Ўзбекистон Республикаси Президентининг «Солиқ ва божхона имтиёзлари берилишини янада тартибга солиш чора-тадбирлари тўғрисида» 2019 йил 27 июндаги ПФ-5755-сон Фармони ижросини таъминлаш мақсадида Вазирлар Маҳкамаси қарор қилади:

1. Вазирлар Маҳкамасининг «2019 йилда ғўзани навлари бўйича жойлаштириш ва пахта хом ашёси етиштиришнинг прогноз ҳажмлари тўғрисида» 2018 йил 22 декабрдаги 1037-сон қарорининг 3-банди биринчи хатбошисидаги «4 000 000 сўм» сўзлари «қўшилган қиймат солиғи билан бирга 4 300 000 сўм» сўзлари билан алмаштирилсин.

2. Ўзбекистон Республикаси Молия вазирлиги Қишлоқ хўжалиги вазирлиги ва «Ўзпахтасаноат» акциядорлик жамияти билан биргаликда икки ҳафта муддатда 2019 йил ҳосили пахта хом ашёсининг харид нархномасига ўзгартириш киритсин ҳамда Қорақалпоғистон Республикаси Вазирлар Кенгашига, вилоятлар ва туманлар ҳокимликларига етказсин.

3. Ўзбекистон Республикаси Молия вазирлиги Қишлоқ хўжалигини давлат томонидан қўллаб-қувватлаш жамғармасининг 2019 йил учун тушумлар ва харажатларининг тасдиқланган балансига ўзгартириш киритиш бўйича икки ой муддатда Вазирлар Маҳкамасига таклиф киритсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров ҳамда Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича маслаҳатчиси А.Д. Вахабов зиммасига юклансин.