Oʻzbekiston Respublikasi Vazirlar Mahkamasining “Kadastr hujjatlarini tayyorlash boʻyicha davlat xizmatlari narxlarini belgilashda tabaqalashtirilgan yondashuv tartibini takomillashtirish toʻgʻrisida” 2014-yil 10-iyuldagi 186-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 1997-yil 2-iyundagi 278-son qarori bilan tasdiqlangan Binolar va inshootlar davlat kadastrini yuritish tartibi toʻgʻrisidagi nizomda:

a) 8-bandga “huquqiy holati oʻzgargandan keyin” soʻzlaridan keyin “bir oy muddatda” soʻzlari qoʻshilsin;

b) 11-bandning birinchi xatboshi quyidagi tahrirda bayon qilinsin:

“11. Binolar va inshootlar davlat kadastrini yuritish boʻyicha ishlar koʻchmas mulkka kadastr hujjatlarini tayyorlaganlik uchun toʻlanadigan mablagʻlar hamda qonun hujjatlarida taqiqlanmagan boshqa manbalar hisobiga moliyalashtiriladi”.

2. Vazirlar Mahkamasining 2003-yil 20-avgustdagi 357-son qarori (Oʻzbekiston Respublikasi QT, 2003-y., 8-son, 72-modda) bilan tasdiqlangan Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi nizomning 71-bandi quyidagi tahrirda bayon qilinsin:

“71. Obyektga boʻlgan huquqni davlat roʻyxatidan oʻtkazganlik uchun toʻlov undirilmaydi”.

3. Vazirlar Mahkamasining 2007-yil 3-yanvardagi 2-son qarori (Oʻzbekiston Respublikasi QT, 2007-y., 1-son, 1-modda) bilan tasdiqlangan Uy-joy qurilishiga, uni rekonstruksiya qilishga va sotib olishga ipoteka krediti berish tartibi toʻgʻrisidagi nizom 22-bandining beshinchi xatboshi chiqarib tashlansin.

4. Vazirlar Mahkamasining “Shaharsozlik faoliyatini amalga oshirish hamda qishloq xoʻjaligiga oid boʻlmagan ehtiyojlar uchun yer uchastkalari berish, shuningdek obyektlarni qurishga ruxsatnomalar berish tartibini tubdan soddalashtirish chora-tadbirlari toʻgʻrisida” 2013-yil 25-fevraldagi 54-son qarorida (Oʻzbekiston Respublikasi QT, 2013-y., 2-son, 13-modda):

a) 1-ilovada:

40-bandda:

birinchi xatboshidagi “egalik qilish huquqini” soʻzlari “huquqni” soʻzi bilan almashtirilsin;

ikkinchi xatboshi quyidagi tahrirda bayon qilinsin:

“Yer uchastkasiga boʻlgan huquqni davlat roʻyxatidan oʻtkazganlik va guvohnoma berganlik uchun toʻlov undirilmaydi”;

uchinchi xatboshi chiqarib tashlansin;

67-band quyidagi tahrirda bayon qilinsin:

“67. Bino va inshootga boʻlgan huquqni davlat roʻyxatidan oʻtkazganlik hamda guvohnoma berganlik uchun toʻlov undirilmaydi”;

b) 2-ilova 35-bandining ikkinchi xatboshi quyidagi tahrirda bayon qilinsin:

“Yer uchastkasiga boʻlgan huquqni davlat roʻyxatidan oʻtkazganlik va guvohnoma berganlik uchun toʻlov undirilmaydi”.

5. Oʻzbekiston Respublikasi Vazirlar Mahkamasining 2013-yil 30-maydagi 150-son qarori (Oʻzbekiston Respublikasi QT, 2013-y., 5-son, 33-modda) bilan tasdiqlangan Qurilish sohasida ruxsat beruvchi tusdagi hujjatlarni berish tartibotlarini amalga oshirish muddatlari va qiymatini belgilashda tabaqalashtirilgan yondashuv tartibi toʻgʻrisidagi nizomga 3-ilova izohining “a” kichik bandidagi “Davarxitektqurilish” qoʻmitasi” soʻzlari “Yergeodezkadastr” davlat qoʻmitasi” soʻzlari bilan almashtirilsin.

6. Vazirlar Mahkamasining 2013-yil 26-avgustdagi 234-son qarori (Oʻzbekiston Respublikasi QT, 2013-y., 8-son, 62-modda) bilan tasdiqlangan Maxsus industrial zonalar qatnashchilariga yer uchastkalari berish tartibi toʻgʻrisidagi nizomning 22-bandidagi “yer uchastkasiga boʻlgan huquq davlat roʻyxatidan oʻtkazilganligi uchun roʻyxatdan oʻtkazish yigʻimi toʻlangandan keyin” soʻzlari chiqarib tashlansin.

7. Vazirlar Mahkamasining 2014-yil 7-yanvardagi 1-son qarori (Oʻzbekiston Respublikasi QT, 2014-y., 1-son, 1-modda) bilan tasdiqlangan Koʻchmas mulkka boʻlgan huquqlarni va u haqda tuzilgan bitimlarni davlat roʻyxatidan oʻtkazish tartibi toʻgʻrisidagi nizomda:

a) 5-bandda:

oʻn sakkizinchi xatboshi chiqarib tashlansin;

oʻn toʻqqizinchi — yigirma uchinchi xatboshilar tegishli ravishda oʻn sakkizinchi — yigirma ikkinchi xatboshilar deb hisoblansin;

b) 8-bandning ikkinchi xatboshi quyidagi tahrirda bayon qilinsin:

“Arizaga davlat roʻyxatidan oʻtkazishni amalga oshiruvchi organ tomonidan tayyorlangan koʻchmas mulkka kadastr yigʻmajildi ilova qilinadi”;

v) quyidagi mazmundagi 9¹-band qoʻshilsin:

“9¹. Koʻchmas mulkka boʻlgan huquqning vujudga kelishini va boshqaga oʻtishini, cheklashlarni, servitutlarni hamda ushbu huquqlarning bekor boʻlishini davlat roʻyxatidan oʻtkazganlik, shuningdek koʻchmas mulkka boʻlgan huquqlarni, shu jumladan ipotekani va ipoteka toʻgʻrisidagi shartnomalarni davlat roʻyxatidan oʻtkazganlik, binolar, inshootlarning tegishliligi va tarkibi toʻgʻrisida, shaxsiy turar joyi mavjudligi (mavjud emasligi) toʻgʻrisida maʼlumotnomalar berganlik uchun toʻlov undirilmaydi”;

g) 30-bandning uchinchi xatboshidagi ikkinchi jumla chiqarib tashlansin;

d) 50-bandda:

toʻrtinchi xatboshi chiqarib tashlansin;

beshinchi xatboshi toʻrtinchi xatboshi deb hisoblansin;

e) 73-band oʻz kuchini yoʻqotgan deb hisoblansin;

j) quyidagi mazmundagi 78¹-band qoʻshilsin:

“78¹. Koʻchmas mulkka boʻlgan huquqning davlat roʻyxatidan oʻtkazilganligi toʻgʻrisidagi guvohnoma yoʻqolgan yoki yaroqsiz holga kelgan taqdirda davlat roʻyxatidan oʻtkazishni amalga oshiruvchi organ tomonidan mulkdorga yoki uning vakolatli shaxsiga koʻchmas mulkka boʻlgan huquqning davlat roʻyxatidan oʻtkazilganligi toʻgʻrisidagi guvohnomaning dublikati beriladi. Dublikat berilganligi uchun toʻlov undirilmaydi”;

z) 79-bandning oltinchi xatboshidagi “va roʻyxatdan oʻtkazish yigʻimi toʻlamasdan” soʻzlari chiqarib tashlansin;

i) 80-bandda:

ikkinchi xatboshi chiqarib tashlansin;

uchinchi — beshinchi xatboshilar tegishli ravishda ikkinchi — toʻrtinchi xatboshilar deb hisoblansin;

k) IX boʻlim oʻz kuchini yoʻqotgan deb hisoblansin;

l) 1-ilovada:

“Roʻyxatdan oʻtkazish yigʻimini toʻlaganlik toʻgʻrisida belgi” ustuni chiqarib tashlansin;

“Izohlar” ustunidagi “7” raqami “6” raqami bilan almashtirilsin.