Hujjat kuchini yo‘qotgan " " 29.04.2026
Oʻzbekiston Respublikasi Vazirlar Mahkamasining
qarori
Qishloq xoʻjaligi mahsulotlari ishlab chiqaruvchilarning moddiy-texnik bazasini yanada mustahkamlash chora-tadbirlari toʻgʻrisida
Qishloq xoʻjaligi texnikasi parkini yangilash va modernizatsiya qilish, qishloq xoʻjaligi mahsulotlari yetishtiruvchilarni sifatli va arzon texnika bilan taʼminlash, ularga oʻz vaqtida servis xizmati koʻrsatish hamda raqobatbardosh qishloq xoʻjaligi texnikasini ishlab chiqarishni moliyalashtirishga bozor mexanizmini keng tatbiq etish maqsadida Vazirlar Mahkamasi qaror qiladi:
1. Qishloq xoʻjaligi texnikasini kredit va lizing shartlarida, shuningdek, qishloq xoʻjaligi texnikasi uchun avtopilot uskunasini xarid qilishni davlat tomonidan qoʻllab-quvvatlash tartibi toʻgʻrisidagi nizom 1-ilovaga muvofiq tasdiqlansin.
(1-band Oʻzbekiston Respublikasi Vazirlar Mahkamasining 2025-yil 29-avgustdagi 549-sonli qarori tahririda — Qonunchilik maʼlumotlari milliy bazasi, 30.08.2025-y., 09/25/549/0791-son)
2. Oʻzbekiston Respublikasi Iqtisodiyot va moliya vazirligi Qishloq xoʻjaligini davlat tomonidan qoʻllab-quvvatlash jamgʻarmasi bilan birgalikda qishloq xoʻjaligi texnikasini yetkazib berishni oʻz vaqtida moliyalashtirishni taʼminlasin.
(2-band Oʻzbekiston Respublikasi Vazirlar Mahkamasining 2025-yil 29-avgustdagi 549-sonli qarori tahririda — Qonunchilik maʼlumotlari milliy bazasi, 30.08.2025-y., 09/25/549/0791-son)
3. Oʻzbekiston Respublikasi Vazirlar Mahkamasining “Qishloqni lizing shartlarida qishloq xoʻjaligi texnikasi bilan taʼminlash chora-tadbirlari toʻgʻrisida” 2000-yil 2-noyabrdagi 424-son qaroriga 2-ilovaga muvofiq oʻzgartirishlar kiritilsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
(4-band Oʻzbekiston Respublikasi Vazirlar Mahkamasining 2025-yil 29-avgustdagi 549-sonli qarori tahririda — Qonunchilik maʼlumotlari milliy bazasi, 30.08.2025-y., 09/25/549/0791-son)
Oʻzbekiston Respublikasining Bosh vaziri A. ARIPOV
Toshkent sh.,
2019-yil 12-iyul,
578-son
Vazirlar Mahkamasining 2019-yil 12-iyuldagi 578-son qaroriga
1-ILOVA
Qishloq xoʻjaligi texnikasini kredit va lizing shartlarida, shuningdek, qishloq xoʻjaligi texnikasi uchun avtopilot uskunasini xarid qilishni davlat tomonidan qoʻllab-quvvatlash tartibi toʻgʻrisida
NIZOM
1-bob. Umumiy qoidalar
1. Ushbu Nizom qishloq xoʻjaligi korxonalari samaradorligini oshirish hamda ularni zamonaviy yuqori unumli qishloq xoʻjaligi texnikasi bilan taʼminlash, shuningdek, qishloq xoʻjaligi texnikasi uchun avtopilot uskunasini xarid qilishni davlat tomonidan qoʻllab-quvvatlash maqsadida subsidiya ajratish tartibini belgilaydi.
2. Ushbu Nizomda quyidagi asosiy tushunchalar qoʻllanadi:
“Subsidiya.mf.uz” axborot portali — qishloq xoʻjaligi texnikalari, lazerli qurilmaga ega avtomatlashtirilgan yer tekislagich agregati xarid qiymatining bir qismini hamda ular kredit va lizing shartlarida xarid qilinganda, foiz xarajatlarining bir qismini, shuningdek, avtopilot uskunasini xarid qilish uchun ajratiladigan kredit boʻyicha foiz xarajatlarining bir qismini qoplab berish uchun subsidiya ajratish bilan bogʻliq amaliyotlar bajariladigan Oʻzbekiston Respublikasi Iqtisodiyot va moliya vazirligining axborot tizimi;
avtopilot uskunasi — qishloq xoʻjaligi texnikalarini inson aralashuvisiz yoki kam aralashuv bilan boshqarishga imkon beradigan elektron-mexanik tizim;
subsidiya — qarz oluvchi tomonidan yangi qishloq xoʻjaligi texnikasi lizing yoki kredit shartlarida xarid qilinganda, ularning foiz xarajatlarini tijorat banklari yoki lizing tashkilotlari tomonidan belgilangan foiz stavkasining 10 foizlik punktidan, shuningdek, yangi avtopilot uskunasini xarid qilish uchun tijorat banki tomonidan ajratiladigan kreditning 14 foiz punktidan yuqori, biroq 8 foizlik punktidan oshmagan qismini qoplab berish uchun Oʻzbekiston Respublikasi Davlat budjeti mablagʻlari hisobidan ajratiladigan Oʻzbekiston Respublikasi Iqtisodiyot va moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasining (keyingi oʻrinlarda — Jamgʻarma) pul mablagʻlari;
qarz oluvchi — qishloq xoʻjaligi mahsulotlari yetishtiruvchi yuridik va jismoniy shaxslar, paxta-toʻqimachilik ishlab chiqarish tashkilotlari va klasterlari hamda mexanizatsiya xizmatlarini koʻrsatuvchi tashkilotlar;
qishloq xoʻjaligi texnikasi — mahalliy ishlab chiqaruvchi korxonalarda ishlab chiqarilgan qishloq xoʻjaligida mexanizatsiya ishlarini bajaradigan barcha turdagi traktorlar, kombaynlar, tirkamalar va agregatlar, shuningdek, 2026-yil 1-yanvarga qadar xorijdan tayyor holda olib kelinadigan, aniq donalab ekuvchi koʻp funksiyali chigit ekish seyalkalari, gʻalla oʻrish kombaynlari hamda paxta terish mashinalari.
3. Oʻzbekiston Respublikasi Iqtisodiyot va moliya vazirligi:
Oʻzbekiston Respublikasi Davlat budjeti parametrlarida qishloq xoʻjaligi texnikalarini sotib olish uchun ajratilgan kredit va lizing boʻyicha, shuningdek, avtopilot uskunasini xarid qilishga ajratilgan kredit boʻyicha hisoblangan foizining bir qismini qoplab berish uchun koʻzda tutilgan mablagʻlarni Jamgʻarmaga ajratadi.
Bunda xarajatlarni qoplashning ushbu miqdori Oʻzbekiston Respublikasi Markaziy bankining asosiy foiz stavkasining oʻzgarishiga qarab Oʻzbekiston Respublikasi Iqtisodiyot va moliya vazirligi tomonidan qayta koʻrib chiqilishi mumkin;
tijorat banklarida resurslar taqchilligi yuzaga kelganda, qishloq xoʻjaligi texnikalarini sotib olishga kreditlar ajratish uchun Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasining (keyingi oʻrinlarda — Gʻaznachilik qoʻmitasi) vaqtincha boʻsh turgan mablagʻlarini tijorat banklariga belgilangan tartibda joylashtiradi.
4. Qishloq xoʻjalik texnikasini lizing yoki kredit shartlarida xarid qilish uchun ajratilgan lizing yoki kredit foizini qoplash uchun subsidiya ushbu Nizomga 1-ilovadagi sxemaga muvofiq ajratiladi.
Tijorat banki tomonidan qishloq xoʻjaligi korxonasiga kredit shartlarida qishloq xoʻjalik texnikasiga avtopilot uskunasini xarid qilish uchun ajratilgan kredit foizini qoplash uchun subsidiya ushbu Nizomga 2-ilovadagi sxemaga muvofiq amalga ajratiladi.
5. Qarz oluvchiga ushbu Nizom talablari asosida:
lizing hamda kredit shartlarida xarid qilingan qishloq xoʻjaligi texnikasining foiz toʻlovini qisman qoplab berish uchun subsidiya lizing tashkiloti, tijorat banki va Jamgʻarma oʻrtasida tuziladigan Bosh bitimga muvofiq;
kredit shartlarida xarid qilinadigan avtopilot uskunasining foiz toʻlovini qisman qoplab berish uchun subsidiya tijorat banki va Jamgʻarma oʻrtasida tuziladigan Bosh bitimga muvofiq ajratiladi.
Subsidiya miqdori qarz oluvchi va lizing tashkiloti yoki tijorat banki oʻrtasida tuziladigan shartnoma shartlarida aks ettirilishi shart.
6. Qishloq xoʻjaligi texnikalarini sotib oluvchiga lizing yoki kredit foizini qoplash uchun subsidiya tijorat banki va lizing tashkiloti tomonidan belgilangan foiz stavkasining 10 foizlik punktidan, shuningdek, avtopilot uskunasi xarid qilish uchun ajratilgan kreditning 14 foizlik punktidan yuqori, biroq 8 foizlik punktidan oshmagan qismi miqdorida ajratiladi.
Bunda qarz oluvchining lizing yoki kredit shartnomasi barcha turdagi kombaynlar va dvigatel quvvati 100 ot kuchidan koʻp boʻlgan traktorlar uchun 10 yil muddatga, qolgan traktorlar, osma va tirkama texnikalar, shuningdek, avtopilot uskunasini xarid qilish uchun 7 yildan kam boʻlmagan muddatga rasmiylashtirilgan boʻlishi lozim.
Kredit yoki lizing oluvchilarning soʻroviga asosan ushbu bandda koʻrsatilgan muddatlar qisqartirilishi mumkin.
7. Subsidiya Oʻzbekiston Respublikasi rezidenti hisoblangan qonunchilikda belgilangan tartibda faoliyat koʻrsatuvchi lizing tashkiloti va tijorat banklariga ajratiladi.
2-bob. Qishloq xoʻjaligi texnikalarini xarid qilishda subsidiya ajratish tartibi
8. Subsidiya:
a) lizing oluvchilar tomonidan qishloq xoʻjaligi texnikasini shartnomada koʻrsatilgan qiymatining 15 foizidan kam boʻlmagan miqdorda avans toʻlanganda;
b) lizing yoki kredit shartnomasida belgilangan foiz stavkasining 10 foizlik punktdan, avtopilot uskunasi xarid qilish uchun ajratilgan kreditning 14 foizlik punktidan yuqori, biroq 8 foizlik punktidan oshmagan qismini qoplash uchun ajratiladi.
9. Qarz oluvchi tomonidan qishloq xoʻjaligi texnikasini lizing yoki kredit shartlarida xarid qilishda lizing tashkiloti yoki tijorat bankiga quyidagi hujjatlar taqdim etiladi:
a) ariza;
b) sugʻurta polisi yoki kafillik yoxud qonunchilikda nazarda tutilgan boshqa taʼminot turlari.
10. Tijorat banki tomonidan quyidagi holatlarda kredit ajratish rad etiladi:
qarz oluvchining bank kreditlari boʻyicha muddati oʻtgan qarzdorligi mavjud boʻlganda;
qarz oluvchi salbiy kredit tarixiga ega boʻlganda (kredit toʻlovi 6-marta 60 kundan kechiktirilgan boʻlsa).
11. Qarz oluvchi tomonidan ushbu Nizomning 9-bandiga muvofiq barcha zarur hujjatlar taqdim etilgandan soʻng lizing tashkiloti yoki tijorat banki arizani 3 ish kunida koʻrib chiqadi hamda ijobiy xulosa qabul qilinganda qarz oluvchi bilan shartnoma tuzadi.
Lizing tashkiloti yoki tijorat bankining kredit qoʻmitasi tomonidan kredit ajratishni rad etish toʻgʻrisida qaror qabul qilinganda, qarz oluvchiga rad etish sabablari bayon etilgan yozma maʼlumot taqdim etishi shart.
Qarz oluvchi qayta murojaat qilish huquqiga ega.
12. Lizing tashkiloti yoki tijorat banki qarz oluvchi tomonidan oʻziga tegishli foiz toʻlovi toʻlangandan soʻng hisoblangan foizning bir qismini qoplash uchun quyidagi hujjatlar toʻgʻrisidagi maʼlumotlarni “Subsidiya.mf.uz” axborot portaliga kiritadi:
a) lizing tashkiloti yoki tijorat banki oʻrtasida qarz oluvchi bilan tuzilgan shartnoma raqami, sanasi, foizi, muddati;
b) qarz oluvchi tomonidan toʻlangan oʻziga tegishli foiz toʻlovi summasi;
v) qishloq xoʻjaligi texnikasi va/yoki lazerli yer tekislagich agregatining:
nomi;
rusumi/modeli;
zavod raqami (kuzov shassi raqami);
dvigatelning zavod raqami (lazerli yer tekislagich va boshqa agregatlar bundan mustasno);
davlat roʻyxatidan oʻtkazilganligi toʻgʻrisidagi texnik pasport, lazerli yer tekislagich agregati va boshqa agregatlarning texnik guvohnoma raqami, sanasi.
Yuqorida qayd etilgan hujjatlar toʻgʻrisidagi maʼlumotlar “Subsidiya.mf.uz” axborot portaliga kiritilganda, qarz oluvchi tomonidan oʻziga tegishli foiz toʻlovini toʻlangani toʻgʻrisidagi maʼlumot va buyurtmanoma avtomatik ravishda shakllanadi.
Agarda hujjatlar toʻgʻrisidagi maʼlumotlar axborot tizimida toʻliq yoki mavjud boʻlmasa, buyurtmanoma shakllanmaydi.
13. Taqdim etilgan hujjatlarning toʻliqligi, lizing yoki kredit ajratish va ular boʻyicha subsidiya olishning barcha jarayoni ushbu Nizom talablariga muvofiqligi yuzasidan masʼuliyat lizing tashkiloti va tijorat banklarining rahbarlariga yuklanadi.
14. Jamgʻarmada Qishloq xoʻjaligi texnikalari va lazerli qurilmaga ega avtomatlashtirilgan yer tekislagich agregati qiymatining, shuningdek, ular kredit yoki lizing shartlarida xarid qilinganda, foiz xarajatlarining bir qismini qoplash uchun subsidiya ajratishni koʻrib chiquvchi komissiya (keyingi oʻrinlarda — komissiya) tuziladi.
Komissiya aʼzolari tarkibi Jamgʻarmani boshqarish departamenti direktori tomonidan shakllantiriladi.
Komissiya aʼzolarining har biriga “Subsidiya.mf.uz” axborot portalida shaxsiy kabinet ochiladi.
Komissiya “Subsidiya.mf.uz” axborot portali orqali kelib tushgan buyurtmanoma va unga ilova qilingan hujjatlarni besh ish kunida oʻrganib chiqadi.
15. Komissiya:
ushbu Nizomning 12-bandiga muvofiq taqdim etilgan hujjatlar toʻgʻrisidagi maʼlumotlarning toʻliqligini;
qarz oluvchi tomonidan oʻziga tegishli lizing yoki kredit uchun foiz toʻlovi summasi toʻlanganini oʻrganadi.
Oʻrganish jarayoni yakunlangandan soʻng bir ish kunida Komissiya subsidiya ajratish yoki ajratishni rad etish toʻgʻrisida qaror qabul qiladi. Bunda:
komissiya aʼzolari “Subsidiya.mf.uz” axborot portalida buyurtmanoma beruvchiga ajratiladigan subsidiyani “subsidiya ajratish” yoki “subsidiya ajratishni rad etish” tugmasi orqali asoslantirgan holda elektron imzo (QR-kod) bilan tasdiqlaydi;
komissiya aʼzolarining uchdan ikki qismining qarori subsidiya ajratish toʻgʻrisida ijobiy boʻlganda, buyurtmanoma beruvchiga subsidiya ajratish toʻgʻrisida qaror qabul qilingan hisoblanadi.
16. Quyidagi holatlarda buyurtmanomani koʻrib chiqish rad etiladi:
a) ushbu Nizomning 12-bandiga muvofiq taqdim etilgan hujjatlar toʻgʻrisidagi maʼlumotlar toʻliq boʻlmaganda;
b) qarz oluvchi tomonidan oʻziga tegishli lizing yoki kredit uchun foiz toʻlovi toʻlanmaganda.
17. Lizing tashkiloti yoki tijorat banki “Subsidiya.mf.uz” axborot portali orqali subsidiya ajratish maʼqullangani yoki rad etilgani toʻgʻrisida maʼlumotga ega boʻladi.
18. Subsidiya ajratish maʼqullanganda, “Subsidiya.mf.uz” axborot portalida qishloq xoʻjaligi texnikasi va lazerli yer tekislagich agregatining shartnomadagi toʻlov grafigiga asosan ajratiladigan subsidiya miqdori avtomatik ravishda aniqlanadi.
Subsidiya bir ish kunida “Subsidiya.mf.uz” axborot portali orqali Oʻzbekiston Respublikasi respublika budjetidan subsidiya uchun ajratilgan mablagʻlar doirasida Gʻaznachilik qoʻmitasida Jamgʻarmaga ochilgan maxsus gʻazna hisobvaragʻidan lizing tashkiloti yoki tijorat bankining buyurtmanomada koʻrsatilgan bank hisobvaragʻiga avtomatik ravishda oʻtkaziladi.
3-bob. Avtopilot uskunasini xarid qilish uchun subsidiya ajratish tartibi
19. Subsidiya qishloq xoʻjaligi texnikasiga xarid qilingan avtopilot uskunasi uchun ajratiladi.
20. Subsidiya:
a) kredit oluvchilar tomonidan avtopilot uskunasining shartnomada koʻrsatilgan qiymatining 20 foizidan kam boʻlmagan miqdorda avans toʻlanganda;
b) kredit shartnomasida belgilangan foiz stavkasining 14 foizlik punktdan yuqori, biroq 8 foiz punktidan oshmagan qismini qoplash uchun ajratiladi.
21. Tijorat banki qarz oluvchi tomonidan oʻziga tegishli foiz toʻlovini toʻlagandan soʻng, hisoblangan foizning 14 foiz punktdan yuqori, biroq 8 foiz punktidan oshmagan qismini qoplash uchun “Subsidiya.mf.uz” axborot portaliga quyidagi hujjatlar toʻgʻrisidagi maʼlumotlarni kiritadi:
a) tijorat banki bilan qarz oluvchi oʻrtasida tuzilgan shartnoma raqamini, sanasini, foizini, muddatini;
b) qarz oluvchi tomonidan oʻziga tegishli foiz toʻlovi toʻlangani toʻgʻrisida maʼlumot;
v) avtopilot uskunasining:
nomi;
rusumi/modeli;
ishlab chiqarilgan sanasi, oyi, yili;
zavod raqamini.
Yuqorida qayd etilgan hujjatlar toʻgʻrisidagi maʼlumotlar “Subsidiya.mf.uz” axborot portaliga kiritilganda, qarz oluvchi tomonidan oʻziga tegishli foiz toʻlovi toʻlangani toʻgʻrisida maʼlumot va buyurtmanoma avtomatik shakllanadi. Agarda hujjatlar toʻgʻrisidagi maʼlumotlar axborot tizimda mavjud boʻlmasa, buyurtmanoma shakllanmaydi.
22. Taqdim etilgan hujjatlarning toʻliqligi yoki kredit ajratish va ular boʻyicha subsidiya olishning barcha jarayoni ushbu Nizom talablariga muvofiqligi yuzasidan masʼuliyat tijorat banklarining rahbarlariga yuklanadi.
23. Komissiya avtopilot uskunasini xarid qilish boʻyicha “Subsidiya.mf.uz” axborot portali orqali kelib tushgan buyurtmanoma va ilova qilingan hujjatlarni uch ish kunida oʻrganadi.
Oʻrganish jarayonlari yakunlangandan soʻng bir ish kunida komissiya subsidiya ajratish yoki ajratishni rad etish toʻgʻrisida qaror qabul qiladi va shu kunning oʻzida tijorat banki “Subsidiya.mf.uz” axborot portalida subsidiyani ajratish maʼqullangani yoki rad etilgani toʻgʻrisida maʼlumotga ega boʻladi.
Komissiya aʼzolari “Subsidiya.mf.uz” axborot portalida buyurtmanoma beruvchiga ajratiladigan subsidiyani “subsidiya ajratish” yoki “subsidiya ajratishni rad etish” tugmasi orqali asoslantirgan holda elektron imzo (QR-kod) bilan tasdiqlaydi.
Komissiya aʼzolarining uchdan ikki qismining qarori “subsidiya ajratish” toʻgʻrisida ijobiy boʻlganda, buyurtmanoma beruvchiga subsidiya ajratish toʻgʻrisida qaror qabul qilingan hisoblanadi.
24. Quyidagi holatlarda buyurtmanomani koʻrib chiqish rad etiladi:
a) kredit oluvchi tomonidan oʻziga tegishli foiz toʻlovi toʻlanmaganda;
b) hujjatlardagi maʼlumotlar avtopilot uskunasi maʼlumotlariga mos boʻlmaganda.
25. Subsidiya ajratish maʼqullanganda, “Subsidiya.mf.uz” axborot portalida ajratiladigan subsidiya miqdori avtomatik tarzda aniqlanadi.
Ajratiladigan subsidiya miqdori aniqlangandan soʻng bir ish kunida Oʻzbekiston Respublikasi respublika budjetidan subsidiya uchun ajratilgan mablagʻlar doirasida Gʻaznachilik qoʻmitasida Jamgʻarmaga ochilgan maxsus gʻazna hisobvaragʻidan “Subsidiya.mf.uz” axborot portali orqali subsidiya tijorat bankining buyurtmanomada koʻrsatilgan bank hisobvaragʻiga avtomatik tarzda oʻtkaziladi.
4-bob. Subsidiyani hisoblash va ajratishni toʻxtatish tartibi
26. Subsidiya ushbu Nizom talablari asosida rasmiylashtirilgan lizing va kredit muddatidan kelib chiqib, haqiqatda qoldiq qarz summasiga hisoblanadi.
Bunda toʻlov jadvali boʻyicha muddati oʻtgan qarzdorlikka qayta subsidiya hisoblanishiga yoʻl qoʻyilmaydi.
Qarz oluvchi lizing yoki kreditni uni muddati oʻtgandan soʻng qaytarganda, ajratiladigan subsidiya tasdiqlangan toʻlov jadvalida qayd etilgan summadan oshmasligi lozim.
27. Qarz oluvchi shartnomaning toʻlov jadvaliga muvofiq oʻziga tegishli boʻlgan lizing yoki kredit foiz toʻlovlarini (subsidiya sifatida beriladigan foizdan tashqari) toʻliq toʻlagan boʻlishi shart.
28. Subsidiya lizing tashkiloti uchun har chorakda, tijorat banki uchun har oyda keyingi oyning 20-kunigacha taqdim etilgan buyurtmanomalar boʻyicha hisoblangan joriy foizlar miqdorida hisob-kitob qilinadi.
29. Jamgʻarma tomonidan lizing tashkiloti yoki tijorat banki hisobvaragʻiga qarz oluvchi uchun hisoblangan foiz toʻlovini qisman qoplash uchun oʻtkazib berilgan subsidiya ushbu qarz oluvchining hisoblangan foiz toʻlovlari uchun hisob-kitob qilinadi.
30. Ajratilgan subsidiya qarz oluvchiga hisoblangan subsidiya miqdoridan koʻp boʻlgan taqdirda, ortiqcha mablagʻlar 2 bank ish kunidan kechiktirmasdan Jamgʻarma hisobvaragʻiga qaytarib oʻtkaziladi.
31. Lizing yoki kredit shartnomasining shartlari oʻzgargan taqdirda, ilgari tasdiqlangan va hisoblangan subsidiya miqdori oshirilmaydi va subsidiya muddati uzaytirilmaydi.
32. Jamgʻarma tomonidan ajratilgan subsidiyadan maqsadli foydalanishni, toʻlovlarning va hisob-kitoblarning toʻgʻri amalga oshirilishini nazorat qilish Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi tomonidan belgilangan tartibda amalga oshiriladi.
Maqsadsiz foydalanilgan subsidiya mablagʻlari Bosh bitim shartlariga asosan Jamgʻarmaga qaytariladi.
33. Subsidiya ajratilishi quyidagi hollarda toʻxtatiladi:
a) lizing yoki kredit shartnomasi boʻyicha subsidiya maqsadsiz sarflangani aniqlanganda, qarz oluvchi tomonidan lizing yoki kredit asosiy qarzining tegishli qismi toʻlov jadvalida belgilangan sanadan boshlab 90 kun davomida toʻliq toʻlanmasa;
b) qarz oluvchi tomonidan lizing yoki kredit shartnomasi boʻyicha majburiyatlar toʻliq bajarilganda;
v) qarz oluvchining subsidiya olishni toʻxtatish toʻgʻrisidagi murojaati mavjud boʻlganda;
g) lizing yoki kredit shartnomasi toʻliq bekor qilinganda hamda qarz majburiyatlari boshqa shaxsga oʻtkazilganda.
5-bob. Yakunlovchi qoidalar
34. Taraflar oʻrtasida yuzaga keladigan nizolar belgilangan tartibda sud tomonidan hal etiladi.
35. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Qishloq xoʻjaligi texnikasini kredit va lizing shartlarida, shuningdek, qishloq xoʻjaligi texnikasi uchun avtopilot uskunasini xarid qilishni davlat tomonidan qoʻllab-quvvatlash tartibi toʻgʻrisidagi nizomga
1-ILOVA
Qishloq xoʻjalik texnikasini lizing yoki kredit shartlarida xarid qilish uchun ajratilgan lizing yoki kredit foizini qoplash uchun subsidiya ajratish
SXEMASI

Bosqichlar

Subyektlar

Tadbirlar

Muddatlar

1-bosqich

Qishloq xoʻjaligi korxonasi

Lizing tashkiloti yoki tijorat bankka qishloq xoʻjaligi texnikasini lizing yoki kredit shartlarida xarid qilish uchun ariza taqdim etadi.

Oʻz xohishiga koʻra

2-bosqich

Lizing tashkiloti yoki tijorat banki

Qishloq xoʻjaligi korxonasi tomonidan qishloq xoʻjaligi texnikasini lizing yoki kredit shartlarida xarid qilish uchun taqdim etilgan arizani koʻrib chiqadi.

3 bank ish kuni

3-bosqich

Lizing tashkiloti yoki tijorat banki

Ijobiy xulosa qabul qilinganda qishloq xoʻjaligi korxonasiga qishloq xoʻjaligi texnikasini lizing yoki kredit shartlarida xarid qilish uchun lizing yoki kredit ajratadi.

Xulosa qabul qilingandan keyin 1 bank ish kuni

4-bosqich

Lizing tashkiloti yoki tijorat banki

Qishloq xoʻjaligi korxonasiga qishloq xoʻjaligi texnikasini lizing yoki kredit shartlarida xarid qilish uchun ajratgan lizing yoki kredit foizini tegishli miqdorda qoplash uchun subsidiya ajratish yuzasidan Qishloq xoʻjaligini davlat tomonidan koʻllab-quvvatlash jamgʻarmasiga “Subsidiya.mf.uz” axborot portali orqali buyurtmanoma taqdim etadi.

Hisobot davridan keyingi oyning 20 sanasiga kadar

5-bosqich

Komissiya

(Jamgʻarma)

1. “Subsidiya.mf.uz” axborot portali orqali kelib tushgan buyurtmanoma va unga ilova qilingan hujjatlarni oʻrganib chiqadi.

5 ish kunida

2. Oʻrganish jarayoni yakunlangandan soʻng subsidiya ajratish yoki ajratishni rad etish toʻgʻrisida qaror qabul qiladi.

1 ish kunida

6-bosqich

Jamgʻarma

Komissiya subsidiya ajratish toʻgʻrisida qaror qabul qilganda, “Subsidiya.mf.uz” axborot portali orqali Oʻzbekiston Respublikasi respublika budjetidan subsidiya uchun ajratilgan mablagʻlar doirasida Gʻaznachilik qoʻmitasida Qishloq xoʻjaligini davlat tomonidan koʻllab-quvvatlash jamgʻarmasiga ochilgan maxsus gʻazna hisobvaragʻidan lizing tashkiloti yoki tijorat bankining buyurtmanomada koʻrsatilgan bank hisobvaragʻiga avtomatik ravishda oʻtkazadi.

Bosh bitimda belgilangan muddatda

Qishloq xoʻjaligi texnikasini kredit va lizing shartlarida, shuningdek, qishloq xoʻjaligi texnikasi uchun avtopilot uskunasini xarid qilishni davlat tomonidan qoʻllab-quvvatlash tartibi toʻgʻrisidagi nizomga
2-ILOVA
Tijorat banki tomonidan qishloq xoʻjaligi korxonasiga kredit shartlarida qishloq xoʻjalik texnikasiga avtopilot uskunasini xarid qilishga ajratilgan kredit foizini qoplash uchun subsidiya ajratish
SXEMASI

Bosqichlar

Subyektlar

Tadbirlar

Muddatlar

1-bosqich

Qishloq xoʻjaligi korxonasi

Tijorat bankka kredit shartlarida qishloq xoʻjaligi texnikasi uchun avtopilot uskunasini xarid qilish uchun ariza taqdim etadi.

Oʻz xohishiga koʻra

2-bosqich

Tijorat banki

Qishloq xoʻjaligi korxonasi tomonidan kredit shartlarida qishloq xoʻjaligi texnikasi uchun avtopilot uskunasini xarid qilish uchun taqdim etilgan arizani koʻrib chiqadi.

3 bank ish kuni

3-bosqich

Tijorat banki

Ijobiy xulosa qabul qilinganda, qishloq xoʻjaligi korxonasiga qishloq xoʻjaligi texnikasi uchun avtopilot uskunasini xarid qilish uchun kredit ajratadi.

Xulosa qabul qilingandan keyin 1 bank ish kuni

4-bosqich

Tijorat banki

Qishloq xoʻjaligi korxonasiga qishloq xoʻjaligi texnikasiga avtopilot uskunasini xarid qilish uchun ajratgan kredit foizini tegishli miqdorda qoplash uchun subsidiya ajratish yuzasidan Qishloq xoʻjaligini davlat tomonidan qoʻllab-quvvatlash jamgʻarmasiga “Subsidiya.mf.uz” axborot portali orqali buyurtmanoma taqdim etadi.

Hisobot davridan keyingi oyning 20 sanasiga kadar

5-bosqich

Komissiya

(Jamgʻarma)

1. “Subsidiya.mf.uz” axborot portali orqali kelib tushgan buyurtmanoma va unga ilova qilingan hujjatlarni oʻrganib chiqadi.

3 ish kunida

2. Oʻrganish jarayoni yakunlangandan soʻng subsidiya ajratish yoki ajratishni rad etish toʻgʻrisida qaror qabul qiladi.

1 ish kunida

6-bosqich

Jamgʻarma

Komissiya subsidiya ajratish toʻgʻrisida qaror qabul qilganda, Oʻzbekiston Respublikasi respublika budjetidan subsidiya uchun ajratilgan mablagʻlar doirasida Gʻaznachilik qoʻmitasida Qishloq xoʻjaligini davlat tomonidan qoʻllab-quvvatlash jamgʻarmasiga ochilgan maxsus gʻazna hisobvaragʻidan “Subsidiya.mf.uz” axborot portali orqali subsidiya tijorat bankining buyurtmanomada koʻrsatilgan bank hisobvaragʻiga avtomatik tarzda oʻtkazadi.

Bosh bitimda belgilangan muddatda

(1-ilova Oʻzbekiston Respublikasi Vazirlar Mahkamasining 2025-yil 29-avgustdagi 549-sonli qarori tahririda — Qonunchilik maʼlumotlari milliy bazasi, 30.08.2025-y., 09/25/549/0791-son)
Vazirlar Mahkamasining 2019-yil 12-iyuldagi 578-son qaroriga
2-ILOVA
Vazirlar Mahkamasining “Qishloqni lizing shartlarida qishloq xoʻjaligi texnikasi bilan taʼminlash chora-tadbirlari toʻgʻrisida” 2000-yil 2-noyabrdagi 424-son qaroriga kiritilayotgan oʻzgartirishlar
1. 1-band quyidagi tahrirda bayon etilsin:
“1. Belgilansinki, yangi zamonaviy gʻalla oʻrish kombayni va paxta terish mashinasini va ular bilan agregatlashtirilib ishlatiladigan traktorni (keyingi oʻrinlarda qishloq xoʻjalik texnikasi deb ataladi) qishloq xoʻjaligi korxonalari va ularga xizmat koʻrsatuvchi tashkilotlarga (keyingi oʻrinlarda lizing oluvchilar deb ataladi) quyidagi lizing shartlarida yetkazib beriladi:
zamonaviy qishloq xoʻjaligi texnikasi qiymatining 20 foizi avans sifatida lizing oluvchilar tomonidan oʻz mablagʻlari hisobiga toʻlanadi;
zamonaviy qishloq xoʻjaligi texnikasi qiymatining 80 foizi lizing tashkilotlari tomonidan ularga Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi (keyingi oʻrinlarda Jamgʻarma deb ataladi) tomonidan qaytariladigan qarz asosida ajratiladigan mablagʻlar hisobiga moliyalashtiriladi.”
2. 2-band quyidagi tahrirda bayon etilsin:
“2. Lizing tashkilotlariga quyidagi vazifalar yuklansin:
lizing oluvchilarning qishloq xoʻjaligi texnikasini yetkazib berish yuzasidan berilgan buyurtmalarini umumlashtirish;
qishloq xoʻjaligi texnikasini yetkazib berish yuzasidan buyurtmalarni joylashtirish;
joylashtirilgan buyurtmalarga muvofiq yetkazib beriladigan qishloq xoʻjaligi texnikasi uchun oʻz vaqtida avans toʻlash va uzil-kesil hisob-kitob qilish;
lizing shartnomalarini tuzish, yangi qishloq xoʻjaligi texnikasini lizingga berish, lizing toʻlovlarini oʻz vaqtida undirilishini va Jamgʻarmaga toʻlanishini taʼminlash;
Jamgʻarma bilan tuzilgan har bir qarz shartnomasi boʻyicha ajratilgan mablagʻlarning hisobini oʻz vaqtida yuritish va ularni hisoblangan foizlari bilan toʻlash.”
3. 3-band oʻz kuchini yoʻqotgan deb hisoblansin.
4. 4-band quyidagi tahrirda bayon etilsin:
“4. Zamonaviy qishloq xoʻjaligi texnikasini lizing shartlarida yetkazib berish tartibi toʻgʻrisidagi nizom ilovaga muvofiq tasdiqlansin.
Jamgʻarmaga har yili, 1-oktabrdan boshlab va uning kelgusi yilga tushumlar va xarajatlari balansi tasdiqlangungacha boʻlgan davrda, zamonaviy qishloq xoʻjaligi texnikasi ishlab chiqarilishini taʼminlash uchun ishlab chiqaruvchi korxonalar yoki ularning rasmiy dileriga avans berish uchun lizing tashkilotlari buyurtmanomalari boʻyicha mablagʻlar ajratishga ruxsat etilsin. Avans berish har oylik ulushlar bilan, oldi-sotdi shartnomasida koʻrsatilgan yetkazib berish muddatidan kechikmay, ushbu shartnomada kelgusi yilda yetkazib berish nazarda tutilgan hajmlar va yetkazib berish muddatlaridan kelib chiqqan holda amalga oshiriladi.
Bunda, qishloq xoʻjaligi texnikasi ishlab chiqaruvchi mahalliy korxonalar va lizing tashkilotlari texnika qiymatining 80 foizi miqdorida avans toʻlovlarini olganidan soʻng lizing oluvchilarga qishloq xoʻjaligi texnikasining avans toʻlangan kundan boshlab 120 kun muddatda yetkazib berilishini taʼminlaydilar.”
5. 5-bandda:
birinchi xatboshidagi “Oʻzagrolizing” AJ” soʻzlari “lizing tashkilotlari” soʻzlari bilan almashtirilsin;
toʻrtinchi xatboshi quyidagi tahrirda bayon qilinsin:
“lizing muddatini fermer, dehqon xoʻjaliklari uchun 10 yil, qishloq xoʻjaligiga xizmat koʻrsatuvchi boshqa tashkilotlar uchun 7 yil etib belgilanishini nazarda tutadi.”
6. 6-bandda:
uchinchi xatboshidagi “Agrobank” ATB” va “Oʻzagrolizing” AJ” soʻzlari tegishlicha “tijorat banklari” va “lizing tashkilotlari” soʻzlari bilan almashtirilsin;
toʻrtinchi xatboshidagi “Nazorat-taftish bosh boshqarmasi” soʻzlari “Davlat moliyaviy nazorati departamenti” soʻzlari bilan almashtirilsin.
7. Ilovaning matni quyidagi tahrirda bayon etilsin:
“Zamonaviy qishloq xoʻjaligi texnikasini lizing shartlarida yetkazib berish tartibi toʻgʻrisida
NIZOM
1. Ushbu Nizom mahalliy ishlab chiqaruvchilar tomonidan ishlab chiqarilgan yangi zamonaviy gʻalla oʻrish kombayni va paxta terish mashinasi va ular bilan agregatlashtirilib ishlatiladigan traktorni (keyingi oʻrinlarda qishloq xoʻjaligi texnikasi deb ataladi) lizing shartlarida yetkazib berishni tartibga soladi.
2. Oʻzbekiston Respublikasi Qishloq xoʻjaligi vazirligi qishloq xoʻjaligi uchun zarur qishloq xoʻjaligi texnikasini turlari boʻyicha shakllantirilgan maʼlumotni hisobot yilining 1-sentabriga qadar Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasiga (keyingi oʻrinlarda Jamgʻarma deb ataladi) taqdim etadi.
3. Taqdim etilgan maʼlumot asosida Jamgʻarma Oʻzbekiston Respublikasi Moliya vazirligi bilan birgalikda qishloq xoʻjaligi texnikasini lizing shartlarida yetkazib berishni moliyalashtirish uchun mablagʻlar manbalarini shakllantiradi.
4. Jamgʻarma oʻzining veb-sahifasida kelgusi yil uchun qishloq xoʻjaligi texnikasini lizing shartlarida yetkazib berishga qarz mablagʻlarini ajratish toʻgʻrisidagi maʼlumotni joylashtiradi.
5. Jamgʻarmaning veb-sahifasiga joylashtirilgan maʼlumotlar asosida respublikada faoliyat yurituvchi barcha lizing tashkilotlari qishloq xoʻjaligi texnikasini lizing shartlarida yetkazib berish boʻyicha dastlabki buyurtmanomalarni Jamgʻarmaning veb-sahifasiga joylashtiradi.
6. Jamgʻarma veb-sahifaga joylashtirilgan dastlabki buyurtmanomalar tahlili asosida lizing tashkilotlari bilan qishloq xoʻjaligi texnikasini lizing shartlarida yetkazib berishga qarz mablagʻlarini ajratish toʻgʻrisida Bosh bitim tuzadi.
Lizing tashkilotlari qishloq xoʻjaligi texnikasi ishlab chiqaruvchilar yoki ularning rasmiy dilerlari bilan qishloq xoʻjaligi texnikasini yetkazib berish, toʻlov tartibi va muddati koʻrsatilgan oldi-sotdi shartnomalari tuzadi.
7. Lizing tashkilotlari:
Jamgʻarma bilan moliyaviy resurslar jalb etish uchun shartnoma tuzadi. Bunda lizing boʻyicha daromad foizi miqdori, shuningdek, lizing oluvchilar tomonidan toʻlanadigan lizing toʻlovlaridan ushlab qolinadigan lizing tashkiloti va bank xizmatlari uchun toʻlovlar miqdori kelishib olinadi;
tijorat banklari bilan moliyaviy agent funksiyalarini bajarish yuzasidan;
sugʻurta tashkilotlari bilan sugʻurta qonunchiligiga muvofiq shartnomalar tuzadi.
8. Lizing tashkilotlari lizing oluvchilar bilan qishloq xoʻjaligi texnikasini lizing shartlarida yetkazib berish shartnomalarini tuzadi. Har bir shartnomaga lizing toʻlovi jadvali ilova qilinadi. Bunda shartnomalar 3 nusxada tuziladi va bir nusxasi tijorat bankiga joʻnatiladi.
9. Lizing oluvchilar:
lizingga olinadigan qishloq xoʻjaligi texnikasi qiymatining 20 foizini lizing tashkilotlariga toʻlaydilar;
lizingga olinadigan qishloq xoʻjaligi texnikasini oʻz mablagʻlari hisobiga sugʻurta tashkilotlarida sugʻurta qiladilar;
lizing shartlarida rasmiylashtirilgan qishloq xoʻjaligi texnikasining qoplanmagan qiymatini hamda hisoblangan lizing foizini fermer, dehqon xoʻjaliklari 10 yil muddatgacha, qishloq xoʻjaligiga xizmat koʻrsatuvchi boshqa tashkilot va korxonalar 7 yil muddatgacha lizing tashkilotlariga toʻlaydilar.
10. Lizing tashkilotlari lizing oluvchilar toʻlagan avans mablagʻlaridan kelib chiqib qishloq xoʻjaligi texnikasi qiymatining 60 foizigacha avans toʻlovini toʻlashga pul mablagʻlarini ajratish uchun buyurtmanomalarni Jamgʻarmaga taqdim etadi.
Ushbu buyurtmanomalar asosida Jamgʻarma pul mablagʻlarini kelgusi davr uchun lizing tashkilotining tijorat bankidagi Jamgʻarma bilan hisob-kitoblar (23216) hisobvaragʻiga (keyingi oʻrinlarda amaliyot hisobvaragʻi deb ataladi) oʻtkazadi.
11. Lizing tashkiloti shartnomada belgilangan muddatda yetkazib beriladigan qishloq xoʻjaligi texnikasi qiymatining 80 foizi miqdorida ishlab chiqaruvchi korxonalar yoki ularning rasmiy dilerlariga amaliyot hisobvaragʻidan avans mablagʻini toʻlaydi.
12. Lizing tashkiloti tomonidan qishloq xoʻjaligi texnikasi lizingga rasmiylashtirilgandan keyin shartnoma shartlariga muvofiq lizing oluvchiga yetkazib beriladi.
Lizing tashkiloti qishloq xoʻjaligi texnikasini lizing oluvchiga yetkazib berganligini tasdiqlovchi hujjatlarni taqdim etgandan keyin qishloq xoʻjaligi texnikasi qiymatining qolgan yakuniy 20 foizi miqdoridagi pul mablagʻlari Jamgʻarma tomonidan lizing tashkilotining amaliyot hisobvaragʻiga oʻtkaziladi.
13. Har oyda, kechi bilan oyning 5-kuni, lizing tashkiloti hizmat koʻrsatuvchi tijorat bankiga oldingi oyda tuzilgan shartnomalar boʻyicha lizing toʻlovi jadvali nusxalarini taqdim etadi.
14. Lizing oluvchilar lizing shartnomalarida belgilangan muddatlarda va miqdorlarda lizing tashkilotlariga lizing toʻlovlari (asosiy qarz va foiz)ni toʻlaydilar. Toʻlangan mablagʻlar toʻliq miqdorda amaliyot hisobvaragʻiga oʻtkaziladi.
15. Lizing tashkilotlari tuzilgan qarz shartnomalariga muvofiq jalb etilgan qarz mablagʻlar boʻyicha asosiy qarz va foizlarni shartnomada belgilangan muddatlarda Jamgʻarmaga toʻlanishini taʼminlaydi. Lizing boʻyicha foizlar Jamgʻarma, lizing tashkiloti va tijorat banki oʻrtasida tuziladigan Bosh bitimga muvofiq taqsimlanadi.
16. Lizing tashkiloti va tijorat banki Jamgʻarma mablagʻlarining harakati, mablagʻlardan foydalanishi toʻgʻrisidagi maʼlumotlarni har oyning 5-kuniga, shuningdek, choraklik, yillik buxgalteriya hisobotlarini chorak tugagandan keyingi oyning 20-kuniga qadar Jamgʻarmaga taqdim etadi.
17. Lizing oluvchilar tomonidan majburiyatlar bajarilmaganda lizing tashkiloti, qonun hujjatlarida belgilangan tartibda undirish choralarini koʻradi. Undirilgan pul mablagʻlari lizing tashkilotining amaliyot hisobvaragʻiga oʻtkaziladi.
18. Lizing tashkiloti va unga hizmat koʻrsatuvchi tijorat banki va ularning hududiy filiallari rahbarlari, shuningdek, lizing oluvchilarning rahbarlari va bosh buxgalterlari Jamgʻarma mablagʻlarini maqsadga muvofiq ishlatilmaganligi, hisob-kitob qilish tartibi buzilganligi uchun qonun hujjatlarida belgilangan tartibda javob beradilar”.
(Qonun hujjatlari maʼlumotlari milliy bazasi, 13.07.2019-y., 09/19/578/3419-son; 16.01.2020-y., 09/20/25/0054-son; Qonunchilik maʼlumotlari milliy bazasi, 11.11.2021-y., 07/21/7/1058-son; 21.02.2022-y., 09/22/78/0151-son; 05.04.2022-y., 09/22/153/0266-son; 29.07.2022-y., 07/22/335/0685-son; 06.08.2022-y., 09/22/431/0716-son; 03.03.2025-y., 09/25/135/0208-son; 30.08.2025-y., 09/25/549/0791-son)