1-modda. Oʻzbekiston Respublikasining 1994-yil 5-mayda qabul qilingan “Bankrotlik toʻgʻrisida”gi Qonuniga (2003-yil 24-aprelda qabul qilingan 474–II-sonli Oʻzbekiston Respublikasi Qonuni bilan tasdiqlangan tahririda) (Oʻzbekiston Respublikasi Oliy Majlisining Axborotnomasi, 2003-yil, № 5, 63-modda) quyidagi oʻzgartish va qoʻshimchalar kiritilsin:

1) 110-moddaning:

oltinchi qismidagi “va tashqi boshqaruv rejasida” degan soʻzlar chiqarib tashlansin;

oʻn uchinchi qismining ikkinchi jumlasi quyidagi tahrirda bayon etilsin:

“Korxonani (biznesni) sotish narxi kreditorlar yigʻilishi yoki kreditorlar qoʻmitasining qarori bilan pasaytirilishi mumkin, biroq bunda pasaytirish avvalgi kimoshdi savdosidagi narxning 10 foizidan koʻp boʻlmasligi kerak”;

2) 111-moddaning birinchi qismidagi “tashqi boshqaruv rejasida va” degan soʻzlar chiqarib tashlansin;

3) 133-modda quyidagi mazmundagi qism bilan toʻldirilsin:

“Agar qarzdorning butun mol-mulki garov narsasi boʻlsa va garovga qoʻyilgan mol-mulkni (garov narsasini) sotishdan tushgan summa kreditorlarning garov bilan taʼminlangan talablari summasidan kam yoki unga teng boʻlib qolsa, kreditorlarning garov bilan taʼminlangan talablarini qanoatlantirish ushbu Qonun 134-moddasining birinchi qismida nazarda tutilgan xarajatlar qoplanganidan va talablar qondirilganidan keyin hamda ish haqi toʻlash uchun pul mablagʻlari berilishini nazarda tutuvchi toʻlov hujjatlari boʻyicha talablar qondirilganidan keyin amalga oshiriladi”:

4) 135-moddaning birinchi qismidagi “agar kreditorlar yigʻilishi yoki kreditorlar qoʻmitasi tomonidan qarzdorning mol-mulkini sotishning boshqacha tartibi belgilangan boʻlmasa” degan soʻzlar chiqarib tashlansin.

2-modda. Ushbu Qonun rasmiy eʼlon qilingan kundan eʼtiboran kuchga kiradi.