Davlat mulkini davlat tasarrufidan chiqarish va xususiylashtirish jarayonining samarali tashkil etilishini taʼminlash, koʻp ukladli iqtisodiyotni shakllantirishni davom ettirish, korxonalar va tashkilotlarni xususiylashtirishdan mehnat jamoalari va jismoniy shaxslarning manfaatdorligini oshirish, ushbu sohadagi kamchiliklarni bartaraf etish, tartibni buzishlar va suiisteʼmollarning oldini olish maqsadida Vazirlar Mahkamasi qaror qiladi:

1. Respublika komissiyasi tomonidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar rahbarlarining xalq xoʻjaligi tarmoqlarida davlat tasarrufidan chiqarish va xususiylashtirish qanday borayotganligi toʻgʻrisidagi hisobotlari eshitilganligi, mulkchilik shakllarini oʻzgartirish boʻyicha ishlarni amalga oshirishga xalaqit berayotgan sabablar aniqlanganligi, ushbu jarayonni jadallashtirishga qaratilgan chora-tadbirlar belgilanganligi maʼlumot uchun qabul qilinsin.

Oʻzlari rahbarlik qilayotgan tarmoqlarda davlat tasarrufidan chiqarish va xususiylashtirishni tashkil etish boʻyicha respublika Hukumati qarorlarining bajarilishini taʼminlamaganligi, quyi tarkibiy boʻlinmalarning ishi ustidan zarur nazoratning yoʻqligi, ushbu sohalardagi jiddiy kamchiliklar va buzilishlarni betaraf qilish boʻyicha amaliy choralar koʻrmaganligi uchun Toshkent shahar hokimligi Kommunal mulkchilik va xususiylashtirish bosh boshqarmasi boshligʻi vazifasini bajaruvchi I. I. Yemelyanov, “Toshkentsavdo” konserni raisi R. Yu. Oʻrozboyev, “Toshshaharmaishiyxizmat” uyushmasi raisi A. D. Azimovlarning egallab turgan lavozimlarida qolish-qolmasliklari toʻgʻrisidagi masalani koʻrib chiqish va hal qilish Oʻzbekiston Respublikasi Davlat mulki qoʻmitasi raisi Sh. R. Gʻafurov, “Oʻzbeksavdo” davlat uyushmasi boshqaruvi raisi M. 3. Usmonov, “Oʻzmaishiyxizmat” uyushmasi raisi 3. T. Sobirov va Toshkent shahar hokimi A, I. Fozilbekov oʻrtoqlarga topshirilsin.

“Oʻzbeksavdo” davlat uyushmasi raisi M. 3. Usmonov. “Oʻzmaishiyxizmat” uyushmasi raisi 3. T. Sobirov oʻrtoqlar ular rahbarlik qilayotgan tizimdagi obyektlarni davlat tasarrufidan chiqarish va xususiylashtirish jarayonini amalga oshirish uchun shaxsan javobgar ekanliklari toʻgʻrisida ogohlantirilsinlar.

Davlat mulki qoʻmitasi (oʻrtoq Gʻafurov), “Oʻzdavjamgʻarma” (oʻrtoq Rahimjonov), Toshkent shahar (oʻrtoq Xoʻjayev), Xorazm (oʻrtoq Doʻschonov), Toshkent (oʻrtoq Rahimboyev), Namangan (oʻrtoq Najmiddinov va Andijon (oʻrtoq Alimov) viloyatlari hokimlari oʻrinbosarlarining eʼtiborlari Vazirlar Mahkamasining davlat tasarrufidan chiqarish va xususiylashtirish boʻyicha ilgari qabul qilingan qarorlarining bajarilishini taʼminlash yuzasidan ular tomonidan yetarli chora-tadbirlar koʻrilmayotganligiga qaratilsin.

2. Vazirlar Mahkamasining 1992-yil 23-sentabrdagi 443-son va 1993-yil 20-yanvardagi 44-son qarorlarida nazarda tutilganlarga qoʻshimcha ravishda mahalliy sanoat, maishiy xizmat koʻrsatish, savdo va umumiy ovqatlanish, matlubot kooperatsiyasi korxonalarini mulkchilikning boshqa shakllariga aylantirish boʻyicha 1993-yil uchun belgilangan tashkiliy chora-tadbirlar 1—5-ilovalarga* muvofiq tasdiqlansin.

3. “Oʻzbeksavdo” uyushmasi, Oʻzbekbirlashuv hamda “Oʻzkooptayyorlovsavdo” birlashmasi Oʻzbekiston Respublikasi Davlat mulki qoʻmitasi va “Oʻzdavjamgʻarma” bilan birgalikda yirik ulgurji bazalarni hamda savdo korxonalarini 1993-yilda mulkchilikning aksionerlik, ijara va aralash shakllariga aylantirish boʻyicha aniq chora-tadbirlarni 6-ilovaga* muvofiq amalga oshirsinlar.

4. Mahalliy sanoat, maishiy xizmat koʻrsatish, savdo va umumiy ovqatlanish, matlubot kooperatsiyasi, “Oʻzkooptayyorlovsavdo” birlashmasi hamda “Oʻzmevasabzavotuzumsanoat” konserni obyektlarini sotib oluvchi nodavlat yuridik va jismoniy shaxslarga, davlat tasarrufidan chiqarish va xususiylashtirishning shakllaridan qatʼi nazar, 7-ilovaga muvofiq qoʻshimcha imtiyozlar berilsin.

5. Belgilab qoʻyilsinki:

asosiy fondlarning balans qiymati 1992-yil 1-yanvargacha 5 mln soʻmdan ortiq boʻlgan davlat mulki obyektlarini mulkchilikning boshqa shakllariga aylantirish Oʻzbekiston Respublikasi Davlat mulki qoʻmitasining qarori bilan, balans qiymati 5 mln soʻmdan kam boʻlgan obyektlarni mulkchilikning boshqa shakllariga aylantirish — hududiy boshqarmalarning qarori bilan amalga oshiriladi;

Davlat hokimiyati va boshqaruvi organlari tomonidan nodavlat yuridik va jismoniy shaxslarga davlat mulkini sotishning Oʻzbekiston Respublikasi Davlat mulki qoʻmitasining ishtirokisiz amalga oshiriladigan barcha aktlari “Davlat tasarrufidan chiqarish va xususiylashtirish toʻgʻrisida”gi Qonun kuchga kiritilgan paytdan boshlab haqiqiy emas deb hisoblanadi va ular bekor qilinadi;

xorijiy yuridik va jismoniy shaxslar ishtirokida davlat mulki ulushi bilan tashkil etiladigan qoʻshma korxonalarni roʻyxatga olish taʼsis hujjatlari Oʻzbekiston Respublikasi Davlat mulki qoʻmitasi bilan kelishilgandan keyin amalga oshiriladi.

6. Davlat mulki qoʻmitasining markaziy apparati va hududiy boshqarmalari 8 va 9-ilovalarga* muvofiq qoʻshimcha 66 nafar xodimlar bilan mustahkamlansin. Hududiy boshqarmalarning namunaviy tuzilmasiga 10-ilovaga* muvofiq qisman oʻzgartirishlar kiritilsin.

7. Oʻzbekiston Respublikasi Moliya vazirligi:

Davlat mulki qoʻmitasining markaziy apparati va hududiy boshqarmalari xodimlari soni qoʻshimcha koʻpayishini hisobga olgan holda ularni respublika budjeti hisobidan mablagʻ bilan taʼminlasin;

10 kun muddatda Tashqi iqtisodiy aloqalar vazirligi va Davlat mulki qoʻmitasi bilan birgalikda Davlat mulki qoʻmitasi markaziy apparatini hamda uning hududiy boʻlinmalarini texnik jihozlash uchun mablagʻ, shu jumladan valyuta ajratish toʻgʻrisidagi takliflarni koʻrib chiqsin va Vazirlar Mahkamasiga kiritsin;

“Oʻzbeksavdo” davlat uyushmasi, “Oʻzmaishiyxizmat” uyushmasi bilan birgalikda joriy yilning toʻqqiz oyi ish yakunlari boʻyicha savdo, maishiy xizmat koʻrsatish korxonalarining moliyaviy ahvolini tahlil qilib chiqsin hamda zarar koʻrib ishlovchi ishlab chiqarish obyektlarini tugatish boʻyicha aniq chora-tadbirlarni ishlab chiqsin;

“Oʻzshartnomasavdo”, “Oʻzbeksavdo” davlat uyushmalari, “Oʻzmaishiyxizmat” uyushmasi “Mahalliy sanoat” davlat korporatsiyasi, Oʻzbekbirlashuv, “Oʻzkooptayyorlovsavdo” birlashmasi bilan birgalikda ikki hafta muddatda Vazirlar Mahkamasiga ushbu tizimlarning xususiylashtirilayotgan korxonalariga zarur asbob-uskunalar va moddiy-texnika resurslarini sotib olishlari uchun Hukumat zaxira jamgʻarmasidan bir yoʻla moliyaviy yordam koʻrsatish toʻgʻrisida takliflar kiritsin.

8. Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimlari:

uy-joy fondini xususiylashtirishni joriy yilning III choragida nihoyasiga yetkazsinlar;

“Davlat tasarrufidan chiqarish va xususiylashtirish toʻgʻrisida” Oʻzbekiston Respublikasi Qonuni qabul qilinishidan oldin mulkchilik shaklini oʻzgartirgan korxonalar, muassasalar va tashkilotlarni joriy yilning 15-sentabrigacha Davlat mulki qoʻmitasi organlarida qayta rasmiylashtirishni taʼminlasinlar. Koʻrsatib oʻtilgan sanadan keyin ushbu obyektlarni mulkchilikning boshqa shakllariga aylantirish toʻgʻrisida hokimliklar tomonidan qabul qilingan qarorlar haqiqiy emas deb hisoblanadi.

9. Oʻzbekiston Respublikasi Davlat mulki qoʻmitasi:

mulkchilik shakli oʻzgartirilayotgan obyektlar qiymatini korxonalarning balansi haqidagi maʼlumotlar asosida aniqlashga ruxsat etsin. Belgilansinki, zarur hisob-kitoblar hamda dalil sifatidagi tasdiqlangan hujjatlar xususiylashtirilayotgan obyektning yuqori tashkiloti tomonidan Davlat mulki qoʻmitasiga yoki uning hududiy boshqarmasiga kiritiladi;

hududiy boshqarmalar huzurida tashkil etilgan davlat mulkini hisobga olish hamda uning qiymatini belgilash boʻyicha xoʻjalik hisobidagi markazlarning, konsalting va auditorlik firmalarining ishlarini jonlantirsin. Yuqorida qayd etib oʻtilgan markazlarni qoʻshimcha qiymat soligʻi toʻlashdan ozod etish toʻgʻrisida belgilangan tartibda taklif kiritsin.

“Oʻzdavjamgʻarma” hamda “Oʻzistiqbolstat” davlat qoʻmitasi bilan birgalikda bir oy muddatda mulkchilikning turli shakllaridagi koʻp ukladli iqtisodiyotni shakllantirish, respublikaning mintaqaviy xususiyatlarini hisobga olgan holda davlat tasarrufidan chiqarish va xususiylashtirish tartibini ishlab chiqish muammolari boʻyicha ilmiy-tadqiqot markazini tuzish toʻgʻrisidagi taklifni ishlab chiqsin va Vazirlar Mahkamasiga kiritsin.

10. Oʻzbekiston Respublikasidan tashqarida boʻlgan hamda uning mulki hisoblangan davlat mulkini xususiylashtirish va mulkiy huquqlarni himoya qilish vazifalari Oʻzbekiston Respublikasi Davlat mulki qoʻmitasi zimmasiga yuklatilsin.

“Oʻzistiqbolstat” davlat qoʻmitasi Tashqi ishlar vazirligi, Tashqi iqtisodiy aloqalar vazirligi hamda manfaatdor idoralar, korporatsiyalar, konsernlar, uyushmalar bilan birgalikda bir oy muddatda Oʻzbekiston Respublikasining xorijiy davlatlarda mavjud boʻlgan hamda shakllantirilayotgan mulki (elchixonalar, vakolatxonalar, savdo vakolatxonalari, korxonalar, tashkilotlar va hokazolar) toʻgʻrisida hisobot shaklini ishlab chiqsin.

11. Oliy va oʻrta maxsus taʼlim vazirligi Oʻzbekiston Respublikasi Davlat mulki qoʻmitasi bilan birgalikda ikki oy muddatda oliy taʼlim tizimida davlat mulkini davlat tasarrufidan chiqarish va xususiylashtirish sohasi boʻyicha oʻquv kursi dasturini ishlab chiqsin.

12. Oʻzdavteleradio, ommaviy axborot vositalari Oʻzbekistondagi va xorijiy mamlakatlardagi xususiylashtirish jarayonlarini muntazam yoritib borsinlar, matbuot sahifalalarida xususiylashtirish boʻyicha chet ellik mutaxassislar va ekspertlarning chiqishlarini uyushtirsinlar, ijobiy tajribalarni keng targʻib qilsinlar.

13. Ushbu qarorning bajarilishini nazorat qilish Bosh vazirning oʻrinbosarlari T. M. Miryoqubov va B. S. Hamidov oʻrtoqlar zimmasiga yuklatilsin.

1. Davlat tasarrufidan chiqarilishi va xususiylashtirilishi kerak boʻlgan mahalliy sanoat, aholiga maishiy xizmat koʻrsatish, davlat savdosi va umumiy ovqatlanish, matlubot kooperatsiyasi korxonalari mulki qiymatini belgilashda beriladigan qoʻshimcha imtiyozlar:

Oʻzbekiston Respublikasi Vazirlar Mahkamasining 1993-yil 6-yanvardagi 3-son qaroriga 1-ilovadagi 2—4-bandlarda nazarda tutilgan imtiyozlar jismoniy va nodavlat yuridik shaxslarga joriy etilsin;

xususiylashtirilayotgan obyektlarni sotib olish muddatini, birinchi badal miqdorini keyinchalik hech qanday indeksatsiyalashsiz sotib olish qiymatining 10 foizi (aksionerlik jamiyatlariga aylantirish hollaridan tashqari) qilib belgilagan holda, besh yildan oʻn yilgacha uzaytirishga ruxsat etilsin;

qiymati 20 mln soʻmdan ortiq boʻlgan obyektlarni bir yoʻla sotib olishda chegirish miqdori sotib olish miqdorining 15 foizigacha oshirilsin;

obyektlarni sotish qiymatlari belgilanayotganda Oʻzbekiston Respublikasi Vazirlar Mahkamasining 1993-yil 1-iyundagi 261-son qarorining amal qilishi 1993-yilda xususiylashtirilayotgan korxonalarga joriy qilinmasin;

Vazirlar Mahkamasining 1993-yil 6-yanvardagi 3-son qaroriga 1-ilovaning 3-bandidagi uchinchi xatboshining sotib olinayotgan mulkning dastlabki qiymatini oʻz aylanma mablagʻlarini toʻldirish uchun Moliya vazirligi tomonidan berilgan imtiyozli kreditlar summasi miqdoriga kamaytirish boʻyicha qismining amal qilishi joriy etilsin.

2. Xususiy mulk shaklida xususiylashtirilgan korxonalar, masʼuliyati cheklangan jamiyatlar uchun:

mulkka order olingan paytdan boshlab dastlabki ikki yilda mulk uchun soliq toʻlashdan (transport vositalari va imorat egalaridan olinadigan soliqlardan tashqari), amortizatsiya ajratmalari hisobidan budjetga toʻlanadigan resurs toʻlovlaridan hamda majburiy toʻlovlardan ozod qilish belgilanadi;

“Korxonalar, birlashmalar va tashkilotlardan olinadigan soliqlar toʻgʻrisida” Oʻzbekiston Respublikasi Qonuni 10-moddasining birinchi xatboshida nazarda tutilgan daromaddan soliq toʻlash boʻyicha imtiyozlar yangidan tashkil etilgan korxonalarga joriy etiladi.

3. Xususiylashtirilgan korxonalar xodimlarining ixtiyoriy badallari hisobiga balansdan tashqari kredit fondlari tashkil etilishiga ruxsat berilsin, bunda ularning manbalari toʻgʻrisida deklaratsiya taqdim etilishi talab etilmaydi.

4. Belgilansinki, “Oʻzbeksavdo” davlat uyushmasi, Oʻzbekbirlashuv, “Oʻzkooptayyorlovsavdo” birlashmasi, “Oʻzmevasabzavotuzumsanoat” konsernining rentabelligi darajasi 2 foizgacha boʻlgan xususiylashtirilgan korxonalari, “Oʻzmaishiyxizmat” uyushmasi hamda “Mahalliy sanoat” davlat korporatsiyasining rentabellik darajasi 10 foizgacha boʻlgan korxonalari uchun 1993-yil oxirigacha soliq olinadigan daromad xodimlarga eng kam ish haqi toʻlashni kafolatlaydigan mehnatga haq toʻlash fondi summasi miqdorida kamaytiriladi.

5. “Mahalliy sanoat” davlat korporatsiyasi, “Oʻzbeksavdo”, “Oʻzmaishiyxizmat” uyushmalari, Oʻzbekbirlashuv, “Oʻzkooptayyorlovsavdo” birlashmasi korxonalari faoliyatlari hajmlarining 0,1 foizi miqdorida avtomobil yoʻllarini saqlash va ulardan foydalanish uchun mablagʻ ajratishning ilgari amalda boʻlgan tartibi saqlab qolinsin.

6. “Oʻzbeksavdo” davlat uyushmasi, “Oʻzmaishiyxizmat” uyushmasi, “Mahalliy sanoat” davlat korporatsiyasiga, tajriba tariqasida, xususiylashtirilayotgan obyektlarning qiymatini baholash hamda tegishli hujjatlarni tayyorlash boʻyicha komissiyalarni mustaqil ravishda tuzishga ruxsat berilsin, keyinchalik bu hujjatlar davlat orderini rasmiylashtirish va berish uchun Davlat mulki qoʻmitasiga va uning hududiy boʻlinmalariga taqdim etiladi.

7. Vazirlar Mahkamasining 1993-yil 6-yanvardagi 3-son qarorining 4-bandiga qisman oʻzgartirish kiritgan holda yangi ish joylarini tashkil etish, tarmoqlarning moddiy-texnika negizini mustahkamlashga sarflash uchun “Oʻzmaishiyxizmat” uyushmasiga davlat mulkini sotib olishdan, sotishdan budjetga oʻtkazilishi kerak boʻlgan umumiy summaning 30 foizgachasini, “Oʻzbeksavdo” davlat uyushmasi hamda “Mahalliy sanoat” davlat korporatsiyasiga esa 25 foizgachasini toʻgʻridan-toʻgʻri ajratish hisobidan maxsus fondlar tashkil etishga ruxsat etilsin.

8. Belgilab qoʻyilsinki, xususiylashtirilgan obyektlarning moliya-xoʻjalik faoliyatini tekshirish, taftish qilish bir yilda koʻpi bilan bir marta amaldagi qonunchilikka muvofiq faqat soliq organlari tomonidan amalga oshiriladi.