasi belgilanishi uchun quyidagi hujjatlarni Kengash muhokamasiga kiritadi:
kelishuv komissiyasi taklif etayotgan tahrirdagi, kelishuv komissiyasining Qonunchilik palatasidan saylangan hamraisi tomonidan viza qo‘yilgan qonun.
34. Qonunchilik palatasi kelishuv komissiyasi xulosasi taqdim etilgan kundan e’tiboran o‘n kun ichida komissiya takliflarini ko‘rib chiqishi va qaror qabul qilishi kerak.
35. Qonunchilik palatasi kelishuv komissiyasining takliflari yuzasidan deputatlar umumiy sonining ko‘pchilik ovozi bilan qaror qabul qiladi.
36. Kelishuv komissiyasining xulosasini ko‘rib chiqish natijalari asosida Qonunchilik palatasi quyidagi qarorlardan birini qabul qiladi:
kelishuv komissiyasiga yangi takliflarni taqdim etish uchun ishni Qonunchilik palatasi tomonidan ma’qullangan tuzatishlarni inobatga olgan holda davom ettirishni taklif qilish to‘g‘risidagi qaror;
ko‘rib chiqilayotgan qonun moddalarining yangi tahriri bo‘yicha kelishuv komissiyasining taklifini rad qilish to‘g‘risidagi qaror.
37. Kelishuv komissiyasining takliflari qabul qilingan taqdirda, qonun Qonunchilik palatasi tomonidan qayta ko‘rib chiqilishi kerak. Qonunni qayta ko‘rib chiqishda kelishuv komissiyasi majlisining bayonnomasidagi mavjud takliflargina muhokama qilinadi. Bunday holda qonun odatdagi tartibda qabul qilinadi.
38. Kelishuv komissiyasining loaqal bitta taklifi rad etilgan taqdirda ham Qonunchilik palatasi kelishuv komissiyasiga yangi takliflarni taqdim etish uchun ishni Qonunchilik palatasi tomonidan ma’qullangan tuzatishlarni inobatga olgan holda davom ettirishni taklif qilishi mumkin.
39. Qonunchilik palatasi qonunni kelishuv komissiyasining tahririda qabul qilgan taqdirda, qonun Senatga ma’qullash uchun zarur materiallar ilova qilingan holda besh kun ichida yuboriladi.
40. Agar Senat tomonidan rad etilgan qonunni qayta ko‘rib chiqishda Qonunchilik palatasi uni kelishuv komissiyasining tahririda qabul qilmasa va Senatning qonunni rad etish to‘g‘risidagi qaroriga rozi emasligini bildirsa, qonun ilgari qabul qilingan tahrirda ovozga qo‘yiladi.
41. Agar Qonunchilik palatasi deputatlar umumiy sonining uchdan ikki qismidan iborat ko‘pchilik ovozi bilan qonunni yana ma’qullasa, qonun O‘zbekiston Respublikasi Oliy Majlisi tomonidan qabul qilingan hisoblanadi va imzolanishi hamda e’lon qilinishi uchun O‘zbekiston Respublikasi Prezidentiga Qonunchilik palatasi tomonidan o‘n kun ichida yuboriladi.