Oʻzbekiston Respublikasi Prezidentining

Qarori

Navoiy viloyatining Tomdi, Uchquduq, Konimex, Nurota tumanlari va Zarafshon shahrini kompleks rivojlantirish hamda aholisi bandligini taʼminlashga doir qoʻshimcha chora-tadbirlar toʻgʻrisida

Raqobatbardosh sanoat mahsulotlari ishlab chiqarishni tashkil etish, zamonaviy servis xizmatlari koʻrsatish, mintaqadagi mavjud tabiiy, ishlab chiqarish va mehnat resurslaridan toʻla-toʻkis hamda samarali foydalanish asosida qishloq xoʻjaligi mahsulotlari yetishtirish va ularni chuqur qayta ishlash yoʻli bilan Navoiy viloyatining Tomdi, Uchquduq, Konimex, Nurota tumanlari va Zarafshon shahrining iqtisodiy salohiyatini kompleks rivojlantirish va mustahkamlashni, shuningdek, aholining turmush darajasi va sifati yanada oshirilishini taʼminlash maqsadida:

1. Navoiy viloyatining Tomdi, Uchquduq, Konimex, Nurota tumanlari va Zarafshon shahrini kompleks rivojlantirish va aholisi bandligini taʼminlashning asosiy yoʻnalishlari etib quyidagilar belgilansin:

zamonaviy raqobatbardosh sanoat mahsuloti, shu jumladan qurilish materiallari, tikuvchilik va trikotaj buyumlari ishlab chiqarish boʻyicha yangi ishlab chiqarish quvvatlarini tashkil etish, qishloq xoʻjaligi va xizmat koʻrsatish sohasini rivojlantirish;

chorvachilik, shu jumladan tuyachilik tarmogʻini yanada rivojlantirish, chorvachilik mahsulotlarini qayta ishlashni ragʻbatlantirish;

yoʻl-transport, muhandislik-kommunikatsiya va ijtimoiy infratuzilmani tobora rivojlantirish, muqobil energiya manbalarini tatbiq etish loyihalarini amalga oshirish;

aholining uy-joy-maishiy sharoitlarini yaxshilashga, uning sogʻlomlashtirish va madaniy hordiq chiqarishini tashkillashtirishga qaratilgan tadbirlarni amalga oshirish, taʼlim va tibbiyot muassasalarining moddiy-texnika bazasini mustahkamlash.

2. 2017 — 2019-yillarda Navoiy viloyatining Tomdi, Uchquduq, Konimex, Nurota tumanlari va Zarafshon shahrida kafolatlangan ish oʻrinlari yaratish hamda yoʻl-transport, muhandislik-kommunikatsiya va ijtimoiy infratuzilmalarni rivojlantirish tadbirlari dasturi (keyingi oʻrinlarda — Dastur) 1-ilovaga muvofiq tasdiqlansin.

3. Dastur parametrlarini bajarishni taʼminlash yuzasidan mahalliy davlat va xoʻjalik boshqaruvi organlari, ijroiya hokimiyat organlarining faoliyatini muvofiqlashtiruvchi Respublika ishchi guruhi 2-ilovaga muvofiq tuzilsin.

Respublika ishchi guruhi (A.J. Ramatov):

Dasturda nazarda tutilgan chora-tadbirlarning belgilangan muddatlarga muvofiq amalga oshirilishini doimiy nazorat qilish va davlat hamda xoʻjalik boshqaruvi organlari, mahalliy ijro hokimiyati organlari faoliyatini muvofiqlashtirishni;

koʻrsatilgan hududlardagi aholi bandligi boʻyicha tegishli uy-joy va maishiy sharoitlarni yaratish bilan birga kechiktirilmaydigan chora-tadbirlar amalga oshirilishi tashkillashtirilishini;

muammoli masalalarni muntazam oʻrganib borish va ularni tezkorlik bilan hal etishda amaliy choralar koʻrilishini;

zarur hollarda Dasturga oʻzgartish va qoʻshimchalar kiritilishini taʼminlasin.

4. Oʻzbekiston Respublikasi Vazirlar Mahkamasi Dastur doirasida amalga oshirilayotgan loyihalarning manzilli roʻyxatini oʻn kun muddatda tasdiqlasin, ularni moliyalashtirilish manbalari, masʼul ijrochilari va amalga oshirish muddatlarini aniq koʻrsatsin.

5. Navoiy viloyatining Tomdi, Uchquduq, Konimex tumanlari, Nurota tumanidagi Dehibaland, Sentob, Temirkovuk, Qizilcha, Gum va Choʻya aholi punktlari hamda Zarafshon shahri hududlarini kompleks rivojlantirish hamda aholisining turmush sharoitlari sifatini tubdan yaxshilash chora-tadbirlarini amalga oshirishni ishonchli va barqaror moliyalashtirishni taʼminlash maqsadida Navoiy viloyati hokimligida Maxsus jamgʻarma (keyingi oʻrinlarda — jamgʻarma) tashkil etilsin.

Maxsus jamgʻarmani shakllantirish manbalari etib kuyidagilar belgilansin:

har yili “Navoiy kon-metallurgiya kombinati” DK tomonidan ajratiladigan mablagʻlar;

xalqaro moliya institutlari va boshqa xorijiy donorlarning imtiyozli kreditlari (qarzlari);

jismoniy va yuridik shaxslarning xayriya ehsonlari;

qonunchilikda taqiqlanmagan boshqa moliyalashtirish manbalari.

Navoiy viloyati hokimligi Oʻzbekiston Respublikasi Moliya vazirligi bilan birgalikda bir oy muddatda Maxsus jamgʻarmani shakllantirish va uning mablagʻlaridan foydalanish tartibi toʻgʻrisidagi Nizom ishlab chiqilishi va belgilangan tartibda tasdiqlanishini taʼminlasin.

6. Navoiy viloyatining Tomdi, Uchquduq, Konimex tumanlari, Nurota tumanidagi Dehibaland, Sentob, Temirkovuk, Qizilcha, Gum va Choʻya aholi punktlari hamda Zarafshon shahri hududida 2017-yilning 1-oktabridan 2028-yilning 1-yanvariga qadar boʻlgan davrda:

sanoat va xizmat koʻrsatish sohasida (savdo va avtomobillarga gaz quyish shoxobchalari bundan mustasno) faoliyat yurituvchi yangi tashkil etilayotgan tadbirkorlik subyektlari aylanmadan olinadigan soliqdan ozod qilinadi va yakka tartibdagi tadbirkorlar jismoniy shaxslardan olinadigan daromad soligʻining qatʼiy belgilangan summalarini hudud uchun belgilangan eng kam stavkaning toʻrtdan bir qismi miqdorida toʻlaydi;

chorvachilik va tuyachilik mahsulotlarini qayta ishlash sohasida faoliyat yuritayotgan fermer xoʻjaliklari va tadbirkorlik subyektlari ijtimoiy soliqdan ozod qilinadi;

ushbu hududlarda roʻyxatga olingan va faoliyat yuritayotgan yakka tartibdagi tadbirkorlar jismoniy shaxslardan olinadigan daromad soligʻining qatʼiy belgilangan summalarini hudud uchun belgilangan eng kam stavkaning toʻrtdan bir qismi miqdorida toʻlaydi;

ushbu hududlarda roʻyxatga olingan va faoliyatni amalga oshirayotgan yuridik shaxslar muassislari tomonidan olingan dividendlar daromad (foyda) soligʻidan ozod qilinadi.

(6-band Oʻzbekiston Respublikasi Prezidentining 2024-yil 25-dekabrdagi PQ-455-sonli qarori tahririda — Qonunchilik maʼlumotlari milliy bazasi, 30.12.2024-y., 07/24/455/1092-son. Kuchga kirish sanasi — 2025-yil 1-yanvar)

7. 2017-yilning 1-oktabridan boshlab Navoiy viloyatining Tomdi, Uchquduq, Konimex, Nurota tumanlari va Zarafshon shahrida joylashgan “Barkamol avlod” markazlaridagi maktabgacha taʼlim tashkilotlarida, musiqa va sanʼat maktablarida bolalarni oʻqitish uchun har oylik ota-onalar toʻlovi respublika boʻyicha oʻrnatilgan hajmning 50 foizi miqdorida belgilansin.

(7-band Oʻzbekiston Respublikasi Prezidentining 2020-yil 8-oktabrdagi PQ-4857-sonli qarori tahririda — Qonun hujjatlari maʼlumotlari milliy bazasi, 09.10.2020-y., 07/20/4857/1357-son)

8. Tijorat banklariga Vazirlar Mahkamasining tasdiqlangan loyihalar manzilli roʻyxatiga kiritilgan loyihalarni amalga oshirishni moliyalashtirishga Oʻzbekiston Respublikasi Markaziy bankining qayta moliyalashtirish stavkasidan oshmaydigan stavka boʻyicha kreditlar ajratish tavsiya etilsin.

Belgilab qoʻyilsinki, tijorat banklari tomonidan mazkur kreditlarni ajratishda ularga Oʻzbekiston Respublikasi Markaziy bankining qayta moliyalash stavkasidan 4 foizgacha summada oshadigan xarajatlarini qoplashga Maxsus jamgʻarma mablagʻlari hisobidan subsidiya (yordam puli) beriladi.

9. Davlat aktivlarini boshqarish agentligi Navoiy viloyatining Tomdi, Uchquduq, Konimex, Nurota tumanlari va Zarafshon shahrida joylashgan foydalanilmay boʻsh yotgan davlat obyektlarini ushbu obyektlar negizida tadbirkorlik faoliyatini yoʻlga qoʻyish istagini bildirgan tadbirkorlik subyektlariga yangi ish oʻrinlari yaratish sharti bilan tekin foydalanish huquqi asosida oʻn yil muddatgacha ijaraga berilishini taʼminlasin.

(9-band Oʻzbekiston Respublikasi Prezidentining 2024-yil 19-apreldagi PF-67-sonli Farmoni tahririda — Qonunchilik maʼlumotlari milliy bazasi, 27.04.2024-y., 06/24/67/0307-son)

10. “Navoiy kon-metallurgiya kombinati” DK, “Qizilqumsement” AJ, “Navoiyazot” AJning Tomdi tumanida 1,5 ming bosh tuya va 10 ming bosh koʻy boqishga moʻljallangan chorvachilik komplekslari tashkil etish, shuningdek, ushbu hududlarda mahalliy aholi orasidan 1000 nafar kishining ish bilan kafolatlangan tarzda qamrab olinishi uchun “Navoiy kon-metallurgiya kombinati” DK tomonidan tikuv mashinalari xarid qilinishini taʼminlash yoʻli bilan ushbu hududlarda tikuvchilik va trikotaj buyumlar ishlab chiqarishni tashkillashtirish toʻgʻrisidagi takliflari maʼqullansin.

11. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi mobil aloqa kompaniyalari bilan birgalikda, zaruratga qarab, aloqa bilan taʼminlanmagan alohida hududlarda bazaviy stansiyalar oʻrnatilishini hamda olis qishloqlar va ovullarda raqamli televideniye tarmoqlari xizmati koʻrsatilishini tashkillashtirsin.

12. Oʻzbekiston Respublikasi Davlat geologiya va mineral resurslar qoʻmitasi bir oy muddatda ushbu hududlarda razvedka qilingan foydali qazilmalarni qazib olish va ularni qayta ishlashni tashkil etish boʻyicha takliflar tayyorlasin hamda Respublika ishchi guruhiga kiritsin.

13. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” aksiyadorlik boshqaruvi raisi A.J. Ramatov hamda bandlik va mehnat munosabatlari vaziri A.A. Xayitov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 29-sentabr,

PQ-3301-son

Oʻzbekiston Respublikasi Prezidentining 2017-yil 29-sentabrdagi PQ-3301-son qaroriga
1-ILOVA

2017 — 2019-yillarda Navoiy viloyatining Tomdi, Uchquduq, Konimex, Nurota tumanlari va Zarafshon shahrida kafolatlangan ish oʻrinlari yaratish hamda yoʻl-transport, muhandislik-kommunikatsiya va ijtimoiy infratuzilmalarni rivojlantirish

TADBIRLARI DASTURI

T/r	Chora-tadbirlarning nomlanishi	Sarf-xarajatlar (mlrd soʻm)	Moliyalashtirish manbalari	Amalga oshirish muddati	Masʼul ijrochilar
I. YANGI ISHLAB CHIQARISH QUVVATLARINI YARATISH, QISHLOQ XOʻJALIGI, SHU JUMLADAN CHORVACHILIK TARMOGʻINI HAMDA XIZMAT KOʻRSATISH SOHASINI RIVOJLANTIRISH ORQALI AHOLI BANDLIGINI TAʼMINLASH
1.	Sanoat sohasida 144 ta loyihani amalga oshirish hisobiga 4,7 mingtadan koʻproq yangi ish oʻrinlarini yaratish.	681,4	Tashabbuskorlarning oʻz mablagʻlari, tijorat banklari kreditlari, xalqaro moliya institutlari mablagʻlari	2017 — 2019-yillar	Navoiy viloyati hokimligi, Iqtisodiyot vazirligi, Qishloq va suv xoʻjaligi vazirligi, xoʻjalik boshqaruvi organlari, tijorat banklari
2.	Xizmatlar va servis infratuzilmasini rivojlantirish sohasida 154 ta loyihani amalga oshirish hisobiga 932 tadan koʻproq yangi ish oʻrinlarini yaratish.	47,9
3.	Qishloq xoʻjaligi sohasida 72 ta loyihani amalga oshirish hisobiga 884 ta yangi ish oʻrinlarini yaratish.	48,1
4.	Birinchi navbatda xorijiy investorlarni jalb qilish orqali qurilish materiallari ishlab chiqarish boʻyicha zamonaviy korxona tashkil etish.	Biznes rejaga muvofiq	Xorijiy investitsiyalar, tashabbuskorlarning oʻz mablagʻlari, tijorat banklari kreditlari	2017 — 2019-yillar	“Oʻzqurilishmateriallari” AJ, Davlat geologiya qoʻmitasi, Navoiy viloyati hokimligi, tijorat banklari
5.	Korxonalarga tikuv va trikotaj mahsulotlari ishlab chiqarishni tashkil etish uchun asbob-uskunalarni taqdim etish orqali ularda qoʻshimcha ish oʻrinlarini yaratish. Shu jumladan: Tomdi tumanida — 50 ta; Uchquduq tumanida — 250 ta; Konimex tumanida — 100 ta; Nurota tumanida — 100 ta; Zarafshon shahrida — 500 ta.	Hisob-kitoblarga muvofiq	“Navoiy kon-metallurgiya kombinati” DK mablagʻlari	2018 yil II chorak	“Navoiy kon-metallurgiya kombinati” DK, “Oʻztoʻqimachiliksanoat” Uyushmasi, Navoiy viloyati hokimligi, Bandlik va mehnat munosabatlari vazirligi
5.	Ushbu maqsadlar uchun Tomdi, Uchquduq, Konimex, Nurota tumanlari va Zarafshon shahrida binolar (ishlab chiqarish maydonlari)ni ajratish.	Hisob-kitoblarga muvofiq	“Navoiy kon-metallurgiya kombinati” DK mablagʻlari	2017 yil IV chorak
II. CHORVACHILIK TARMOGʻINI, SHU JUMLADAN TUYACHILIKNI YANADA RIVOJLANTIRISH, CHORVACHILIK MAHSULOTLARINI QAYTA ISHLASHNI RAGʻBATLANTIRISH
6.	Tomdi tumanida 1,5 ming bosh tuya va 10 ming bosh qoʻy boqishga moʻljallangan chorvachilik komplekslarini tashkil etish. Bunda tuya va mayda shoxli hayvonlarni chetdan, jumladan quyidagilarni tashkil etish orqali olib kelish:
	500 bosh tuya va 3000 bosh qoʻy boqishga moʻljallangan chorvachilik kompleksi;	4,0	“Qizilqumsement” AJ mablagʻlari	2017-2018-yillar	“Qizilqumsement” AJ, Navoiy viloyati hokimligi
	500 bosh tuya va 3000 bosh qoʻy boqishga moʻljallangan chorvachilik kompleksi;	4,0	“Navoiyazot” AJ mablagʻlari		“Navoiyazot” AJ, Navoiy viloyati hokimligi
	500 bosh tuya va 4000 bosh qoʻy boqishga moʻljallangan chorvachilik kompleksi.	4,5	“Navoiy kon-metallurgiya kombinati” DK mablagʻlari	2017-2018-yillar	“Navoiy kon-metallurgiya kombinati” DK, Navoiy viloyati hokimligi
7.	Chetdan olib kelingan 1000 bosh tuyalarni agrofirmalar orqali sotib olish uchun aholiga imtiyozli kreditlar ajratish.	10,0	AT Xalq banki mablagʻlari	2017-2018-yillar	AT Xalq banki, Navoiy viloyati hokimligi
8.	Chorvachilikka ixtisoslashgan fermer xoʻjaliklarining suv taʼminotini 87 ta yangi suv quduqlarini qazish orqali yaxshilash.	Hisob-kitoblarga muvofiq	Qishloq va suv xoʻjaligi vazirligiga ajratiladigan markazlashtirilgan kapital qoʻyilmalar mablagʻlari	2018-2019-yillar	Qishloq va suv xoʻjaligi vazirligi, Moliya vazirligi, Navoiy viloyati hokimligi
III. YOʻL-TRANSPORT, MUHANDISLIK-KOMMUNIKATSIYA VA IJTIMOIY INFRATUZILMANI RIVOJLANTIRISH
9.	51,6 km yoʻlni kapital taʼmirlash, 54,12 km yoʻlni joriy taʼmirlash.	27,5	Respublika va mahalliy budjet mablagʻlari, Respublika yoʻl jamgʻarmasi mablagʻi	2017 — 2019-yillar	Navoiy viloyati hokimligi, Avtomobil yoʻllari davlat qoʻmitasi. Respublika yoʻl jamgʻarmasi
10.	Ayrim hududlarning yoʻl-transport infratuzilmasini rivojlantirish. Hududlarning aholi punktlarini bogʻlovchi avtomobil yoʻllarini qurish va rekonstruksiya qilish qilish rejasini ishlab chiqish. Ishlab chiqilgan rejaga muvofiq avtomobil yoʻllarini taʼmirlash va qurish.	Loyiha-smeta hujjatlariga muvofiq	Respublika yoʻl jamgʻarmasi, respublika va mahalliy budjet mablagʻlari	2017 — 2019-yillar	Moliya vazirligi, Iqtisodiyot vazirligi, Avtomobil yoʻllari davlat qoʻmitasi, Respublika yoʻl jamgʻarmasi, Navoiy viloyati hokimligi
11.	Dagistov, Xolmurod, Momiqchi aholi punktlarini, shuningdek fosforit zavodi hududini mobil aloqa tarmogʻi bilan qamrab olishni taʼminlash: 12 km optik tolali aloqa liniyasini qurish; past kuchlanishli 34 ta raqamli teleuzatkichlarni oʻrnatish.	3,2	Mobil aloqa operatorlari, “Oʻzbektelekom” AK	2017 — 2019-yillar	Axborot texnologiyalari va kommunikatsiyalarini rivojlantirish vazirligi, Navoiy viloyati hokimligi
12.	Hududlarning elektr uzatish liniyalari tarmogʻini qurish va modernizatsiya qilish.	Loyiha-smeta hujjatlariga muvofiq	“Oʻzbekenergo” AJ va mahalliy budjet mablagʻlari	2017-2018-yillar	“Oʻzbekenergo” AJ, Navoiy viloyati hokimligi
13.	Muqobil energiya manbalarini joriy qilish boʻyicha loyihalarni amalga oshirish, shu jumladan quyosh va shamol energiyasi asosida energiya tizimlarini rivojlantirish.	Loyiha-smeta hujjatlariga muvofiq	“Oʻzbekenergo” AJ mablagʻlari, tashabbuskorlarning oʻz mablagʻlari, xalqaro moliya institutlari mablagʻlari	2017 — 2019-yillar	“Oʻzbekenergo” AJ, Investitsiyalar boʻyicha davlat qoʻmitasi, Navoiy viloyati hokimligi
14.	86,9 km suv quvurlari tarmogʻini qurish.	17,2	Uy-joy kommunal xoʻjaligini rivojlantirish jamgʻarmasi, “Toza ichimlik suvi” jamgʻarmasi mablagʻlari	2017 — 2019-yillar	Uy-joy kommunal xizmat koʻrsatish vazirligi, Navoiy viloyati hokimligi
15.	46 ta umumtaʼlim maktabi va 28 ta maktabgacha taʼlim muassasalarida qurilish-taʼmirlash ishlarini amalga oshirish hamda ularni rekonstruksiya qilish.	74,4	Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari	2017 — 2019-yillar	Xalq taʼlimi vazirligi, Moliya vazirligi. Iqtisodiyot vazirligi, Navoiy viloyati hokimligi
16.	Maktablarni qozoq tilidagi oʻquv materiallari va kitoblari bilan taʼminlash hamda oʻqituvchilar bilan butlash.	0,1	Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari	2017 — 2019-yillar	Xalq taʼlimi vazirligi, Moliya vazirligi,Iqtisodiyot vazirligi, Navoiy viloyati hokimligi
17.	Tomdi agroiqtisodiyot kolleji negizida 100 nafar oʻquvchiga moʻljallangan maktab-internatni tashkil etish.	0,1	Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari	2018-yil II chorak	Xalq taʼlimi vazirligi, Moliya vazirligi, Iqtisodiyot vazirligi, Navoiy viloyati hokimligi
18.	19 ta sogʻliqni saqlash muassasalarida qurilish-taʼmirlash ishlarini amalga oshirish hamda ularni rekonstruksiya qilish.	31,0	Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari	2017 — 2019-yillar	Sogʻliqni saqlash vazirligi, Moliya vazirligi, Iqtisodiyot vazirligi, Navoiy viloyati hokimligi
IV. HUDUDNING HAYVONOT VA OʻSIMLIK DUNYOSI NOYOB TURLARINI SAQLAB QOLISH VA ULARNING SONINI KOʻPAYTIRISH ORQALI EKOTURIZMNI RIVOJLANTIRISH
19.	Hududlarning hayvonot va oʻsimlik dunyosi noyob turlarini saqlab qolish va ularning sonini koʻpaytirishga yoʻnaltirilgan loyihalarni amalga oshirish.	Loyiha-smeta hujjatlariga muvofiq	Tashabbuskorlarning oʻz mablagʻlari, tijorat banklari kreditlari	2017-2018-yillar	Oʻrmon xoʻjaligi davlat qoʻmitasi, Fanlar akademiyasi, Ekologiya va atrof muhitni muhofaza qilish davlat qoʻmitasi, Navoiy viloyati hokimligi
20.	Turistlarni jalb qilish uchun zarur infratuzilmani tashkil qilgan holda ekoturizmni rivojlantirish, mehmon uylari (oʻtovlar)ni tashkil qilish.	Loyiha-smeta hujjatlariga muvofiq	Tashabbuskorlarning oʻz mablagʻlari, tijorat banklari kreditlari	2017-2018-yillar	Turizmni rivojlantirish davlat qoʻmitasi, “Oʻzsanoatqurilishbank” ATB, “Ipoteka bank” ATIB, “Asaka” ATB
21.	Ov faoliyatini tashkil qilish uchun zarur infratuzilmani shakllantirish.	Loyiha-smeta hujjatlariga muvofiq	Tashabbuskorlarning oʻz mablagʻlari, tijorat banklari kreditlari	2017 — 2019-yillar	Oʻrmon xoʻjaligi davlat qoʻmitasi, Ichki ishlar vazirligi, Ekologiya va atrof muhitni muhofaza qilish davlat qoʻmitasi, Navoiy viloyati hokimligi
22.	Ayrim hududlarning diqqatga sazovor joylari va turistik salohiyatini televideniyeda yoritish.			2018-yil I chorak	Milliy teleradiokompaniya, Navoiy viloyati hokimligi
V. AYRIM HUDUDLARNING BAND BOʻLMAGAN AHOLISINI HUNARMANDCHILIK VA BOSHQA MUTAXASSISLIKLARGA OʻQITISH HAMDA ULARNING MALAKASINI OSHIRISH ISHLARINI TASHKIL ETISH
23.	Band boʻlmagan aholini hunarmandchilik va boshqa mutaxassisliklarga oʻqitish, ularning malakasini oshirish ishlarini tashkil etish.	0,1	Bandlikka koʻmaklashish jamgʻarmasi mablagʻlari	2017 — 2019-yillar	Bandlik va mehnat munosabatlari vazirligi, Navoiy viloyati hokimligi
24.	Har yili 500 nafar band boʻlmagan aholini jamoat ishlariga jalb qilish.	0,6	Jamoat ishlari jamgʻarmasi mablagʻlari	2017 — 2019-yillar	Bandlik va mehnat munosabatlari vazirligi, Navoiy viloyati hokimligi

(1-ilova Oʻzbekiston Respublikasi Prezidentining 2018-yil 20-martdagi PF-5383-sonli Farmoni tahririda — Qonun hujjatlari maʼlumotlari milliy bazasi, 20.03.2018-y., 06/20/5383/0980-son)

Oʻzbekiston Respublikasi Prezidentining 2017-yil 29-sentabrdagi PQ-3301-son qaroriga
2-ILOVA

Dastur parametrlarini bajarishni taʼminlash yuzasidan mahalliy davlat va xoʻjalik boshqaruvi organlari, ijroiya hokimiyat organlarining faoliyatini muvofiqlashtiruvchi Respublika ishchi guruhi

TARKIBI

1.	A.J. Ramatov	—	Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi, respublika ishchi guruhi rahbari
2.	K.B. Tursunov	—	Navoiy viloyati hokimi, respublika ishchi guruhi rahbarining oʻrinbosari
3.	S.X. Bekenov	—	iqtisodiyot vazirining birinchi oʻrinbosari, respublika ishchi guruhi rahbarining oʻrinbosari
4.	A.A. Xaitov	—	bandlik va mehnat munosabatlari vaziri
5.	A.K. Shadmanov	—	sogʻliqni saqlash vaziri
6.	U.I. Inoyatov	—	xalq taʼlimi vaziri
7.	A.Ya. Haydarov	—	moliya vazirining birinchi oʻrinbosari
8.	D.A. Nazarmuxamedov	—	ichki ishlar vazirining birinchi oʻrinbosari
9.	T.A. Ishmetov	—	Markaziy bank raisining birinchi oʻrinbosari
10.	B.R. Parpiyev	—	Davlat soliq qoʻmitasi raisi
11.	A.A. Abduvaliyev	—	Avtomobil yoʻllari davlat qoʻmitasi raisi
12.	B.T. Qoʻchqorov	—	Ekologiya va atrof muhitni muhofaza qilish davlat qoʻmitasi raisi
13.	R.A. Gulyamov	—	Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi
14.	A.X. Abdullayev	—	Yer resurslari, geodeziya, kartografiya va davlat kadastri davlat qoʻmitasi raisi
15.	A.X. Toʻxtayev	—	qurilish vaziri
16.	K.S. Sanaqulov	—	“Navoiy kon-metallurgiya kombinati” DK bosh direktori
17.	U.M. Mustafoyev	—	“Oʻzbekenergo” AJ raisi
18.	A.S. Mustafayev	—	“Oʻztransgaz” AJ raisi
19.	M.Yu. Fayziyev	—	“Oʻzneftmahsulot”AJ raisi
20.	D.S. Azimov	—	uy-joy kommunal xizmat koʻrsatish vazirining birinchi oʻrinbosari
21.	B.K. Zaripov	—	“Oʻzqurilishmateriallari” AJ raisi
22.	M.B. Jumaniyazov	—	Vazirlar Mahkamasi ATD mudiri, respublika ishchi guruhi kotibi
23.	lavozim boʻyicha	—	tijorat banklari (AT Xalq banki, “Oʻzsanoatqurilishbank” ATB, “Ipoteka bank” ATIB, “Asaka” ATB) rahbarlari

Izoh. Respublika ishchi guruhi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki tegishli funksiyalarni bajarish zimmasiga yuklangan shaxslar kiritiladi.

(Qonun hujjatlari maʼlumotlari milliy bazasi, 30.09.2017-y., 07/17/3301/0040; 20.03.2018-y., 06/20/5383/0980-son, 31.07.2018-y., 06/18/5483/1594-son; 09.10.2020-y., 07/20/4857/1357-son; 27.04.2024-y., 06/24/67/0307-son; 30.12.2024-y., 07/24/455/1092-son)