«Ўзбекистон Республикасида ногиронларни ижтимоий ҳимоя қилиш тўғрисида»ги Ўзбекистон Республикаси Қонунига мувофиқ шахсларнинг айрим тоифаларини ижтимоий ҳимоя қилишни таъминлаш мақсадида ҳамда Вазирлар Маҳкамасининг «Автомобиль бензинига чакана нархларнинг ўзгариши тўғрисида» 2006 йил 30 июндаги 127-сон қарорини бажариш юзасидан Вазирлар Маҳкамаси қарор қилади:

1. 2006 йил 1 ноябрдан бошлаб автомобиль бензини сотиб олиш бўйича илгари берилган имтиёзлар ўрнига шахсларнинг айрим тоифаларига ойлик пул компенсациялари тўловлари жорий этилсин.

2. Автомобиль бензини сотиб олиш харажатларининг бир қисми учун шахсларнинг айрим тоифаларига ойлик пул компенсацияси тўлаш тартиби тўғрисидаги низом 1-иловага мувофиқ тасдиқлансин.

4. Ўзбекистон Республикаси Ҳукуматининг 2-иловага мувофиқ айрим қарорларига ўзгартиришлар киритилсин ва баъзилари ўз кучини йўқотган деб ҳисоблансин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.

1. Мазкур Низом автомобиль бензини сотиб олишга харажатларнинг бир қисми учун ойлик пул компенсацияси олиш (кейинги ўринларда «ойлик пул компенсацияси» деб юритилади) ҳуқуқига эга бўлган шахслар тоифасини белгилайди ва уларга бундай компенсация тўлаш тартибини тартибга солади.

2. Ойлик пул компенсациялари тўлаш автомобиль бензини сотиб олиш бўйича илгари берилган имтиёзлар ўрнига 2006 йил 1 ноябрдан бошлаб жорий этилади.

3. Қуйидагилар ойлик пул компенсацияси олиш ҳуқуқига эгадир:

уруш қатнашчилари ва уларга тенглаштирилган шахслар мазкур Низомга 1-иловага мувофиқ;

уруш фахрийлари ва уларга тенглаштирилган шахслар мазкур Низомга 2-иловага мувофиқ;

меҳнатда майиб бўлиш ва касб касаллиги туфайли I ва II гуруҳ ногиронлар;

I ва II гуруҳ болаликдан ногиронлар.

4. Ойлик пул компенсацияси тўлови уни олиш ҳуқуқига эга бўлган, Ўзбекистон Республикаси ҳудудида доимий яшайдиган, енгил автомобиль, мотоаравача ёки мотоциклга эга бўлган (кейинги ўринларда «автомототранспорт воситаси» деб юритилади) ва улардан фойдаланадиган шахсларга тайинланади.

5. Автомототранспорт воситаларидан фойдаланиш ҳуқуқи ишончнома бўйича бошқа шахсга берилганда ойлик пул компенсацияси олиш ҳуқуқи йўқолади.

6. Мазкур Низомнинг 5-бандининг амал қилиши, башарти соғлиғининг ҳолати бўйича автомототранспорт ҳайдаш тўғри келмайдиган Иккинчи жаҳон уруши ногиронлари билан доимий равишда бирга яшайдиган, у билан бирга бир турар жой майдонида рўйхатдан ўтган оила аъзолари автомототранспортни ишончнома бўйича ҳайдаган тақдирда уларга нисбатан татбиқ этилмайди. Бунда ойлик пул компенсацияси тўлаш фақат ишончноманинг амал қилиш муддатига тайинланади.

7. Ойлик пул компенсацияси тўловини тайинлаш учун бунга ҳуқуқи бўлган шахс пенсиялар ва нафақаларни тайинлайдиган органларга (Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси, Мудофаа вазирлиги, Ички ишлар вазирлиги, Фавқулодда вазиятлар вазирлиги, Давлат хавфсизлик хизмати, Давлат божхона қўмитаси органлари) қуйидаги ҳужжатларни тақдим этиши зарур:

ариза;

ариза берувчининг паспорти нусхаси;

имтиёзга бўлган ҳуқуқлар тўғрисидаги гувоҳномалар нусхалари (уруш қатнашчилари ва ногиронлари ҳамда уларга тенглаштирилган шахслар учун);

Тиббий-меҳнат эксперт комиссияларининг маълумотномалари нусхалари (меҳнатда майиб бўлиш, касб касаллиги туфайли ногиронлар ва болаликдан ногиронлар учун);

ариза берувчига тегишли бўлган автомототранспорт воситаси техник паспортининг Ўзбекистон Республикаси Ички ишлар вазирлигининг Йўл ҳаракати хавфсизлиги давлат хизмати органларида даврий техник кўрикдан ўтганлиги тўғрисида белги қўйилган техник паспорти нусхаси;

автомототранспорт воситаси эгасининг ҳайдовчилик гувоҳномаси нусхаси ёки Иккинчи жаҳон уруши ногирони билан доимий бирга яшайдиган ва у билан бир турар жой майдонида рўйхатдан ўтган оила аъзосининг ҳайдовчилик гувоҳномаси, паспорти нусхалари ва у томонидан автомототранспорт воситасидан фойдаланиш ҳуқуқига ишончнома.

8. Ойлик пул компенсациясини тўлаш барча зарур ҳужжатлар мавжуд бўлган тақдирда мурожаат қилинган кундан бошлаб тайинланади.

9. Барча зарур ҳужжатлар билан биргаликда ариза берилгандан кейин ойлик пул компенсацияси тўловини тайинлаш тўғрисидаги масала 5 иш куни мобайнида кўриб чиқилади.

Бунда ойлик пул компенсацияси тўғрисидаги ижобий қарор ойлик пул компенсациясини тайинлайдиган органнинг (Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси, Мудофаа вазирлиги, Ички ишлар вазирлиги, Фавқулодда вазиятлар вазирлиги, Давлат хавфсизлик хизмати, Давлат божхона қўмитаси органлари) фармойиши билан қабул қилинади.

10. Ойлик пул компенсацияси тўловини тайинлаш рад этилган тақдирда ойлик пул компенсациясини тайинлайдиган органлар тегишли қарор қабул қилингандан кейин 3 иш кунида тегишли қарорни ариза берувчининг қўлига беради ёки унга рад этиш тўғрисида почта билдиришномасини жўнатади (рад этиш сабаблари кўрсатилган ҳолда) ва айни бир вақтда барча ҳужжатларни қайтаради.

11. Ойлик пул компенсациясини тайинлайдиган органлар томонидан ойлик пул компенсацияси тўловни тайинлаш рад этилиши тўғрисидаги қарор:

ариза берувчининг мақоми ойлик пул компенсациясини олиш ҳуқуқига эга бўлган шахслар тоифаси мақомига мувофиқ бўлмаганда;

фойдаланилаётган автомототранспорт воситаси типи енгил автомобиль, мотоаравача ва мотоциклга мувофиқ бўлмаганда;

автомототранспорт даврий давлат техник кўригидан ўтказилмаганда;

мазкур Низомнинг 7-бандида назарда тутилган ҳужжатлар тўлиқ тақдим этилмаганда қабул қилиниши мумкин.

12. Ойлик пул компенсацияси тўловини тайинлаш рад этилиши учун асос бўлиб хизмат қилган сабаблар ариза берувчи томонидан бартараф этилган тақдирда ариза берувчи такроран мурожаат қилиш ҳуқуқига эгадир.

Ҳужжатларни такроран кўриб чиқишда ойлик пул компенсациясини тайинлайдиган орган томонидан ариза берувчига ёзма шаклда илгари баён қилинган эътирозлар тақдим этилишига йўл қўйилмайди, уларнинг бартараф этилишини тасдиқлайдиган ҳужжатлар билан боғлиқ эътирозларни тақдим этиш бундан мустасно.

13. Ойлик пул компенсацияси тўлови суммасининг миқдори жисмоний шахслардан ёнилғи истеъмоли учун олинадиган солиқ ҳисобга олинмаган ҳолда чакана савдодаги автомобиль бензини (чакана савдода энг кўп тарқалган) муайян маркасининг қирқ литри қийматининг эллик фоизидан келиб чиқиб Ўзбекистон Республикаси Вазирлар Маҳкамасининг қарорлари билан белгиланади.

14. Ойлик пул компенсацияси тўлови кўрсатиб ўтилган шахсларнинг яшаш жойи бўйича пенсиялар ва нафақаларни тайинлайдиган органлар томонидан пенсиялар ва нафақаларни тўлаш учун белгиланган муддатларда, алоҳида қайдномалар бўйича алоқа бўлими ёки банкларнинг бўлимлари орқали амалга оширилади.

15. Автомототранспортнинг даврий давлат техник кўрикдан ўтганлиги тўғрисида техник паспортда тегишли белги мавжуд бўлмаган тақдирда ойлик пул компенсацияси тўлаш ойлик пул компенсация тўловини тайинлайдиган органлар томонидан тўхтатиб қўйилади.

Ойлик пул компенсацияси тўлаш автомототранспорт эгаси томонидан ариза берилган ва даврий давлат техник кўрикдан ўтганлик тўғрисида техник паспортда белги қўйилган пайтдан бошлаб тикланади.

Ойлик пул компенсацияси тўлови тайинланган автомототранспорт воситаси эгалари ойлик пул компенсацияси тўловини тайинлайдиган органларни даврий давлат техник кўригидан ўтилгандан кейин 10 кун мобайнида хабардор қилиши шарт.

Агар даврий техник кўрикдан ўтганлик тўғрисидаги ҳужжат икки ҳафтадан ортиқ кечикиб тақдим этилган тақдирда тегишли давр учун ойлик пул компенсацияси тўланмайди.

16. Автомототранспорт воситаси эгаси ойлик пул компенсация тўловини тайинлайдиган органга:

яшаш жойи ўзгарганлиги;

автомототранспорт воситаси сотилганлиги;

йўл ҳаракати хавфсизлиги қоидалари бузилганлиги учун ҳайдовчилик гувоҳномасидан маҳрум этилганлиги ҳолатлари тўғрисида хабар бериши шарт.

Ойлик пул компенсацияси олиш ҳуқуқига эга бўлган автомототранспорт воситаси эгаси вафот этган тақдирда тегишли билдиришнома унинг қариндошлари томонидан тақдим этилиши керак.

Юқорида санаб ўтилган ҳолатларда компенсация тўлаш тўхтатилади.

Кўрсатиб ўтилган ахборотни яширган ва ойлик пул компенсациясини ноқонуний олган автомототранспорт воситаси эгасидан тегишли сумма қонун ҳужжатларида белгиланган тартибда ундириб олинади.

17. Агар ойлик пул компенсациясини асосланмаган тўлаш ойлик пул компенсациясини тайинлайдиган ёки тўлайдиган органнинг ходими айби билан юз берган тақдирда ушбу пул маблағлари айбдор шахснинг ҳисобига қопланади.

18. Ойлик пул компенсациясини тўлайдиган вазирликлар ва идораларнинг ҳудудий бўлинмалари, ҳар ойда, 10-кундан кечикмай «Ўзнефтмаҳсулот» акциядорлик компаниясининг унитар корхоналарига (нефть базаларига) нефть базалари томонидан хизмат кўрсатиладиган ҳудудлар бўйича, ойлик пул компенсациясини олиш ҳуқуқига эга бўлган шахслар сонини кўрсатган ҳолда кейинги ойга ойлик пул компенсациялари суммасини тўлаш учун молиявий маблағлар ҳажмида (компенсациялар етказиб берилиши учун алоқа бўлимлари ёки банкларнинг бўлимлари харажатлари ҳисобга олинган ҳолда) ҳисоб-китоблар билан асосланган эҳтиёжга бўлган буюртманомани тақдим этадилар.

19. «Ўзнефтмаҳсулот» акциядорлик компаниясининг унитар корхоналари (нефть базалари) ҳар ойда 27-кундан кечикмай ойлик пул компенсацияси тўлайдиган вазирликлар ва идораларнинг ҳудудий бўлинмаларининг банк ҳисоб рақамларига ойлик пул компенсацияси тўлаш учун молиявий маблағларнинг зарур миқдорини ўтказадилар.

20. Ойлик пул компенсацияси олиш ҳуқуқига эга бўлган шахслар реестри ойлик пул компенсацияси тўлайдиган вазирликлар ва идораларнинг ҳудудий бўлинмалари томонидан амалга оширилади ва икки ҳафта мобайнида ҳар бир календарь йил чорагининг 1-куни ҳолати бўйича «Ўзнефтмаҳсулот» акциядорлик компаниясининг унитар корхоналарига (нефть базаларига) тақдим этилади.

21. Ойлик пул компенсацияси тўлайдиган вазирликлар ва идораларнинг ҳудудий бўлинмалари ойлик пул компенсацияси олиш ҳуқуқига эга бўлган шахслар реестрларини топшириш билан бир вақтда «Ўзнефтмаҳсулот» акциядорлик компаниясининг унитар корхоналарига (нефть базаларига) олдинги йил чораги учун амалда тўланган тўловлар тўғрисида ҳисоботлар тақдим этади.

22. Мазкур Низом талаблари бузилишида айбдор бўлган шахслар қонун ҳужжатларида белгиланган тартибда жавоб беради.

Иккинчи жаҳон уруши, бошқа урушлар даврида, шунингдек Ўзбекистон Республикасини ҳимоя қилишда ҳаракатдаги армия таркибига кирган ҳарбий қисмлар, штаблар ва муассасаларда хизматни ўтаган ҳарбий хизматчилар ойлик пул компенсацияси олиш ҳуқуқига эга бўлган уруш қатнашчилари ҳисобланади.

Қуйидаги шахслар уруш қатнашчиларига тенглаштирилади:

а) 1941 йил 22 июндан 1954 йил 31 декабргача бўлган даврда қирувчи батальонлар, взводлар ва халқни ҳимоя қилиш отрядлари таркибида собиқ СССР ҳудудида жангларда қатнашган шахслар;

б) Иккинчи жаҳон уруши йилларида партизан отрядларида ва қўшилмаларида бўлган ёхуд яширин ишлар билан шуғулланган шахслар;

в) Иккинчи жаҳон уруши йилларида ҳаракатдаги армия таркибида ёки ҳарбий ҳаракатлар минтақаларида хизматни ўтаган собиқ СССРнинг Ички ишлар вазирлиги органлари ва Давлат хавфсизлиги қўмитаси органларининг бошлиқлар ва оддий аскарлар таркибига кирувчи шахслар;

г) Иккинчи жаҳон уруши даврида балоғат ёшига етгунга қадар полк ўғли ёки кичик матрос сифатида ҳаракатдаги армия ва флотнинг қисмлари ва тузилмалари таркибида бўлган шахслар;

д) Иккинчи жаҳон уруши йилларида ҳарбий ҳаракатлар минтақаларида темир йўлларнинг фронт яқинида жойлашган участкаларида, мудофаа чизиғи иншоотларида, ҳарбий-денгиз базаларида, аэродромларда ва бошқа ҳарбий объектлардаги ишларда қатнашган ишчилар;

е) Иккинчи жаҳон уруши йилларида ҳаракатдаги армия таркибида ишлаган эркин ёлланганлар таркибидан бўлган шахслар;

ж) 1956 йил 24 октябрдан 1956 йил 10 ноябргача бўлган даврда Венгриядаги жанговар ҳаракатлар даврида ушбу мамлакат ҳудудида бўлган ҳарбий қисмлар, штаблар ва муассасаларда хизматни ўтаган ҳарбий хизматчилар.

Иккинчи жаҳон уруши, бошқа урушлар даврида, шунингдек Ўзбекистон Республикасини ҳимоя қилишда ҳаракатдаги армия таркибига кирган ҳарбий қисмлар, штаблар ва муассасаларда хизматни ўташда ярадор, майиб бўлиш, контузияга учраш ёки касал бўлиш оқибатида ногирон бўлиб қолган ҳарбий хизматчилар ойлик пул компенсациясини олиш ҳуқуқига эга бўлган уруш ногиронлари ҳисобланади.

Қуйидаги шахслар уруш ногиронларига тенглаштирилади:

а) собиқ СССР ва Ўзбекистон Республикаси чегараларини ҳимоя қилишда ярадор, майиб бўлиш, контузияга учраш ёки касал бўлиш оқибатида ногирон бўлиб қолган ҳарбий хизматчилар;

б) 1941 йил 22 июндан 1954 йил 31 декабргача бўлган даврда собиқ СССР ҳудудида ҳаракат қилган қирувчи батальонлар, взводлар ва халқни ҳимоя қилиш отрядларида бўлган даврда ярадор, майиб бўлиш, контузияга учраш ёки касал бўлиш сабабли ногирон бўлиб қолган шахслар;

в) фронт яқинида жойлашган темир йўл участкалари, мудофаа чизиғи иншоотлари, ҳарбий-денгиз базалари, аэродромлар ва бошқа ҳарбий объектлардаги ишларда қатнашган ҳамда Иккинчи жаҳон уруши йилларида ҳарбий ҳаракатлар минтақаларида ярадор, майиб бўлиш, контузияга учраш ёки касал бўлиш сабабли ногирон бўлиб қолган ходимлар;

г) Иккинчи жаҳон уруши йилларида партизан отрядлари ва қўшилмаларида ёхуд яширин ишларда бўлиш даврида ярадор, майиб бўлиш, контузияга учраш ёки касал бўлиш оқибатида ногирон бўлиб қолган шахслар;

д) Иккинчи жаҳон уруши йилларида ҳаракатдаги армия таркибида ишлаган даврда ярадор, майиб бўлиш, контузияга учраш ёки касал бўлиш оқибатида ногирон бўлиб қолган эркин ёлланганлар таркибига кирган шахслар;

е) ички ишлар органлари ва давлат хавфсизлик хизматининг бошлиқлар ва оддий аскарлар таркибига кирадиган, жанговар ҳаракатлар олиб борилган мамлакатларда тинчлик ўрнатиш кучларида қатнашиш ҳамда байналмилал бурчни бажариш билан боғлиқ ярадор, майиб бўлиш, контузияга учраш ёки касал бўлиш оқибатида ногирон бўлиб қолган ҳарбий хизматчилари;

ж) ички ишлар органлари ва давлат хавфсизлик хизматининг бошлиқлар ва оддий аскарлар таркибига кирадиган, ҳарбий хизмат мажбуриятини бажариш (хизмат вазифасини ўташ) билан боғлиқ ярадор, майиб бўлиш, контузияга учраш ёки касал бўлиш оқибатида ногирон бўлиб қолган ҳарбий хизматчилари;

з) ўқув ёки синов йиғинларига чақирилган ҳамда ушбу йиғинларни ўташ даврида хизмат мажбуриятларини бажариш билан боғлиқ ярадор, майиб бўлиш, контузияга учраш ёки касал бўлиш оқибатида ногирон бўлиб қолган ҳарбий хизматга мажбурлар.

1. Вазирлар Маҳкамасининг 2003 йил 1 июлдаги 296-сон қарори (Ўзбекистон Республикаси ҚТ, 2003 й., 7-сон, 54-модда) билан тасдиқланган Нефть маҳсулотлари сотувчи корхоналарнинг чекланган устамаларини шакллантириш тўғрисидаги низомнинг 9-банди биринчи хатбошининг иккинчи жумласи қуйидаги таҳрирда баён қилинсин:

«Бунда Нархларни бошқариш жамғармасига ўтказилиши керак бўлган сумма автомобиль бензини сотиб олиш харажатларининг бир қисми учун фуқароларнинг айрим тоифаларига пул компенсацияси тўлайдиган органлар ҳисобига ўтказилган пул маблағлари суммасига камайтирилади».

2. Вазирлар Маҳкамасининг «Энергия ресурслари нархларини давлат томонидан бошқариш тўғрисида» 1992 йил 16 октябрдаги 474-сон қарорининг 4-банди ўз кучини йўқотган деб ҳисоблансин.

3. Вазирлар Маҳкамасининг «Ёқилғи ва энергия учун чекланган улгуржи ва чакана нархларнинг ўзгариши тўғрисида» 1993 йил 27 майдаги 258-сон қарорининг 3-банди ўз кучини йўқотган деб ҳисоблансин.