Yaponiya va Koreya Respublikasi hukumatlari tomonidan berilayotgan uzoq muddatli imtiyozli kreditlardan samarali foydalanishni va ularning oʻz vaqtida qaytarilishi ustidan nazoratni taʼminlash maqsadida Vazirlar Mahkamasi qaror qiladi:

1. Maʼlumot uchun qabul qilinsinki:

Oʻzbekiston Respublikasi Moliya vazirligi Yaponiya va Koreya Respublikasi hukumatlari tomonidan Oʻzbekiston Respublikasi Hukumatiga 40 yil muddatga berilayotgan uzoq muddatli imtiyozli kreditlarning, iqtisodiy samaradorligi yuqori darajada boʻlgan ustuvor loyihalarni amalga oshirishga yoʻnaltirilayotgan yillik stavkasi 3 foizgacha boʻlgan imtiyozli davr ham shu jumlaga kiradi, qarz oluvchisi hisoblanadi;

Yaponiya xalqaro hamkorlik banki va Koreya Respublikasi iqtisodiy rivojlanish boʻyicha hamkorlik fondi bilan oʻzaro hamkorlik qilish, shu jumladan moliyaviy muassasalarning maxsus missiyalari bilan ishlash Oʻzbekiston Respublikasi Tashqi iqtisodiy aloqalar vazirligi, Moliya vazirligi, vakolatli banklar va loyihalarning tashabbuskorlari boʻlgan tashkilotlar tomonidan amalga oshiriladi.

2. Oʻzbekiston Respublikasi Investitsiyalar boʻyicha davlat qoʻmitasi uzoq muddatli imtiyozli kreditlar doirasida loyihalar tayyorlanishini, kelishish tartibiga rioya etilishini, ularning harakati va amalga oshirilishini tashkil etishni taʼminlasin.

3. Oʻzbekiston Respublikasi Moliya vazirligi:

umumiy shartlarga va mablagʻ bilan taʼminlashning ixtisoslashtirilgan dasturlari xususiyatlariga javob beruvchi loyihalarning texnik-iqtisodiy asoslanishining tezkor ekspertizasi belgilangan tartibda tashkil etilishini;

kreditlar olish va qarz bitimlarini imzolashga tayyorlash yuzasidan zarur tartibotlar oʻz vaqtida rasmiylashtirilishini;

jalb etilayotgan kredit resurslari boʻyicha Oʻzbekiston Respublikasi majburiyatlari kafolatlanishi bilan bogʻliq hujjatlarning tezlikda tayyorlanishini;

Yaponiya xalqaro hamkorlik agentligi ekspertlari va xorijiy moliyaviy muassasalar tegishli boʻlinmalari mutaxassislari jalb qilingan holda yangi loyihalar tayyorlanishida vazirliklar va idoralarga koʻmaklashishni;

Vazirlar Mahkamasining Tashqi iqtisodiy faoliyatni muvofiqlashtirish departamenti bilan oʻzaro hamkorlikda, uzoq muddatli imtiyozli kredit berish hajmlarini koʻpaytirish yuzasidan Yaponiya va Koreya Respublikasi hukumatlarining vakolatli agentliklari bilan muntazam maslahatlashuvlar oʻtkazilishini;

Vazirlar Mahkamasining Investitsiya dasturlari departamenti tomonidan amalga oshirilayotgan Oʻzbekiston Respublikasining investitsiya dasturiga kiritilgan loyihalar amalga oshirilishining davlat monitoringi doirasida qarz mablagʻlari oʻzlashtirilishining borishi, shu jumladan toʻlovlar oʻz vaqtida amalga oshirilishi va kreditlar qaytarilishi ustidan qattiq monitoring oʻtkazilishini taʼminlasin.

4. Koʻrsatib oʻtilgan funksiyalarni bajarish va moliyaviy koʻmaklashish dasturlarini samarali amalga oshirish maqsadida Oʻzbekiston Respublikasi Moliya vazirligi:

vazirlik tuzilmasida xodimlarning shtatda belgilangan soni doirasida uzoq muddatli imtiyozli kreditlar hisobiga amalga oshiriladigan investitsiya loyihalari ekspertizasi va moliyaviy monitoringi boʻyicha maxsus boʻlinma tashkil etsin;

qoʻshma loyihalarni tayyorlash muddatlarini jadallashtirish va ularni roʻyobga chiqarish sifatini oshirish maqsadida, uzoq muddatli imtiyozli kredit resurslari berayotgan mamlakatlardan mutaxassislarni tashkil etilayotgan boʻlinmaning maslahatchilari sifatida texnik hamkorlik grantlari asosida jalb etsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.