Oʻzbekiston Respublikasi Prezidentining “Oʻzbekiston Respublikasining jamoat taʼlim axborot tarmogʻini tashkil etish toʻgʻrisida” 2005-yil 28-sentabrdagi PQ-191-son qaroriga muvofiq “ZiyoNET” taʼlim axborot tarmogʻini yanada takomillashtirish, uning sifatini oshirish hamda umumtaʼlim maktablari, akademik litseylar, kasb-hunar kollejlari, oliy taʼlim muassasalari, yoshlar tashkilotlari, axborot-kutubxona muassasalari, muzeylar va boshqa taʼlim, ilmiy va madaniy-maʼrifiy muassasalarning “ZiyoNET” tarmogʻidan foydalanishini yaxshilash maqsadida Vazirlar Mahkamasi qaror qiladi:

1. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi, Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Madaniyat va sport ishlari vazirligining “Oʻzbektelekom” aksiyadorlik kompaniyasini umumtaʼlim maktablari, akademik litseylar, kasb-hunar kollejlari, oliy taʼlim muassasalari, yoshlar tashkilotlari, axborot-kutubxona muassasalari, muzeylar va mamlakatning boshqa taʼlim, ilmiy va madaniy-maʼrifiy muassasalarini “ZiyoNET” tarmogʻiga ulash boʻyicha operator etib belgilash toʻgʻrisidagi taklifi qabul qilinsin.

2. “Oʻzbektelekom” aksiyadorlik kompaniyasi:

umumtaʼlim maktablari, akademik litseylar, kasb-hunar taʼlimi muassasalari (kasb-hunar maktablari, kasb-hunar kollejlari, texnikumlar), oliy taʼlim muassasalari, yoshlar tashkilotlari, axborot-kutubxona muassasalari, muzeylar va boshqa taʼlim, ilmiy va madaniy-maʼrifiy muassasalarning tuzilgan shartnomalarga muvofiq “ZiyoNET” tarmogʻining axborot resurslaridan belgilangan tartibda uzluksiz foydalanishini;

umumtaʼlim maktablari, akademik litseylar, kasb-hunar taʼlimi muassasalari (kasb-hunar maktablari, kasb-hunar kollejlari, texnikumlar), oliy taʼlim muassasalari, yoshlar tashkilotlari, axborot-kutubxona muassasalari, muzeylar va boshqa taʼlim, ilmiy va madaniy-maʼrifiy tashkilotlarga “ZiyoNET” tarmogʻidan foydalanish xizmatlarini Oʻzbekiston Respublikasi Moliya vazirligi bilan kelishilgan holda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan tasdiqlangan roʻyxat va tariflar boʻyicha koʻrsatilishini taʼminlasin.

3. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi bir oy muddatda manfaatdor vazirliklar va idoralar bilan birgalikda umumtaʼlim maktablari, akademik litseylar, kasb-hunar kollejlari, oliy taʼlim muassasalari, yoshlar tashkilotlari, axborot-kutubxona muassasalari, muzeylar va boshqa taʼlim, ilmiy va madaniy-maʼrifiy muassasalarini telefonlashtirish va “ZiyoNET” tarmogʻiga ulash boʻyicha jadvalni tasdiqlasin.

4. Kompyuterlashtirish va axborot-kommunikatsiya texnologiyalarini rivojlantirish boʻyicha muvofiqlashtiruvchi kengash bir oy muddatda manfaatdor vazirliklar va idoralar bilan birgalikda “ZiyoNET” tarmogʻi axborot resurslarining yagona reyestrini shakllantirish va yuritish tartibini tasdiqlasin, unga Oʻzbekiston Respublikasi davlat organlarining ilmiy-taʼlim resurslari, saytlari hamda Internet tarmogʻi milliy segmenti saytlarini kiritishni nazarda tutsin.

5. Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi, Madaniyat vazirligi, Yoshlar ittifoqi va boshqa manfaatdor vazirliklar va idoralar:

telefonlashtirish va “ZiyoNET” tarmogʻiga ulash jadvaliga muvofiq Qoraqalpogʻiston Respublikasi Xalq taʼlimi vazirligi, viloyat xalq taʼlimi boshqarmalari, hududiy oʻrta maxsus, kasb-hunar taʼlimi boshqarmalari, oliy taʼlim muassasalari, yoshlar tashkilotlari, axborot-kutubxona muassasalari, muzeylar va boshqa taʼlim, ilmiy va madaniy-maʼrifiy muassasalar bilan “Oʻzbektelekom” aksiyadorlik kompaniyasining filiallari oʻrtasida shartnomalar tuzish tashkil etilishini, shuningdek tuzilgan shartnomalar boʻyicha koʻrsatilgan xizmatlar va bajarilgan ishlar uchun oʻz vaqtida haq toʻlanishini;

mahalliy tarmoqlarni tashkil etish yoʻli bilan umumtaʼlim maktablari, akademik litseylar, kasb-hunar kollejlari, oliy taʼlim muassasalari, yoshlar tashkilotlari, axborot-kutubxona muassasalari, muzeylar va boshqa taʼlim, ilmiy va madaniy-maʼrifiy muassasalarning “ZiyoNET” tarmogʻi resurslaridan keng foydalanishini taʼminlasinlar.

6. Oʻzbekiston Respublikasi Vazirlar Mahkamasining “ZiyoNET” axborot tarmogʻini yanada rivojlantirish toʻgʻrisida” 2005-yil 28-dekabrdagi 282-son qarorining 4-bandi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Axborot tizimlari va telekommunikatsiyalar masalalari axborot-tahlil departamentiga hamda Oʻzbekiston Respublikasi Axborot texnologiyalari va kommunikatsiyalarini rivojlantirish vaziri X.M. Mirzohidov zimmasiga yuklansin.