Бозор муносабатларини ривожлантиришни, бозорга хизмат кўрсатувчи тармоқларни такомиллаштиришни, кичик ва ўрта тадбиркорликка таъсирчан моддий ва молиявий ёрдам беришни кучайтириш мақсадида, шунингдек республика тадбиркорларининг кўпгина мурожаатларини ҳисобга олиб:

1. Ўзбекистон Республикасида кичик ва ўрта тадбиркорликни ривожлантиришга кўмаклашувчи жамғармани таъсис этиш тўғрисидаги «Ипак йўли» ва «Агрохизмат» акционерлик жамиятлари, Ўзбекистон Республикаси «Тадбиркор» акционерлик-тижорат банки, «Рустамбанк» универсал тижорат банки, «Юнитекс Интернейшнл» ва бошқа қўшма корхоналарнинг таклифлари маъқуллансин.

2. Қуйидагилар таъсис этилган Жамғарманинг асосий вазифалари эканлиги инобатга олинсин:

кичик ва ўрта тадбиркорликни қўллаб-қувватлаш, бозорга хизмат кўрсатувчи тармоқларни шакллантириш йўли билан бозор муносабатларини босқичма-босқич ривожлантириш соҳасида давлат сиёсатини ўтказишга кўмаклашиш;

маҳсулот ва хизматлар бозорини ўрганиш, Жамғарманинг молиявий маблағларини биринчи навбатда тақчил халқ истеъмоли моллари ва жиҳозлари ишлаб чиқарувчи тадбиркорлик тузилмаларига, шунингдек янги иш жойларини вужудга келтиришга, четдан келтириладиган маҳсулот ўрнини қоплаш ва экспортни кенгайтириш тадбирларини амалга оширишга, ишлаб чиқаришни кўпайтириш ва республиканинг бозорларини моллар билан тўлдиришга ажратиш;

кичик ва ўрта тадбиркорлик тузилмаларининг инновация фаолиятини қўллаб-қувватлаш, рақобатбардошли тайёр маҳсулотнинг янги турларини ишлаб чиқаришни йўлга қўйишни рағбатлантириш, муайян лойиҳаларни амалга ошириш учун республикамизнинг ва хорижий сармояларни жалб этиш;

тадбиркорлик тузилмаларининг уларга Жамғармадан ажратилган маблағларни самарали фойдаланиш устидан назорат қилишнинг механизмини ишлаб чиқиш.

3. Кичик ва ўрта тадбиркорликни вужудга келтиришда давлат йўли билан моддий ва молиявий ёрдам бериш учун жамғармани ташкил этишга Вазирлар Маҳкамаси захирасидан 500 миллион сўм ажратилсин.

4. Ўзбекистон Республикасининг Вазирлар Маҳкамаси бир ой муддат ичида таъсисчиларнинг Жамғарма фаолиятини ташкил этиш ва унинг ишини давлат йўли билан қўллаб-қувватлаш ҳақидаги таклифларини кўриб чиқсин.