Lizing operatsiyalarini yanada rivojlantirish, ulardan korxonalarni tashkil etish va zamonaviylashtirish uchun samarali foydalanish, korxonalarni raqobatbardosh mahsulotlar ishlab chiqarishni koʻpaytirishni taʼminlovchi zamonaviy asbob-uskunalar va texnologiyalar bilan jihozlash maqsadida Vazirlar Mahkamasi qaror qiladi:

1. Soliq solinadigan daromadlar (foyda)ni aniqlashda lizingga oluvchilarning 2009-yil 1-yanvargacha lizingga olingan asosiy vositalar boʻyicha jami daromadidan amortizatsiya ajratmalari jami summasini, shu jumladan qonun hujjatlariga muvofiq tezlashtirilgan usul bilan hisoblangan summani chegirib tashlash huquqiga ega boʻlishiga doir tartib belgilab qoʻyilsin.

Oʻzbekiston Respublikasi Davlat soliq qoʻmitasi ushbu qarorda belgilangan tartibga qatʼiy amal qilsin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda, 2004-yil 1-yanvardan boshlab barcha xoʻjalik yurituvchi subyektlar uchun Moliya-xoʻjalik faoliyati buxgalteriya hisobining yangi hisob-kitoblar rejasi joriy qilinishini hisobga olgan holda, ikki hafta muddatda Buxgalteriya hisobida lizing operatsiyalarini aks ettirish tartibini ishlab chiqsin va belgilangan tartibda tasdiqlasin.

3. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

I. Vazirlar Mahkamasining 1994-yil 3-noyabrdagi 533-son qarori (Oʻzbekiston Respublikasi QT, 1994-y., 11-son, 49-modda) bilan tasdiqlangan Davlat bojlari stavkalari 4-bandining “u” kichik bandiga quyidagi mazmundagi izoh qoʻshilsin:

“Izoh. Lizing obyektining lizing beruvchi talabi boʻyicha ijro xatlari yozib berishda, lizing shartnomasida belgilangan toʻlanmagan toʻlovlar summasidan lizing shartnomasi muddati tugashigacha qolgan davrga lizing beruvchi daromadini chegirgan holda davlat boji undiriladi”.

II. Vazirlar Mahkamasining “Avtomototransport vositalarini roʻyxatdan oʻtkazish, qayta roʻyxatdan oʻtkazish va ularning hisobini olib borish, milliy davlat raqami belgilarini berish va ularni almashtirish ishlarini tartibga solish haqida” 1997-yil 26-maydagi 256-son qaroriga 1-ilovada:

a) II boʻlim 16-bandining birinchi xatboshi quyidagi tahrirda bayon qilinsin:

“16. Yuridik shaxslar transport vositalarini roʻyxatdan oʻtkazishda yuridik shaxsning davlat roʻyxatidan oʻtkazilganligi toʻgʻrisidagi guvohnoma nusxasini taqdim etadilar”;

b) V boʻlim 1-bandi “v” kichik bandining uchinchi xatboshidagi “oldi-sotdi, hadya, ayirboshlash” soʻzlaridan keyin “lizing, sublizing” soʻzlari qoʻshilsin;

v) quyidagi mazmundagi VII boʻlim qoʻshilsin:

1. Jismoniy shaxs yoki yuridik shaxs tomonidan mulk sifatida sotib olingan va jismoniy shaxs yoki yuridik shaxsga vaqtincha egalik qilish va foydalanish huquqi bilan lizing shartnomasi yoki sublizing shartnomasi asosida berilgan transport vositalari, lizingga beruvchi nomiga yoki lizingga oluvchi nomiga tomonlarning yozma bitimi boʻyicha (belgilangan namunadagi blankalarda) roʻyxatdan oʻtkaziladi.

2. Lizingga beruvchi nomiga transport vositalarini roʻyxatdan oʻtkazish umumiy asoslarda lizing beruvchi joylashgan joyda amalga oshiriladi.

3. Lizingga beruvchi tomonidan lizingga oluvchiga lizingga oluvchi nomiga roʻyxatdan oʻtkazishni nazarda tutuvchi lizing yoki sublizing shartnomasiga asosan vaqtinchalik egalik va foydalanish huquqi berilgan transport vositalari shartnoma amal qilish muddatiga lizingga oluvchining joylashgan joyi boʻyicha quyidagilarga asosan roʻyxatdan oʻtkaziladi:

lizingga beruvchining transport vositalariga mulk egasi huquqini tasdiqlovchi hujjatlar (oldi-sotdi shartnomasi, maʼlumotnoma-hisob raqami va/yoki davlat orderi va boshqalar);

lizing yoki sublizing shartnomasi;

transport vositasining roʻyxatdan oʻtkazish guvohnomasi (agar transport vositasi ilgari Oʻzbekiston Respublikasida roʻyxatdan oʻtkazilgan taqdirda);

transport vositalari Oʻzbekiston Respublikasi hududiga vaqtinchalik olib kirilganda — bojxona organlari tomonidan berilgan tegishli hujjatlar;

lizingga oluvchining, agar u yuridik shaxs boʻlsa, davlat roʻyxatidan oʻtkazilganligi toʻgʻrisidagi guvohnoma nusxasi.

4. Transport vositalarini lizingga oluvchi nomiga roʻyxatdan oʻtkazish lizing yoki sublizing shartnomasida yoxud transport vositalari Oʻzbekiston Respublikasi hududiga vaqtinchalik olib kirilganda bojxona organlari tomonidan berilgan hujjatlarda koʻrsatilgan muddatga roʻyxatdan oʻtkazish guvohnomasi berilgan holda amalga oshiriladi. Bunda lizingga beruvchining ruxsatisiz transport vositalari hisobdan chiqarilmaydi.

5. Transport vositalarini lizingga oluvchi nomiga roʻyxatdan oʻtkazishda beriladigan roʻyxatdan oʻtkazish guvohnomasining “Muhim belgilar” ustuniga “Lizing, vaqtincha hisobda turishi ____gacha” yozuvi yoziladi va transport vositasini roʻyxatdan oʻtkazish muddatining tamom boʻlish sanasi koʻrsatiladi, lizing (sublizing) shartnomasining tartib raqami va shartnomaning tuzilgan sanasi qoʻyiladi.

6. Lizing shartnomasi muddati tugagach lizingga oluvchi nomiga roʻyxatdan oʻtkazilgan transport vositasi belgilangan tartibda hisobdan chiqariladi. Transport vositalarini roʻyxatdan oʻtkazish, shuningdek transport vositalarini hisobdan chiqarishga asos boʻlgan hujjatlar tikib qoʻyiladi va hujjatlar belgilangan tartibda saqlanadi.

7. Transport vositalariga mulk egasi huquqi lizingga oluvchiga oʻtishini nazarda tutuvchi lizing shartnomasi asosida lizingga beruvchi yoki lizingga oluvchi nomiga roʻyxatdan oʻtkazilgan transport vositalari transport vositasiga mulk egasi huquqi lizingga oluvchiga oʻtishi toʻgʻrisida lizingga beruvchining yozma tasdigʻi va lizing shartnomasi asosida lizingga oluvchi nomiga qayta roʻyxatdan oʻtkaziladi.

8. Transport vositalariga mulk egasi huquqining lizingga oluvchiga oʻtishini nazarda tutmaydigan lizing shartnomasining amal qilish muddati tugagach transport vositalari hisobdan chiqarilishi va faqat koʻrsatilgan transport vositalariga mulk egasi huquqi lizingga oluvchiga oʻtishini tasdiqlovchi tegishli hujjatlar asosida lizingga oluvchi nomiga roʻyxatdan oʻtkazilishi mumkin.

9. Lizing shartnomasi bekor qilinganda va lizingga oluvchi nomiga roʻyxatdan oʻtkazilgan transport vositalari lizingga beruvchiga qaytarilganda, koʻrsatilgan transport vositalari lizingga beruvchi va lizingga oluvchining birgalikdagi yozma arizasi yoki sud organlari yoki boshqa organlarning ijro hujjati nusxasi ilova qilingan holda lizingga beruvchining yozma arizasi asosida lizingga beruvchiga qayta rasmiylashtiriladi. Lizing shartnomasining muddati tugaganda uni oʻz vaqtida qayta roʻyxatdan oʻtkazilishi uchun lizingga beruvchi ham, lizingga oluvchi ham javob beradi”;

g) VII boʻlim VIII boʻlim deb hisoblansin.

III. Vazirlar Mahkamasining “Normativ hujjatlarni tasdiqlash toʻgʻrisida” 1998-yil 6-maydagi 194-son qarorida:

a) qarorning toʻrtinchi xatboshi va qarorga 2-ilova oʻz kuchini yoʻqotgan deb hisoblansin;

b) 1-ilovaning 8-bandi quyidagi tahrirda bayon qilinsin:

“8. Lizingga beruvchi nomiga import boʻyicha keluvchi tovarlarni bojxonada rasmiylashtirishda deklarant yoki bojxona brokeri ularni qonun hujjatlariga muvofiq talab qilinadigan hujjatlar bilan birga bojxona organiga taqdim etadi”.

IV. Vazirlar Mahkamasining “Notariuslarning ijro xatlariga asosan qarzni undirish soʻzsiz amalga oshiriladigan hujjatlar roʻyxatini tasdiqlash toʻgʻrisida” 2002-yil 18-yanvardagi 26-son qaroriga (Oʻzbekiston Respublikasi QT, 2002-y., 1-son, 4-modda) ilovaga quyidagi mazmundagi XI boʻlim qoʻshilsin:

15. Lizingga oluvchining qarzini tasdiqlovchi hujjatlar.

Ijro xatlarini olish uchun quyidagilar taqdim etiladi:

a) qarzni undirish va/yoki lizing obyektini talab qilib olishni amalga oshirishga asos boʻladigan lizing shartnomasining asl nusxasi;

b) lizingga oluvchining lizingga beruvchi oldidagi qarzini tasdiqlaydigan ikki tomonlama taqqoslash dalolatnomasi;

v) lizingga oluvchining ogohlantirishni olganligi toʻgʻrisidagi tilxati bilan birga qarzni qaytarish toʻgʻrisida ogohlantirish xatining nusxasi”.

V. Oʻzbekiston Respublikasi Vazirlar Mahkamasining “Oʻzavtoyoʻl” davlat-aksiyadorlik kompaniyasi va Oʻzbekiston Respublikasi Moliya vazirligi huzuridagi Respublika yoʻl jamgʻarmasi faoliyatini tashkil etish masalalari toʻgʻrisida” 2003-yil 21-avgustdagi 361-son qaroriga (Oʻzbekiston Respublikasi QT, 2003-y., 8-son, 74-modda) 6-ilovada:

7-bandning “a” kichik bandidagi “mazkur bandning “b”, “v”, “g”, “d”, “j” kichik bandlarida” soʻzlari “mazkur bandning “b”, “v”, “v1”, “g”, “d”, “j” kichik bandlarida” soʻzlari bilan almashtirilsin;

7-bandga quyidagi mazmundagi “v1” kichik bandi qoʻshilsin:

“v-1) asosiy faoliyati lizingga mol-mulk taqdim etish boʻlgan korxonalar tomonidan mablagʻlaridan — lizing boʻyicha daromadlari (foizlari) summasidan majburiy ajratmalar hisobiga shakllantiriladi”;

31-bandga quyidagi mazmundagi xatboshi qoʻshilsin:

“lizing yoki sublizing shartnomasi boʻyicha — shartnomada qaytarib olish qiymatini toʻlamasdan avtotransport vositasiga mulk egasi huquqi oʻtishi nazarda tutilgan taqdirda va barcha lizing toʻlovlari toʻlangan taqdirda, lizingga oluvchilar”.

VI. Vazirlar Mahkamasining “Oʻzbekiston Respublikasining 2004-yilgi Davlat budjeti parametrlari toʻgʻrisida” 2003-yil 25-dekabrdagi 567-son qaroriga “Oʻzbekiston Respublikasi Moliya vazirligi huzuridagi Respublika yoʻl jamgʻarmasiga ajratmalar va yigʻimlar stavkalari” nomli 20-ilova jadvalidagi 5-bandga quyidagi mazmundagi xatboshi qoʻshilsin:

“Asosiy faoliyati lizingga mol-mulk taqdim etish boʻlgan korxonalar tomonidan mablagʻlar ajratish — lizing boʻyicha daromad (foizlar) summasidan”.