Davlat mulkini ijaraga berish tartibini yanada takomillashtirish hamda tadbirkorlik subyektlari uchun qulay shart-sharoitlar yaratish maqsadida Vazirlar Mahkamasi qaror qiladi:

1. Vazirlar Mahkamasining 2009-yil 8-apreldagi 102-son qarori (Oʻzbekiston Respublikasi QT, 2009-y., 4-son, 26-modda) bilan tasdiqlangan Davlat mulkini ijaraga berish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi bir oy muddatda Oʻzbekiston Respublikasi Adliya vazirligi bilan birgalikda davlat mulkini tadbirkorlik subyektlariga, ular tomonidan investitsiya majburiyatlari qabul qilish sharti bilan, ijara toʻlovining eng kam stavkasi boʻyicha, tegishli koeffitsiyentlarni belgilamagan holda, ijaraga berishni nazarda tutuvchi namunaviy ijara shartnomasini ishlab chiqsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 2-bandda:

ikkinchi xatboshidagi “yuridik shaxslarning mulki” soʻzlaridan keyin “(shu jumladan texnopark hududidagi davlat mulki)” soʻzlari qoʻshilsin;

quyidagi mazmundagi xatboshi qoʻshilsin:

“texnopark — kamida 10 000 kv.m tutash hududdan, davlat mulki (binolar va inshootlar)dan hamda mahalliy davlat hokimiyati organi qaroriga muvofiq tashkil etilgan (oʻz faoliyatini oʻzini oʻzi mablagʻ bilan taʼminlash tamoyili boʻyicha va Oʻzbekiston Respublikasi Davlat raqobat qoʻmitasi, Moliya vazirligi hamda Iqtisodiyot vazirligining tegishli hududiy organlari bilan kelishilgan biznes-reja asosida amalga oshiradigan) yuridik shaxsga ishlab chiqarish faoliyatini tashkil etish uchun tasarruf etish huquqisiz berilgan zarur infratuzilmadan iborat boʻlgan mulkiy kompleks”.

2. 7-bandga quyidagi mazmundagi xatboshi qoʻshilsin:

“Texnopark hududidagi davlat mulkini ijaraga berishning eng koʻp muddati, davlat mulkini ijaraga berishning ilgari tuzilgan shartnomalari boʻyicha majburiyatlar oʻz vaqtida va toʻliq bajarilgan taqdirda ushbu muddatni uzaytirish imkoni bilan oʻn yilni tashkil qiladi, qonun hujjatlarida nazarda tutilgan holatlar bundan mustasno”.

3. Quyidagi mazmundagi 7¹-bandi qoʻshilsin:

“7¹. Texnopark hududidagi davlat mulki tadbirkorlik subyektlariga ijara shartnomasi asosida, ular tomonidan investitsiya majburiyatlari qabul qilinishi sharti bilan ijaraga beriladi.

Investitsiya majburiyatlari va ularni tadbirkorlik subyektlari tomonidan bajarish shartlari ijara shartnomasida belgilanadi”.

4. 10-bandda:

quyidagi mazmundagi toʻrtinchi xatboshi qoʻshilsin:

“Texnopark hududidagi davlat mulki tadbirkorlik subyektlariga, tegishli koeffitsiyentlar belgilanmasdan, ijara toʻlovining eng kam stavkasi boʻyicha beriladi”;

toʻrtinchi — sakkizinchi xatboshilar tegishli ravishda beshinchi — toʻqqizinchi xatboshilar deb hisoblansin.

5. 12-bandning sakkizinchi xatboshi quyidagi tahrirda bayon qilinsin:

“Ijaraga oluvchi ijara shartnomasi muddatini uzaytirish toʻgʻrisida yozma ravishda murojaat qilgan taqdirda shartnoma muddati, ushbu ijara obyekti boʻyicha majburiy tartibda eʼlon berilmasdan, ushbu Nizomning 7-bandida nazarda tutilgan, tegishli ravishda davlat mulkini ijaraga berishning eng koʻp muddatlaridan oshmaydigan muddatlarga belgilangan tartibda uzaytiriladi. Ushbu eng koʻp muddatlar tugagach davlat mulki ijaraga umumiy asoslarda beriladi”.