O‘zbekiston Respublikasi Saylov kodeksining 14, 16, 20, 20¹ va 92¹-moddalariga hamda “Xalq deputatlari viloyat, tuman va shahar kengashi deputatining maqomi to‘g‘risida”gi O‘zbekiston Respublikasi Qonunining 4 va 17-moddalariga muvofiq O‘zbekiston Respublikasi Markaziy saylov komissiyasi qaror qiladi:

1. Xalq deputatlari viloyat, tuman va shahar Kengashi deputatining guvohnomasi va ko‘krak nishoni to‘g‘risidagi namunaviy nizom 1-ilovaga muvofiq tasdiqlansin.

2. Xalq deputatlari viloyat, tuman va shahar kengashi deputatining guvohnomasi namunasi va tavsifi 2 va 2a-ilovalarga muvofiq;

Xalq deputatlari viloyat, tuman va shahar Kengashi deputatining ko‘krak nishoni namunasi va tavsifi 3 va 3a-ilovalarga muvofiq tasdiqlansin.

3. Ma’lumot uchun qabul qilinsinki, xalq deputatlari viloyat, tuman va shahar Kengashi deputatining transportda tekin yurish tartibi va shartlari, transport tashkilotlari bilan bu borada hisob-kitob qilish tartibi O‘zbekiston Respublikasi Vazirlar Mahkamasining 2014-yil 2-apreldagi 78-son qarori bilan tasdiqlangan Xalq deputatlari viloyat va tuman Kengashi deputatining yo‘lovchilar transportida bepul yurishi hamda transport tashkilotlari bilan shu bilan bog‘liq hisob-kitoblarni amalga oshirish tartibi va shartlari to‘g‘risida nizom asosida amalga oshiriladi.

4. Qoraqalpog‘iston Respublikasi Markaziy saylov komissiyasiga qonun hujjatlarida belgilangan vakolatlari doirasida deputatning guvohnomasi va ko‘krak nishoni to‘g‘risidagi nizomni, ularning namunasi hamda tavsiflarini tasdiqlash tavsiya etilsin.

5. O‘zbekiston Respublikasi Markaziy saylov komissiyasining “Xalq deputatlari viloyat, tuman va shahar kengashi deputatining guvohnomasi va ko‘krak nishoni to‘g‘risida” 2020-yil 6-yanvardagi 1019-son qarori o‘z kuchini yo‘qotgan deb hisoblansin.

6. Mazkur qaror O‘zbekiston Respublikasi Markaziy saylov komissiyasining rasmiy veb-saytida e’lon qilinsin.

7. Ushbu qaror nusxasi Qoraqalpog‘iston Respublikasi Markaziy saylov komissiyasi va hududiy saylov komissiyalariga hamda xalq deputatlari viloyat, tuman va shahar Kengashlariga yuborilsin.

8. Mazkur qaror ijrosini nazorat qilish O‘zbekiston Respublikasi Markaziy saylov komissiyasi Raisining o‘rinbosari B. Kuchkarov zimmasiga yuklansin.

Mazkur Namunaviy nizom xalq deputatlari viloyat, tuman va shahar Kengashi deputatiga (bundan buyon matnda deputat deb yuritiladi) guvohnoma va ko‘krak nishoni berish, ulardan foydalanish, shuningdek yo‘qolgan yoki yaroqsiz holga kelgan taqdirda yangisini berish tartibini belgilaydi.

1. Deputatning guvohnomasi deputatning vakolati va shaxsini tasdiqlovchi hujjat hisoblanadi.

2. Deputatning ko‘krak nishoni deputatlik maqomiga ega bo‘lgan vakolatli shaxs sifatida ajratib turuvchi belgi hisoblanadi.

Ko‘krak nishoni ko‘krakning chap tomoniga taqiladi.

3. Deputatga guvohnoma va ko‘krak nishoni tegishincha hududiy, tuman va shahar saylov komissiyasida (deputatlar uchun alohida yuritilgan tegishli qayd daftarida) ro‘yxatga olinib, tegishli saylov komissiyasi raisi yoki u vakolat bergan shaxs tomonidan topshiriladi.

4. Deputatning guvohnomasi tegishli hududiy, tuman, shahar saylov komissiyasining muhri bilan tasdiqlanadi.

5. Xalq deputatlari viloyat, Toshkent shahar Kengashi deputatiga guvohnoma tegishli hududiy saylov komissiyasi tomonidan 001 raqamidan 060 raqamigacha u saylangan saylov okrugi tartib raqami bo‘yicha beriladi.

Xalq deputatlari tuman, shahar Kengashi deputatiga guvohnoma tegishli tuman, shahar saylov komissiyasi tomonidan 001 raqamidan 030 raqamigacha u saylangan saylov okrugi tartib raqami bo‘yicha beriladi.

6. Bo‘shab qolgan o‘rinlarga viloyat, tuman, shahar Kengashi deputati etib saylangan hamda ro‘yxatga olingan deputatga guvohnoma navbatdagi tartib raqamidan boshlab beriladi.

7. Deputatning yaroqsiz holga kelgan guvohnomasi o‘rniga aynan shu raqam bilan yangi guvohnoma beriladi.

Deputatning yaroqsiz holga kelgan ko‘krak nishoni yangisi bilan almashtiriladi.

Deputatning yo‘qolgan guvohnomasi o‘rniga navbatdagi tartib raqami bilan yangi guvohnoma beriladi.

8. Guvohnoma yoki ko‘krak nishoni yaroqsiz holga kelgani haqida deputat viloyat, tuman va shahar Kengashi orqali, tegishli saylov komissiyasiga ikki ish kuni ichida ariza bilan murojaat qilishi shart.

Guvohnoma yoki ko‘krak nishoni yo‘qotilgani haqida deputat tegishli xalq deputatlari Kengashi raisi nomiga yozgan va ustxat qo‘yilgan bildirishnoma nusxasini ilova qilgan holda tegishli saylov komissiyasiga ikki ish kuni ichida ariza bilan murojaat qilishi shart.

Arizaga guvohnoma yoki ko‘krak nishonining yo‘qotilgan yoxud yaroqsiz holga kelganligi sabablari ko‘rsatilishi hamda yaroqsiz holdagi guvohnoma yoki ko‘krak nishoni va tegishli hujjatlar ilova qilinishi lozim.

Deputat guvohnomasini va (yoki) ko‘krak nishonini yo‘qotgan taqdirda unga ushbu Nizomda belgilangan tartibda guvohnoma va (yoki) ko‘krak nishoni yo‘qolgani haqida ariza bergan kundan boshlab bir oy ichida yangi guvohnoma va (yoki) ko‘krak nishoni beriladi.

9. Deputatning yo‘qotilgan guvohnomasi topib olingan taqdirda ushbu guvohnoma ichki ishlar organlariga yoki tegishli saylov komissiyasiga topshirilishi shart.

10. Deputatning yaroqsiz holga kelgan guvohnomasi, topib olingan yoki vakolatlari muddatidan ilgari tugatilgan deputatning tegishli saylov komissiyasiga qaytarilgan guvohnomalari kesish yo‘li bilan foydalanib bo‘lmaydigan holga keltiriladi hamda belgilangan tartibda (yoqish yo‘li bilan) yo‘q qilinadi va bu haqda tuzilgan dalolatnoma tegishli viloyat, tuman va shahar hokimligining idoraviy arxivda saqlanadi.

11. Deputat guvohnoma va ko‘krak nishonidan o‘z vakolatlari muddati mobaynida foydalanadi.

Deputat o‘z vakolatlarini amalga oshirayotganda guvohnomasini ko‘rsatib, tegishli viloyat, tuman va shahar hududida joylashgan korxonalar, muassasalar va tashkilotlarga moneliksiz kirish huquqidan, shuningdek ularning rahbarlari hamda boshqa mansabdor shaxslari tomonidan darhol qabul qilinish huquqidan foydalanadi.

Deputat guvohnoma va ko‘krak nishonini avaylab asrashi shart.

12. Deputatning guvohnomasini va (yoki) ko‘krak nishonini olib qo‘yish, shuningdek guvohnomani va (yoki) ko‘krak nishonini boshqa shaxslarga berish taqiqlanadi.

13. Deputatning vakolatlari muddati tugaganidan keyin guvohnoma va ko‘krak nishoni o‘z kuchini yo‘qotgan deb hisoblanadi hamda deputatlik vakolatini to‘liq o‘tagan shaxsda esdalik sifatida qoladi.

14. Deputatning vakolatlari muddatidan ilgari tugatilgan taqdirda guvohnoma va ko‘krak nishoni tegishli xalq deputatlari Kengashi kotibiyati orqali ikki ish kunidan kechiktirmay tegishli saylov komissiyasiga qaytarilishi shart.

15. Deputat viloyat, tuman va shahar Kengashining vakolatlari muddati davrida vafot etgan taqdirda guvohnoma va ko‘krak nishoni uning oila a’zolarida xotira sifatida qoladi.

16. Mazkur Nizom talablarining buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.

1. Xalq deputatlari viloyat, tuman va shahar Kengashi deputatining (bundan buyon matnda deputat deb yuritiladi) guvohnomasi 90x60 millimetr o‘lchamdagi qattiq charm muqovali kitobcha ko‘rinishiga ega bo‘ladi.

2. Xalq deputatlari viloyat Kengashi deputatining guvohnomasi to‘q qizil rangli, xalq deputatlari tuman (shahar) Kengashi deputatining guvohnomasi to‘q ko‘k rangda bo‘ladi.

3. Deputat guvohnomasining old tomoni yuqori va o‘rta qismlari oralig‘ida O‘zbekiston Respublikasi Davlat gerbining metaldan tayyorlangan o‘xshash tasviri o‘rnatiladi, uning ostida ikki satrda oltin rangda “VILOYAT (TUMAN, SHAHAR) KENGASHI DEPUTATI” degan matn joylashtiriladi.

4. Deputatning guvohnomasi ichki so‘l tomonining:

yuqori qismi chap tomonida O‘zbekiston Respublikasi Davlat gerbining rangli tasviri tushiriladi;

o‘rta qismi markazida uch satrda tegishli “XALQ DERUTATLARI _________________ VILOYATI (SHAHAR, TUMANI) KENGASHI DEPUTATI” degan matn qora rangda yirik joylashtiriladi. Bunda chiziq o‘rniga tegishli hudud nomi yoziladi;

pastki qismining markazida qizil rangda guvohnomaning amal qilish muddati (kun, oy, yil) ko‘rsatiladi.

5. Deputatning guvohnomasi ichki o‘ng tomonining:

chap o‘rta qismida deputatning 30x40 millimetr o‘lchamidagi (oq fonda) rangli fotosurati joylashtiriladi. Fotosurat o‘ng tomonining pastki burchagiga O‘zbekiston Respublikasi Davlat gerbi tasvirlangan tegishli hududiy, tuman, shahar saylov komissiyasining muhri shaklidagi gologramma yopishtiriladi;

yuqori qismi markaziga bir satrda qizil rangda “GUVOHNOMA №___” so‘zlari joylashgan bo‘ladi. Bunda chiziq o‘rniga guvohnomaning tartib raqami yoziladi;

o‘rta qismining markazida, fotosuratdan o‘ngroqda alohida uch satrda deputatning familiyasi, ismi va otasining ismi qora rangda yirik ko‘rsatiladi;

pastki qismining markazida qora rangda tegishli “_____________ hududiy (shahar, tumani) saylov komissiyasining 20__-yil __-_________dagi ____-son qarori bilan ro‘yxatga olingan.” degan matn joylashtiriladi. Bunda chiziq o‘rniga tegishli hudud nomi yoziladi.

6. Guvohnomaning ichki tomonlari maxsus qog‘ozdan tayyorlangan va shaffof plyonka bilan qoplangan bo‘ladi.

1. Xalq deputatlari viloyat, tuman va shahar Kengashi deputatining (bundan buyon matnda deputat deb yuritiladi) ko‘krak nishoni O‘zbekiston Respublikasi Davlat bayrog‘ining hilpirab turgan tasviri ko‘rinishida bo‘ladi.

2. Deputat ko‘krak nishonining asosi mis qotishmadan tayyorlanadi. Ko‘krak nishonning old tomoni sirlangan moviy, oq va yashil rangdagi tasma chiziqlar hamda qizil rangdagi hoshiya chiziq bilan qoplangan. Oq tasma chiziq moviy va yashil tasma chiziqlardan sirlangan qizil rangdagi hoshiya bilan ajralib turadi. Ko‘krak nishondagi tasvirlar, yozuv, nishon qirralari hamda orqa tomoni zarhal qilib ishlangan.

3. Ko‘krak nishon old tomonining yuqori chap burchagida moviy fonda yarim oy va undan o‘ngroqda uch qatorda o‘n ikkita besh qirrali yulduz tasvirlangan bo‘ladi. Yarim oy vertikal holatda joylashtirilgan, yulduzlar esa undan o‘ngroqda, uch qatorda, ya’ni yuqori qatorda uchta, o‘rta qatorda to‘rtta va quyi qatorda beshta yulduz joylashtiriladi.

4. Deputat ko‘krak nishonining oq tasma chizig‘i ustida lotin yozuvida “VILOYAT (TUMAN, SHAHAR)” degan, yashil tasma chizig‘i ustida lotin yozuvida ikki satrda “KENGASHI DEPUTATI” degan matnlar sariq rangda yoziladi.

5. Ko‘krak nishon to‘g‘nog‘ich bilan taqiladi.

6. Ko‘krak nishonning kattaligi 23x30 millimetr.