Вазирлар Маҳкамаси мамлакатимиз фармацевтика индустриясини давлат томонидан қўллаб-қувватлаш уч йил ичида дори-дармон воситалари ва тиббиёт буюмлари ишлаб чиқариш ҳажмини 2,5 баравар, улар турларини 253 номга етказган ҳолда 1,7 баравари кўпайтириш имконини берганлигини қайд этади. «Ўзфармсаноат» концерни корхоналари томонидан ишлаб чиқарилаётган дори-дармон воситалари билан аҳоли эҳтиёжларини қондириш даражаси 3 баравар ўсди. Хорижий инвестиция иштирокида ташкил этилган қўшма корхоналар концерн ишлаб чиқариши умумий ҳажмининг 65 фоизини таъминламоқда.

дори-дармон воситалари ва тиббиёт буюмларининг энг муҳим турларини ва уларни ишлаб чиқариш ҳажмларини кенгайтириш, замонавий, шу жумладан хорижий инвесторлар иштирокидаги фармацевтика ишлаб чиқаришлари барпо этиш, тайёр дори-дармонлар импортини қисқартириш ва дори-дармонлар нархларининг асоссиз ўсишига йўл қўймаслик мақсадида Вазирлар Маҳкамаси қарор қилади:

1. Даволаш муассасалари ва аҳолини дори-дармон воситалари билан таъминлашни назорат қилиш республика комиссияси томонидан Ўзбекистон Республикаси Соғлиқни сақлаш вазирлиги ва «Ўзфармсаноат» давлат-акциядорлик концерни билан биргаликда 2002 йилгача бўлган даврда мавжуд ва янгидан ташкил этиладиган корхоналарда, шу жумладан хорижий инвестициялар иштирокидаги корхоналарда фармацевтика маҳсулотлари ишлаб чиқаришни янада кўпайтириш дастури ишлаб чиқилганлиги дастурда:

дори-дармон препаратлари ва тиббиёт буюмлари ишлаб чиқариш ҳажмларини 3,5 бараварга кўпайтириш;

ишлаб чиқарилаётган маҳсулот турларини 1,6 бараварга кенгайтириш назарда тутилганлиги маълумот учун қабул қилинсин.

2. Ўзбекистон Республикаси Вазирлар Маҳкамасининг 1996 йил 14 августдаги 283-сон қарорида «Ўзфармсаноат» концерни корхоналари ва ташкилотлари учун назарда тутилган умумдавлат ҳамда маҳаллий солиқлар ва йиғимларнинг барча турлари бўйича бюджетга тўланадиган сумманинг 50 фоизи миқдоридаги имтиёзлар 2000 йил 1 январдан бошлаб 3 йил муддатга узайтирилсин, бўшаб қолган маблағлар фармацевтика маҳсулотлари ишлаб чиқаришни ривожлантириш дастури доирасида мавжуд ишлаб чиқаришларни замонавийлаштириш ва янгиларини барпо этишга мақсадли йўналтирилсин.

3. 2000 йил 1 январдан бошлаб «Ўзфармсаноат» концерни корхоналари ва ташкилотлари, шу жумладан қўшма корхоналар дори-дармонлар ва тиббиёт буюмлари ишлаб чиқариш учун импорт қилинадиган моддий ресурслар ва бутловчи буюмларга солинадиган қўшилган қиймат солиғи тўлашдан 3 йил муддатга озод қилинсин.

4. «Ўзфармсаноат» концернининг концерн ҳузурида Ривожлантириш жамғармаси ташкил этиш, солиқ солишдан озод қилинадиган маблағларни ушбу жамғармада тўплаш ҳақидаги таклифига розилик берилсин.

Белгилансинки, Ривожлантириш жамғармаси маблағлари:

алоҳида банк ҳисоб рақамида тўпланади, «Ўзфармсаноат» концерни уни тасарруф этувчи ҳисобланади;

илмий ишланмаларни маблағ билан таъминлаш, концерн корхоналари ва ташкилотларини реконструкция қилиш ва техника билан қайта жиҳозлаш, шунингдек дори-дармон воситалари ва тиббиёт буюмлари ишлаб чиқаришни таъминловчи инфратузилмани ташкил этиш ва янгилаш учун фойдаланилади;

ҳар йили концерн томонидан Ўзбекистон Республикаси Молия вазирлиги билан келишган ҳолда тасдиқланадиган сметага мувофиқ сарфланади.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ҳ.С.Кароматов зиммасига юклансин.