Gʻoyat muhim xalqaro turizm yoʻnalishi — Buyuk Ipak yoʻlini qayta tiklash, xorijiy sayyohlarni keng jalb etish, shuningdek mamlakatda zamonaviy turizm sanoatini vujudga keltirish maqsadida:

1. Buyuk Ipak yoʻlidagi shaharlar — Samarqand, Buxoro, Xiva va Toshkentda xalqaro turizm boʻyicha maxsus ochiq iqtisodiy mintaqalar tashkil qilinsin.

2. Mazkur shaharlarning aeroportlari va temir yoʻl vokzallarida xorijiy sayyohlar uchun bojxona rasm-rusumlarining xalqaro meʼyorlarga mos soddalashtirilgan tartibi, shuningdek tranzit sayyohlar uchun maxsus bojxona zonalari joriy qilinsin.

5. Tashqi ishlar vazirligi, Ichki ishlar vazirligi ikki oy muddat ichida xorijiy sayyohlar uchun Oʻzbekiston Respublikasi qonunlarida belgilangan obyektlardan tashqari respublikaning butun hududida amal qiluvchi yagona vizani oʻrnatsin.

6. Tijorat banklariga tadbirkorlar xususiy mehmonxonalarni va mehmonxona infrastrukturasi inshootlarini barpo etishlari chogʻida ularga kamida besh yil muddat ichida toʻlash sharti bilan kreditlar berish tavsiya qilinsin.

7. “Oʻzbekturizm” Milliy kompaniyasi Tashqi iqtisodiy faoliyat milliy banki bilan birgalikda investitsiya banki — “Oʻzsayohatinvestbank”ni tashkil qilsin va jamlanayotgan mablagʻlar qatʼiyan aniq maqsad yoʻlida foydalanilishi ustidan nazoratni taʼminlasin.

Oʻzbekiston Respublikasining Markaziy banki va Moliya vazirligi 15 kun muddat ichida “Oʻzsayohatinvestbank”ning ustav jamgʻarmasini shakllantirish manbalari va uni qoʻllab-quvvatlash chora-tadbirlari toʻgʻrisidagi takliflarni kiritsinlar.

8. Vazirlar Mahkamasi huzurida turizm boʻyicha Idoralararo kengash tuzilsin va quyidagilar shu kengash faoliyatining asosiy vazifalari qilib belgilansin:

turizm sohasida iqtisodiy islohotlarni chuqurlashtirish;

jahon andozalari darajasida kichik va oʻrta mehmonxonalar, motellar va kempinglar tarmogʻi shakllantirilishini muvofiqlashtirish;

sayr-tomoshalar zamonaviy industriyasini, madaniy va sport-sogʻlomlashtirish markazlarini barpo etishga koʻmaklashish;

noyob turizm imkoniyatlari va tarixiy-madaniy meros keng koʻlamda targʻib qilinishi va saqlanishini tashkil etish;

sayyohlik tizimida muvofiqlashtirilgan ilmiy-texnikaviy va investitsiya siyosatini oʻtkazish;

sayyohlik sohasida kadrlarni tayyorlash va qayta tayyorlashni taʼminlash.

9. “Oʻzbekturizm” Milliy kompaniyasi, Madaniyat ishlari vazirligi, Fanlar akademiyasi, yodgorliklarni muhofaza qilish Respublika jamiyati manfaatdor tashkilotlar bilan birgalikda Buyuk Ipak yoʻlidagi koʻhna shaharlarda joylashgan meʼmoriy, arxeologik, tarixiy va madaniy yodgorliklarni qayta tiklash, obodonlashtirish hamda foydalanish boʻyicha milliy “Meros” dasturi loyihasini ikki oy muddat ichida ishlab chiqsinlar va Idoralararo kengash muhokamasiga taqdim etsinlar.

10. Xalqaro turizmni rivojlantirish bilan bogʻliq barcha masalalarning oʻz vaqtida hal etilishi uchun shaxsiy javobgarlik “Oʻzbekturizm”, “Oʻzbekiston havo yoʻllari”, “Oʻzbekiston temir yoʻllari” kompaniyalarining, Ichki ishlar vazirligining, Tashqi ishlar vazirligining, chegara va bojxona xizmatlarining rahbarlari zimmasiga yuklansin.

11. Adliya vazirligi qonunlarga mazkur Farmondan kelib chiqadigan oʻzgartish va qoʻshimchalar kiritish boʻyicha takliflarni ishlab chiqib, taqdim etsin.

12. Vazirlar Mahkamasi ikki hafta muddat ichida ushbu Farmonni ijro etish yuzasidan tegishli qarorlar qabul qilsin.