Meva-sabzavot mahsulotlari, kartoshka, poliz mahsulotlari va uzumni eksport qilishni tartibga solish, eksport kontraktlarini sugʻurta qilishning amaldagi mexanizmini takomillashtirish, shuningdek mahsulotlarning koʻrsatib oʻtilgan turlarini eksport qilishga doir kontraktlarni bojxonada rasmiylashtirishning yanada ochiq-oshkoraligini taʼminlash hamda ularning respublika bojxona chegarasidan noqonuniy olib oʻtilishining oldini olish maqsadida Vazirlar Mahkamasi qaror qiladi:

1. Belgilab qoʻyilsinki, meva-sabzavot mahsulotlari, kartoshka, poliz mahsulotlari va uzumni (TIF TN kodi 07-08) eksport qilish belgilangan tartibda barcha transport vositalaridan foydalangan holda amalga oshiriladi.

2. “Oʻzbekiston temir yoʻllari” AJ yuk joʻnatuvchilarning buyurtmanomalari boʻyicha talab qilinadigan izotermik va universal harakatlanadigan tarkib belgilangan tartibda oʻz vaqtida berilishini taʼminlasin.

3. Oʻzbekiston Respublikasi Davlat bojxona qoʻmitasi meva-sabzavot mahsulotlari, kartoshka, poliz mahsulotlari va uzumni eksport qilish oʻz vaqtida bojxonada rasmiylashtirilishini va qoʻllaniladigan transport vositalari qatʼiy nazorat qilinishini taʼminlasin.

4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Markaziy bank, Davlat bojxona qoʻmitasi hamda Davlat soliq qoʻmitasining 2015-yil 1-oktabrdan boshlab meva-sabzavot mahsulotlari, kartoshka, poliz mahsulotlari va uzumni eksport qilishda nohalol eksport qiluvchilar va ularning muassislari reyestrini yuritish mexanizmini joriy etish toʻgʻrisida taklifiga rozilik berilsin.

Oʻzbekiston Respublikasi Tashqi iqtisodiy aloqalar, investitsiyalar va savdo vazirligiga meva-sabzavot mahsulotlari, kartoshka, poliz mahsulotlari va uzumni eksport qilishda nohalol eksport qiluvchilar va ularning muassislari reyestrini yuritish yuklansin.

5. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Markaziy bank, Davlat bojxona qoʻmitasi, Davlat soliq qoʻmitasi hamda boshqa manfaatdor vazirliklar va idoralar bilan birgalikda Meva-sabzavot mahsulotlari, kartoshka, poliz mahsulotlari va uzumni eksport qilishda nohalol eksport qiluvchilar va ularning muassislarini aniqlash, shuningdek ularning reyestrini yuritish tartibi toʻgʻrisidagi nizomni 2015-yil 1-oktabrgacha boʻlgan muddatda ishlab chiqsin va tasdiqlasin.

Bunda nohalol eksport qiluvchilar va ularning muassislari toʻgʻrisidagi axborot har oyda Oʻzbekiston Respublikasi Markaziy bankiga va Davlat bojxona qoʻmitasiga taqdim etilishi nazarda tutilsin.

6. Belgilab qoʻyilsinki, quyidagilar xoʻjalik subyektini meva-sabzavot mahsulotlari, kartoshka, poliz mahsulotlari va uzumni eksport qilishda nohalol eksport qiluvchilar va ularning muassislari reyestriga kiritish uchun asos hisoblanadi:

eksport qiluvchilarning tashqi savdo kontraktlari boʻyicha muddati oʻtkazib yuborilgan debitorlik qarzlari mavjudligi;

meva-sabzavot mahsulotlari, kartoshka, poliz mahsulotlari va uzumni eksport qilishdan tushgan xorijiy valyutadagi tushumning bir qismi vakolatli banklarga oʻz vaqtida majburiy sotilmasligi.

7. Belgilab qoʻyilsinki:

nohalol eksport qiluvchilar va ularning muassislari reyestriga kiritilgan xoʻjalik subyektlari tomonidan meva-sabzavot mahsulotlari, kartoshka, poliz mahsulotlari va uzum eksport qilinishiga yoʻl qoʻyilmaydi;

xoʻjalik subyektini nohalol eksport qiluvchilar va ularning muassislari reyestridan chiqarish xoʻjalik subyektini ushbu reyestrga kiritish uchun asos boʻlgan kamchiliklar ular tomonidan bartaraf etilgandan keyin amalga oshiriladi.

8. Oʻzbekiston Respublikasi Moliya vazirligi bir oy muddatda:

eksport kontraktlarini sugʻurtalashni alohida hisobga olish, hisobot va sugʻurtalovchilar faoliyatini nazorat qilish tartibini ishlab chiqsin;

Oʻzbekiston Respublikasi Davlat soliq qoʻmitasi hamda Xususiylashtirish, monopoliyadan chiqarish va raqobatni rivojlantirish davlat qoʻmitasi bilan birgalikda sugʻurtalovchilarga huquqiy taʼsir koʻrsatish choralarini kuchaytirsin, bunda eksport kontraktlarining sugʻurta shartnomalari boʻyicha sugʻurta tovonlarini toʻlash muddatlari, shuningdek eksport kontraktlarini sugʻurta qilish boʻyicha hisob va hisobot talablari buzilganligi uchun sugʻurtalovchilarga nisbatan sugʻurta faoliyati toʻgʻrisidagi qonun hujjatlariga muvofiq sugʻurtalovchilar uchun belgilangan ustav kapitali eng kam miqdorining 0,1 foizigacha miqdorda belgilangan tartibda jarima sanksiyalari qoʻllanilishini nazarda tutsin.

9. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi manfaatdor vazirliklar va idoralar bilan birgalikda bir oy muddatda belgilangan tartibda:

Oʻzbekiston Respublikasi Vazirlar Mahkamasiga qonun hujjatlariga ushbu qarordan kelib chiquvchi oʻzgartirishlar va qoʻshimchalar kiritish yuzasidan takliflar kiritsin;

oʻz idoraviy normativ-huquqiy hujjatlarini ushbu qarorga muvofiqlashtirsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Bosh vazir oʻrinbosari B.I. Zakirov zimmasiga yuklansin.