Oʻzbekiston Respublikasi Hukumati tomonidan takdim etilgan Budjetnomani hamda muhokama qilish davomida Qonunchilik palatasi deputatlarining fikr-mulohazalari va takliflari hisobga olingan holda maromiga yetkazilgan Oʻzbekiston Respublikasining 2013-yilgi Davlat budjeti loyihasini koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasining 2013-yilgi Davlat budjeti hamda shu davrga moʻljallangan soliq va budjet siyosatining asosiy yoʻnalishlari Davlat budjeti taqchilligining eng yuqori darajasi yalpi ichki mahsulot hajmiga nisbatan 1,0 foiz miqdorida belgilangan holda qabul qilinsin.

2. Oʻzbekiston Respublikasi Hukumati:

iqtisodiyotning yuksak surʼatlarda barqaror oʻsishini hamda aholi farovonligi va turmush darajasini oshirishga qaratilgan makroiqtisodiy barqarorlikning yanada mustahkamlanishini taʼminlash;

yuqori texnologiyalarga asoslangan zamonaviy tarmoqlar va ishlab chiqarishlarning ildam rivojlanishini taʼminlash orqali iqtisodiyotdagi tuzilmaviy oʻzgarishlarni chuqurlashtirish hamda uni diversifikatsiya qilish, xalqaro sifat standartlariga javob beruvchi raqobatbardosh mahsulotlar ishlab chiqarishga yoʻnaltirilgan ishlab turgan quvvatlarni modernizatsiya qilish va texnik jihatdan yangilash jarayonlarini jadallashtirish;

soliqlar va boshqa majburiy toʻlovlarning oʻz vaqtida kelib tushishi, berilgan imtiyozlar hamda preferensiyalar hisobiga xoʻjalik yurituvchi subyektlar tasarrufida qoladigan mablagʻlardan oqilona va samarali foydalanilishini taʼminlash;

avtomobil yoʻllari va temir yoʻl kommunikatsiyalari, shuningdek telekommunikatsiya tarmoqlarini qurish hamda rekonstruksiya qilish boʻyicha loyihalarning amalga oshirilishini jadallashtirish hisobiga transport va muhandislik-kommunikatsiya infratuzilmalarining rivojlantirilishini taʼminlash;

fermer xoʻjaliklari faoliyatini, kichik biznes va xususiy tadbirkorlikni davlat tomonidan yanada qoʻllab-quvvatlash hamda ragʻbatlantirish;

yangi turar joy shaharchalari barpo etish yoʻli bilan Qishloq joylarda namunaviy loyihalar boʻyicha yakka tartibdagi uy-joylar qurish dasturini bajarish, shuningdek ishlab chiqarish va ijtimoiy infratuzilma obyektlari qurish;

kichik biznes va xususiy tadbirkorlikni yanada rivojlantirish, kasanachilikning turli shakllarini kengaytirish va oilaviy tadbirkorlikni rivojlantirish, shuningdek kasb-hunar kollejlari va akademik litseylarning bitiruvchilarini ishga joylashtirish hisobiga 2013-yilda ish oʻrinlari tashkil etish va aholi bandligini taʼminlash dasturi soʻzsiz bajarilishi;

ish haqi, pensiyalar, stipendiyalar, ijtimoiy nafaqalar va kam taʼminlangan oilalarga moddiy yordam koʻrsatishni oʻz vaqtida moliyalashtirish;

budjet mablagʻlaridan maqsadli va samarali foydalanilishi xamda ushbu mablagʻlarning asossiz sarflanishini bartaraf etish chora-tadbirlari koʻrilishi ustidan qatʼiy nazorat oʻrnatish;

inflatsiyaning belgilangan eng yuqori darajadan oshib ketishiga yoʻl qoʻymaslik, bunda Davlat budjeti taqchilligi respublika budjetining boʻsh qolgan qoldiq mablagʻlari va boshqa noinflatsiyaviy manbalar hisobiga moliyalashtirilishini nazarda tutish yuzasidan zarur chora-tadbirlar koʻrsin.

3. Mahalliy davlat hokimiyati organlari Davlat budjetining parametrlari soʻzsiz bajarilishini, mahalliy budjetlarning xarajatlari sifatli rejalashtirilishi va oʻz vaqtida moliyalashtirilishini taʼminlasin, budjet mablagʻlaridan maqsadli va samarali foydalanilishi ustidan qatʼiy nazorat oʻrnatsin.

4. Ushbu Qaror Oʻzbekiston Respublikasi Oliy Majlisining Senatiga yuborilsin.

5. Ushbu Qaror qabul qilingan kundan eʼtiboran kuchga kiradi.