Oʻzbekiston Respublikasi Prezidentining 2014-yil 19-fevraldagi PQ–2133-son qarori bilan tasdiqlangan “Sogʻlom bola yili” Davlat dasturining 83-bandini bajarish yuzasidan hamda oʻquvchi-yoshlarning ijodiy salohiyatini rivojlantirish, jismoniy va maʼnaviy barkamol avlodni tarbiyalash, ularga vatanparvarlik tuygʻularini va sogʻlom turmush tarzi koʻnikmalarini singdirish maqsadida Vazirlar Mahkamasi qaror qiladi:

1. Andijon viloyatining Andijon tumanidagi Xortum qishloq fuqarolar yigʻini, Kamolot koʻchasida barpo etilayotgan oʻquv, madaniyat, sport va turar joy maskanlari negizida Oʻzbekiston Respublikasi Xalq taʼlimi vazirligi huzuridagi Respublika oʻquvchi-yoshlar markazi (keyingi oʻrinlarda “Markaz” deb ataladi) tashkil etilsin va uning asosiy vazifalari etib quyidagilar belgilansin:

respublika umumtaʼlim maktablari oʻquvchilari, jumladan, ijtimoiy himoyaga muhtoj oila farzandlari, ota-ona qaramogʻidan mahrum boʻlgan bolalarga taʼtillar davrida oʻz bilimlarini yanada oshirishga koʻmaklashish, ularning mazmunli dam olishi va sogʻligʻini mustahkamlash uchun shart-sharoitlar yaratish;

oʻquvchilarda vatanparvarlik, milliy va umuminsoniy qadriyatlarga hurmat, axborot makonidagi turli tahdidlarga nisbatan sogʻlom immunitetni shakllantirish;

bolalarning mustaqil hayotiy pozitsiyaga ega boʻlishini taʼminlashga yoʻnaltirilgan madaniy, maʼnaviy-maʼrifiy tadbirlar va mahorat darslarini tashkil etish;

oʻquv yili davomida Markazga yaqin atrofda joylashgan umumtaʼlim maktablari oʻquvchilari uchun qiziqishlariga koʻra toʻgaraklar tashkil etish va boshlangʻich kasb-hunar sirlarini oʻrgatish.

2. Oʻzbekiston Respublikasi Xalq taʼlimi vazirligi:

bir oy muddatda Markaz toʻgʻrisidagi Nizomni tasdiqlasin hamda Markazning belgilangan tartibda davlat roʻyxatidan oʻtkazilishini taʼminlasin;

Sogʻliqni saqlash vazirligi bilan birgalikda Markazga taʼtillar davrida oʻquvchilarni qabul qilish tartibini ishlab chiqsin va belgilangan tartibda tasdiqlasin;

Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi bilan kelishgan holda Markazning shtatlar jadvalini tasdiqlasin. Bunda shtatlarni saqlash xarajatlarining tegishli binolar hajmiga va foydalanishga topshirish muddatlariga mutanosib ravishda amalga oshirilishi belgilab qoʻyilsin;

taʼlim-tarbiya jarayonini tashkil etish maqsadida Markazni malakali mutaxassislar va zarur oʻquv-uslubiy adabiyotlar bilan taʼminlasin.

3. Andijon viloyati hokimligi yuqorida koʻrsatilgan oʻquv, madaniyat, sport va turar joy binolari qurilishini qisqa muddatlarda tugatish hamda ularni tezkor boshqarish huquqi bilan Markazga berish chora-tadbirlarini koʻrsin.

4. Oʻzbekiston Respublikasi Moliya vazirligi Davlat budjeti parametrlarida “Taʼlim” sohasiga ajratiladigan mablagʻlar doirasida:

2014-yilda Markazni saqlash va unga respublikaning boshqa hududlaridan keladigan oʻquvchilarning yoʻl xarajatlarini moliyalashtirish uchun zarur boʻladigan mablagʻlarni ajratsin, 2015-yildan boshlab esa Oʻzbekiston Respublikasi Davlat budjeti parametrlarida ularni nazarda tutsin;

Xalq taʼlimi vazirligining Sogʻliqni saqlash vazirligi bilan kelishilgan, asoslangan hisob-kitoblari boʻyicha Markazni tegishli asbob-uskuna va jihozlar, shuningdek bitta “Isuzu” rusumli avtobus hamda bitta “Damas” rusumli yengil avtomobil bilan bosqichma-bosqich taʼminlash uchun zarur mablagʻlarni moliyalashtirishni amalga oshirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.I. Ikramov va B.I. Zakirov zimmasiga yuklansin.