Oʻzbekiston Respublikasi fuqarosining biometrik pasportini almashtirish va olishda, shuningdek chet eldan nobiometrik pasportlar boʻyicha qaytishda fuqarolar uchun qulay shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligi, Tashqi ishlar vazirligi, Davlat xavfsizlik xizmati va Oʻzbekiston Respublikasi Vazirlar Mahkamasi huzuridagi Davlat personallashtirish markazining Oʻzbekiston Respublikasi fuqarosining biometrik boʻlmagan namunadagi pasportining amal qilish muddatini uzaytirish toʻgʻrisidagi taklifiga rozilik berilsin:

respublika hududida — 2019-yil 31-dekabrgacha;

chet davlat hududida — uning amal qilish muddati tugaguniga qadar.

2. Belgilab qoʻyilsinki, Oʻzbekiston Respublikasi fuqarosining biometrik boʻlmagan namunadagi pasporti xorijiy davlat hududida turgan fuqarolar uchun uning amal qilish muddati tugaguniga qadar respublika hududiga kirish uchun haqiqiy hisoblanadi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

respublika aholisini Oʻzbekiston Respublikasi fuqarosining nobiometrik namunadagi pasportini biometrik pasportga almashtirishga tizimli ravishda jalb etish;

biometrik pasportga ega boʻlmagan aholining kam taʼminlangan qatlamlarini pasportlashtirish uchun tegishli tashkiliy choralarni koʻrish taʼminlasin.

4. Oʻzbekiston Milliy teleradiokompaniyasi va Oʻzbekiston Milliy axborot agentligiga mazkur qaror qoidalarini ommaviy axborot vositalarida keng yoritish tavsiya etilsin.

5. Oʻzbekiston Respublikasi Tashqi ishlar vazirligi Oʻzbekiston Respublikasi fuqarosining nobiometrik namunadagi pasportining amal qilish muddati uzaytirilganligi toʻgʻrisida xorijiy mamlakatlarning vakolatli organlarini belgilangan tartibda xabardor qilsin.

6. Oʻzbekiston Respublikasi Ichki ishlar vazirligi, Tashqi ishlar vazirligi, Vazirlar Mahkamasi huzuridagi Davlat personallashtirish markazi belgilangan tartibda taqdim etish:

biometrik pasportlarni rejali qabul qilish, personallashtirish va oʻz vaqtida berishni tashkil etish;

oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

7. Oʻzbekiston Respublikasi Vazirlar Mahkamasining “Oʻzbekiston Respublikasi fuqarosining biometrik pasportini va fuqaroligi boʻlmagan shaxsning 16 yoshga toʻlmagan shaxslarga harakatlanish hujjatini berish tartibi toʻgʻrisidagi nizomni tasdiqlash haqida” 2011-yil 7-iyuldagi 200-son qarorining (Oʻzbekiston Respublikasi QT, 2011-y., 7-son, 63-modda) 2-bandidagi “2018-yil 30-iyunda” soʻzlari “2019-yil 31-dekabrda” soʻzlari bilan almashtirilsin.

8. Oʻzbekiston Respublikasi Vazirlar Mahkamasining “Oʻzbekiston Respublikasi aholisini biometrik pasportlar bilan taʼminlashga doir qoʻshimcha chora-tadbirlar toʻgʻrisida” 2015-yil 14-dekabrdagi 361-son qarori oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasi huzuridagi Davlat personallashtirish markazi direktori N.S. Toʻraxoʻjayev zimmasiga yuklansin.