Respublikaning uy-joy-kommunal xoʻjaligi sohasida bozor munosabatlari izchillik bilan tadbiq etilmoqda, qonunchilik va normativ-huquqiy baza mustahkamlanmoqda, uy-joy mulkdorlari shirkatlarining mulkdorlar huquqlarini muhofaza qilish, kommunal xizmatlar haqini toʻlashdan olingan mablagʻlardan oqilona foydalanishga qaratilgan faoliyati kuchaytirilmoqda.

Kommunal xizmatlar tariflari asossiz oshirilishining oldini olish boʻyicha aniq maqsadga qaratilgan ishlar olib borilmoqda, kommunal sohaga energiyani tejaydigan texnologiyalar tadbiq etilmoqda, muxandislik infratuzilmasini modernizatsiya qilish va texnik jihatdan qayta jihozlash boʻyicha xorijiy investitsiyalarni jalb etgan holda loyihalar amalga oshirilmoqda.

2005-yilning 1-yanvaridan aholiga koʻrsatiladigan kommunal xizmatlar uchun qoʻshilgan qiymat soligʻi boʻyicha “nulinchi” stavka joriy etilgan, bu esa kommunal xizmat koʻrsatish korxonalarining sarf-xarajatlarini kamaytirish va tariflar oʻsishini cheklash imkonini berdi.

Shu bilan birga joylarda tariflarning aholiga koʻrsatilayotgan kommunal xizmatlar sifatiga muvofiqligi, toʻlovlarning toʻliq va oʻz vaqtida amalga oshirilishi ustidan tegishli nazorat taʼminlanmayapti. Issiqlik va ichimlik suv isrofgarchiligini kamaytirish, ulardan oqilona foydalanish, uy-joy fondini hisoblagich asbob-uskunalari bilan jihozlash, kommunal xoʻjalik korxonalarining unumsiz xarajatlarini qisqartirish chora-tadbirlari yetarli darajada amalga oshirilmayapti.

Respublika aholisini ijtimoiy muhofaza qilish, tariflarning asossiz oʻsishiga yoʻl qoʻymaslik, shuningdek kommunal xizmat koʻrsatish korxonalarini qoʻllab-quvvatlash maqsadida:

1. Oʻzbekiston Respublikasi Iqtisodiyot vazirligi va Moliya vazirligining 2006-2007-yillarda markazlashtirilgan isitish va issiq suv taʼminoti boʻyicha aholiga koʻrsatiladigan xizmatlar tariflarining miqdori 10 foiz boʻlgan farqini issiqlik taʼminoti korxonalariga Davlat budjeti mablagʻlari hisobidan qoplash toʻgʻrisidagi takliflari maʼqullansin.

2. Oʻzbekiston Respublikasi Moliya vazirligi:

2006-2007-yillardagi Davlat budjeti parametrlarida aholiga markazlashtirilgan isitish va issiq suv taʼminoti boʻyicha koʻrsatilayotgan xizmatlar tariflaridagi farqlarni qoplashga mablagʻlarni nazarda tutsin;

Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi bilan birgalikda energiyani tejaydigan texnologiyalarni tatbiq etish, qozonxona uskunalarini, issiqlik tarmoqlarini kapital taʼmirlash va kuzgi-qishki isitish mavsumiga tayyorgarlik tadbirlarini oʻtkazishga Davlat budjeti hisobidan ajratiladigan mablagʻlardan maqsadli foydalanilishi ustidan qattiq nazorat oʻrnatsin.

3. Oʻzbekiston Respublikasi Vazirlar Mahkamasi:

2006-2007-yillar mobaynida kommunal xoʻjaligi korxonalarini moliyaviy va texnik jihatdan restrukturizatsiya qilish, 2008-yildan boshlab aholiga xizmat koʻrsatadigan markazlashtirilgan isitish va issiq suv taʼminotining oʻzini-oʻzi toʻla qoplashga oʻtishi boʻyicha harakatlar dasturini amalga oshirsin;

kommunal xizmatlarning raqobat bozorini shakllantirish, xususiy korxonalarning kommunal xizmat koʻrsatish sohasidagi ishtirokini kengaytirish, barcha isteʼmolchilarni energiya va suv hisoblagich asbob-uskunalari bilan jihozlash asosida energiya hamda resurslarni tejaydigan zamonaviy texnologiyalarni joriy etish borasida tizimli chora-tadbirlar bajarilishini taʼminlasin.

4. Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari respublika aholisiga, birinchi galda kuzgi-qishki davrda, yaxshi turmush sharoitini taʼminlash, koʻrsatilgan kommunal xizmatlar uchun mablagʻlar toʻliq yigʻib olinishi va tariflarning asossiz oshirilishiga yoʻl qoʻyilmasligi, shuningdek markazlashtirilgan isitish va issiq suv taʼminoti boʻyicha xizmatlar bosqichma-bosqich oʻzini-oʻzi qoplashga oʻtkazilishi uchun shaxsan javobgar boʻlishlari toʻgʻrisida ogohlantirilsin.

5. Oʻzbekiston Respublikasi Prezidentining “Kommunal xizmat koʻrsatish sohasida Iqtisodiy islohotlarni chuqurlashtirishning yangi bosqichi toʻgʻrisida” 2001-yil 17-apreldagi PF-2832-sonli Farmonining 2-bandi oʻz kuchini yoʻqotgan deb hisoblansin.

6. Mazkur Farmonning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.