Oʻzbekiston Respublikasidagi viloyat, tuman va shahar koʻchmas mulk kadastri xizmatlari ishlarini muvofiqlashtirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “Oʻzbekiston Respublikasida koʻchmas mulk davlat kadastrini yuritish toʻgʻrisida” 1997-yil 2-iyundagi 278-son qarorining 2-bandi quyidagi mazmundagi xatboshilar bilan toʻldirilsin:

“Oʻzgeodezkadastr” bosh boshqarmasi Qoraqalpogʻiston Respublikasi, viloyatlar va Toshkent shahar er, binolar va inshootlar davlat kadastri bosh boshqarmalari ishlarini muvofiqlashtirish hamda ularga tashkiliy-uslubiy rahbarlik qilish uchun koʻchmas mulk davlat kadastri maxsus xoʻjalik hisobidagi xizmatini tashkil etsin.

Belgilab qoʻyilsinki, koʻchmas mulk davlat kadastri maxsus xizmatini mablagʻ bilan taʼminlash Qoraqalpogʻiston Respublikasi, viloyatlar, shaharlarning er, binolar, inshootlar davlat kadastri bosh boshqarmalarining xoʻjalik hisobidagi faoliyatidan ajratmalar hamda boshqa xoʻjalik hisobidagi manbalar hisobiga amalga oshiriladi”.

2. Oʻzbekiston SSR Ministrlar Sovetining “Oʻzbekiston SSR Kommunal xoʻjaligi ministrligining Oʻzbekiston SSR shaharlari va shahar posyolkalaridagi imoratlarni roʻyxatdan oʻtkazish toʻgʻrisidagi yoʻriqnomasini tasdiqlash haqida” 1972-yil 2-noyabrdagi 480-son qarori (OʻzSSR QT., 1972-y., 10-son, 65-modda) oʻz kuchini yoʻqotgan deb hisoblansin.