Oʻz ehtiyojlari uchun Oʻzbekiston Respublikasi hududiga zamonaviy texnologiyalar va asbob-uskunalar, ularga butlovchi buyumlar, shuningdek xomashyo va materiallar olib kirayotgan xorijiy investorlar uchun qonun hujjatlarida nazarda tutilgan imtiyozlarni tartibga solish maqsadida Vazirlar Mahkamasi qaror qiladi:

1. Quyidagilar:

“Boj tarifi toʻgʻrisida”gi Oʻzbekiston Respublikasi Qonunining 33-moddasi birinchi qismining oʻn uchinchi xatboshiga va “Chet el investitsiyalari toʻgʻrisida”gi Oʻzbekiston Respublikasi Qonunining 12-moddasi oltinchi qismiga muvofiq xorijiy investorlar tomonidan Oʻzbekiston Respublikasiga oʻz ishlab chiqarish ehtiyojlari uchun olib kiriladigan mol-mulkka bojxona boji solinmasligi;

xorijiy investorlar Oʻzbekiston Respublikasi hududida oʻz ishlab chiqarish faoliyatini, qoidaga koʻra, xorijiy investitsiyalar ishtirokidagi korxonalar tashkil etish yoʻli bilan amalga oshirishi maʼlumot uchun qabul qilinsin.

2. Xorijiy investorlar tomonidan oʻz ishlab chiqarish ehtiyojlari uchun olib kiriladigan mol-mulk bojxona boji solishdan ozod etilishi boʻyicha imtiyozlar xorijiy investitsiyalar ishtirokidagi korxonalarga ham joriy etilganligi nazarda tutilsin.

3. Belgilab qoʻyilsinki, xorijiy investorlar tomonidan oʻz ehtiyojlari uchun Oʻzbekiston Respublikasiga olib kiriladigan mol-mulkni bojxona boji solishdan ozod etish boʻyicha imtiyozlar 2008-yil 1-yanvardan boshlab ustav sarmoyasida xorijiy investorning ulushi kamida 33 foiz boʻlgan xorijiy investitsiyalar ishtirokidagi korxonalarga nisbatan amal qiladi.

4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Adliya vazirligi, Moliya vazirligi, Iqtisodiyot vazirligi va Davlat bojxona qoʻmitasi bilan birgalikda ikki hafta muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.