Ўзбекистон Республикаси Солиқ кодекси, «Давлат солиқ хизмати тўғрисида»ги Ўзбекистон Республикаси Қонунининг 7-моддаси, «Адвокатура тўғрисида»ги, «Адвокатлик фаолиятининг кафолатлари ва адвокатларни ижтимоий муҳофазаси тўғрисида»ги ва «Нодавлат нотижорат ташкилотлар тўғрисида»ги Ўзбекистон Республикаси қонунларига мувофиқ Ўзбекистон Республикаси Молия вазирлиги, Адлия вазирлиги ва Давлат солиқ қўмитаси қарор қилади:

1. Адвокатлик бюролари, адвокатлар ҳайъатлари, адвокатлик фирмалари ва адвокатлар томонидан бюджетга солиқлар ва мажбурий тўловларни ҳисоблаб чиқариш ва тўлаш тартиби тўғрисидаги йўриқнома иловага мувофиқ тасдиқлансин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.

Мазкур Йўриқнома Ўзбекистон Республикаси Солиқ кодекси, «Давлат солиқ хизмати тўғрисида»ги Ўзбекистон Республикаси Қонунининг 7-моддаси, «Адвокатура тўғрисида»ги, «Адвокатлик фаолиятининг кафолатлари ва адвокатларнинг ижтимоий ҳимояси тўғрисида»ги ва «Нодавлат нотижорат ташкилотлар тўғрисида»ги Ўзбекистон Республикаси қонунларига мувофиқ ишлаб чиқилиб, адвокатлик бюролари, адвокатлар ҳайъатлари, адвокатлик фирмалари ва адвокатлар томонидан бюджетга солиқлар ва мажбурий тўловларни ҳисоблаб чиқариш ва тўлаш тартибини белгилайди.

1. «Адвокатлик фаолиятининг кафолатлари ва адвокатларнинг ижтимоий ҳимояси тўғрисида»ги Ўзбекистон Республикаси Қонунининг 11-моддасига мувофиқ Адвокатура нотижорат ташкилотдир ва фаолиятни ўз маблағлари ҳисобидан амалга оширади. У адвокатлик фаолияти билан шуғулланиш учун лицензия олган адвокатлар томонидан жисмоний ва юридик шахсларнинг ҳуқуқлари ва қонуний манфаатларини ҳимоя қилиш мақсадида ихтиёрийлик асосида ташкил этилган ўзини ўзи бошқариш ташкилотидир.

2. Адвокатуранинг ташкилий тузилмалари бўлиб адвокатлар коллегиялари, адвокатлик фирмалари ва адвокатлик бюролари (кейинги ўринларда — адвокатлик тузилмалари) ҳисобланади.

Адвокатлик фаолияти билан шуғулланиш ҳуқуқини берувчи лицензияни белгиланган тартибда олган жисмоний шахс ўз адвокатлик бюросини очиб, якка тартибда фаолият кўрсатишга ёхуд ихтиёрийлик асосида бошқа адвокатлар (шериклар) билан ҳайъатлар ва фирмалар тузишга, шунингдек, адвокатлик фирмалари ва коллегияларига аъзо (муассис) сифатида киришга ҳақлидир.

«Адвокатура тўғрисида»ги Ўзбекистон Республикаси Қонунининг 4-моддасига мувофиқ адвокатлар бюролари, ҳайъатлари ва фирмалари рўйхатдан ўтган кундан эътиборан юридик шахс мақомини оладилар ҳамда кўрсатилган юридик ёрдам учун фуқаролардан ва юридик шахслардан тушадиган пул маблағлари (даромадлар) ҳисобига фаолият кўрсатадилар.

3. «Нодавлат нотижорат ташкилотлари тўғрисида»ги Ўзбекистон Республикаси Қонунининг 29-моддасига мувофиқ, нодавлат нотижорат ташкилотларининг мол-мулкини шакллантириш манбалари қуйидагилардан иборат бўлиши мумкин:

кириш ва аъзолик бадаллари, агар улар уставда назарда тутилган бўлса;

муассислардан, қатнашчилардан (аъзолардан) бир маротаба ва мунтазам равишда келадиган тушумлар;

ихтиёрий мулкий бадаллар ва эҳсонлар;

тадбиркорлик фаолиятидан олинган, фақат устав мақсадлари учун ишлатиладиган даромадлар (фойда);

қонунларда тақиқланмаган бошқа тушумлар.

Бунда қатнашчилар (аъзолар), яъни адвокатларнинг жисмоний ва юридик шахсларга кўрсатиладиган юридик ёрдам учун оладиган даромадларининг бир қисми кўринишидаги мунтазам тушумлари адвокатлик тузилмаларини маблағ билан таъминлашнинг асосий манбаси ҳисобланади. Кўрсатилган юридик ёрдам учун келиб тушган маблағлардан адвокатлик тузилмасини сақлаб туриш учун ажратмалар миқдори адвокатлик тузилмасининг таъсис ҳужжатида (уставида) ёки қатнашчилар (аъзолар) нинг бошқа қарорида белгиланади.

4. Адвокатлик тузилмасини сақлаш учун харажатларга маъмурий ва хўжалик харажатлари, шунингдек уни сақлаш учун қилинган бошқа харажатлар киради.

5. Адвокатлик тузилмасини сақлаш учун харажатлар таркибига қуйидаги харажатлар киради:

а) маъмурий ва хўжалик (техник) ходимларни сақлаб туриш, жумладан компенсация ва кафолатли тўловлар билан биргаликда улар меҳнатига ҳақ тўлашга;

б) коммунал хизматлар, шунингдек, телефон, телекоммуникация ва ахборот хизматлари учун ҳақ тўлашга;

в) инвентарь, материаллар, канцелярия, офис учун ва бошқа жиҳозларни харид қилишга;

г) транспорт воситалари, техникаларни сақлаш, ижарага олишга ва бошқа хизматларга ҳақ тўлашга, бензин ва ёқилғи мойлаш маҳсулотларига;

д) адвокатларни (адвокатура ходимларини) ўқитишга, газеталар, журналлар ва бошқа даврий нашрларга обуна бўлишга, бошқа жорий харажатларга;

е) жорий таъмирлашга;

ж) техника ва асбоб-ускуналарни, оргтехника воситалари, компьютерлар ва бошқа асосий воситаларни харид қилишга;

з) қурилиш ва капитал таъмирлашга;

и) адвокатлик тузилмасини сақлаб туриш учун бошқа харажатларга.

«Адвокатура тўғрисида»ги Ўзбекистон Республикаси Қонунининг 12-моддасига мувофиқ, адвокатлик тузилмасини сақлаб туриш учун харажатлар таркибига, шунингдек, маблағлари адвокатларнинг ижтимоий эҳтиёжларига ишлатиладиган Адвокатурани ижтимоий ҳимоя қилиш жамғармасини шакллантириш бўйича харажатлар киради. Адвокатурани ижтимоий ҳимоя қилиш жамғармасининг маблағлари қуйидагиларга сарфланади:

а) адвокатлик тузилмасининг адвокатларига нафақалар, компенсация ва кафолатли тўловларни тўлаш, уларнинг таътили учун ҳақ тўлашга. Бунда адвокатлик тузилмалари таътил учун ҳақ тўлаш мақсадида маблағларни (масалан, иш ҳақининг миқдоридан келиб чиққан ҳолда) жамлашга ҳақлидирлар;

б) моддий ёрдам сифатида бериладиган турли хил пуллик нафақаларга;

в) санатория-курортда даволаниш учун ва дам олиш уйларига йўлланмаларни тўлашга, стационар ва амбулатор даволаниш ҳақини тўлашга;

г) овқатланиш учун қўшимча тўловларга, йўл чипталарини бериш ёки уларнинг қийматини қоплашга;

д) адвокатларнинг ҳаёти ва соғлиғини суғурта қилиш бадалларини тўлашга;

е) туристик йўлланмалар, спорт секцияларига абонементларни тўлашга ва бошқа шу каби харажатларга;

ж) Ўзбекистон Адвокатлар ассоциациясига аъзолик бадалини адвокат ҳисобидан тўлашга;

з) адвокатларнинг бошқа ижтимоий эҳтиёжларига.

6. Ўзбекистон Республикаси Солиқ кодексининг 31-моддасига мувофиқ тижорат билан шуғулланмайдиган юридик шахслар, уларнинг тадбиркорлик фаолиятидан оладиган даромадларидан (фойдаларидан) ташқари фойда солиғидан озод қилинади.

Ўзбекистон Республикаси Вазирлар Маҳкамасининг 1998 йил 15 апрелдаги 159-сон қарори билан тасдиқланган Микрофирмалар ва кичик корхоналар учун солиқ солишнинг соддалаштирилган тизимини қўллаш тартибининг 1-бандига мувофиқ, солиққа тортишнинг соддалаштирилган тизими тадбиркорлик фаолиятини амалга ошираётган микрофирмалар ва кичик корхоналар учун қўлланилади.

7. Адвокатлик тузилмалари нодавлат нотижорат ташкилотлар сифатида, фойда солиғини тўлашдан озод этиладилар ҳамда ягона солиқ тўловчиси ҳисобланмайдилар.

8. «Адвокатура тўғрисида»ги Ўзбекистон Республикаси Қонунининг 11-моддасига мувофиқ, адвокатларнинг меҳнатига кўрсатилган юридик ёрдам учун жисмоний ва юридик шахслардан адвокатлар бюролари, ҳайъатлари ва фирмаларига келиб тушган маблағлар ҳисобидан ҳақ тўланади. Бунда юридик хизмат учун ҳақ тўлаш адвокат билан мижоз ўртасида ихтиёрий равишда тузиладиган битим (шартнома) асосида амалга оширилади.

Адвокат томонидан кўрсатилган юридик ёрдам учун келиб тушган маблағлар адвокатлик тузилмаларининг даромадлари ҳисобланмайди.

Маблағларнинг адвокатлик тузилмасини сақлаб туриш учун ўтказиладиган (ушлаб қолинадиган) қисми тадбиркорлик фаолиятидан олинган даромад бўлиб ҳисобланмайди. Ушбу маблағларга мазкур Йўриқноманинг 3 ва 4-бандларига мувофиқ адвокатлик тузилмасини сақлаб туриш учун мунтазам тушумлар сифатида қаралади.

9. Агар адвокатлик тузилмалари тадбиркорлик фаолияти, яъни адвокатлик фаолиятидан ташқари бошқа (адвокатнинг юридик ёрдам кўрсатиши билан боғлиқ бўлмаган) фаолият билан шуғуллансалар, ушбу фаолиятдан олинган даромадлар (фойда) белгиланган тартибда фойда солиғи ёки ягона солиққа тортилади.

10. Молия йилида солиқ солинадиган даромадга эга бўлган жисмоний шахслар — адвокатлар жисмоний шахсларнинг даромадига солинадиган солиқни тўловчилардир.

11. Адвокатлар меҳнатига ҳақ тўлаш шаклида олинадиган даромадлардан жисмоний шахслар даромадига солинадиган солиқни ушлаб қолиш ва уни бюджетга ўтказиш адвокатлик тузилмалари томонидан амалга оширилади.

12. Адвокатлар меҳнатига ҳақ тўлаш шаклида олинадиган даромадларни аниқлаш учун асос бўлиб адвокатларнинг меҳнатга ҳақ тўлаш фонди ҳисобланади.

Жисмоний шахслар даромадига солинадиган солиқни аниқлаш мақсадида, адвокатларнинг меҳнатга ҳақ тўлаш фонди, белгиланган ставкаларда ажратиладиган ижтимоий суғурта бадалларини чегириб ташлаган ҳолда қуйидаги формула асосида аниқланади:

Ф — адвокатларнинг меҳнатга ҳақ тўлаш фонди;

Y — адвокат томонидан кўрсатилган юридик ёрдам учун олинган маблағлар (адвокат гонорари) ҳамда мазкур Йўриқноманинг 3 ва 4-бандига мувофиқ адвокатлик тузилмасини сақлаб туриш учун ўтказиладиган маблағлар ўртасидаги фарқ;

С — меҳнатга ҳақ тўлаш фондидан олинадиган ижтимоий суғурта бадалининг фоиздаги ставкаси.

Масалан, кўрсатилган юридик ёрдам учун адвокатнинг гонорари 100000 сўмни ташкил этган. Бунда, адвокатлик тузилмасининг тегишли қарорига кўра, адвокатлик тузилмасини сақлаб туриш учун мунтазам тушум сифатида 30 000 сўм ушлаб қолинган. Ўзбекистон Республикаси Вазирлар Маҳкамасининг 2003 йил 25 декабрдаги 567-сон қарорига мувофиқ, адвокатлик тузилмалари меҳнатга ҳақ тўлаш фондидан 25 фоизли ставкада ижтимоий суғурта бадалини тўлайдилар. Бундай ҳолда, меҳнатга ҳақ тўлаш фонди қуйидагича аниқланади:

Меҳнатга ҳақ тўлаш фонди ва меҳнатга ҳақ тўлаш шаклида олинадиган даромадларни аниқлашнинг намунавий схемаси мазкур Йўриқноманинг иловасида келтирилган.

13. Жисмоний шахсларнинг даромадига солинадиган солиқни ҳисоблаб чиқаришда меҳнатга ҳақ тўлаш шаклида олинадиган даромадлар таркибига мазкур Йўриқноманинг 12-банди асосида аниқланадиган меҳнатга ҳақ тўлаш фондидан ташқари, Ўзбекистон Республикаси Солиқ кодексининг 49-моддаси иккинчи қисмида назарда тутилган даромадлар ҳам киради.

14. Жисмоний шахсларнинг даромадига солинадиган солиқни ушлаб қолиш ва бюджетга ўтказиш учун адвокатлик тузилмалари жавобгардир. Солиқ суммаси ушлаб қолинмаганда, улар ушлаб қолинмаган солиқ суммасини ҳамда у билан боғлиқ жарима ва пеняларни бюджетга тўлаши шарт.

15. Жисмоний шахсларнинг даромадига солинадиган солиқ ушлаб қолинганда адвокатлик тузилмалари ушлаб қолинган солиқ суммасини тўлов амалга оширилган ой тугаганидан кейин беш кун ичида бюджетга ўтказадилар.

16. Адвокатлик тузилмалари:

иш ҳақини тўлаш чоғида адвокатнинг талабига кўра унга унинг даромади суммаси ва тури, шунингдек, ушлаб қолинган солиқ суммаси (агар солиқ ушлаб қолинган бўлса) кўрсатилган маълумотномани бериши;

асосий бўлмаган иш жойидан олинган даромадлар тўғрисида жисмоний шахснинг рўйхат рақами, фамилияси, исми ва отасининг исми, доимий яшаш манзили, ҳисобот йилида қилган даромадининг умумий суммаси ва ушлаб қолинган солиқнинг умумий суммаси кўрсатилган маълумотномани қонун ҳужжатларида белгиланган шаклда молия йили тугаганидан сўнг ўттиз кун ичида солиқ органларига тақдим этиши;

ёлланиб ишлайдиганларга меҳнат ҳақи тарзида ҳисоблаб чиқарилган ва амалда тўланган суммалар ҳамда бошқа даромадлар, шунингдек, бу даромадларнинг солиқ суммалари тўғрисидаги маълумотларни қонун ҳужжатларида белгиланган шаклда йилнинг ҳар чорагида, йилнинг ҳисобот чорагидан кейинги ойнинг 15-кунига қадар солиқ органларига тақдим этиши шарт.

17. Ўзбекистон Республикаси Солиқ кодексининг 66-моддасига мувофиқ, тадбиркорлик фаолияти билан шуғулланувчи юридик шахслар қўшилган қиймат солиғи тўловчилардир.

Адвокатлик тузилмалари қўшимча қиймат солиғини тўловчи ҳисобланмайдилар, мазкур Йўриқноманинг 18 ва 19-бандида назарда тутилган ҳоллар бундан мустасно.

18. Агар адвокатлик тузилмалари тадбиркорлик фаолияти, яъни адвокатлик фаолиятидан ташқари бошқа (адвокатнинг юридик ёрдам кўрсатиши билан боғлиқ бўлмаган) фаолият билан шуғуллансалар, ушбу фаолият доирасидаги товарлар (ишлар, хизматлар) реализацияси бўйича оборот белгиланган тартибда қўшимча қиймат солиғига тортилади.

19. Адвокатлик тузилмалари товарларни импорт қилишда божхона тўловларини (шу жумладан қўшимча қиймат ва акциз солиғини) белгиланган тартибда тўлайдилар, қонунчиликда назарда тутилган ҳоллар бундан мустасно.

20. Ўзбекистон Республикаси Солиқ кодексининг 110-моддасига мувофиқ товарлар ишлаб чиқарувчи, ишлар бажарувчи, хизматлар кўрсатувчи юридик шахслар экология солиғи тўловчилардир.

Юридик ёрдам адвокат билан мижоз ўртасида тузилган шартнома асосида адвокат (жисмоний шахс) томонидан кўрсатилишини инобатга олиб, ушбу юридик ёрдам экология солиғига тортилмайди.

Агар бевосита адвокатлик тузилмаси томонидан товарлар ишлаб чиқарилса, ишлар бажарилса ва хизматлар кўрсатилса, ушбу фаолиятдан белгиланган тартибда экология солиғи тўланади.

21. Ўзбекистон Республикаси Солиқ кодексининг 92, 102 ва 119-моддаларига мувофиқ адвокатлик тузилмалари нодавлат нотижорат ташкилотлар сифатида мол-мулк солиғи, ер солиғи ва сув ресурсларидан фойдаланганлик учун солиқни тўлашдан озод қилинадилар.

Агар адвокатлик тузилмалари тадбиркорлик фаолияти, яъни адвокатлик фаолиятидан ташқари бошқа (адвокатнинг юридик ёрдам кўрсатиши билан боғлиқ бўлмаган) фаолият билан шуғуллансалар, ушбу фаолият учун фойдаланилган мол-мулк, ер участкалари ва сув ресурслари белгиланган тартибда мол-мулк солиғи, ер солиғи ва сув ресурсларидан фойдаланганлик учун солиққа тортилади.

22. Ободонлаштириш ва ижтимоий инфратузилмани ривожлантириш солиғини ҳисоблаш чиқариш ва бюджетга тўлаш тартиби тўғрисидаги йўриқнома (2002 йил 15 февраль, рўйхат рақами 1100-сон — Меъёрий ҳужжатлари ахборотномаси, 2002 й., 3-сон)нинг 1-бандига мувофиқ, ободонлаштириш ва ижтимоий инфратузилмани ривожлантириш солиғини тўловчилар тадбиркорлик фаолияти билан шуғулланувчи юридик шахслардир.

Адвокатлик тузилмалари ободонлаштириш ва ижтимоий инфратузилмани ривожлантириш солиғини тўловчи ҳисобланмайдилар.

Агар адвокатлик тузилмалари тадбиркорлик фаолияти, яъни адвокатлик фаолиятидан ташқари бошқа (адвокатнинг юридик ёрдам кўрсатиши билан боғлиқ бўлмаган) фаолият билан шуғуллансалар, ушбу фаолиятдан олинган соф фойда белгиланган тартибда ободонлаштириш ва ижтимоий инфратузилмани ривожлантириш солиғига тортилади.

23. Юридик ёрдам адвокат ва мижоз ўртасида тузилган шартнома асосида адвокат (жисмоний шахс) томонидан кўрсатилганлиги сабабли, адвокатлик тузилмасининг адвокатлари томонидан кўрсатилган юридик ёрдам ҳажмидан Бюджетдан ташқари пенсия жамғармасига ҳамда Ўзбекистон Республикаси Молия вазирлиги ҳузуридаги Республика йўл жамғармасига мажбурий ажратмалар ўтказилмайди.

Агар бевосита адвокатлик тузилмаси томонидан товарлар ишлаб чиқарилса, ишлар бажарилса ва хизматлар кўрсатилса, ушбу товарлар (ишлар, хизматлар) реализацияси ҳажмидан белгиланган тартибда Бюджетдан ташқари пенсия жамғармаси ва Республика йўл жамғармасига ажратмалар ўтказилади.

24. Ўзбекистон Республикаси Вазирлар Маҳкамасининг 2003 йил 21 августдаги 361-сон қарори билан тасдиқланган Ўзбекистон Республикаси Молия вазирлиги ҳузуридаги Республика йўл жамғармаси даромадларини шакллантириш ва сарфлаш фойдаланиш тартиби тўғрисидаги низомнинг 29-бандига мувофиқ нодавлат нотижорат ташкилотлар тижорат ва хўжалик фаолияти бўлмаган фаолиятдан олинган даромадлар ва тушумлар бўйича Ўзбекистон Республикаси Молия вазирлиги ҳузуридаги Республика йўл жамғармасига мажбурий ажратмалар тўлашдан озод этилади.

Адвокатнинг кўрсатилган юридик ёрдам учун олган гонорари, уставда назарда тутилган кириш ва аъзолик бадаллари, ихтиёрий мулкий бадаллар ва эҳсонлар, адвокатлардан бир маротаба ва мунтазам равишда келадиган тушумлар тижорат ёки хўжалик фаолиятидан олинган даромадлар ёки тушумлар ҳисобланмайди.

25. Адвокатлик тузилмалари ягона ижтимоий тўлов ўрнига меҳнатга ҳақ тўлаш фондидан 25 фоизлик мажбурий ижтимоий суғурта бадалларини тўлайдилар.

26. Меҳнатга ҳақ тўлаш фондидан ажратмалар ҳамда фуқароларнинг иш ҳақидан мажбурий суғурта бадаллари, солиқлар ушланишини ҳисобга олмасдан, иш ҳақи (даромад) нинг барча турларига (шу жумладан адвокатурани ижтимоий ҳимоя қилиш жамғармасидан тўланадиган тўловларга) ҳисобланади, қонунчиликда белгиланган тўловлар бундан мустасно.

Бунда меҳнатга ҳақ тўлаш фондидан ажратиладиган мажбурий ажратмалар суммаси қуйидаги формула асосида аниқланади:

CF — адвокатларнинг меҳнатга ҳақ тўлаш жамғармасидан ажратиладиган ижтимоий суғурта бадали суммаси;

Y — адвокат томонидан кўрсатилган юридик ёрдам учун олинган маблағлар (адвокат гонорари) ҳамда мазкур Йўриқноманинг 3 ва 4-бандига мувофиқ адвокатлик тузилмасини сақлаб туриш учун ўтказиладиган маблағлар ўртасидаги фарқ;

V — Адвокатурани ижтимоий ҳимоя қилиш жамғармасидан ажратиладиган ва суғурта бадаллари ҳисобланиши назарда тутилган тўловлар. Бунда суғурта бадаллари ҳисобланиши назарда тутилмайдиган тўловлар, адвокатлик тузилмалари томонидан ижтимоий суғурта бадалларини ҳисоблаб чиқариш ва тўлашда ҳисобга олинмайди;

С — меҳнатга ҳақ тўлаш фондидан олинадиган ижтимоий суғурта бадалининг фоиздаги ставкаси.

Масалан, кўрсатилган юридик ёрдам учун адвокатнинг гонорари 100000 сўмни ташкил этган. Бунда адвокатлик тузилмасининг тегишли қарорига кўра, адвокатлик тузилмасни сақлаб туриш учун мунтазам тушум сифатида 30 000 сўм ушлаб қолинган.

Бундан ташқари, адвокатлик тузилмаси томонидан адвокат ҳисобига Адвокатурани ижтимоий ҳимоя қилиш жамғармаси маблағларидан 2000 сўм миқдорида аъзолик бадали тўланган, шунингдек, 3000 сўм миқдорида моддий ёрдам берилган. Бунда, Ўзбекистон Республикаси Вазирлар Маҳкамасининг 1994 йил 11 майдаги 249-сон қарори билан тасдиқланган Пенсияни ҳисоблаб чиқаришда ҳамда суғурта бадалларини ҳисоблашда ҳисобга олинмайдиган иш ҳақи ва даромадлар турлари рўйхатига мувофиқ моддий ёрдам бўйича ижтимоий суғурта бадали ҳисобланмайди. Аъзолик бадали мунтазам равишда адвокат ҳисобига тўланишини инобатга олиб, ушбу тўлов адвокатнинг даромади ҳисобланади ва у бўйича ижтимоий суғурта бадали ҳисобланади (бунда аъзолик бадали пенсияни ҳисоблашда ҳам ҳисобга олинади).

Ўзбекистон Республикаси Вазирлар Маҳкамасининг 2003 йил 25 декабрдаги 567-сон қарорига мувофиқ, адвокатлик тузилмалари меҳнатга ҳақ тўлаш фондидан 25 фоизли ставкада ижтимоий суғурта бадалини тўлайдилар.

Бундай ҳолда, меҳнатга ҳақ тўлаш фондидан ажратиладиган ижтимоий суғурта бадали суммаси қуйидагича аниқланади:

Фуқароларнинг иш ҳақидан мажбурий ижтимоий суғурта бадали суммаси қуйидагича аниқланади:

CF1 — иш ҳақидан мажбурий ижтимоий суғурта бадали суммаси;

C1 — иш ҳақидан мажбурий ижтимоий суғурта бадалининг фоиздаги ставкаси.

Юқорида кўрсатилган мисолда фуқароларнинг иш ҳақидан 2,5 фоизли мажбурий суғурта бадали суммаси қуйидагича аниқланади:

27. Солиқлар ва мажбурий тўловларни мазкур Йўриқномага асосан тўғри ҳисоблаб чиқарилиши ва бюджетга тўланиши устидан назорат белгиланган тартибда давлат солиқ хизмати органлари томонидан амалга оширилади.

28. Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари рўйхатдан ўтказувчи органлар сифатида адвокатлик тузилмалари томонидан ўзларининг таъсис шартномалари ва уставларига риоя этилиши устидан назоратни олиб борадилар.

Адвокатлик тузилмалари мазкур Йўриқнома талабларига риоя этмаганлик учун қонунчиликда белгиланган тартибда жавобгарликка тортиладилар.

29. Мазкур Йўриқнома Ўзбекистон Республикаси Меҳнат ва аҳолини ижтимоий ҳимоя қилиш вазирлиги ҳамда Ўзбекистон Адвокатлар ассоциацияси билан келишилган.