O‘zbekiston Respublikasida avtomototransport vositalari va shahar elektr transporti vositalari haydovchilarini tayyorlash va qayta tayyorlash tizimida ta’lim jarayonini yanada takomillashtirish va o‘qitishning zamonaviy usullarini joriy etish maqsadida Vazirlar Mahkamasi qaror qiladi:
1. “Avtotest Report” mas’uliyati cheklangan jamiyat (keyingi o‘rinlarda “Avtotest Report” MChJ deb ataladi) tomonidan:
avtomototransport vositalari haydovchilarini tayyorlash va qayta tayyorlash bo‘yicha “Avtotest” va “Avtotest 2.0” mahalliy elektron o‘quv qo‘llanmalari ishlab chiqilganligi;
avtomototransport vositalari haydovchilarini tayyorlash va qayta tayyorlash bo‘yicha ta’lim muassasalari o‘qituvchilari uchun ixtisoslashtirilgan o‘quv qo‘llanmasi yaratilganligi ma’lumot qabul qilinsin.
Oldingi tahrirga qarang.
(2-bandning ikkinchi xatboshisi O‘zbekiston Respublikasi Vazirlar Mahkamasining 2018-yil 23-fevraldagi 139-sonli qaroriga asosan 2018-yil 1-iyundan chiqariladi — Qonun hujjatlari ma’lumotlari milliy bazasi, 26.02.2018-y., 09/18/139/0818-son)
respublikaning barcha mintaqalarida “Avtotest Report” MChJning avtomototransport vositalari va shahar elektr transporti vositalari haydovchilarini tayyorlash va qayta tayyorlash bo‘yicha zamonaviy axborot-kommunikatsiya texnologiyalari, ilg‘or o‘quv vositalari, trenajyerlar va o‘quv aerodromi bilan jihozlangan zamonaviy o‘quv-metodik komplekslarini (keyingi o‘rinlarda o‘quv komplekslari deb ataladi) tashkil etish to‘g‘risidagi taklifiga rozilik berilsin.
“Avtotest Report” MChJ o‘quv komplekslarini qurish va jihozlash uchun o‘z mablag‘lari hisobidan kamida 4 mlrd so‘m investitsiya qo‘yish majburiyatini olganligi qayd etilsin.
3. Qoraqalpog‘iston Respublikasi Vazirlar Kengashi va viloyatlar hokimliklari “Avtotest Report” MChJning murojaatiga ko‘ra viloyat markazlariga tutash tumanlarda o‘quv komplekslari qurish uchun kamida 3 ga yer uchastkalari bepul foydalanish uchun berilishini bir oy muddatda ta’minlasinlar.
Toshkent shahri hokimligi o‘quv kompleksi qurish uchun Vazirlar Mahkamasining “Zarar ko‘rib ishlovchi, iqtisodiy nochor va past rentabelli tashkilotlarning foydalanilmayotgan hududlarini va ortiqcha ishlab chiqarish maydonlarini yanada maqbullashtirish chora-tadbirlari to‘g‘risida” 2014-yil 15-iyuldagi 192-son qaroriga muvofiq berilayotgan yer zaxirasi hisobiga “SAR” aviakompaniyasi aerodromining sharqiy qismida, Sergeli tumani, “Bahor” mahallasi manzilida joylashgan umumiy maydoni 3 ga yer uchastkasini o‘quv kompleksi qurish uchun “Avtotest Report” MChJga bepul foydalanish uchun berilishini ta’minlasin.
Oldingi tahrirga qarang.
(4-band O‘zbekiston Respublikasi Vazirlar Mahkamasining 2018-yil 23-fevraldagi 139-sonli qaroriga asosan 2018-yil 1-iyundan o‘z kuchini yo‘qotadi — Qonun hujjatlari ma’lumotlari milliy bazasi, 26.02.2018-y., 09/18/139/0818-son)
5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.I. Ikramov va O‘zbekiston Respublikasi Ichki ishlar vaziri A.A. Axmedbayev zimmasiga yuklansin.