Bozor munosabatlari sharoitida qishloq va suv xoʻjaligini boshqarish tuzilmasini takomillashtirish, tuproq unumdorligini, sugʻoriladigan yerlardan foydalanish samaradorligini yaxshilash va qishloq xoʻjalik ekinlari hosildorligini oshirish masalalarida ularning mustahkam oʻzaro aloqasini taʼminlash maqsadida:

1. Oʻzbekiston Respublikasi Qishloq xoʻjalik vazirligi hamda Melioratsiya va suv xoʻjaligi vazirligi negizida Oʻzbekiston Respublikasi Qishloq va suv xoʻjaligi vazirligi tashkil etilsin.

2. Qishloq va suv xoʻjaligi vazirligi davlat boshqaruv organi deb belgilab qoʻyilsin va uning zimmasiga quyidagi asosiy vazifalar yuklatilsin:

sugʻoriladigan yerlar unumdorligi va samaradorligini oshirishga qaratilgan yagona strategik siyosatni ishlab chiqish va amalga oshirish. Respublika suv xoʻjaligi tashkilotlarining, loyiha-qidiruv, ilmiy, gidrogeologiya-meliorativ, tuproq-yer tuzilishi hamda taʼmirlash-qurilish muassasalari va korxonalari imkoniyatlaridan har tomonlama oqilona foydalanish;

mamlakatimizdagi ilgʻor tajriba va jahondagi eng yaxshi yutuqlarni uygʻunlashtirib, qishloq va suv xoʻjaligida yagona ilmiy-texnikaviy va texnologik siyosatni yuritish;

qishloq va suv xoʻjaligida iqtisodiy islohotlarni chuqurlashtirish, qishloq xoʻjaligi va suv xoʻjaligi korxonalarining iqtisodiy mustaqilligini kengaytirish, qishloq xoʻjalik ishlab chiqarishini oqilona tashkil etish maqsadida ularning manfaatlarini birlashtirish;

agrar sektorda bozor munosabatlarini rivojlantirish, fermerlik harakati va xususiy tashabbuskorlikni butun choralar bilan qoʻllab-quvvatlash, respublika hududida qishloq xoʻjalik mahsulotlarining ulgurji va mayda ulgurji bozorlarini tashkil etish;

qishloq xoʻjalik ishlab chiqarishi tarkibini oqilona tashkil etish, almashlab ekish va ekinlarni navbat bilan ekishning maqbul sxemalarini joriy etish, bozor talablariga qarab ekin maydonlari tarkibi va qishloq xoʻjalik mahsulotlari yetishtirish hajmini boshqarish;

agrosanoat majmui holatini tahlil etish va uni rivojlantirish istiqbollarini ishlab chiqish, qishloq xoʻjalik mahsulotlari va xomashyo yetishtirish hamda ular harakatda boʻladigan aniq maqsadni koʻzlovchi dastur va balanslarini tuzish;

qishloq xoʻjalik ekinlari urugʻchiligini, chorvachilikda naslchilik ishini va veterinariya xizmatini tashkil etish, urugʻlik sifatini, pestitsid va oʻgʻitlarning qoʻllanilishi, tuproq eroziyasining oldini olish, oʻsimliklar va hayvonlar kasalliklari tarqalishini nazorat qilish;

qishloq xoʻjalik ishlab chiqarishini har tomonlama mexanizatsiyalash, yangi turdagi texnika, mashina va mexanizmlarni joriy etish asosida uni intensivlashni taʼminlash;

er, suvdan foydalanuvchilar va suv isteʼmolchilarining barcha toifalarida yer va suvdan samarali foydalanishni davlat yoʻli bilan hisobga olish va nazorat qilishni amalga oshirish;

qadimdan sugʻoriladigan yerlarning meliorativ holatini yaxshilash va yangilash, yangi yerlarni oʻzlashtirish, sugʻorishning ilgʻor usullarini joriy etish choralarini ishlab chiqish;

ekologiya muammolari va Orol dengizi havzasi muammolarini hisobga olib, barcha suv isteʼmolchilari va suvdan foydalanuvchilar manfaatlarini koʻzlagan holda suv resurslarini boshqarish;

katta kanallar, yirik suv omborlari va boshqa suv xoʻjaligi inshootlari va tizimlarini davlat yoʻli bilan boshqarish;

oliy va oʻrta maxsus taʼlimni tashkil etish, fermerlarni oʻqitish, xodimlarni tayyorlash, ularning malakasini oshirish, agrosanoat majmui sohasida davlat kadrlar siyosatini oʻtkazish.

3. Joylarda Qoraqalpogʻiston Respublikasi Qishloq va suv xoʻjaligi vazirligi, viloyat va tuman qishloq va suv xoʻjaligi boshqarmalari tashkil etilsin.

Qishloq va suv xoʻjaligi hududiy boshqarmalari Oʻzbekiston Respublikasi Qishloq va suv xoʻjaligi vazirligiga va tegishli hudud hokimiga boʻysunishi belgilab qoʻyilsin.

Vazirlik tarkibidagi mavjud respublika ishlab chiqarish birlashmalari, korporatsiyalar va boshqa tashkilotlar saqlab qolinsin.

4. Belgilab qoʻyilsinki, Oʻzbekiston Respublikasi Qishloq va suv xoʻjaligi vazirligining oʻz vakolatlari doirasida qabul qiladigan qarorlari er, suvdan foydalanish va suv isteʼmol qilish turlaridan, qishloq xoʻjalik ishlab chiqarishini tashkil etish shakllaridan qatʼi nazar, vazirliklar, idoralar, konsernlar, uyushmalar, korxonalar va muassasalar, mahalliy hokimiyat va boshqaruv organlari, mansabdor shaxslar va fuqarolarning ijro etishi uchun majburiydir.

5. Oʻzbekiston Respublikasi Adliya vazirligi amaldagi qonun hujjatlarini ushbu Farmonga muvofiqlashtirish uchun ularga oʻzgartish va qoʻshimchalar kiritish toʻgʻrisidagi takliflarni ikki oy muddatda Vazirlar Mahkamasiga taqdim etsin.

6. Oʻzbekiston Respublikasi Qishloq va suv xoʻjaligi vazirligini tuzishga doir tashkiliy masalalarni hal qilish uchun tashkilot qoʻmitasi tuzilsin.

Tashkilot qoʻmitasiga Oʻzbekiston Respublikasi Qishloq va suv xoʻjaligi vazirligi faoliyatini tashkil etish, uning tarkibi, shtatlar soni va vazirlik toʻgʻrisidagi Nizom haqida Vazirlar Mahkamasi qarori loyihasini ikki hafta muddatda tayyorlash topshirilsin. Qaror loyihasini tayyorlash chogʻida ikki vazirlik negizida qishloq xoʻjalik mahsulotlarini yetishtiruvchilar uchun zarur ragʻbatlantiruvchi sharoit yaratishi lozim boʻlgan mutlaqo yangi boshqaruv organi barpo etilishi nazarda tutilsin.

7. Oʻzbekiston Respublikasi Prezidentining 1990-yil 8-dekabrda chiqargan “Oʻzbekiston SSR agrosanoat majmuini boshqarish strukturasini takomillashtirish toʻgʻrisida”gi 107-Farmoni oʻz kuchini yoʻqotgan deb hisoblansin.